NYENGU zinyaki asani Yesu wakhumba kukamba ndi munthu munthukazi, wamudananga kuti, “wamunthukazi.” Mwakuyeruzgiyapu, pa nyengu yo wachizganga munthu wakupunduka yo wangupindika musana kwa vyaka 18 wangukamba kuti: “Wamunthukazi, wafwatulika ku matenda ngaku.” (Luka 13:10-13) Yesu wangukamba so mazu ngenanga po walongoronga ndi anyina. Ŵanthu a munyengu yakali awonanga kuti kadaniru ka viyo, kenga kakutumbika. (Yoh. 19:26; 20:13) Penga so kadaniru kanyaki ko kenga kakutumbika ukongwa.

Bayibolu likamba so mazu nganyaki ngo ŵanthu akambanga pakudana anthukazi ngo ngalongonga kuti aŵayanjanga ndipuso aŵachitiyanga lisungu. Yesu wangukamba mazu ngenanga po walongoronga ndi munthukazi yo wangusuluwa ndopa kwa vyaka 12. Vo iyu wanguchita kuti wakakumani ndi Yesu, venga vakuzomerezeka cha mumarangu ngaku Chiuta, chifukwa ngakambanga kuti munthu yo wenga ndi matenda yanga wenga wakufipisika. Ŵanthu akambanga kuti munthu waviyo, wakhumbikanga cha kuja pafupi ndi ŵanthu. (Ŵal. 15:19-27) Kweni munthukazi uyu, wengavi munthu wakuti wamuwovyi. Iyu “wangukumana ndi masuzgu ngakulu ku madokotala ko wakanga ndipu wangumala vinthu vaki vosi kweni wanguwovyeka cha, m’malu mwaki nthenda yo yingukuwa ukongwa.”​—Marko 5:25, 26.

Munthukazi yo, wangwenda kamanakamana mugulu la ŵanthu ndipu wangupitiya kumsana kwaku Yesu ndi kuchiko mphonji za munjilira waki. Wati wako ŵaka mphonji, ndopa zinguleka kutuwa. Iyu waŵanaŵananga kuti vo wanguchita viziŵikengi cha. Kweni Yesu wangufumba kuti: “Ndiyani yo wandiko?” (Luka 8:45-47) Munthukazi yo, wanguchita mantha ndipu wangwamba kunjekeme. Pavuli paki, wangugwada pa masu paku Yesu ‘ndi kumukambiya nkhani yosi mwauneneska.’​—Marko 5:33.

Kuti waleki kuchita mantha, Yesu wangumukambiya kuti: “Chintha mtima, wamwana munthukazi!” (Mat. 9:22) Mwakukoliyana ndi vo ŵanthu wo akusambira za vineneru vo Bayibolu lingulembeke akukamba, mazu ngachihebere ndi ngachigiriki ngakuti “wamwana munthukazi” ngangagwirisikiya so ntchitu pakulongo “lisungu ndi chanju.” Yesu wangulutiriza kuchiska munthukazi yo mwakumukambiya kuti: “Chivwanu chaku chakuchizga. Luta mwachimangu, ndipu uchili matenda ngaku ngakulu.”​—Marko 5:34.

Munthu munyaki wachiyisraele zina laki Boazi wenga wakukhupuka. Iyu wachikambisana ndi Ruti wa ku Moabu, wangumudana kuti: “Wamwana munthukazi.” Ruti wamuziŵanga cha mweneku wa munda wo wakunkhangamu barile ndipu penga pakwenere kujivwa kuti wenga wambula kuvikilirika. Boazi wangukambiya Ruti kuti: “Ayivwa wamwana wangu munthukazi.” Pavuli paki, wangumukambiya kuti walutirizi kukunkha barile muminda yaki. Ruti wangugwada pa masu paku Boazi ndipu wangumufumba chifukwa cho wangumulongole lisungu chinanga kuti wenga mulendu. Boazi wangumuka kuti: “Ŵanthu andikambiya vosi vo uchitiya apongozi ŵaku anthukazi [Naomi yo wenga choko] . . . Yehova wakutumbiki chifukwa cha vo uchita.”​—Ruti 2:8-12.

Vo Yesu ndi Boazi anguchita vingaŵawovya ukongwa ŵara achikhristu! Nyengu zinyaki pangakhumbika ŵara ŵaŵi kuti akumani ndi mzichi yo wakhumba kuwovyeka kweniso kuchiskika kutuliya m’Malemba. Kuti ŵara amuchiski ndi kumupembuzga kutuliya m’Mazu ngaku Chiuta, akhumbika dankha kupemphera kuti Yehova waŵalongozgi ndipuso kuvwisiya vo muzichi yo wakamba.—Ŵar. 15:4.