KʼALAL chchiʼin ta loʼil antsetik li Jesuse, bakʼintike xi chalanbee: «Ants». Jun skʼelobile jaʼ kʼalal la xpoxta jun ants ti oy xa ta vaxaklajuneb jabil xvujvun chanave. Xi laj yalbee: «Ants, chkol li achamele» (Luk. 13:10-13). Jech la skʼopon li smeʼ eke, yuʼun li ta voʼnee jech toʼox nopem xaʼi chkʼopojik xchiʼuk jech chichʼ sbaik ta mukʼ (Juan 19:26; 20:13). Pe oy to jpʼel kʼop xtok ti maʼuk noʼox chakʼ ta aʼiel ti chichʼ sbaik ta mukʼe. Taje jaʼ kʼalal tseb xiike.

Li Vivliae jech chalbe skʼoplal ti jaʼ jech chiʼinatik ta loʼil junantik antsetike, jaʼ tstunesik li jpʼel kʼop taje ti kʼupil tajek xchiʼuk chkʼot ta oʼontonale. Li Jesuse jech laj yalbe jun ants ti oy xa ta lajcheb jabil mu xmak xchamele. Kʼalal nopaj batel ta stojolal Jesus li antse, muʼyuk la xchʼun kʼuchaʼal chal li Smantal Diose, ti te chal ti ibal sba li jun ants ti jech svokol kʼuchaʼal taje. Chal xtok ti skʼan nom xakʼ sba ti bu oy li krixchanoetike (Lev. 15:19-27). Pe jech la spas ta skoj ti mu xa snaʼ kʼusi ta spase. Xi chal li Vivliae: «Ep yiloj svokol kʼalal chakʼ sba ta kʼelel ta doktoretike, slajesoj xa skotol stakʼin, pe muʼyuk bu xkol, jaʼ noʼox tsatsaj-o mas li xchamele» (Mar. 5:25, 26).

Kʼunkʼun nakʼal la stikʼ sba ochel bu tsobol krixchanoetik li antse. Te nopaj batel ta spat Jesus, vaʼun la spikbe li stsitsimal skʼuʼe. Kʼalal naka noʼox jech la spase, ta ora noʼox mak li xchamele. Spatoj yoʼonton ti muʼyuk buchʼu xakʼ ventae, pe bu chata, xi la sjakʼ li Jesuse: «¿Buchʼu ti la spikune?» (Luk. 8:45-47). Xtʼeltʼun ta xiʼel kom li antse, jaʼ yuʼun la skejan sba ta stojolal Jesus xchiʼuk «jamal laj yalbe skotol» (Mar. 5:33).

Vaʼun li Jesuse ta slekil yoʼonton xi laj yalbe li antse: «¡Tsotsuk avoʼonton jtseb!» (Mat. 9:22). Jlom buchʼutik chchanbeik skʼoplal Vivliae chalik ti jpʼel kʼop ta evreo xchiʼuk griego ti «stseb» xi chichʼ jelubtasele, xuʼ la xichʼ tunesel ta babakʼop sventa chichʼ albel skʼoplal «slekil oʼontonal xchiʼuk xkʼuxul oʼontonal». Li Jesuse mas to xi la spatbe yoʼonton li antse: «Lapoxtaj xa ta skoj li xchʼunel avoʼontone. Junuk avoʼonton batan, yuʼun kol xa li achamel ti toj ep laj avil-o avokol yuʼune» (Mar. 5:34).

Li Boas ti jaʼ jun jkʼulej j-israel vinike, «tseb» xi ek kʼalal la xchiʼin ta loʼil li Rut ti jaʼ jun ants likem talel ta Moabe. Oy lek srasonal ti chiʼ eke, yuʼun yakal chkʼuxkʼulta sevada ta yosil jun vinik ti mu xojtikine. Kʼalal «tseb» xi laj yalbee, li Boase la stijbe yoʼonton ti mu xbat ta yantik osil sventa stsob sevadae. Li Rut une la skejan sba xchiʼuk la snijan sba ta stojolal, la sjakʼbe kʼu yuʼun ti chkʼuxubin jun jyanlum antse. Li Boase xi la spatbe yoʼontone: «Yuʼun la jnaʼ scotol cʼusi lec laj apas ta stojol ameʼelʼalib Noemí ti cʼalal chamen xaʼox li smalale». Xi to laj yalbe xtoke: «Mucʼul Dios chayacʼbot atojol ti jech laj apase» (Rut 2:8-12).

¡Toj echʼ xa noʼox lek xuʼ xchanbeik Jesus xchiʼuk Boas li moletik ta tsobobbaile! Bateltike, ta stsob sbaik chaʼvoʼ moletik sventa tspatbeik yoʼonton ta Vivlia junuk ermana o sventa chakʼbeik mantal. Ti kʼusi baʼyel tspasike jaʼ ti tskʼanbeik beiltasel li Jeovae xchiʼuk ti chchikintabeik lek kʼusi chal li ermanae. Kʼalal jech tspasike xuʼ lek spatbeik yoʼonton xchiʼuk xuʼ stsatsubtasik ta Vivlia ta skoj ti lek xa chapalike (Rom. 15:4).