“O le Galuega e Telē”

PLAY

UA OO i le taimi e fai ai se fono e tāua tele i Ierusalema. Ua faapotopoto uma e le tupu o Tavita ona alii sili, tagata aloaʻia, ma tagata malolosi. Ua matuā fiafia i latou e faalogo atu i se faasilasilaga faapitoa. Ua tofia e Ieova le atalii o Tavita, o Solomona, e na te fausia se maota e mataʻina lona fausaga ina ia tuuina atu mo le tapuaʻiga i le Atua moni. Ua faaali atu e le agaga o le Atua le ata o le fale iā Tavita le tupu matua o Isaraelu, ona tuuina atu lea e Tavita iā Solomona. Ua faapea atu Tavita: “O le galuega e telē; auā o le maota e faia e lē mo se tagata, ae e mo Ieova le Atua.”—1 No. 28:1, 2, 6, 11, 12; 29:1.

Ua sosoo ai ma le fesili atu o Tavita: “O ai ea e tauofo e foaʻi mai ana mea mo Ieova i le asō?” (1 No. 29:5) Pe ana faapea na e iai i inā, o le ā sau tali? Po o le a uunaʻia oe ia lagolagoina lenei galuega telē? Sa vave loa ona gaoioi tagata Isaraelu. Ioe, sa “olioli . . . le nuu i a latou meaalofa tauofo, auā na latou foaʻi atu ma le lotoatoa meaalofa tauofo iā Ieova.”—1 No. 29:9.

I senituri mulimuli ane, na faatulaga ai e Ieova se mea e matuā sili atu i lo o le malumalu. Sa faavaeina e Ieova le malumalu sili faaleagaga, o le faatulagaga mo tagata ina ia faalatalata atu ai iā te ia i le tapuaʻiga, e faavae i le taulaga a Iesu. (Epe. 9:11, 12) Ua faapefea ona fesoasoani Ieova i tagata i aso nei ina ia maua se leleiga ma ia? E ala i la tatou galuega o le faia o isi ma soo. (Mata. 28:19, 20) O le iʻuga, i tausaga taʻitasi e faitau miliona suʻesuʻega faale-Tusi Paia e faia, faitau afe soo e papatiso, ma e faitau selau faapotopotoga fou ua faavaeina.

O lenei faatelega ua manaʻomia ai ona lomia le tele o lomiga faale-Tusi Paia, fausia ma faaleleia Maota mo Sauniga, ma ua manaʻomia ni nofoaga mo fonotaga ma tauaofiaga. Pe e te lē ioe o la tatou galuega o le faalauiloaina atu o le tala lelei, o se galuega e sili ona tāua ma faamalieina ai?—Mata. 24:14.

O le alolofa i le Atua ma tuaoi ma le faanatinati o le galuega talaʻi o le Malo, ua uunaʻia ai tagata o le Atua e ʻfoaʻi a latou mea mo Ieova,’ e ala i le faia o foaʻi tauofo. Maʻeu lo tatou fiafia e “āva iā Ieova i [a tatou] ʻoa,” ma iloa o loo faaaogā tatau ma le faautauta na ʻoa, ina ia faia ai le galuega e sili ona telē i le talafaasolopito o tagata!—Faata. 3:9.

AUALA UA FILIFILI E NISI E FOAʻI AI MEAALOFA MO LE GALUEGA I LE LALOLAGI AOAO

O le toʻatele i aso nei ua latou “tuu ese se mea” pe faaagaga se vaega tupe e lafo i pusa a faapotopotoga o loo faailogaina, “Galuega i le Lalolagi Aoao.” (1 Kori. 16:2) E lafo atu e faapotopotoga i masina taʻitasi nei tupe i le ofisa o le lālā, o loo vaavaaia o latou atunuu. E mafai foʻi ona lafo saʻo lau foaʻi, i se faalapotopotoga faaletulafono o loo faaaogāina e Molimau a Ieova i lou atunuu. Ina ia iloa le faalapotopotoga faaletulafono autū o loo faaaogāina e Molimau a Ieova i lou atunuu, faamolemole faafesootaʻi le ofisa o le lālā o loo vaavaaia le atunuu. E mafai ona maua le tuatusi o le ofisa o le lālā i luga o le www.pr418.com. O loo mulimuli mai foaʻi e mafai ona e lafoina tuusaʻo.

O FOAʻI E LEAI NI TUUTUUGA

Foaʻi e ala i faletupe, o debit card, o credit card, po o tupe e lafo e ala i telefoni feaveaʻi. I nisi lālā e faaaogā ai le Upega tafaʻilagi o le jw.org po o se isi tuatusi aloaʻia.
Foaʻi tautupe, filifili, tautaliga, taulima, po o isi oloa tāua a le tagata lava ia. E aofia ai ma se tusi e faailoa atu ai, o na mea ua foaʻi atu e aunoa ma ni tuutuuga.

O FOAʻI E IAI TUUTUUGA

Foaʻi tautupe ma le tuutuuga e toe faafoʻi lenā foaʻi i lē e ana le tupe, pe a ia talosagaina.
E aofia ai ma se tusi e faailoa atu ai e iai tuutuuga o le foaʻi.

FUAFUAGA O FOAʻI FAAMEAALOFA

E lē gata i foaʻi tautupe ma isi foaʻi faameaalofa, ae e iai isi auala e faia ai foaʻi mo le galuega o le Malo i le lalolagi aoao. O loo lisiina mai na auala i le pito i lalo. Po o le ā lava le auala e te filifili e faaaogā, faamolemole faafesootaʻi muamua le ofisa o le lālā o loo vaavaaia lo outou atunuu, ina ia iloa ai auala o loo faaaogāina e lou atunuu. Talu ai e tele ina fesuisuiaʻi tuutuuga faaletulafono ma tulafono o lafoga, e tāua ai ona saʻili le fesoasoani a ni lōia ma tagata faufautua e faatatau i lafoga, a o leʻi filifili po o lē fea le auala sili e faia ai lau foaʻi.

Inisiua: O le inisiua o le ola o se tasi, o tupe e maua pe a litaea po o le penisione, o le a lotomalie se tasi e foaʻi mo le faalapotopotoga o loo faaaogāina e Molimau a Ieova.

Teugātupe i le Faletupe: O teugātupe i le faletupe, pepa e faamaonia ai se teugātupe (certificates of deposit), po o tupe e maua e le tagata pe a litaea, e mafai ona tuu faamavaega pe totogi atu pe a maliu, i se faalapotopotoga o loo faaaogāina e Molimau a Ieova, ma ia faia e tusa ma aiāiga a faletupe o le atunuu.

Tupe Faafaigaluega (Stocks) ma Pepa Faamaonia mo Tupe (Bonds): O nei mea e mafai ona foaʻi faameaalofa tuusaʻo atu i se faalapotopotoga o loo faaaogāina e Molimau a Ieova po o le tuu faamavaega e totogi atu pe a maliu lē o faia le foaʻi.

Fanua ma Fale: E mafai ona foaʻi tuusaʻo ou fanua ma fale, i se faalapotopotoga o loo faaaogā e Molimau a Ieova, pe tuu e nofo ai pea lē e ana le fale seʻia oo ina maliu, ona faatoʻā maua lea e le lālā.

Tupe Faameaalofa e Iai Tuutuuga (Gift Annuity): O nei tupe, o se meaalofa ua faatulaga e avatu i se faalapotopotoga o loo faaaogāina e Molimau a Ieova. Ae e maua e lē e ana le foaʻi po o se tasi ua ia tofia, se tino i tupe i tausaga taʻitasi a o soifua pea o ia. O le a faaitiitia le lafoga e totogi e le tagata na faia le foaʻi, i le tausaga na faamautūina ai lea fuafuaga.

Uili ma Mavaega: E mafai ona foaʻi atu meatotino po o se vaega tupe i se faalapotopotoga o loo faaaogāina e Molimau a Ieova, e ala i se uili ua faia e tusa ai ma le tulafono. Pe mauaina foʻi e lenei faalapotopotoga le taui o se teugātupe ua tuu faamavaega. O le faia faapea, e mafai ona faaitiitia ai lafoga e totogi.

E pei ona faailoa mai i le faaupuga “fuafuaga o foaʻi faameaalofa,” o nei foaʻi, e manaʻomia ona fuafua lelei e lē e ana le foaʻi. Ina ia fesoasoani i ē o loo fia faia ni meaalofa tauofo i le galuega a Molimau a Ieova i le lalolagi aoao, ua saunia ai se polosiua i le faa-Peretania ma le faa-Sepania e taʻua o le Charitable Planning to Benefit Kingdom Service Worldwide. Ua saunia i le polosiua faamatalaga i auala eseese e faia ai foaʻi faameaalofa i le taimi lenei, ma pe a maliu lē e ana le foaʻi. Atonu e lē o faamatalaga uma i le polosiua e aogā i lou tulaga, ona o tulafono o lafoga po o nisi o tulafono i lou atunuu. O nei auala ua mafai ai e le toʻatele ona lagolagoina fuafuaga a Molimau a Ieova i le lalolagi aoao, ma maua ai foʻi le fesoasoani i le faaitiitia o lafoga e totogi. Atonu e mafai ona e talosagaina se kopi o lenei polosiua mai le failautusi o lau faapotopotoga, pe afai e maua i lou atunuu.

Mo nisi faamatalaga, oomi le vaega “Make a Donation to Our Worldwide Work” o loo i le pito i lalo o le itulau autū o le jw.org/sm, pe faafesootaʻi le ofisa o le lālā.

E te Ono Fiafia Foʻi

Auala e Faia ai Foa‘i i Luga o le Initaneti

LE OLOMATAMATA—LOMIGA MO SU‘ESU‘EGA