‘Musebezi ki Omutuna’

MUBAPALE

KI NAKO ya mukopano wa butokwa hahulu mwa Jerusalema. Mulena Davida ukopanyize hamoho makwambuyu kaufela, likombwa zahae kaufela, ni baana kaufela babamaata. Batabile hahulu kuutwa zibiso yeipitezi. Jehova uketile mwanaa Davida, yena Salumoni, kuli ayahe muyaho omutuna hahulu okaitusiswa kwa kulapela Mulimu wa niti. Mulena wa Isilaele yasali musupali, uamuhezi mulalo wa muyaho wo ka susumezo ya moya wa Mulimu, mi utambekile Salumoni mulalo wo. Davida ubulela kuli: “Musebezi ki o mutuna, kakuli ndu-tuna [kamba tempele] haki ya mutu, kono ki ya Muñaa Bupilo Mulimu.”—1 Makol. 28:1, 2, 6, 11, 12; 29:1.

Davida kiha buza puzo ya kuli: “Cwale ki mañi ya lata ku zwiseza Muñaa Bupilo za hae kacenu?” (1 Makol. 29:5) Kambe nemufumanehile kwa mukopano wo, nemuka alaba cwañi? Kana nemuka ikatulela kutusa mwa musebezi omutuna wo? Maisilaele baanga muhato kapili-pili. Sicaba “kiha si tabela bufani bwa ba ba zwisize . . . ka ku lata, kakuli ne ba file Muñaa Bupilo ka lipilu za bona kaufela.”—1 Makol. 29:9.

Lilimo zeñata hamulaho, Jehova atoma nto yenefita hahulu tempele. Atoma tempele yetuna ya kwa moya, ili tukiso yenekonisa batu kumulapela ka sitabelo sa Jesu. (Maheb. 9:11, 12) Jehova usweli kutusa cwañi batu kukutela ku yena kacenu? Usweli kueza cwalo ka musebezi waluna wa kuluta batu kuba balutiwa. (Mat. 28:19, 20) Bakeñisa musebezi wo, silimo ni silimo kuzamaiswanga lituto za Bibele zeeza limilioni, mi balutiwa babañata bakolobezwanga, ili kutahisa kuli kutomiwe liputeho zeñata.

Kulo yeo, itahisa kuli kuhatiswe lihatiso zeñata zetomile fa Bibele, kuyahiwe Mandu a Mubuso ni kuababalela, ni kulukisa libaka zeñata za kuezeza teñi mikopano yaluna ya mupotoloho ni yemituna. Kana hamulumeli kuli musebezi waluna wa kukutaza taba yende ki musebezi omutuna ili otahisa limbuyoti?—Mat. 24:14.

Lilato ku Mulimu ni kwa batu babañwi, hamohocwalo ni kulemuha butokwa bwa musebezi wa kukutaza za Mubuso, kususuezanga batu ba Mulimu ‘kutiseza Jehova mpo’ ka kufa linubu za ka kuitatela. Lwatabela ‘kukuteka Jehova ka lika [zaluna] za butokwa’ ni kubona mo linubu zaluna liitusisezwa hande ili ka busepahali kutusa mwa musebezi omutuna hahulu oeziwa mwa lifasi!—Liprov. 3:9, NW.

Babañwi Mobafelanga Linubu Kwa Musebezi Wa Mwa Lifasi Kaufela

Batu babañata kacenu babulukanga “se siñwi kwatuko” kamba masheleñi akona kuitusiswa mwa musebezi wa mwa lifasi kaufela, mi babeyanga masheleñi ao mwa mbokisi ya linubu yeñozwi kuli “Musebezi wa Mwa Lifasi Kaufela.” (1 Makor. 16:2) Kweli ni kweli, liputeho lilumelanga masheleñi ao kwa ofisi ya Lipaki za Jehova ye mwa naha mokufumaneha liputeho zeo. Hape mwakona kulumela linubu zeo ka ilimina kwa kopano ya ka mulao yeitusiswa ki Lipaki za Jehova mwa naha yamina. Kuli muzibe kopano ya ka mulao yeitusiswa ki Lipaki za Jehova mwa naha yamina, muñolele kwa ofisi ya mutai. Keyala ya mutai mwakona kuifumana fa webusaiti ya www.pr418.com. Mwakona kulumela linubu zamina ka linzila zelatelela:

LINUBU ZEFIWA KUSINA TUMELELANO

Linubu zefiwa ka kushimbulula masheleñi kuzwa mwa akaunti yeñwi kuya ku yeñwi, kamba ka kuitusisa kadi ya kwa panga, kamba ka kuitusisa foni. Mwa mitai yemiñwi, kwakonahala kufa linubu ka kuitusisa webusaiti ya jw.org kamba webusaiti yeñwi yelukiselizwe musebezi wo.
Linubu za masheleñi, lika zepangilwe fa macwe abutokwa, kamba lika zeñwi za butokwa zemunani zona. Muñole liñolo lelibonisa kuli masheleñi kamba lika zemulumile ki nubu ya kufa kusina tumelelano.

LINUBU ZA KUFA KA TUMELELANO

Linubu za masheleñi zefiwa ka tumelelano ya kuli zakona kukutiswa haiba yalifanile alitokwa.
Muñole liñolo lelibonisa kuli nubu yeo ifilwe ka tumelelano.

LINUBU ZEMULELA KUFA KWAPILI

Kwandaa kufa linubu za masheleñi kamba lika za butokwa, kunani linzila zeñwi zelukona kufa ka zona linubu ili zekona kutusa mwa sebelezo ya Mubuso mwa lifasi kaufela. Linzila zeo litalusizwe kwatasi. Hamubata kuitusisa nzila yeñwi kamba linzila zeñwi, pili muñolele ofisi ya mutai yeokamela musebezi mwa naha yamina ilikuli muzibe linzila zeitusiswa mwa naha yamina. Bakeñisa kuli milao ya mitelo yashutana-shutana mwa linaha, ki kwa butokwa kubuza mutu yaziba za mitelo ni milao pili musika keta kale nzila yemukona kuitusisa kwa kufa nubu yamina.

Insurance: Nubu yefiwa ka kuñolisa kuli kopano ya ka mulao yeitusiswa ki Lipaki za Jehova ifiwe masheleñi akazwa kwa kampani ya Insurance ibe kuli ki a penshini kamba añolisizwe kufiwa hamulaho wa lifu la mutu yafana nubu yeo.

Liakaunti za Kwa Panga: Kulikana ni milao ya lipanga za mwa naha, mutu wakona kulukisa kuli akaunti, mapampili abonisa masheleñi akalimilwe ki panga, kamba masheleñi a penshini abulukilwe kwa panga, afiwe kwa kopano ya ka mulao yeitusiswa ki Lipaki za Jehova.

Ma-Stocks ni Ma-Bonds: Mutu wakona kufa nubu ya Ma-stocks ni ma-bonds; kamba wakona kuñola kuli Ma-stocks ni ma-bonds ahae afiwe kwa kopano ya Lipaki za Jehova hakatimela.

Miyaho Kamba Mubu: Haiba mutu unani miyaho kamba mubu zekona kulekiswa, wakona kulifa sina nubu kwa kopano ya ka mulao yeitusiswa ki Lipaki za Jehova. Mi wakona kueza cwalo kusina tumelelano kamba wakona kueza tumelelano ya kuzwelapili kupila mwa muyaho kamba fa mubu wo kufitela atimela kihona likafiwa sina nubu.

Gift Annuity: Masheleñi kamba ma-stocks, ma-shares, ma-bonds kamba mapampili amañwi alumeleza mutu kuamuhela masheleñi amañwi silimo ni silimo; mi mutu yo uñolisa kuli masheleñi ao afiwange kwa kopano ya ka mulao yeitusiswa ki Lipaki za Jehova. Silimo safa nubu ya Gift Annuity, mutu yo wakona kuzusezwa kwa masheleñi alifanga mutelo.

Ma-Wills ni Ma-Trusts: Mutu wakona kulukisa kuli maluwo kamba masheleñi ahae lifiwe sina nubu hakatimela. Wakona kueza cwalo ka kuitusisa will yeñozwi ka mulao kamba trust yebonisa hande kuli maluwo kamba masheleñi ahae lifiwe kwa kopano ya ka mulao yeitusiswa ki Lipaki za Jehova. Kueza cwalo, kwakona kutahisa kuli mutu yafana nubu yeo alifange masheleñi amanyinyani a mutelo.

Sina moiboniseza pulelo ya kuli “linubu zemulela kufa kwapili,” mifuta ya linubu zeo litokwa kuli mutu aine fafasi ni kulelela cimo kuli kwapili ukafa nubu ka nzila yecwalo. Kuli batu babalakaza kufa linubu kwa musebezi wa mwa lifasi kaufela wa Lipaki za Jehova batusiwe, kulukisizwe broshuwa yeli Charitable Planning to Benefit Kingdom Service Worldwide [Kulela Kufa Linubu Zekatusa Mwa Musebezi wa Mubuso Mwa Lifasi Kaufela]. Broshuwa ye, yefumaneha mwa puo ya Sikuwa ni ya Sisipanishi ilukiselizwe kutalusa linzila zeshutana-shutana za mwakufela linubu ka nako yacwale, ni kwapili, inge cwalo mutu hatimela. Litaba zetalusizwe mwa broshuwa ye, mwendi halikoni kumitusa hahulu bakeñisa kuli milao ya mwa naha yamina ka za mitelo kamba milao yeñwi yashutana ni yetalusizwe. Ka kuitusisa linzila zeo za kufa linubu zelelezwi cimo, buñata batusize kuzwisezapili misebezi ya bulapeli bwaluna ni ya kutusa batu babatokwile mwa lifasi kaufela, mane ni kutahisa kuli liteko za mitelo likutele mwatasi kwa bafi ba linubu zeo. Haiba broshuwa ye yafumaneha mwa naha yamina mwakona kuiputela yona ku muñoli wa puteho yamina.

Kuli mufumane litaba zeñata, musine fa linki yeli: “Mufe Nubu Kwa Musebezi Waluna wa Mwa Lifasi Kaufela” yefumaneha kwatasaa likepe lapili la wabusaiti yaluna ya jw.org/loz, kamba mulizeze kwa ofisi ya mutai.

Hape Mwendi Mwakona Kutabela Litaba Ze

Liakalezo za Mwakufela Linubu ka Kuitusisa Intaneti

Muzibe miezezo ni linzila zeshutana-shutana zemukona kuitusisa kuli mufe nubu.

TAWALA YA MULIBELELI—HATISO YA KUITUTA