EJ IIEN aer kõm̦m̦ane juon kweilo̦k elukkuun aorõk ilo Jerusalem. Kiiñ Devid ear kũrtok aolep ruutiej ro, rũtõl ro, im em̦m̦aan ro rekajoor. Rar pojak in roñ juon kõjjel̦ã eaorõk. Jeova ear kappeik l̦adik eo nejin Devid etan Solomon bwe en kalõk juon tampel̦ ejejuwaan ñan an armej ro kabuñ ñan Anij eo em̦ool. Anij ear kwal̦o̦k l̦o̦k ñan kiiñ in an Israel joñak in tampel̦ eo renaaj kalõke im kiiñ in ear lel̦o̦k joñak eo ñan Solomon. Devid ear ba: “Jerbal eo enaaj kõm̦m̦ane ekanooj l̦ap, kõnke m̦weo ejjab im̦õn armej ak ej juon tampel̦ ñan Irooj Anij.”​—1 Kronikel 28:1, 2, 6, 11, 12, UBS; 29:1, UBS.

Ãlikin an kar Devid ba men in, ear kajjitõk im ba: “Kiiõ wõn iaami ej m̦õn̦õn̦õ in letok men ko m̦weien ñan Irooj?” (1 Kronikel 29:5, UBS) Ñe kwaar pãd ilo iien in, enaaj kar ta uwaak eo am̦? Kwõnaaj ke kar m̦õn̦õn̦õ in rejetake jerbal in el̦ap rar kõm̦m̦ane? RiIsrael ro rar m̦õn̦õn̦õ in jipañ. Ilo m̦ool, rar “lañlõñ kõn aer lel̦o̦k im m̦õn̦õn̦õ, bwe kõn bõro eweeppãn rar lel̦o̦k im m̦õn̦õn̦õ ñan Jeova.”​—1 Kronikel 29:9.

Elõñ bukwi iiõ tokãlik, Jeova ear kajutak juon men el̦apl̦o̦k an aorõk jãn tampel̦ eo ilo kar tõre ko. Ear kajutak tampel̦ eo ilo kõkkar ak karõk eo bwe armej ren maroñ epaake im kabuñ ñane ikijjeen katok in mour eo an Jijej. (Hibru 9:11, 12) Ewi wãween an Jeova jipañ armej ro bwe ren jem̦jerãik e rainin? Ikijjeen jerbal eo ñan kõm̦m̦an rũkal̦oor. (Matu 29:19, 20) Ikijjeen jerbal in, kajjojo iiõ elõñ milien armej ro rej katak Baibõl̦, elõñ to̦ujin ro rekããl rej peptaij, im elõñ eklejia ko rekããl rej jutak.

Kõn wõt wõnm̦aanl̦o̦k kein rej wal̦o̦k, jej aikuj bũriini elõñl̦o̦k bok ko rej pedped ioon Baibõl̦, kalõk elõñl̦o̦k Im̦õn Kweilo̦k ko, im kappok jikin ñan kõm̦m̦ani kweilo̦k ko rel̦l̦ap. Kwõj ke errã bwe jerbal in ñan kajeeded ennaan eo em̦m̦an ej juon jerbal ekanooj l̦ap im kam̦õn̦õn̦õ?​—Matu 24:14.

Kõnke jej yokwe Anij im rũturid im kõnke jejel̦ã bwe jej aikuj kõm̦m̦ane jerbalin kwal̦o̦k naan m̦okta jãn an itok jem̦l̦o̦kin, jej ‘m̦õn̦õn̦õ in lel̦o̦k men ko m̦weied ñan Jeova’ ilo ad m̦õn̦õn̦õ in jabawõt. Elukkuun em̦m̦an ñe jej ‘kaiboojoj Jeova kõn men ko m̦weied’ im loe an jim̦we im tiljek wãween aer kõjerbal men kein ñan kõm̦m̦ane jerbal in ej make wõt aorõk!​—Jabõn Kõnnaan 3:9.