1. a) Mmunyi mutudi bamanye ne: bantu ba Nzambi bavua ne bua kupatuka mu bupika mu Babilona Munene? b) Nnkonko kayi ituandamune mu tshiena-bualu etshi?

TUVUA bamone mu tshiena-bualu tshishale ne: Babilona Munene uvua mukuate bena Kristo ba lulamatu mu bupika. Lumu luimpe ludi ne: kabavua mua kushala mu bupika bua kashidi to. Tudi bamanye bualu ebu bualu mu Bible, Nzambi udi wambila bantu bende bua ‘kupatuka munkatshi’ mua nsangilu wa bitendelelu bia dishima bia pa buloba bujima. (Bala Buakabuluibua 18:4.) Bualu ebu budi buleja ne: bena Kristo bavua ne bua kupatuka mu Babilona Munene. Tudi ne dijinga dikole dia kumanya tshikondo tshivuabu ne bua kupeta budikadidi. Kadi kumpala, tudi ne bua kuandamuna nkonko idi ilonda eyi: Ntshinyi tshivua Balongi ba Bible badisuike bua kuenza bua Babilona Munene katshia anu kumpala kua 1914? Bana betu bavuaku bayisha ne tshisumi mu tshikondo tshia Mvita ya kumpala ya buloba bujima anyi? Bu muvua bantu ba Nzambi dijinga ne kuakaja amue malu tshikondo atshi, tudiku mua kuamba ne: bavua mu bupika mu Babilona anyi?

2. Ntshinyi tshivua Balongi ba Bible ba ntuadijilu badisuike bua kuenza kumpala kua Mvita ya kumpala ya buloba bujima kutuadija?

² Bidimu bia bungi kumpala kua Mvita ya kumpala ya buloba bujima kutuadija (1914-1918), Charles Taze Russell ne Balongi ba Bible bakuabu bakajingulula ne: bitendelelu bia bukua buena Kristo kabivua bilongesha bulelela bua mu Bible to. Nunku, kabavua basue kubuelakana ne bitendelelu bia dishima to. Mu 1879, Tshibumba tshia Nsentedi tshia Siyona tshiakamba ne: tshitendelelu tshionso tshidi tshidiamba muditshi mukaji wa Kristo wa lulamatu eku tshitua mbulamatadi nyama ku mikolo tshidi mu Babilona Munene udi Bible ubikila ne: ndumba.​—Bala Buakabuluibua 17:1, 2.

3. Ntshinyi tshivua Balongi ba Bible benze bua kuleja ne: kabatshivua kabidi bena mu bitendelelu bia dishima? (Tangila tshimfuanyi tshia ntuadijilu tshia tshiena-bualu.)

³ Bantu balume ne bakaji ba lulamatu bavua bamanye ne: bobu batungunuke ne kutua bitendelelu bia dishima nyama ku mikolo, Nzambi kavua mua kubabenesha to. Nunku, ba bungi ba kudibu bakatumina bena mu bitendelelu bivuabu mikanda bamba ne: kabavua basue kuikala benamu kabidi to. Bamue bavua mene babale mikanda yabu kumpala kua bena mu tshitendelelu bonso. Mu tshitendelelu muvuabu kabayi banyishe bua kuenza nunku, bavua batumina muena mu tshitendelelu yonso mukanda. Balongi ba Bible bakaleja patoke ne: kabavua basue kubuelakana ne bitendelelu bia dishima to. Bidimu bia bungi kumpala, bavua mua kubashipa bobu benze nunku. Kadi, kutuadijila mu 1870, mbulamatadi ya mu matunga a bungi kayivua yambuluisha kabidi bitendelelu bu muvuayi yenza kumpala to. Mpindieu bantu bavua mua kuakula bua malu a mu Bible badilekelele anyi mene kubenga malongesha a bitendelelu.

4. Mu tshikondo tshia Mvita ya kumpala ya buloba bujima, mmunyi muvua Balongi ba Bible bamona Babilona Munene? Umvuija.

⁴ Balongi ba Bible bakamona ne: bivua bikengela kuenza malu makuabu pa kumbusha kuambila bena mu mêku abu, balunda babu ne bena mu tshitendelelu tshiabu ne: kabavua mua kutua tshitendelelu tshia dishima nyama ku mikolo. Bavua basue bua bantu ba pa buloba bujima bamanye ne: Babilona Munene nndumba mu malu a ntendelelu. Nunku, kutuadijila mu ngondo wa 12 mu 1917 too ne ku ntuadijilu kua 1918, Balongi ba Bible binunu bikese bakabanya ne tshisumi trakte wa ne: “Dikuluka dia Babilona” (Angl.) miliyo 10. Trakte eu wakaleja patoke bulelela pa bidi bitangila bukua buena Kristo. Anu muudi mua kuela meji, bamfumu ba bitendelelu bakafiika munda. Kadi Balongi ba Bible kabakalekela to. Bavua badisuike bua kutungunuka ne kuyisha ne kutumikila “Nzambi bu mfumu pamutu pa kutumikila bantu.” (Bienzedi 5:29) Ebi bidi bituleja tshinyi? Bidi bituleja ne: mu tshikondo tshia Mvita ya kumpala ya buloba bujima, bena Kristo balume ne bakaji aba kabavua baye mu bupika to, kadi bavua munkatshi mua dipatuka mu bitendelelu bia dishima ne bambuluisha bantu bakuabu bua bapatuke pabu.

5. Bua tshinyi tudi tuamba ne: bana betu bavua ne tshisumi tshia bungi mu tshikondo tshia Mvita ya kumpala ya buloba bujima?

⁵ Ku kale, tuvua tuamba ne: Nzambi kavua wanyisha bantu bende mu tshikondo tshia Mvita ya kumpala ya buloba bujima bualu kabavua bayisha ne tshisumi to. Bua bualu ebu, tuvua tuela meji ne: Yehowa uvua muanyishile Babilona Munene bua kubakuata mu  bupika bua tshitupa tshîpi. Kadi, bana betu ba balume ne ba bakaji ba lulamatu bavua benzela Nzambi mudimu kumbukila mu 1914 too ne mu 1918 bakaleja pashishe ne: mu tshibungi, bavua badienzeja bikole bua kutungunuka ne kuyisha. Ngumvuilu muimpe wa tshivua tshifikile Balongi ba Bible mu tshikondo atshi udi utuambuluisha bua kumvua amue malu a mu Bible.

6, 7. a) Nntatu kayi ivua Balongi ba Bible bapete mu tshikondo tshia Mvita ya kumpala ya buloba bujima? b) Ntshinyi tshidi tshileja ne: Balongi ba Bible bavua ne tshisumi?

⁶ Mu bulelela, mu tshikondo tshia Mvita ya kumpala ya buloba bujima, Balongi ba Bible bavua bayisha bikole. Kadi bavua kabidi bapete ntatu ya bungi. Tuakulayi bua ibidi ya kudiyi. Lua kumpala, kabavua balongeshe Balongi ba Bible mua kuyisha anu ne Bible to. Bavua ne tshibidilu tshia kuabanyina bantu mikanda bua yoyi nkayayi yumvuije bulelela. Nunku, pavua mbulamatadi mukandike mukanda wa Le mystère accompli ku ntuadijilu kua 1918, mudimu wa kuyisha wakakolela bana betu ba bungi. Lutatu lukuabu luvua lumueneke anu mu tshidimu atshi luvua lua gripe wa bena Espanye. Disama dibi edi divua diambulukila bantu bikole ne dienza bua bikale bikole bua bana betu kuenza ngendu ne kuyisha. Kadi nansha muvuaku ntatu eyi, Balongi ba Bible bakenza muabu muonso bua kutungunuka ne kuyisha.

⁷ Mu 1914, kasumbu kakese ka Balongi ba Bible kavua kaleja bantu filme wa “Foto-drama wa bufuki.” (Angl.) Filme eu muenza ne bimfuanyi binyunga ne mêyi uvua tshintu tshipiatshipia kudi bantu tshikondo atshi. Bavua bamubikila ne: Drama, ne uvua muyuki wa nsombelu wa bantu kumbukila ku difukibua dia Adama too ne ku ndekelu kua bukokeshi bua Kristo. Mu 1914, tshidimu tshia kumpala tshivuabu baleje filme eu, bakamumona kudi bantu bapite pa miliyo 9. Anji elabi meji. Bungi bupite bua Bantemu ba Yehowa badi pa buloba bujima lelu! Luapolo mikuabu idi ileja ne: mu 1916, bantu bapite pa binunu 809 bavua babuele mu bisangilu bia patoke mu États-Unis, ne mu 1918, bantu bakavula, kufikabu ku binunu 950. Bushuwa, Balongi ba Bible abu bavua ne tshisumi!

8. Mmunyi muvua bana betu bavua balombola bakankamije Balongi ba Bible mu tshikondo tshia Mvita ya kumpala ya buloba bujima?

⁸ Mu tshikondo tshia Mvita ya kumpala ya buloba bujima, bana betu bavua balombola  bavua benza mudimu mukole wa kupatula mikanda ya malu a mu Bible ne kukankamija Balongi ba Bible bonso. Dienza nunku divua dibakolesha bua kutungunuka ne kuyisha. Richard Barber uvua uyisha ne tshisumi tshikondo atshi wakamba ne: “Tuvua balongolole bua kuikale ndambu wa batangidi bena ngendu ne bua bantu bikale bapeta Tshibumba tshia Nsentedi ne kutshituma mu Canada muvuabu batshikandike.” Wakatungunuka wamba ne: “Mvua ne diakalenga dia kutumina bana betu mikanda ya Le mystère accompli ivua mua kukumbana mu mpaya bua muvuabu babanyenge yabu. Muanetu Rutherford wakatulomba bua kulongolola mpungilu mu bimenga bia bungi bia ku ouest kua États-Unis ne kutumaye bangamba-malu bua kukankamija bana betu.”

9. a) Bua tshinyi bantu ba Nzambi bavua dijinga ne kuakaja amue malu kumbukila mu 1914 too ne mu 1919? b) Nansha muvuabu dijinga ne kuakaja amue malu, ntshinyi tshitudi katuyi mua kuamba?

⁹ Kutshivua malu kampanda avua Balongi ba Bible ne bua kuakaja. Kabavua bumvue bimpe tshivua Yehowa usua kuamba pavuaye muambe bua kutumikila mbulamatadi to. (Lomo 13:1) Ke bualu kayi, mu tshibungi bavua imue misangu babuelakana mu malu a mvita. Tshilejilu, pavua mfumu wa ditunga dia États-Unis mulombe bantu bua kusambila bua ditalala mu dia 30 ngondo 5 mu 1918, Tshibumba tshia Nsentedi tshiakalomba Balongi ba Bible bua kusambilabu pabu. Bamue bana betu bakafila makuta bua kuambuluisha mu malu a mvita, ne bakese ba kudibu bakalua mene basalayi ne kuyabu ku mvita. Kadi nansha mutshivuabu dijinga ne kuakaja amue malu, katuena mua kuamba ne: aka ke kabingila kavuabu babakuatshile mu bupika mu Babilona Munene to. Bulelela budi ne: mu tshikondo tshia Mvita ya kumpala ya buloba bujima, bakavua baditapulule ne nsangilu wa bitendelelu bia dishima mu malu a bungi.​—Bala Luka 12:47, 48.

10. Mmunyi muvua Balongi ba Bible baleje muvuabu banemeka muoyo?

¹⁰ Bulelela budi ne: Balongi ba Bible kabavua bumvue bimpe menemene tshivua kubenga kubuelakana mu malu a pa buloba kumvuija bua bena Kristo to. Kadi, bavua bamanye ne: bivua bibi bua kushipa muntu. Nunku, nansha muvua bana betu bakese balue basalayi ne bambule bingoma mu Mvita ya kumpala ya buloba bujima, bavua babenge bua kushipa muntu nabu. Bavua bateke bamue bavua babenge kushipa bantu mu mulongo wa kumpala mu mvita bua babashipe bobu.

11. Ntshinyi tshivua mbulamatadi muenze pavua Balongi ba Bible babenge bua kuya ku mvita?

¹¹ Diabolo uvua ne tshiji bua muvua bana betu ne lulamatu kudi Nzambi. Ke bualu kayi ‘wakalongolola dikenga mu dîna dia mikenji.’ (Musambu 94:20, NWT) Kamanda ka basalayi ba mu États-Unis James Franklin Bell wakambila muanetu Rutherford ne Van Amburgh ne: mbulamatadi uvua ukeba kuela mukenji uvua wanyisha bua kukosela muntu udi ubenga kuya mu mvita tshibawu tshia lufu. Bavua bawela nangananga bua Balongi ba Bible. Kamanda ka basalayi kakambila muanetu Rutherford ne tshiji tshionso ne: mukenji eu ki mmuedibue bualu mfumu wa ditunga dia États-Unis uvua mubenge. Kamanda ka basalayi kakamba pashishe ne: “Kadi tudi bamanye kua kunukuatshila, ne netunukuate.”

12, 13. a) Bua tshinyi bavua bakosele bana betu ba balume muanda mukulu buloko bua bidimu bia bungi? b) Diedibua mu buloko divuaku ditekeshe dipangadika diabu dia kutumikila Yehowa anyi? Umvuija.

¹² Ndekelu wa bionso mbulamatadi wakapeta mushindu wa kunyoka Balongi ba Bible. Bakakuata muanetu Rutherford ne Van  Amburgh pamue ne bana betu bakuabu basambombo bavua baleji mpala ba Balongi ba Bible. Mulumbuluishi uvua utangila tshilumbu tshiabu wakamba ne: bana betu aba bavua bakebesha njiwu ya bungi kupita tshisumbu tshimue tshia basalayi ba bena Allemagne. Wakamba ne: bavua bapetule mbulamatadi, basalayi ne bitendelelu bionso ne bavua ne bua kunyokibua bikole. ^[1] (Tangila note ku ndekelu.) Nunku bakakosela Balongi ba Bible muanda mukulu aba tshibawu tshia buloko bua kuenza bidimu bia bungi mu Atlanta, mu Georgie. Kadi pakajika mvita bakabalekela, ne kabakabalondakaja kabidi to.

¹³ Nansha pavua bana betu ba balume muanda mukulu aba mu buloko, bavua badisuike bua kutumikila mikenji ya Nzambi. Mmunyi mutudi bamanye bualu ebu? Bavua bafundile mfumu wa ditunga dia États-Unis bua kumulomba bua abapatule mu buloko. Mu mukanda eu, bavua bambe ne: Bible udi utuambila bua kubenga kushipa bantu, nunku muntu yonso udi mudilambule kudi Nzambi ne ubenga ku bukole bua kumutumikila, neajimije dianyishibua diende kudiye ne neabutudibue. Bakumvuijamu ne: bualu ebu ke buvua bubasaka bua kubenga kushipa muntu nabu. Bivua bilomba dikima bua kufundila mfumu wa ditunga mukanda wa mushindu eu. Kakuyi mpata, bana betu kabavua mua kutekesha dipangadika diabu dia kutumikila Yehowa to.

14. Umvuija mudi Bible uleja tshivua tshienzeke kumbukila mu 1914 too ne mu 1919.

¹⁴ Malaki 3:1-3 udi umvuija tshivua tshifikile Balongi ba Bible kumbukila mu 1914 too ne ku ntuadijilu kua 1919. (Bala.) Yehowa Nzambi, ‘Mukalenge’ mulelela, ne Yezu Kristo, ‘messager wa dipungila,’ bakalua bua kutangila “bana ba Lewi” badi tshimfuanyi tshia bela manyi. Yehowa mumane kubalengeja ne mubakezule, bakalua bakumbane bua kuenza mudimu mupiamupia. Mu 1919, Yezu wakajadika ‘mupika wa lulamatu udi mudimuke,’ kumupesha mudimu wa kulombola ne kulongesha batendeledi ba Nzambi bonso. (Matayi 24:45) Ndekelu wa bionso, bantu ba Nzambi bakapatuka mu bupika mu Babilona Munene. Katshia anu ku tshikondo atshi, badi balonga bua kumanya disua dia Nzambi, ne dinanga diabu kudiye ndikole. Badi ne dianyisha dia bungi bua mudiye mubabeneshe. ^[2]​—Bala note ku ndekelu.

15. Mmunyi mutudi mua kuleja ne: tudi ne dianyisha bua mudibu batupatule mu bupika mu Babilona Munene?

¹⁵ Tudi ne dianyisha dia bungi bua mudibu batupatule mu bupika mu Babilona Munene. Satana ki mmukumbane bua kubutula ntendelelu mulelela to. Mmupangile. Kadi tudi ne bua kuvuluka tshidi Yehowa mutupatuile mu bupika. Tshipatshila tshiende ntshia kusungila bantu bonso. (2 Kolinto 6:1) Kadi, ntendelelu wa dishima utshidi anu ukokesha bantu ba muoyo muimpe miliyo ya bungi, ne badi dijinga ne diambuluisha dietu. Tuenzayi muetu muonso bua kuidikija bana betu bavua bashale ne lulamatu, tuambuluishe bantu bua kupatuka mu bupika.