Sai husi nakukun
“[Jeová] bolu imi atu sai husi nakukun hodi tama fali ba naroman neʼebé furak.”—1 PEDRO 2:9.
KNANANUK: 43, 28
1. Konta toʼok saida mak akontese ba Jeruzalein iha tinan 607 molok Kristu.
IHA tinan 607 molok Kristu, Liurai Nabukodonosor II lori tropa boot husi Babilónia hodi ataka sidade Jeruzalein. Kona-ba tempu neʼe, Bíblia hatete katak Nabukodonosor “oho sira-nia mane joven sira ho surik iha sira-nia fatin santu; nia la sente kasian ba mane joven sira no feto-virjen, katuas-ferik no ema neʼebé fraku. . . . Nia sunu Maromak loos nia uma, harahun Jeruzalein nia moru, sunu ninia uma aas hotu ho ahi, no harahun buat hotu neʼebé folin-boot”.—2 Crônicas (Tawarikh) 36:17, 19.
2. Jeová fó avizu nanis saida kona-ba Jeruzalein, no saida mak akontese ba ema judeu sira?
2 Tuir loloos Jeruzalein naksobu laʼós buat neʼebé akontese derrepente deʼit, tanba Maromak haruka ninia profeta sira fó-hatene nanis tinan barak ona ba ema judeu sira katak, se sira la rona no la halo tuir beibeik Maromak nia Ukun-Fuan, ema Babilónia sei mai ataka sira. No katak ema barak sei mate ho surik, sira neʼebé la mate, sei sai dadur iha Babilónia iha sira-nia moris tomak. (Jeremias [Yeremia] 15:2) Moris nuʼudar dadur iha Babilónia mak hanesan saida? Situasaun hanesan neʼe mós akontese iha ema kristaun nia tempu ka lae? Se nuneʼe, horibainhira mak ida-neʼe akontese?
EMA JUDEU NIA MORIS NUʼUDAR DADUR
3. Oinsá mak moris nuʼudar dadur iha rai-Babilónia la hanesan duni ho moris nuʼudar atan iha rai-Ejitu?
3 Liuhusi profeta Jeremias, Maromak Jeová fó-hatene ba ema judeu sira katak, bainhira sira sai dadur iha Babilónia, sira presiza simu situasaun foun neʼe no aproveita atu halaʼo sira-nia moris ho didiʼak iha neʼebá. Nia dehan: “Hariʼi uma no hela bá. Halo toʼos no han ninia fuan bá. No buka dame iha sidade neʼebé haʼu haruka imi bá nuʼudar dadur, no harohan ba Jeová kona-ba sidade neʼe, tanba se sidade neʼe iha dame, imi mós sei iha dame.” (Jeremias [Yeremia] 29:5, 7) Sira neʼebé halo tuir Jeová nia matadalan halaʼo moris hanesan ema baibain iha rai-Babilónia. Ema Babilónia fó liberdade ba sira atu halaʼo moris loroloron nian no laʼo livre iha rai neʼe. Iha tempu neʼebá, sidade Babilónia mak fatin sentru atu halaʼo negósiu. Husi dokumentu antigu sira neʼebé ema hetan hatete katak iha Babilónia, ema judeu barak aprende oinsá atu halaʼo negósiu no balu sai badain neʼebé matenek. Ema judeu balu mós sai riku iha rai neʼe. Moris nuʼudar dadur iha rai-Babilónia la hanesan duni ho moris nuʼudar atan iha rai-Ejitu iha tinan atus ba atus liubá.—Lee Êxodo (Keluaran) 2:23-25. *
4. Sesé deʼit mak presiza terus hamutuk ho ema judeu seluk neʼebé kontra Jeová, no tanbasá mak sira la bele halo tuir buat hotu neʼebé Ukun-Fuan haruka?
4 Iha ema judeu balu neʼebé laran-metin ba Jeová, maibé tanba nasaun nia sala, sira mós tenke moris nuʼudar dadur iha rai-Babilónia. Iha Babilónia, sira lalika hanoin barak kona-ba presiza isin nian, maibé oinsá ho presiza espirituál nian? Jeová nia templu no altár rahun hotu ona, no arranju kona-ba amlulik nia knaar mós sai runguranga ona. Maski nuneʼe, ema judeu sira neʼebé laran-metin ba Jeová halo tuir nafatin Jeová nia Ukun-Fuan. Porezemplu, Daniel no ninia maluk naʼin-tolu, Sadrak, Mexak, no Abednego hakribi nafatin atu han ai-han neʼebé Ukun-Fuan bandu. No Bíblia hatete katak Daniel iha toman atu halo orasaun beibeik ba Maromak. (Daniel 1:8; 6:10) Maibé tanba sira moris iha ema jentiu nia ukun, sira la bele halo tuir buat hotu neʼebé Ukun-Fuan haruka.
5. Jeová fó esperansa saida ba ninia povu, no tanbasá mak neʼe kontra Babilónia nia toman?
5 Ema Izraél sei iha oportunidade ka lae atu bele adora Jeová iha dalan neʼebé nia simu? Iha tempu neʼebá karik ema sente neʼe la bele, tanba ema Babilónia nia toman mak nunka husik sira-nia dadur livre. Maibé Maromak Jeová promete nanis ona katak ninia povu sei sai livre, no ikusmai ida-neʼe mak akontese duni. Maromak nia promesa sira sempre sai loos!—Isaías (Yesaya) 55:11.
EMA KRISTAUN HASORU SITUASAUN HANESAN KA LAE?
6, 7. Tanbasá mak ita presiza halo mudansa ba ita-nia esplikasaun kona-ba bainhira mak ema kristaun sai dadur ba Babilónia Boot?
6 Ema kristaun iha tempu modernu mós hasoru ona situasaun hanesan dadur iha Babilónia ka lae? Tinan barak ona Livru Haklaken hatete katak Maromak nia povu sai nuʼudar Babilónia nia dadur iha tinan 1918 no sai livre fali iha tinan 1919. Maibé iha lisaun neʼe no lisaun tuirmai ita sei haree razaun tanbasá presiza halo mudansa kona-ba esplikasaun neʼe.
7 Ita hatene katak Babilónia Boot reprezenta relijiaun falsu hotu, maibé hanoin toʼok kona-ba neʼe: Se ita dehan katak Maromak nia povu sai dadur ba Babilónia Boot iha tinan 1918, neʼe katak relijiaun falsu mak kontrola hela Maromak nia povu iha tempu neʼebá, loos ka lae? Maibé terus neʼebé ema kose-mina sira hasoru iha tempu neʼebá, barak mai husi governu, laʼós husi relijiaun falsu. Tuir loloos ema kose-mina komesa haketak an ona husi relijiaun falsu kleur antes Funu Mundiál Primeiru akontese. Tan neʼe mak ladún loos se ita hanoin katak iha tinan 1918 mak Jeová nia povu foin sai dadur ba Babilónia Boot.
HORIBAINHIRA MAK EMA KRISTAUN SAI BABILÓNIA NIA DADUR?
8. Bainhira apóstolu sira mate hotu, saida mak akontese? (Haree dezeñu iha pájina 21.)
8 Iha loron Pentekostes tinan 33, ema rihun ba rihun neʼebé sai kristaun hetan kose-mina husi espíritu santu hodi sai ‘suku neʼebé Maromak hili ona, no amlulik sira neʼebé serbí nuʼudar liurai, nasaun santu ida, no povu neʼebé nia hili ba nia an rasik’. (Lee 1 Pedro 2:9, 10.) Apóstolu sira tau matan didiʼak ba Maromak nia kongregasaun. Maibé bainhira apóstolu sira mate hotu, ema balu husi kongregasaun laran hahú hanorin doutrina falsu oioin no sira mós hakarak dada dixípulu seluk atu tuir sira. Sira gosta uza filozofia husi Aristóteles no Plato hodi hanorin, duké hanorin Maromak nia Liafuan. (Apóstolu 20:30; 2 Tesalónika 2:6-8) Mane sira-neʼe barak mak iha knaar atu tau matan ba kongregasaun. No maski Jesus fó-hatene nanis ona katak sira hotu tenkesér sai hanesan maun-alin deʼit, maibé neineik-neineik sira komesa forma pozisaun iha kongregasaun atu sai ulun-naʼin.—Mateus 23:8.
9. Esplika toʼok oinsá mak ema kristaun sira neʼebé kontra lia-loos serbisu hamutuk ho governu Roma, no neʼe lori rezultadu saida?
9 Iha tinan 313 liutiha Kristu, Liurai Constantino neʼebé ukun Roma, halo grupu kristaun neʼe hodi sai relijiaun legál. Komesa husi tempu neʼebá, Igreja no governu Roma sempre serbisu hamutuk. Porezemplu, Constantino halaʼo enkontru boot ida iha sidade Niseia ho relijiaun nia ulun-naʼin sira. Enkontru neʼe liu tiha, Constantino duni sai amlulik ida naran Ário atu moris nuʼudar dadur tanba nia lakohi fiar katak Jesus mak Maromak. Tuirmai, iha Liurai Teodósio nia tempu (tinan 379-395), Igreja Katólika sai nuʼudar relijiaun ofisiál iha rai sira neʼebé Roma ukun. Istória-naʼin barak hatete katak iha Liurai Teodósio nia tempu ema jentiu barak husi Roma sai nuʼudar ema “kristaun”. Maibé tuir loloos, ema kristaun mak husik ona lia-loos no simu fali hanorin falsu hodi sai parte ba Babilónia Boot. Maski nuneʼe, sei iha ema kristaun kose-mina balu neʼebé laran-metin nafatin ba Maromak. Sira mak fini diʼak hanesan Jesus dehan, no sira hakaʼas an nafatin atu adora Maromak, maibé ema lakohi rona ba sira. (Lee Mateus 13:24, 25, 37-39.) Sira-nia moris mak hanesan dadur iha rai-Babilónia!
10. Tanbasá mak ema balu komesa duvida kona-ba igreja nia doutrina sira?
10 Tinan atus balu liutiha husi tempu neʼebé Jesus mate, ema barak sei hatene lee Bíblia iha lia-gregu ka lia-latín. Tan neʼe sira bele kompara hanorin husi Bíblia ho doutrina husi igreja. Bainhira ema balu haree katak igreja hanorin doutrina neʼebé falsu, sira lakohi simu hanorin sira-neʼe. Maibé perigu tebes ba sira atu fó sai sira-nia hanoin ba ema seluk, tanba ema bele oho sira iha tempu neʼebá.
11. Saida mak igreja nia ulun-naʼin sira halo ba Bíblia?
11 Nuʼudar tempu liu daudauk, ema ladún koʼalia ona lia-gregu ka lia-latín, no igreja nia ulun-naʼin sira mós bandu ema labele tradús Bíblia hodi ema baibain labele lee. Tan neʼe, amlulik ho ema neʼebé eskola deʼit mak iha oportunidade atu bele lee Bíblia, maibé tuir loloos, amlulik balu mós ladún hatene hakerek ka lee. Ema neʼebé la konkorda ho igreja nia doutrina bele simu kastigu. Ema kose-mina neʼebé laran-metin ba Maromak presiza halibur an subasubar, no balu la iha oportunidade atu halo hanesan neʼe. Situasaun neʼe hanesan ho ema judeu sira neʼebé moris nuʼudar dadur iha Babilónia. Ema kose-mina sira la bele organiza an ho livre hodi adora Maromak, tanba Babilónia Boot mak kontrola hela sira.
KOMESA ATU IHA NAROMAN FALI
12, 13. Razaun rua saida mak lori naroman ba ema kristaun neʼebé loos? Esplika toʼok.
12 Ema kristaun loos sei iha liberdade atu adora Maromak iha dalan neʼebé nia simu ka lae? Sin! Naroman komesa iha fali tanba razaun rua tuirmai neʼe. Primeiru, tanba ema foin inventa mákina foun atu halo livru sira maizumenus iha tinan 1450. Antes neʼe ema kopia Bíblia ho liman deʼit. Karik presiza fulan sanulu atu halo Bíblia ida. No buat neʼebé sira uza atu kopia mak halo husi animál-kulit, tan neʼe Bíblia ladún barak no karun tebes iha tempu neʼebá. Maibé ho mákina foun, loron ida ema bele print toʼo tahan 1.300 liu.
Inventa mákina foun no tradutór Bíblia sira neʼebé aten-brani fó esperansa ba ema atu sai husi Babilónia Boot (Haree parágrafu 12, 13)
13 Razaun segundu mak maizumenus iha tinan 1500, ema komesa brani atu tradús Bíblia hodi ema baibain bele lee. Tradutór sira-neʼe tau sira-nia moris iha perigu laran atu tradús Bíblia. Igreja nia ulun-naʼin sira taʼuk tebes kona-ba neʼe, tanbasá? Tanba bainhira ema laran-loos sira lee Bíblia, sira sei husu pergunta hanesan: ‘Iha neʼebé mak Bíblia temi kona-ba purgatóriu? Iha neʼebé mak Bíblia hatete katak ema tenke selu osan ba amlulik atu halo misa ba matebian? Iha neʼebé mak Bíblia temi kona-ba amu-papa no kardinál?’ Iha igreja nia doutrina sira, barak mai husi filozofia neʼebé Aristóteles no Plato hanorin, ema neʼebé moris kleur ona antes Jesus moris iha rai. Igreja nia ulun-naʼin sira hirus kuandu iha ema ruma husu kona-ba doutrina sira-neʼe, no se ema mak lakohi simu hanorin husi igreja, sira bele hetan kastigu mate. Neʼe mak dalan neʼebé igreja nia ulun-naʼin sira hapara ema atu la bele husu pergunta ka lee Bíblia. Maibé ema balu neʼebé aten-brani, sira la husik Babilónia Boot atu kontrola sira-nia moris. Sira hetan ona lia-loos no sira hakarak buka-hatene liután. Tempu atu sai husi relijiaun falsu nia liman mós besik ona.
14. (a) Ema neʼebé hakarak estuda Bíblia halo saida? (b) Esplika toʼok dalan neʼebé irmaun Russell buka lia-loos.
14 Ema barak hakarak lee, estuda, no koʼalia ba ema seluk kona-ba saida mak sira aprende husi Bíblia. Sira lakohi husik igreja nia ulun-naʼin mak haruka sira atu fiar ba saida. Tan neʼe sira muda ba rai seluk neʼebé iha liberdade hodi estuda Bíblia. Rai ida mak Estadus Unidus. Toʼo tiha tinan 1870, Charles Taze Russell ho ema balu hahú estuda kleʼan kona-ba Bíblia. Foufoun irmaun Russell hakarak buka-hatene relijiaun ida neʼebé mak hanorin lia-loos. Nia uza Bíblia hodi halo komparasaun ba hanorin husi relijiaun kristaun oioin, no mós husi relijiaun neʼebé laʼós kristaun. Nia haree katak la iha relijiaun ida husi sira mak halo tuir ho loloos hanorin sira husi Bíblia. Iha tempu ida, irmaun Russell hasoru ulun-naʼin husi igreja balu iha ninia área. Nia hanoin katak sira hakarak simu lia-loos neʼebé nia no ninia grupu hetan husi Bíblia hodi hanorin fali ba igreja sira. Maibé la iha ulun-naʼin ida husi igreja sira mak interese kona-ba neʼe. Ikusmai Estudante Bíblia sira rekoñese katak sira la bele adora Maromak hamutuk ho ema husi relijiaun falsu sira.—Lee 2 Korinto 6:14.
15. (a) Horibainhira mak ema kristaun loos sai dadur ba Babilónia Boot? (b) Lisaun tuirmai sei koʼalia kona-ba pergunta saida deʼit?
15 Ita aprende ona husi lisaun neʼe katak, bainhira apóstolu hotu mate, liutiha tempu balu ema kristaun loos sai Babilónia Boot nia dadur. Maibé ita hakarak buka-hatene tan pergunta hanesan: Oinsá mak ita hatene katak ema kose-mina komesa sai livre husi Babilónia Boot antes tinan 1914? Jeová la kontente ho ninia atan sira tanba haklaken la laʼo ba oin iha tempu Funu Mundiál Primeiru ka lae? Iha tempu neʼebá, iha ka lae irmaun balu neʼebé la neutrál, tan neʼe halo Jeová la kontente ho sira? Se ema kristaun mak sai dadur ba relijiaun falsu husi tempu neʼebé apóstolu hotu mate, horibainhira mak sira sai livre fali? Lisaun tuirmai sei koʼalia kona-ba pergunta sira-neʼe.
^ par. 3 Êxodo 2:23-25 23 Tempu kleur liutiha, liurai Ejitu nian mate, maibé ema Izraél halerik nafatin tanba sira-nia serbisu nuʼudar atan no sira hakilar tanba sira-nia susar no sira kontinua husu ajuda husi Maromak loos. 24 Ikusmai Maromak rona sira-nia halerik, no Maromak hanoin-hetan ninia aliansa ho Abraão, Isaac no Jacob. 25 Tan neʼe Maromak haree ba ema Izraél; no haree sira-nia terus.
Karik Ita sei gosta
DOKUMENTÁRIU
Testemuña ba Jeová—Hatudu fiar liuhusi hahalok, Parte 1: Sai husi nakukun laran
Neʼe mak istória kona-ba povu neʼebé hakarak tebes atu fó sai naroman lia-loos nian maski ema kontra sira. Sira-nia ezemplu sei anima ita atu kontinua serbí Maromak ho laran-metin.
