1. Menlau kawehwehda dahme wiawi ni ohlahn Serusalem.

 NAN pahr 607 mwohn Krais, lapalahn karis en sounpei en mehn Papilon kan me mi pahn kaundahn Nanmwarki Nepukadnesar II kalowehdi kahnimw en Serusalem. Me pid mahwen wet, Paipel mahsanih: “[Nepukadnesar] kemehla mwahnakapw akan en Suda iangahki irail kan me patopato nan Tehnpas Sarawio. Sohte mehmen me e ketin kupwur mahkohng, me pwulopwul de mah, ohl de seri, me soumwahu de kehlail. . . . E isikala Tehnpas Sarawio oh kahnimwo, iangahki tehnpesen nanmwarki kan oh kepwe kan, oh kauwehla kelen kahnimwo.”​—2 Kron. 36:17, 19.

2. Kehkehlik dahieu me Siohwa ketikihda me pid Serusalem eh pahn kasohrala, oh dahme pahn wiawihong mehn Suhs ko?

² Ohlahn Serusalem sohte wia mehkot kapwuriamwei ong towe kan. Erein sounpar tohto, sapwellimen Koht soukohp kan kehkehlikihong mehn Suhs ko me ma irail pousehlahte sapeikiong Kosonned en Koht, re pahn pengpengla rehn mehn Papilon kan. Mehn Suhs tohto pahn mehkihla kedlahs. Irail kan me sohte mehla ele pahn kalipilipala Papilon oh mi wasao erein arail mour. (Ser. 15:2) Ia mwomwen arail mour wasao? Ia duwe, arail selidi pahn Papilon  pahrekiong ahnsoun Kristian kan? Ma ei, iahd me e wiawi?

3. Ia duwen ahn mehn Suhs ko ar kalipilipala Papilon eh weksang dahme mehn Israel ko lelohngehr ni arail wia lidu kei nan Isip?

³ Dahme soukohp ako kohpada pweidahr. Siohwa ketin doadoahngki Seremaia en kaweid irail kan me pahn kalipilipala Papilon ren pwungki irair kapw me re mi loale oh doadoahngki arail ahnsou ni ahl me keieu mwahu. E mahsanih: “Kumwail kauwada imwamwail [nan Papilon] oh soandihla loale. Kumwail wiahda amwail mwetuwel kan oh tungoale wah kan. Kumwail doadoahk ong ni kamwahupen kahnimw kan wasa me I waikumwaillahng ie nin duwen aramas selidi kei. Kumwail kapakapkin irail pwe ma re paiamwahu, kumwail pahn pil paiamwahu.” (Ser. 29:5, 7) Irail kan me kin uhpah dahme Koht kupwurki kin ahneki soangen mour me duwehte ahn mehn Papilon kan. Mehn Papilon ko mweidohng irail en pein apwalihala pali laud en arail koasoandi de wiewia kan. Irail pil ahneki saledek en kohseli nan sahpwo. Mahsie, Papilon iei wasa me aramas kin kohla ie pwehn pwain, netiki oh weliali kepwe. Doaropwehn mahs kan me dierekda kasalehda me mehn Suhs tohto esehla ia duwen arail pahn pwain de netiki kepwe kan wasao, oh ekei koahiekla en wiahda dipwisou kan. Ekei mehn Suhs ko pil kepwehpwehla. Arail kalipilipala Papilon sohte mwahn duwehte dahme mehn Israel ko lelohng ni arail wia lidu kei nan Isip sounpar epwiki kei mwowe.​—Wadek Eksodus 2:23-25.

4. Likin irail kan me uhwongada, ihs me pil lokolongki kalipilipala wet, oh soahng dah kan me irehdi irail sang arail en kak kaudokiong Koht ni pwung?

⁴ Mendahki mehn Suhs ko alehdi dahme re anahne, a ia duwen arail nanpwungmwahu rehn Siohwa? Sapwellimen Siohwa tehnpas sarawio iangahki pei sarawio ohla, oh samworo ko solahr kin wia arail koasoandi en kaudok ni ahl me soandi mwahu. Nanpwungen mehn Suhs ko me kalipilipala Papilon, mie sapwellimen Koht ladu lelepek kan me sohte warohng ale lokolok, ahpw re anahne iangete mehn Suhs teikan lokolok. Mendahki met, re wia uwen arail kak pwehn kapwaiada Kosonned en Koht. Karasepe, nan Papilon, Daniel oh ienge meh silimeno, Sadrak, Mihsak, oh Apedneko, sohte kin tungoale mwenge me mehn Suhs kan keinepwsang. Oh kitail ese me Daniel kin kaukaule kapakapohng Koht. (Dan. 1:8; 6:10) Ahpw, pahn kaundahn kaudok likamw, mehn Suhs kan me lemmwiki Koht sohte kak wia soahng koaros me mi nan Kosonnedo.

5. Koapworopwor dahieu me Siohwa ketikihong sapwellime aramas akan, oh dahme kahrehda inou wet kaselel oh kapwuriamwei?

⁵ Ia duwe, mehn Israel ko kak pwurehng kaudokiong Koht ni ahl ehu me uhdahn pwung? Ni ahnsowo, mwomwen me re sohte pahn kak wia met. Mehn Papilon ko sohte kadarala me sensel ko. Re wiahda koasoandi wet ni arail sohte medemedewe me Siohwa kak ketin wia mehkot. Siohwa ketin inoukihda me sapwellime aramas akan pahn saledekla, oh met pweida. Sapwellimen Koht inou kan kin ahnsou koaros pweida.—Ais. 55:11.

6, 7. Dahme kahrehda e konehng kitail en kalaudehla atail wehwehki wehwehn sensel pahn Papilon en atail ahnsou?

⁶ Ia duwe, Kristian kan lelohngehr irair ehu me pahrekiong mehn Suhs ko ar mihla pahn manaman en Papilon? Erein sounpar tohto, Kahn Iroir kasalehda me sapwellimen Koht ladu kan nan atail ahnsou mihla pahn manaman en Papilon nan pahr 1918 oh me re saledeksang  Papilon nan pahr 1919. Ahpw, pwehki kahrepe kan me kitail en kawehwehda nan iren onop wet oh iren onop en mwuhr, kitail anahne tehk sapahlih ire wet.

⁷ Medewehla: Papilon Lapalap iei pelien lamalam likamw koaros nin sampah pwon. Eri, pwe sapwellimen Koht aramas akan en wie sensel pahn Papilon nan pahr 1918, re pahn anahne mihla pahn manaman en pelien lamalam likamw ni soangen ahl ehu ni ahnsowo. Ahpw mehn kadehde kan kasalehda me pahr kan mwohn Mahwen Keieu en Sampah, sapwellimen Koht ladu keidi kan sohte wiahla lidu kei pahn Papilon Lapalap, ahpw re tepidahier saledeksang. Mendahki me keidi ko ale lokolok erein mahwen keieu en sampah, kahpwal wet uhdahn kohsang palien koperment, kaidehn Papilon Lapalap. Eri e mwomwen me sapwellimen Siohwa aramas akan sohte mihla pahn manaman en Papilon Lapalap nan pahr 1918.

8. Menlau kawehwehda ia duwen padahk likamw eh kasaminehla padahk mehlel en Kristian. (Menlau kilang tepin kilel.)

⁸ Ni Pendekos 33, tohtohn mehn Suhs oh mehn liki kan me wehkohng lamalam en mehn Suhs keikihdi sapwellimen Koht manaman. Kristian kapw pwukat wiahla “keinek pilipil ehu, pwihn samworo en Nanmwarkio, . . . wehi sarawi ehu, sapwellimen Koht aramas kei.” (Wadek 1 Piter 2:9, 10.) Wahnpoaron ko kin tetehk kanahieng mwomwohdisohn sapwellimen Koht aramas akan erein arail wie momour. Ahpw, mwurin wahnpoaron ko mehla, ekei ohl pwarada oh “pitiheki me pwoson akan lokaia likamw, pwe re en idawehnirailla.” (Wiewia 20:30; 2 Des. 2:6-8) Pali laud en ohl pwukat ahneki pwukoa kesempwal kan nan mwomwohdiso, re kin papah nin duwen sounapwalih kei, oh mwuhr “pisop” kei. Pwihn en kaunen pelien lamalam kan wiawihda, mendahki Sises mahsanihong sapwellime tohnpadahk kan: “Kumwail koaros kin wia pirien ehu.” (Mad. 23:8) Ohl lapalap kan me perenki padahk loalokong widing kan en Aristotle oh Plato kin kihda padahk likamw kan, oh kedekedeo padahk pwukat wiliandi padahk mehlel en Mahsen en Koht.

9. Menlau kawehwehda ia duwen Kristian likamw kan ar ale sawas sang Wehin Rom oh ia imwilahn met.

⁹ Nan pahr 313, Kaunen Rom Constantine kamanahla mwomwen wiewia likamw en Kristian wet. Sang ahnsowo kohdo, pelien lamalam oh koperment tepida doadoahkpene. Karasepe, mwurin mihting en kaunen pelien lamalam kan en Nicaea, Constantine, me iang mihtingo, koasoanehdi me Arius, padre men me uhwongada irail, pahn kalipilipala pwehki e sohte pwungki me Sises iei Koht. Mwuhr, pahn kaundahn Theodosius I (pahr 379-395), pelien lamalam en Kadolik wiahla pelien lamalam en Wehin Rom. Soupoad kan nda me mehn Rom kan me sohte iang Kristian mahs “wiahla Kristian kei” nan pahr 300 samwa. Ahpw ni mehlel Kristian likamw kan alehdahr padahk likamw ni ahnsowo oh iangalahr kisehn Papilon Lapalap. Mendahki met, Kristian keidi malaulau kei me rasehng tuhke mwahu kin wia uwen arail kak en kaudokiong Koht, ahpw arail padahk kan sohte kehlail. (Wadek Madiu 13:24, 25, 37-39.) Irail uhdahn mi pahn manaman en Papilon!

10. Dahme kahrehda aramas mehlel kan kin peidengki padahk kan en pelien lamalam?

¹⁰ Ahpw, sang ni mwehin tepin Kristian ko kohdo, aramas tohto kin kak wadek Paipel ni lokaiahn Krihk de Latin. Re kin kak kapahrekihpene padahk en Mahsen en Koht oh padahk kan en pelien lamalam en Kristian likamw kan. Ni arail wadek Paipel, ekei irail soikala padahk likamw kan en arail sarawio, ahpw e keper, oh  pil kak kahrehiong irail en kamakamala, ma re kasalehda arail madamadau ong met.

11. Ia duwen Paipel eh mihla pahn manaman en kaunen pelien lamalam kan?

¹¹ Kedekedeo, aramas tohto sohla doadoahngki lokaiahn Latin oh Krihk oh re pil kauhdi kawehwehn Mahsen en Koht ong lokaia teikan. Met kahrehda kaunen pelien lamalam kan oh ekei me ale kasukuhl laud kelehpw me kak wadek Paipel, mendahki kaidehn koaros kaunen pelien lamalam kan kak wadawad oh nting mwahu. Mehmen me uhwongada dahme pelien lamalam ko kin padahngki pahn ale kalokolok laud. Sapwellimen Koht ladu keidi lelepek kan kin anahne kanahieng arail kin tuhpene ma re kak. Duwehte ahnsou me mehn Suhs ko kalipilipala Papilon, “pwihn samworo en Nanmwarkio,” me wia me keidi kei, sohte kak doadoahkpene nin duwen pwihn ehu. Ni lokaiahn karasaras, Papilon Lapalap uhdahn salihedi aramas ako!

12, 13. Soahng kesempwal riau dah me sewese aramas akan en ekis saledeksang manaman en Papilon Lapalap? Menlau kawehwehda.

¹² Ia duwe, Kristian mehlel kan pahn kak kaudokiong Koht ni saledek? Ei! Marain en padahk mehlel tepida sansalda pwehki soahng kesempwal riau me wiawi. Keieu iei wiawihdahn misihn en wiahda pwuhk kan me wiawihda nan pahr 1450 samwa. Mwohn misihn en wiahda pwuhk kan ar miehla, aramas kin wiahda copy en Paipel ni arail kin pein ntingihedi. Copy en Paipel kan kin pweilaud oh apwal en diarada. Pwehn ntingihada ehute copy en Paipel, sounnting koahiek men anahne sounpwong eisek pwehn wia met! Patehng met, dipwisou kan me sounnting men anahne, duwehte doaropwe mosul kan (vellum de parchment), uhdahn pweilaud. Weksang met, emen me koahiek en doadoahngki misihn en wiahda pwuhk kan kak wiahda pali 1,300 nan rahn ehute!

 ¹³ Keriau iei me ohl eimah kei ni tepin pahr 1500 samwa pilada en kawehwehdi Mahsen en Koht ong ni lokaia kan me aramas kalapw doadoahngki. Sounkawehwe tohto mendahkihla arail mour oh tepida wia doadoahk wet. Kaunen pelien lamalam ko inenen lingeringerkihda met. E wia mehkot keper me Paipel en mi rehn irail kan me kin lemmwiki Koht! Ih met me kaunen pelien lamalam ko kin perki. Oh ni Paipel eh miehla, aramas akan kakehr wadek. Ni arail kin wadek, re kin idek peidek kan duwehte, ‘Ia wasa nan Paipel me kasalehda duwen pwurkadorio? pweinen wia sarawi ong me melahr kan? de kaun akan me kin wia pwukoa me uhdahn laud nan Kadolik (pope oh cardinal)?’ Kaunen pelien lamalam ko inenen lingeringerkihda met. Uhdahn sohte mweimwei aramas akan en peidengki padahk kan en kaunen pelien lamalam ko! Kaunen pelien lamalam ko pelianda irail. Ohl oh lih kan kin pakadeikda nin duwen me kin kesehla oh uhwongada padahk en kaunen pelien lamalam ko, ekei padahk ko poahsoankihda padahk loalokong widing en Aristotle oh Plato, me momour mwohn Sises Krais ipwidi. Kaunen pelien lamalam ko koasoanehdi me irail kan me uhwongada arail padahk kan pahn kamakamla, oh palien kopermento kapwaiada met. Arail mehn akadei iei en kauhdi aramas akan sang wadek Paipel oh peidengki padahk en kaunen pelien lamalam ko. Met pweida. Ahpw mie ekei me eimah oh sohte mweidohng Papilon Lapalap en kamasak irail. Re esehlahr mehlelpen Mahsen en Koht oh re men kalaudehla arail sukuhlki! Met kahrehiong aramas akan en tepida saledeksang kaudok likamw.

14. (a) Soangen irair dah kan me sewese aramas akan en kalaudehla arail wehwehki padahk mehlel en Paipel mwohn pahr 1900? (b) Menlau kawehwehda en Brother Russell eh nantihong en rapahki padahk mehlel.

¹⁴ Me tohto me men esehla padahk mehlel en Paipel kin keseula sahpw teikan me sohte nohn mi pahn manaman en kaunen pelien lamalam kan. Re men wadek oh onop oh pil koasoiapene duwen Paipel ni sohte emen pahn ndahng irail dahme ren kamehlele. Nan ehu sahpw pwukat, Wehin Amerika, Charles Taze Russell oh ienge kan tepida onopki mwahu Paipel mwohn pahr 1900. Dahme Brother Russell tepin akadeiong iei en esehda mehnia pelien lamalam me kin padahngki padahk mehlel. Ni keneinei, e kapahrekihpene padahk kan en pelien lamalam tohto, pil me kaidehn Kristian kan, ong dahme Paipel mahsanih. Sohte pwand, e tehkada me sohte ehu rehn pelien lamalam ako kin uhdahn idawehn Mahsen en Koht. Ehu pak, e tuhwong kaunen pelien lamalam tohto pwehn esehda ma ohl pwukat pahn pwungki ire mehlel kan me ih oh ienge ko diarada sang Paipel oh ren padahkihong tohn arail mwomwohdiso ko. Kaunen pelien lamalam ko sohte men rong. Tohnsukuhl en Paipel ko anahne pohnese me re sohte kak ehuong irail kan me men kolokolte arail kaudok likamw.​—Wadek 2 Korint 6:14.

15. (a) Iahd me Kristian kan mihla pahn manaman en Papilon Lapalap? (b) Peidek dah kan me kitail pahn sapengala nan iren onop en mwuhr?

¹⁵ Kitail esehier me Kristian mehlel kan mihla pahn manaman en Papilon mwurinte luhwen wahnpoaron ko ar mehla. Ahpw, peidek tohto pwarada: Ia duwen atail ese me me keidi kan tepida saledeksang Papilon Lapalap erein pahr kan mwohn 1914? Mehlel me Siohwa ketin kupwursuwedla pahn sapwellime ladu kan pwehki doadoahk en kalohk wawaila erein Mahwen Keieu en Sampah? Oh ia duwe, ekei riatail Kristian kan ni ahnsowo kauwehla arail soupoupali en Kristian me kahrehda Siohwa en ketin nsensuwedkihla? Ma Kristian kan mihla pahn manaman en kaudok likamw mwurin wahnpoaron ko mehla, iahd me re saledekla? Peidek kesempwal kei met. Kitail pahn sapengala peidek pwukat nan iren onop en mwuhr.