1. Ki ka kyalengejile bantu ba Lesa kuketekela’mba bakafumamo mu Babilona Mukatampe, kabiji ñanyi mepuzho o tusakwisambapo?

MU MUTWE wafumako, twafunjile pa kyalengejile bena Kilishitu ba kishinka kwikala bazha mu Babilona. Kyawamakotu ke kya kuba’mba kechi batwajijile kwikala mu buzha ne. Twayuka bino mambo Lesa wakambizhe’mba, “Bantu bami, lupukaimo mwi aye,” ko kuba’mba kufuma mu bupopweshi bwa bubela bwa ntanda yonse. (Tangai Lumwekesho 18:4.) Pano ñanyi kimye bantu ba Lesa kyo bafumine mu Babilona? Patanshi twafwainwa kukumbula ano mepuzho: Mwaka wa 1914 saka akyangye kufika, Bafunda Baibolo bamonanga byepi Babilona Mukatampe? Nanchi balongo betu basapwijilenga na mukoyo mu kimye kya Nkondo Itanshi ya Ntanda Yonse nyi? Nanchi bantu ba Lesa baikele bazha mu Babilona pa kuba’mba bebololeko ne kwibajimunako nyi?

2. Bafunda Baibolo bamonanga byepi bupopweshi bwa bubela?

² Mu myaka ya kunangijila ku Nkondo Itanshi ya Ntanda Yonse, Charles Taze Russell ne balunda banji bayukile’mba machechi  a Kilishitendomu kechi afunjishenga bukine bwa mu Baibolo ne. Onkao mambo, bafuukwilepo kuleka kupwanañana na bupopweshi bwa bubela. Magazini wa Zion’s Watch Tower wa November 1879, walumbulwile’mba: “Machechi onse etela’mba musongwa wa kwa Kilishitu bino saka akwatankana na makafulumende a pano pa ntanda (lukinyama mukatampe), kwesakana na byaamba Binembelo aji nobe pite,” ko kuba’mba Babilona Mukatampe.—Tangai Lumwekesho 17:1, 2.

3. Bafunda Baibolo baubile byepi pa kumwesha’mba baleka kupwanañana na bupopweshi bwa bubela? (Monai kipikichala kitanshi.)

³ Banabalume ne banabakazhi baakamwanga Lesa bayukile byo bafwainwe kuba. Bayukile’mba Lesa kechi wakonsheshe kwibapesha inge batwajijila kutundaika bupopweshi bwa bubela ne. Onkao mambo, Bafunda Baibolo bavula batumine makalata ku machechi o bayangamo kala kwibabuula’mba bafumamo. Bamo batanganga ano makalata pa mutuntamo mu chechi. Mu machechi mo bakanyanga kutanga ano makalata ku mvula bantu, batuminanga muntu yense wa mu chechi nkalata. Bafunda Baibolo kechi bakebelenga kutwajijila kupwanañana na bupopweshi bwa bubela ne. Inge baubilenga bino mu myaka ya kunyuma, inge bebepayile. Bino byo kyafikilenga mu 1870, makafulumende a mu byalo byavula alekele kukwasha machechi. Na mambo a kino, bantu bakasulukile kwisamba pa bya bupopweshi ne kukana byafunjishanga machechi.

4. Mu kimye kya Nkondo Itanshi ya Ntanda Yonse, bantu ba Lesa bamwenenga byepi Babilona Mukatampe?

⁴ Bafunda Baibolo bayukile’mba kechi bafwainwe kupelelatu pa kubuula balongo babo, balunda nabo, ne ba mu chechi kuba’mba baleka kutundaika bupopweshi bwa bubela ne. Bino ntanda yonse yafwainwe kuyuka Babilona Mukatampe kuba’mba pite wa bupopweshi. Onkao mambo, kutendeka mu December 1917 kufika ku ntendekelo ya mwaka wa 1918, jibumba jichechetu ja Bafunda Baibolo japaine matalakiti 10,000,000 ajinga na mutwe wa kuba’mba: “Kupona kwa Babilona.” Uno talakiti wasolwele patooka byajinga Kilishitendomu. Bantangi ba bupopweshi bazhingijile bingi, bino Bafunda Baibolo batwajijile kwingila uno mwingilo wanema wa kusapwila. Bafuukwilepo ‘kukookela Lesa amba ye kalama kechi bantu ne.’ (Byu. 5:29) Kino kibena kwitumweshapo ka? Kino kibena kumwesha’mba bano banabalume ne banabakazhi bena Kilishitu kechi baikele bazha mu Babilona Mukatampe kimye kya Nkondo Itanshi ya Ntanda Yonse ne, bino bafuminengamo kabiji bakwashishenga ne bakwabo kufumamo.

5. Ñanyi bishiino bimwesha’mba balongo basapwijilenga na mukoyo kimye kya Nkondo Itanshi ya Ntanda Yonse?

⁵ Kala twaitabijile’mba Yehoba wazhingijile bantu banji mambo kimye kya Nkondo Itanshi ya Ntanda Yonse kechi basapwijilenga na mukoyo ne. Onkao mambo, twashiinwe’mba o ene mambo Yehoba o aswishishe bantu banji kwibatwala mu buzha mu Babilona Mukatampe pa kimye kicheche. Pano bino, kufuma mu 1914 kufika mu 1918, kwajinga bakalume ba Lesa ba kishinka, kabiji kulutwe na lwendo, bashimikizhe’mba mu yoya myaka bantu ba Nkambo batwajijile na kusapwila papelejile bulume bwabo. Kuji bishiino bimwesha’mba byo byo baubilenga. Kuyuka bulongo bintu byapichilemo Bafunda Baibolo kwitukwasha kumvwisha bintu bimo byanembwa mu Baibolo.

6, 7. (a) Ñanyi makatazho ashinjile Bafunda Baibolo kimye kya Nkondo Itanshi ya Ntanda Yonse? (b) Ambaipo bimo bimwesha’mba Bafunda Baibolo baingijile na mukoyo.

 ⁶ Kishinka ke kya kuba’mba Bafunda Baibolo bajingako kimye kya Nkondo Itanshi ya Ntanda Yonse (1914-1918) baingijile na mukoyo kushimuna bukamonyi pa kyokya kimye. Bino kwajinga bintu bimo byalengejile uno mwingilo kukatazha. Twayai twisambeko pa bibiji. Kitanshi, kwingila mwingilo wa busapwishi mu oa moba kwaimenejile pa kusampanya mabuku alumbulula Baibolo. Kimye makafulumende kyo akainye kusampanya buku wa kuba’mba The Finished Mystery busapwishi bwakatezhe bingi ku balongo bavula. Kechi bafunjile kusapwila kwingijishatu Baibolo ne, mambo buku wa The Finished Mystery ye wibambilangako. Kya bubiji kyalengejile busapwishi kukatazha ke kikola kya kipwizhipwizhi (Spanish Influenza) mu 1918. Na mambo a kuba kino kikola kyatama bingi kyakumbenetu konse, kyalengejile basapwishi kubula kukasuluka kupitañana. Nangwa kya kuba kwajinga ano makatazho, Bafunda Baibolo kechi balekele kusapwila ne.

⁷ Mu mwaka wa 1914, jibumba jicheche ja Bafunda Baibolo jatambishe “Mashikopo wa Bilengwa na Lesa” ku bantu kukila pa 9,000,000. Mu uno Mashikopo mwajinga bipikichala ne nyimbo kabiji wamweshanga bwikalo bwa bantu kufumatu kimye kyalengelwe Adama kufika ne ku mpelo ya bukalama bwa kwa Kilishitu. Uno Mashikopo waingijile bingi bulongo pa kyokya kimye. Akilangulukaipotu. Bantu batambile uno mashikopo mu 1914 bavula kukila basapwishi ba Bufumu bonse babambakana baji mwaya ntanda yonse lelo jino. Kabiji masawakya amwesha’mba mu 1916 bantu 809,393 bo bataanwanga ku kupwila mu United States, kabiji mu 1918 bavujijileko kufika ku 949,444. Bano Bafunda Baibolo baingijilenga na mukoyo.

8. Balongo batangijilanga bakoseshe byepi Bafunda Baibolo mu kimye kya Nkondo Itanshi ya Ntanda Yonse?

⁸ Kimye kya nkondo itanshi ya ntanda yonse, balongo batangijilanga baingijilenga na ngovu kunengezha kajo ka ku mupashi ne kutundaika Bafunda Baibolo bapalañenejilemo. Bino bintu byakoseshe balongo kutwajijila na kusapwila. Richard H. Barber wapayankene na kusapwila pa kyokya kimye wavulukile’mba: “Twatundaikanga bakalama  ba myanzo bacheche bajingako kabiji twatwajijile kusampanya Kyamba kya Usopa ne kutuma ku Canada ko bakainye bantu kutambula uno magazini. Natumanga mabuku ache ache a kuba’mba The Finished Mystery ku balunda nami bo baangachile abo a kala. Mulongo Rutherford waambile’mba tunengezhe kushonkena ku muzhika wa United States ne kutuma bañambi kuya na kutundaika balunda netu.”

9. (a) Mambo ka bantu ba Lesa o bakebewenga kwibololako ne kwibajimunako pakachi ka mwaka wa 1914 ne 1919? (b) Mambo ka o kyabujila kuyilamo kwamba’mba bebatwajile mu buzha kuba’mba bebajimuneko?

⁹ Pakachi ka mwaka wa 1914 ne 1919, kuji bintu bimo byaubilenga Bafunda Baibolo byabujile kukwatankana na mafunde a mu Binembelo. Nangwa kya kuba bajinga ba kishinka, bano balongo kechi bayukile pa kupelela mu kukookela makafulumende ne. (Loma 13:1) Onkao mambo, bevwangilemo mu kutundaika nkondo. Kimye ndamakyalo wa United States kyo akambizhe’mba juba ja 30 May, 1918 jikekala juba ja kulombela mutende, Kyamba kya Usopa kyatundaikile Bafunda Baibolo kwivwangamo. Balongo bamo bapaineko mali a kutundaika nkondo, kabiji bakwabo basendele mata ne mapoko ne kuya ko balwijilenga nkondo. Nangwa byonkabyo, kechi kyakonsha kuyilamo kwamba’mba Bafunda Baibolo bebatwajile mu buzha mu Babilona Mukatampe kuba’mba bebololeko ne kwibajimunako ne. Mambo nkondo byo yatendekelenga, saka bayuka kala amba kechi bafwainwa kupwanañana na bupopweshi bwa bubela ne, kabiji kimye kya Nkondo Itanshi ya Ntanda Yonse, bajingatu pepi kufumamo mu bupopweshi bwa bubela bwa ntanda yonse. —Tangai Luka 12:47, 48.

10. Bafunda Baibolo bamwesheshe byepi amba banemekele bumi bwa bantu?

¹⁰ Nangwa kya kuba Bafunda Baibolo kechi bayukishe byo kilumbulula kubula kwivwanga mu milukuchi ya mu ntanda byonka byo twayuka ne, bino bayukile kishinka kya kuba’mba Baibolo wakanya kwipayañana. Nangwatu boba balongo bacheche basendele mata kimye kya Nkondo Itanshi ya Ntanda Yonse, bakainetu nsala nsala kwipaya bantu. Bamo bakaine kwipayañana bebatwajile konka kwakosejile nkondo kuba’mba bebepaye.

11. Bakulumpe ba mu kafulumende baubilepo byepi byo bamwene’mba Bafunda Baibolo bakana kwipayañana?

¹¹ Diabola wazhingijile bingi pa kumona bano balongo byo bakaine kwipayañana mu nkondo. Onkao mambo, wibaletejile makatazho kupichila mu kuletako mizhilo yakatazha. (Sala. 94:20) Mukulumpe wa bashilikale mu U.S. aye James Franklin Bell byo esambilenga na Mulongo J. F. Rutherford ne Mulongo W. E. Van Amburgh, waambile’mba Kipamo Kitala pa Bunchibamambo mu U.S. kyafuukwilepo kulenga muzhilo wa kuba’mba yense wakainenga kwingijisha mata mu nkondo bakamuzhachisha na mambo ne kumwipaya. Bantu bo aambilengapo bajinga Bafunda Baibolo. Saka azhingila, uno mukulumpe wa bashilikale aye, Bell wabuujile Mulongo Rutherford amba: “Bino [Bandamakyalo ba mu U.S.] ba Wilson bakaine kuswisha uno muzhilo; pano bino twayuka byo tukemukambula!”

12, 13. (a) Mambo ka balongo batanu na basatu batangijilanga kyo bebatayijile pa kaleya? (b) Nanchi kwibataya mu kaleya kwibalengejile kuleka kukookela Yehoba nyi? Lumbululai.

¹² Bakulumpe ba mu kafulumende batainepo jishinda ja kukambwilamo Bafunda Baibolo. Balongo baimenangako jibumba ja Watch Tower Society abo ba Rutherford,  ba Van Amburgh, ne balunda nabo batanu na umo bebatayile pa kaleya. Pa kwibazhachisha na mambo, mutonyi waambile’mba: “Bujimbijimbi bwa bupopweshi bwa bano banabalume bwatama kukila ne bashilikale ba bena Germany . . . Kechi bapelelatu pa kulengulula mizhilo ya kafulumende ne, bino balengulula ne bantangi ba machechi onse. Twafwainwa kwibakambula bingi.” (Buku wa Faith on the March, wanembele ba A. H. Macmillan, ji. 99) Ne kine bebakambwile. Bano Bafunda Baibolo batanu na basatu bebatayile pa kaleya kakatampe kajinga mu muzhi wa Atlanta, mu kibunji kya Georgia. Nkondo byo yapwile, bebakasulwile, ne mambo onse o bebakashijilepo apwile.

¹³ Nangwatu byo bajinga mu kaleya, bano banabalume bakakachijile ku Binembelo byo bafunjile. Mu nkalata yo banembejile ndamakyalo wa United States ya kulomba’mba bebakasulule, banembele’mba: “Binembelo byaamba’mba kyaswa muchima wa Nkambo yetu ke kino: ‘Kechi wafwainwa kwipayañana ne.’ Kabiji muntu yense wipana kwi Nkambo kabiji uji mu jibumba ja [Bafunda Baibolo] inge walengulula mulaye wanji wa kwipana kwi Nkambo kechi ukamona bibusa bya Lesa ne, kabiji ukonaunwa kikupu. Onkao mambo, bantu ba mu jino jibumba kechi bakonsha kwivwanga mu nkondo ne kwipayañana ne.” Bino byambo bya kuchinchika byamwesheshe patoka’mba bano balongo bafuukwilepo kukookela Yehoba.

14. Lumbululai byamwekele pakachi ka mwaka wa 1914 ne 1919 kwesakana na byaamba binembelo.

¹⁴ Kinembelo kya Malakai 3:1-3 kyalumbulula byamwekele kutatula mu mwaka wa 1914 kufika ku ntendekelo ya 1919, amba “baana ba kwa Levi” bashingwa bakebatokesha. (Tangai.) Pa kyokya kimye, Yehoba Lesa, aye “Nkambo wa kine” pamo ne Yesu Kilishitu, “muluwe wa lulayañano” baishile ku nzubo ya Lesa ya ku mupashi na kumona boba baingijilengamo. Panyuma ya kwibajimunako, Yehoba wibatokeshe ne kwibapa mingilo ikwabo. Mu 1919, Yehoba watongwele “kalume wa kishinka kabiji wa maana” kuba’mba apanenga kajo ka ku mupashi pa kimye kyafwainwa ku ba mu nzubo yanji. (Mat. 24:45) Pa kikye kimye, bantu ba Lesa bafuminemo mu Babilona Mukatampe. Kufuma kyokya kimye, Yehoba watwajijila kukwasha bantu banji kukomenako mu maana a kuyuka kyaswa muchima wanji ne mu butemwe bo batemwa Shabo wa mwiulu. Tumusanchila bingi pa ano mapesho! ^[1]

15. Twakonsha kumwesha byepi amba tusanta pa byo betufumya mu Babilona Mukatampe?

¹⁵ Byo kyawamapo kufuma mu buzha ku Babilona Mukatampe. Satana wakankalwa kuzhiisha bena Kilishitu ba kine pano pa ntanda. Nangwa byonkabyo, kechi twafwainwa kutambula bwana bwa bene bwitupa Yehoba ne kwibwalula kwikala ke bwatutu ne. (2 Ko. 6:1) Bantu bavula bakeba kufunda bukine bakiji mu buzha mu bupopweshi bwa bubela. Twafwainwa kwibafunjisha byo bakonsha kufumamo mu buno buzha. Onkao mambo, byonka byaubile balongo betu mu myaka ya kunyuma, twayai ne atweba tukwashe bantu kufuma mu buzha!