“Tom yô, U Kehe”

KUHWA

“Tom yô, U Kehe”

SHIGHE yange kuma u a zua mkombo u hange hange ugen ken Yerusalem. Nahan Tor Davidi yila mbahemenev nav man mbaerentom ken ya u tor kua anomaior a ageegh cii, ve va kohol imôngo. Tsô tor yôô kwagh ugen, u doo ve tsung u ungwan yô. Kwaghyôôn shon yô ér Yehova tsua Solomon, wan u Davidi ér, a maa zegeyou, u una lu sha ci u civir Aôndo u mimi la her yô. Aôndo yange pase Davidi, tor u Mbaiserael u bee iyol hen shighe ne la, gbenda u a maa iyou shon la, Davidi di gema pase Solomon. Tsô Davidi kaa a ior ér: “Tom yô, u kehe; gadia zegeyou la ngu sha ci u or ga, kpa ka sha ci u TER Aôndo je.”—1 Kron. 28:1, 2, 6, 11, 12; 29:1.

Davidi been yô, a pine ér: “Ka an nana na iyol i nan nyian gbar gbar u ivin ikyev [uwe] i nan sha u nan TER iyua?” (1 Kron. 29:5) Yange wea lu her nahan, ma u er nena? Ishima ma i mgbegha u u suen zegetom la kpa? Yange Mbaiserael ve er kwagh fese sha kwagh ne. Jighilii yô, “ior ember, er ve na gbar gbar nahan, gadia ve na TER iyua a ishima i môm gbar gbar.”—1 Kron. 29:9.

Anyom nga kar uderi imôngo yô, Yehova sôr kwagh ugen ver u hemba tempel la ica je yô. Yange ver zege tempel u ken jijingi la; inja na yô, ka gbenda u uumace ka ve kporom ikyua a na ken mcivir sha iwasen i naagh ku Yesu kura je la. (Heb. 9:11, 12) Yehova ngu wasen ior nyian ér ve hime a na nena? Ngu eren kwagh ne sha ikyev i tom wase u geman ior hingir mbahenen la. (Mat. 28:19, 20) Tom ne na yô, hanma inyom ka i hen Bibilo a ior umiliôn imôngo, shi i er mbahenen udubu imôngo batisema, shi i bugh atôônanongo a he uderi imôngo.

Mvese ne na yô, ka i gba u a seer gberen ityakerada i pasen Bibilo, shi a maa Ayou a Tartor shi a nengen sha mi, shi a zua a ajiir a eren mbamkohol mba kiriki man mba vesen. U na jighjigh wer tom wase u samber a loho u dedoo ne ka zegetom, u injar i lu ker kpa?—Mat. 24:14.

Dooshima u ior mba Aôndo ve lu a mi sha a na kua mbawanndor a ve, man er i hingir torough torough u a er tom u pasen kwagh u Tartor ne la, mgbegha ve u ‘ivin ikyev uwe ve sha u nan TER’ iyua sha asema a ve. Ka kwagh u saan iyol kpishi u ‘civir TER sha inyaregh yasegh’ shi nengen er i lu eren tom a mi sha mimi man sha kwaghfan sha u kuren zegetom u i gbe je uumace ve lu a vande eren ga ne!—Anz. 3:9.

Igbenda I Mbagenev Ka Ve Er Iyua I Suen Tom U Pasen Kwagh U I Lu Eren Tar Sha Won Cii Ne yô

Ior kpishi nyian ka ve za a ‘kwagh u ve ver’ her shin inyaregh ki ve soo u eren iyua a mi la, ve za kende shin akwati u eren iyua, u i nger sha mi ér “Tom Wase u Í Eren Tar Sha Won Cii La.” (1 Kor. 16:2) Hanma uwer yô, atôônanongo ka a tindi a uiyua mban hen afishi a Mbashiada mba Yehova, a ken tar u ve lu la. Shi u fatyô u tindin a uiyua jighilii hen ma mzough u sha tindi, u Mbashiada mba Yehova ve lu a mi ken tar wou la. Aluer u soo u fan iti i mzough u sha tindi, u Mbashiada mba Yehova ve lu a mi hen tar wou la yô, pine afishi a branci. U fatyô u zuan a adereshi u afishi a branci wou sha Intanet hen www.pr418.com/tiv. Ka uiyua kposo kposo mba u fatyô u tindin a mi jighilii je i tese shin heen ne:

UIYUA MBA A FATYÔ U TINDIN A MI JIGHILII YÔ

Or nana fatyô u eren iyua sha u tindin afishi a branci a inyaregh ken banke sha Intanet, shin sha kaade u i yer ér ATM la. Afishi a branci agen yô, ka i fatyô u tindin á a inyaregh sha ijiir yase i jw.org la, shin sha ma ijiir igen sha Intanet i a ver la je kpaa.
Or nana fatyô u eren iyua sha inyar shin sha akaa a hweev gayô akaa a injaa a nan agen. Nger washika pase wer inyaregh shin akaa a u ne la ka iyua i u er yô.

UIYUA MBA A FATYÔ U HIDEN SE A MI YÔ

Or nana fatyô u eren iyua sha inyar, i a fatyô u hiden nan a mi, shighe u nan soo ér i hide nan a mi yô.
Nger washika pase wer iyua you la ka iyua i a va kuma u yô, a hide u a mi yô.

IGBENDA I EREN IYUA

Dugh u eren iyua sha inyar man akaa a injaa agen kera kpa, igbenda igen ngi i or a fatyô u suen tom u Tartor u i lu eren tar sha won cii ne yô. Ka igbenda shon je i ter shin heen ne. Hanma gbenda shin igbenda i eren iyua sha inyar i u tsough u eren iyua sha u suen tom u Tartor cii kpa, vande pinen afishi a branci a hen tar wou la sha er u fa igbenda i eren iyua sha inyar i i lu hen tar wou la yô. Er atindi a lu kwagh môm ga yô, gba hange hange u ú vande lamen a loya u nan fe atindi a sha kwagh u iyua i eren la tsembelee cii ve u mase tsuan gbenda u u hembe doon u ú er iyua la ye.

Ishiôlansi: Or nana fatyô u ngeren ér i na Watch Tower inyaregh ki ishiôlansi shin penshen u nan.

Inyaregh Ki ken Banke: Or nana fatyô u ngeren ér shighe u nan kpe yô, i na Watch Tower inyaregh ki nan koso ken banke shin jindinyar i nan we ken banke nan zough a mtsera sha mi la, gayô inyaregh ki penshen ki nan ver ken banke la, er atindi a banke a tese la.

Shia man Mtsera: Or nana fatyô u nan Watch Tower iyua sha shia i nan yam vea banke shin kômpeni shin mtsera u nana zua a mi sha anzô a ior ve ngohol hen a nan la, shin nana fatyô u kaan ér shighe u nan kpe yô, i gema akaa ne i na Watch Tower.

Inya Shin Ya: Or nana fatyô u nan Watch Tower iyua sha inya shin ya u a fatyô u teen yô. Kpa aluer ka ya u or u eren iyua la nan lu tsan her yô, nana fatyô u kaan ér nana tsa her zan zan nana kpeen yô, Watch Tower a tee ya shon.

Ngeren u Tesen Kwagh u U Soo Wer i Er Shighe u U Kpe yô, kua Ngeren u Nan Orgen Shin ma Nongo Inyaregh Wer Ve Koso: Or nana fatyô u ngeren ér shighe u nan kpe yô, i na Watch Tower akaa a nan lu a mi cii shin inyaregh ki nan. Shin nana fatyô u ngeren ér inyaregh ki nan ne Watch Tower ér a lu nan a mi la a saa a mi shighe u nan kpe yô.

Ishember i “igbenda i eren iyua” ne tese ér, aluer gba u or nana er imba iyua ne yô, gba u nana fa igbenda ne vough, nana wa iyol cii ve nana er iyua ne ye.

Aluer u soo u fan seer yô, za shin kpe u peeji u hiihii u ijiir yase i sha Intanet i jw.org/tiv la, ape i nger ér, “Er Iyua i Suen Tom u Se Eren Tar sha Won Cii La,” shin nger pine afishi a branci.