E ORA pa un reunion masha importante na Herúsalèm a yega. Rei David a manda yama tur su prensnan, ofisialnan i hòmbernan poderoso. Nan tabata masha emoshoná pa tende un anunsio spesial. Yehova a manda David su yu, Sálomon, konstruí un edifisio dediká na adorashon di e Dios berdadero. Dios a duna David, rei di Israel ku ya tabata di edat, e plan di konstrukshon mediante inspirashon, i e na su turno, a duna Sálomon. David a bisa: “E trabou ta grandi; pasobra e tèmpel no ta pa hende, sino pa SEÑOR Dios.”—1 Kró. 28:1, 2, 6, 11, 12; 29:1.

Despues David a puntra: “Ken anto ta boluntario pa konsagrá [òf, ofresé,] su mes na SEÑOR awe?” (1 Kró. 29:5) Si bo tabata presente e dia ei, kon lo bo a reakshoná? Lo bo a sinti bo motivá pa sostené e proyekto grandi ei? E israelitanan a pone man na obra mesora. Sí, nan “a regosihá, pasobra nan a duna ofrenda boluntariamente, pasobra di henter nan kurason nan a duna SEÑOR nan ofrenda.”—1 Kró. 29:9.

Siglonan despues, Yehova a establesé algu muchu mas importante ku e tèmpel ei: e tèmpel spiritual. Esei ta e medio via kua hende por ador’é a base di e sakrifisio di Hesus. (Heb. 9:11, 12) Kon Yehova ta yudando hende pa rekonsiliá kuné awe? E ta hasi esei mediante nos trabou di hasi disipel. (Mat. 28:19, 20) Komo resultado di e aktividat akí, tur aña nos ta dirigí miónes di estudio di Beibel, míles i míles di disipel ta batisá i sientos di kongregashon ta ser formá.

E oumento ei ta pone ku mester imprimí mas literatura basá riba Beibel, konstruí i mantené mas Salòn di Reino i buska mas lugá pa tene asamblea i kongreso. Nos aktividatnan pa plama e bon notisia ta un gran trabou ku ta duna nos hopi satisfakshon, no ta bèrdat?—Mat. 24:14.

Amor pa Dios i pa próhimo i e urgensia pa prediká e Reino ta motivá e pueblo di Dios pa hasi donashon boluntario, i asina ‘ofresé nan mes na SEÑOR.’ Ta masha emoshonante pa “onra SEÑOR ku [nos] rikesa” i pa mira kon e rekursonan ei ta ser usá fielmente i diskretamente pa hasi e trabou di mas grandi den historia humano.—Pro. 3:9.