“BABAYE.” Ito usahay an pagtawag ni Jesus ha kababayin-an nga iya nakakaistorya. Pananglitan, han gintambal ni Jesus an usa nga 18 ka tuig na nga baldado, hiya nagsiring: “Babaye, talwas ka na ha imo sakit.” (Luc. 13:10-13) Gintawag pa ngani ni Jesus an iya nanay hini nga paagi. Ha panahon han Biblia, komon ini nga pagtawag ngan nagpapakita ini hin pagtahod. (Juan 19:26; 20:13) Kondi may usa pa nga pulong nga labaw pa ha pagpakita hin pagtahod.

Ginagamit han Biblia an usa nga pulong nga nagpapakita gud hin pagkabuotan ngan pagkamalumo kon nag-uunabi ha partikular nga kababayin-an. Gin-gamit ito ni Jesus han nakiistorya hiya ha babaye nga 12 ka tuig na nga gindidinugoan. An iya paghirani kan Jesus diri uyon ha Balaud han Dios kay mahugaw hiya tungod han iya sakit. Kon istrikto nga susundon an Balaud, diri unta hiya angay dumaop ha kadam-an. (Leb. 15:19-27) Pero karuyag gud niya matambal. Ngani, “makuri an iya gin-antos ha damu nga paratambal ngan naubos na an ngatanan nga iya katigayonan pero waray hiya mag-opay, nagtikagrabe la lugod.”—Mar. 5:25, 26.

An babaye nangalimbasog nga sumuksok ha kadam-an, dumaop ha luyo ni Jesus, ngan ginkaptan an sidsid han Iya pantungbaw nga panapton. Natambal dayon an babaye! Naglaom hiya nga waray unta mahibaro han iya ginbuhat, pero hi Jesus nagpakiana: “Hin-o an kinapot ha akon?” (Luc. 8:45-47) Tungod hini, an nahahadlok ngan nangungurog nga babaye hinapa ha atubangan ni Jesus ngan “iginsumat ha iya an ngatanan.”—Mar. 5:33.

Basi diri na mahadlok an babaye, may pagkabuotan nga ginsidngan hiya ni Jesus: “Ayaw kabaraka, Anak!” (Mat. 9:22) Sumala ha mga eskolar han Biblia, an Hebreo ngan Griego nga pulong para ha “anak” mahimo gamiton ha simboliko nga paagi ha pagpahayag hin “pagkabuotan ngan pagkamalumo.” Dugang nga ginpasarig ni Jesus an babaye: “Tungod han imo pagtoo nag-opay ka. Lakat nga mamurayawon, ngan mag-opay ka ha imo grabe nga sakit.”—Mar. 5:34.

“Anak.” Ito an pagtawag han riko nga Israelita nga hi Boas ha Moabita nga hi Ruth. Pariho ha babaye nga gin-unabi kanina, inabat ni Ruth an kawaray-kasigurohan kay namumurot la hiya hin salin nga sebada ha uma han usa nga diri niya kilala. “Waray ka ba makabati, anak ko?” siring ni Boas. Katapos, gin-aghat niya hi Ruth nga padayon nga mamurot hin mga salin ha iya uma. Hinapa hi Ruth ha atubangan ni Boas ngan nagpakiana kon kay ano nga buotan gud hiya ha estranghero nga pariho ha iya. Hi Boas binaton pinaagi ha paghatag ha iya hin dugang nga pasarig: “Iginpakita ha akon hin maopay, an ngatanan nga imo ginbuhat ha imo ugangan nga babaye [an balo nga hi Noemi] . . . Hi Jehova magbalos han imo binuhat, ngan an hingpit nga balos ihatag unta ha imo ni Jehova.”—Rut 2:8-12.

Maopay gud nga susbaranan hi Jesus ngan hi Boas para ha Kristiano nga mga tigurang! Ha panapanahon, bangin kaistoryahon han duha nga tigurang an usa nga sister nga nagkikinahanglan hin bulig ngan pagparig-on tikang ha Kasuratan. Katapos aroon an giya ni Jehova pinaagi ha pag-ampo ngan pamatian hin maopay an igin-iistorya han sister, an mga tigurang makakahatag hin pagparig-on ngan pagliaw gamit an Pulong han Dios.—Roma 15:4.