“NA.” Wodu Yesu anaayamba adee ti gu kura aregbo. Ni kpiapai, ho ko aahusa kura gbarĩgbarĩ dee ni nga guri naadu ni nugonugo ri tipa agarã 18, ko aya: “Na, i zaki ro ti ga kaza.” (Rk. 13:10-13) Yesu aima mangasunge na ngbatunga gu fugo re a ho ko aafura ni fu nako, nga gu fugo aboro anaabi ni zezeredihe ti agu aregbo i aakeka Ziazia Kekeapai ti ni. (Yo. 19:26; 20:13) Ono kura fugo kinaho berewe naima du ni zezeredihe kisusi.

Ziazia Kekeapai namangasunge na fugo nunga ho si afura ni tipa kura ngbatunga adee. Yesu amangisunge na gu fugo re ho ko afura ni fu dee sa nga guri kureri aga tipa agarã 12. Gu gene ri aye fuo Yesu ngbaha aarunga te, ringbisihe kuti ga Mbori Ndiko, ngbatunga boro wa ri were adu ni birikobiriko ni. Aboro aima rengba ka ya si aaida ri kpara tiri kusayo ti aboro mbiko du ri rogo pai wa gure. (Pa Mot. 15:19-27) Ono ri aaida ka manga ai pai ka gbia undo. Nirengo, “ri aimi be dungu amunganga gbe, ri ki bagi agu ahe naadu be ri dũ, ka ri ahu nga wa sa ya, ono kaza ki zi ri azia bakere ti gu naadu mbata.”​—Mk. 5:25, 26.

Gu dee re andu yee dagba rimbasa aboro yo, ki ye gii Yesu yo, na ki zadi ngba gako roko. Kureri ambu ga ni basa! Gu dee re aberẽ gupai nga ri nika ndu andu zanga Yesu inihe, ono ko asanahe ki ya: “Da zadi re?” (Rk. 8:45-47) Fuani gu dee re ki tona ka kio na ki ti sande na gunde barangba Yesu “ki gumba kinaku rengo fu ko dũ.”​—Mk. 5:33.

Tipa ka sa gu dee re ka ri gundenga ya, Yesu aya furi ni nunga: “Vungu, mo wása!” (Mt. 9:22) Ringbisihe kuti wene abawirikipai tipa Ziazia Kekeapai, gu fugo nga “vungu” rogo pa-Ebere gbiati pa-Giriki, i rengbe ka mangasunge na ni ka yugopa “weneringise gbiati nunga.” Yesu andu kumbatayo ka fu bakere kido furi niya ko: “Ga idapase batasi ro; mo ndu zezeredi ki bati be ga kere kaza.”​—Mk. 5:34.

“Wire.” Wodu gu kumukokumuko boro Yisaraere nangia Boaza ayambu Ruta boro Moaba. Ndupai adu kina beri a ka zanga du na kido mbiko ri aadungura gu futu zende ahe duwa mapunga rogo gu ati nga ga gu kumba ri aainongo ko ya. Boaza aya furi, “Mo gí he te, wire?” Fuani ko ki zungodi Ruta ri ni dungura futu ahe kina rogo gako ati. Ruta ki vagadi kpakpuri kusande barangba Boaza na ki sanako tipa gu ndupai ko ayugo weneringise ti ni furi wa ri angia yeaye. Boaza akaragaha ki fu bakere kido furi nga: “I ayugu agu apai fere gbayaga, nga gu mo anamanga dunduko fu na kumbamo [gu dekurugbo nangia Naomi] . . . Yekova tumo pa gu sunge mangi mo.”​—Ruta 2:8-12.

Nairiwo gu wene kpiapai aYesu na Boaza amoihe fu agu aKristano nga abaakumba rogo dungurati! Ti gu kura aregbo, abaakumba ue rengbe ka sungo ka fura na gu Kristano ni dee nga guri naida na gu undo gbiati ngarasaro nga ga Ziazia Kekeapai. Tingbafuo i gbata ga Yekova rugapai rogo kparakpee yo na ki degetuyo wenengai kuti gupai gu wirina re agumbaha, agu abaakumba re rengbe tie ka fu kido gbiati wasa furi rogo Fugo Mbori yo.​—Rom. 15:4.