TIEMPON ti nakapatpateg a miting idiay Jerusalem. Pinaayaban ni Ari David ti amin a prinsipena, opisial ti palasio, ken dagiti nabileg a lallaki. Magagarandan a dumngeg iti espesial a pakaammo. Dinutokan ni Jehova ti anak ni David a ni Solomon a mangibangon iti naisangsangayan a pasdek a nairanta para iti panagdayaw iti pudno a Dios. Inawat ti lakayen nga ari ti plano manipud iti Dios ket intedna dayta ken Solomon. Kinuna ni David: “Ti trabaho dakkel; ta ti kastilio saan nga agpaay iti tao, no di ket agpaay ken Jehova a Dios.”—1 Cron. 28:1, 2, 6, 11, 12; 29:1.

Kalpasanna, insaludsod ni David: “Siasino ti agboluntario tapno punnuenna ti imana ita nga aldaw iti sagut a maipaay ken Jehova?” (1 Cron. 29:5) No addaka idi sadiay, ania koma ngata ti inaramidmo? Timmulongka ngata iti dayta a dakkel a trabaho? Dagus a nagtignay dagiti Israelita. Kinapudnona, “nagragrag-o dagiti umili gapu iti panangaramidda kadagiti boluntario a panagidaton, ta buyogen idi iti naan-anay a puso a nangipaayda kadagiti boluntario a daton ken Jehova.”—1 Cron. 29:9.

Ginasut a tawen kalpasanna, nangisagana ni Jehova iti napatpateg nga amang ngem iti templo. Impasdekna ti naindaklan a naespirituan a templo, ti urnos tapno makaadani dagiti tattao kenkuana ken makapagserbida maibatay iti daton ni Jesus. (Heb. 9:11, 12) Kasano a tultulongan ni Jehova dagiti tattao a makikappia kenkuana ita? Babaen ti trabahotayo a panagaramid iti adalan. (Mat. 28:19, 20) Gapu iti dayta, kada tawen, minilion ti maikonkondukta a panangyadal iti Biblia, rinibu ti mababautisaran, ken ginasut ti mabubuangay a kongregasion.

Gapu iti dayta a panagrang-ay, masapul nga ad-adu a literatura a naibatay iti Biblia ti mayimprenta, ad-adu a Kingdom Hall ti maibangon ken mamantener, ken ad-adu a pagasambleaan ken pagkombensionan ti kasapulan. Mariknam kadi a talaga a dakkel ken makagunggona ti trabahotayo a panangipakaammo iti naimbag a damag?—Mat. 24:14.

Gapu iti panagayatda iti Dios ken kadagiti tattao ken ti kinaganat ti panangikasaba iti Pagarian, matignay dagiti adipen ti Dios nga ‘agboluntario tapno punnuenda ti imada . . . iti sagut a maipaay ken Jehova’ babaen kadagiti boluntario a donasionda. Talaga a maragsakantayo a ‘mangpadayaw ken ni Jehova babaen iti napapateg a bambanagtayo’ ken makakita a nasayaat ken nainsiriban ti pannakausar dagiti pondo para iti kadakkelan pay laeng a trabaho iti pakasaritaan ti tao!—Prov. 3:9.