1. Кӕцӕй ӕй зонӕн, Хуцауи адӕн Устур Вавилони уацарӕй ке гъӕуама исуӕгъдӕ адтайуонцӕ ӕма цӕхуӕн фарстатӕмӕ ӕркӕсдзиан?

АЙРАЗИККОН статьяй базудтан, еузӕрдон киристӕнттӕ Устур Вавилони уацармӕ куд бахаудтӕнцӕ, уой. Фал гъӕуама уордиги исуӕгъдӕ адтайуонцӕ. Еци гъуддагӕн гӕнӕн ку н ’адтайдӕ, уӕд Хуцау ӕ адӕнӕн уотӕ нӕ загътайдӕ, «рацотӕ си», зӕгъгӕ. (Бакӕсӕ Раргомадӕ 18:4.) Мадта Хуцауи адӕн Устур Вавилони уацарӕй еугур уӕгъдӕ кӕд иссӕнцӕ? Фиццаг бал ӕркӕсӕн аци фарстатӕмӕ: 1914-аг анзи размӕ Библиртасгутӕй ма Устур Вавилони ка адтӕй, етӕ цӕхуӕн унаффӕ рахастонцӕ? Фиццаг дуйнеуон тугъди рӕстӕг не ’нсувӕртӕ игъосун кӕнуни гъуддаги зӕрдиагӕй ке архайдтонцӕ, е цӕмӕй бӕрӕг адтӕй? Цума еци рӕстӕг Хуцауи адӕн Вавилони уацари уой туххӕй бахаудтӕнцӕ, ӕма сӕ кӕцидӕр гъуддӕгти бараст кӕнун гъудӕй?

2. Библиртасгутӕ киристон динти туххӕй ци балӕдӕрдтӕнцӕ?

² Фиццаг дуйнеуон тугъдӕй берӕ ӕнзтӕ раздӕр, Чарлз Тейз Расселл ӕма ма ӕндӕр Библиртасгутӕ балӕдӕрдтӕнцӕ, киристон динтӕ Библий рӕстдзийнадӕ ке нӕ амонунцӕ.  Уомӕ гӕсгӕ сӕ нӕбал фӕндадтӕй, цӕмӕй син сӕ хӕццӕ еумӕйагӕй ести адтайдӕ. 1879-аг анзи «Сиони Гъӕуайгӕнӕн мӕсуги» финст адтӕй: «Алли аргъауӕн дӕр, ӕхе Киристей кӕдзос киндзаг ка хонуй, ӕцӕгӕй ба ӕхе аци дуйнебӕл ка бӕттуй ӕма ӕ нифс уобӕл ка даруй, е, Библи куд зӕгъуй, уомӕ гӕсгӕ хӕтагӕ силгоймаг ӕй». Дзурд си цудӕй Устур Вавилони туххӕй. (Бакӕсӕ Раргомадӕ 17:1, 2.)

3. Библиртасгутӕ ци бакодтонцӕ, мӕнгӕ дини хӕццӕ син еумӕйагӕй ке неци ес, уой ку балӕдӕрдтӕнцӕ, уӕд? (Кӕсӕ хузӕмӕ статьяй райдайӕни.)

³ Хуцауӕй ка тарстӕй, еци адӕн зудтонцӕ, ци син кӕнгӕ ’й, уой. Етӕ ’й лӕдӕрдтӕнцӕ, идарддӕр дӕр мӕнгӕ дини хӕццӕ баст ку уонцӕ, уӕд син Хуцау ке нӕбал арфӕ кӕндзӕй. Уомӕ гӕсгӕ Библиртасгутӕй беретӕ сӕ аргъауӕнтӕмӕ финстӕгутӕ ниффинстонцӕ, уордиги цӕугӕ ке кӕнунцӕ, уой фӕдбӕл. Еуӕй-еуетӕ сӕ финстӕгутӕ аргъауӕни адӕни размӕ бакастӕнцӕ. Уӕхӕн барӕ кӕмӕн нӕ равардтонцӕ, етӕ ба си алкӕмӕдӕр хецӕн къопи рарвистонцӕ. Бӕрӕг ӕй, мӕнгӕ динӕй рацӕун сӕ ке фӕндадтӕй. Раздӕр сӕ уӕхӕн гъуддаги туххӕй маргӕ дӕр ракодтайуонцӕ. Фал 1870-аг анзи берӕ бӕстити аргъауӕнтӕ хецауади ӕнхусӕй уӕхӕн нифсгун нӕбал адтӕнцӕ. Нур уӕхӕн бӕстити адӕни бон адтӕй Библий туххӕй сӕребарӕй дзорун, сауӕнгӕ ма аргъауӕни нихмӕ дӕр.

4. Фиццаг дуйнеуон тугъди рӕстӕг Библиртасгутӕ Устур Вавилонмӕ цӕхуӕн цӕстӕй кастӕнцӕ?

⁴ Библиртасгутӕ ’й балӕдӕрдтӕнцӕ, мӕнгӕ дин ке ниууагътонцӕ, уой сӕ хӕстӕгутӕн, се ’мбӕлттӕн ӕма, аргъауӕнмӕ ке хӕццӕ цудӕнцӕ, уонӕн зӕгъун фагӕ ке нӕй. Ӕгас дуйне дӕр ӕй гъӕуама базудтайдӕ, Устур Вавилон хӕтагӕ силгоймаг ке ӕй! Уомӕ гӕсгӕ 1917-аг анзи кӕронӕй 1918-аг анзи райдайӕнмӕ цалдӕр мин Библиртасӕги райурстонцӕ 10 000 000 буклетти. Еци буклет хунттӕй «Вавилон бабун ӕй», зӕгъгӕ, ӕма си ӕргом финст адтӕй киристон динти туххӕй. Расагъӕс кӕнӕ, дини разамонгутӕ фур мӕстӕй куд ирадӕнцӕ! Фал Библиртасгутӕ еци ӕхсидзгӕ куст нӕ ниууагътонцӕ, уомӕн ӕма фиццагидӕр Хуцаумӕ игъустонцӕ, адӕнмӕ нӕ, фал (Гъуд. 5:29). Мадта бӕрӕг ӕй, еузӕрдон киристӕнттӕ мӕнгӕ дини уацармӕ Фиццаг дуйнеуон тугъди рӕстӕг ке нӕ бахаудтӕнцӕ. Еци рӕстӕг си етӕ уӕгъдӕ иссӕнцӕ ӕма ма иннетӕн дӕр еци гъуддаги ӕнхус кодтонцӕ.

5. Цӕмӕ гӕсгӕ ес зӕгъӕн, ӕма Фиццаг дуйнеуон тугъди рӕстӕг хуӕртӕ ӕма ӕнсувӕртӕ игъосун кӕнуни гъуддаги зӕрдиагӕй архайдтонцӕ?

⁵ Раздӕр уотӕ дзурдтан, ӕма Хуцау ӕ адӕнӕй Фиццаг дуйнеуон тугъди рӕстӕг арази н’ адтӕй, уомӕн ӕма игъосун кӕнуни гъуддаги зӕрдиагӕй нӕ архайдтонцӕ. Уомӕ гӕсгӕ уӕхӕн гъудимӕ ӕрцудан, ӕма сӕ Йеговӕ цубур рӕстӕгмӕ Устур Вавилони къохмӕ уой туххӕй равардта. Фал 1914-аг анзӕй 1918-аг анзмӕ ка лӕггадӕ кодта, еци еузӕрдон хуӕртӕ ӕма ӕнсувӕртӕ куд зӕгъунцӕ, уомӕ гӕсгӕ, сӕ бон ци адтӕй, уой кодтонцӕ, цӕмӕй игъосун кӕнуни гъуддаг ма ’рлӕудтайдӕ. Ӕма уомӕн ес федар бӕлвурдгӕнӕнтӕ. Библиртасгутӕбӕл еци рӕстӕг ци хабӕрттӕ ӕрцудӕй, уони фӕрци Библий финст хабӕрттӕ хуӕздӕр лӕдӕрӕн.

6, 7. а) Библиртасгутӕ Фиццаг дуйнеуон тугъди рӕстӕг цӕхуӕн зиндзийнӕдтӕбӕл исӕмбалдӕнцӕ? б) Библиртасгутӕ хъӕбӕр зингзӕрдӕй ке архайдтонцӕ, е цӕмӕй бӕрӕг адтӕй?

⁶ Мадта бӕрӕг ӕй, Фиццаг дуйнеуон  тугъди рӕстӕг Библиртасгутӕ игъосун кӕнуни гъуддаги зӕрдиагӕй ке архайдтонцӕ. Фал е ӕнцон н ’адтӕй дууӕ гъуддагей туххӕй. Фиццаг: 1918-аг анзи хецауадӕ нӕбал уагътонцӕ пайда кӕнун киунугӕй «Сосӕгдзийнадӕ раргом ӕй». Уӕди рӕстӕги ба игъосун кӕнгӕй фулдӕр пайда кодтонцӕ, рӕстдзийнадӕ ка лӕдӕрун кодта, уӕхӕн киунугутӕй. Уомӕ гӕсгӕ ӕнсувӕртӕй беретӕн игъосун кӕнун ӕнцон нӕбал адтӕй, уомӕн ӕма айдагъ Библийӕй пайда кӕнун ахур н’ адтӕнцӕ. Дуккаг: 1918-аг анзи исхуӕстӕй грипп Испанкӕ. Еци лӕгъуз нез уотӕ хъӕбӕр ке рапурхӕ ’й, уой туххӕй игъосунгӕнгути бон н’ адтӕй алкӕми игъосун кӕнун. Еци зиндзийнӕдти рӕстӕг дӕр Библиртасгутӕ, сӕ бон ци адтӕй, уой кодтонцӕ, цӕмӕй игъосун кӕнуни гъуддаг ма ’рлӕудтайдӕ.

⁷ 1914-аг анзи Библиртасгути минкъий къуар 9 000 000 фулдӕр адӕймагемӕн бавдистонцӕ «Сфӕлдистади фотодрамӕ». Еци драми байеу кодтонцӕ кинокадртӕ, слайдтӕ ӕма звук. Ӕвдист си цудӕй Библий финст хабӕрттӕ, Адамӕй райдайӕ ӕма Киристей минанзон хецаудзийнадӕй фӕууо. Уӕди рӕстӕги е нӕуӕг цидӕр адтӕй. Расагъӕс кӕнӕ, еци драмӕмӕ айдагъ 1914-аг анзи цал адӕймаги бакастӕй, уони нимӕдзӕ, абони ӕгас зӕнхӕбӕл Йегови Ӕвдесӕнтӕ цӕйбӕрцӕ ’нцӕ, еци нимӕдзӕй фулдӕр адтӕй! Уӕди рӕстӕги бӕрӕггӕнӕнтӕмӕ гӕсгӕ 1916-аг анзи Еугонд Штатти ӕмбурдтӕмӕ цудӕй 809 393 адӕймаги, 1918-аг анзи ба иссӕнцӕ 949 444 адӕймаги. Куд ӕй уинӕн, уотемӕй Библиртасгутӕ хъӕбӕр зингзӕрдӕй архайдтонцӕ!

8. Фиццаг дуйнеуон тугъди рӕстӕг ӕнсувӕртӕ Библиртасгути куд федар кодтонцӕ?

⁸ Фиццаг дуйнеуон тугъди рӕстӕг ӕнсувӕртӕ сӕхебӕл нӕ аурстонцӕ, цӕмӕй Библиртасгути алли рауӕнти дӕр федар кодтайуонцӕ ӕма архайдтонцӕ, цӕмӕй син Библибӕл арӕзт литературӕ адтайдӕ. Уой фӕрци Хуцауи адӕни бон адтӕй идарддӕр игъосун кӕнун. Еци рӕстӕг зингзӕрдӕй ка игъосун кодта, еу уӕхӕн ӕнсувӕр, Ричард Барбер, зӕгъгӕ, радзурдта: «Мах хъӕбӕр байархайдтан, цӕмӕй цӕуӕг цӕстӕдаргутӕн сӕ бон адтайдӕ идарддӕр дӕр къуӕрттӕ бӕрӕг кӕнун, удта цӕмӕй „Гъӕуайгӕнӕн мӕсуг“ идарддӕр уагъд цудайдӕ. Уомӕй уӕлдай ма еци журнал Канадӕмӕ  дӕр ӕрвистан, кӕд ӕй уоми хецауадӕ нӕ уагътонцӕ, уӕддӕр. [...] Ӕнсувӕртӕ ӕма хуӕртӕй кӕмӕндӕрти сӕ киунугутӕ, „Сосӕгдзийнадӕ раргом ӕй“, зӕгъгӕ, байстонцӕ. Ӕма сӕмӕ уӕхӕн киунугутӕ ӕрвистон, дзиппи ка цудӕй, уӕхӕн форматти. Ӕнсувӕр Рутерфорд ба нин загъта, цӕмӕй Еугонд Штатти нигулӕн ӕрдиги цалдӕр горӕтеми конгресстӕ бацӕттӕ кодтайанӕ ӕма уордӕмӕ радзубандити хӕццӕ ӕнсувӕрти рарвистайанӕ, цӕмӕй не ’нсувӕрти бафедар кодтайуонцӕ».

9. а) Хуцауи адӕни 1914-аг анзӕй 1919-аг анзи уӕнгӕ цӕхуӕндӕр гъуддӕгти бараст кӕнун цӕмӕн гъудӕй? б) Бараст кӕнун сӕ ке гъудӕй, е цӕбӕл дзорӕг н’ адтӕй?

⁹ Еци рӕстӕг ма Библиртасгути гъудӕй цидӕр гъуддӕгти бараст кӕнун. Кӕд сӕ Хуцауи зӕрдӕ рохс кӕнун фӕндадтӕй, уӕддӕр ӕй кӕронмӕ нӕ лӕдӕрдтӕнцӕ, хецауадӕмӕ игъосун ци нисан кӕнуй, уой (Ром. 13:1). Уомӕ гӕсгӕ Библиртасгутӕ тугъди гъуддӕгтӕй бустӕги еуварс н’ адтӕнцӕ. Зӕгъӕн, Еугонд Штатти президенд унаффӕ рахаста, цӕмӕй 1918-аг анзи 30 маййи адӕн Хуцаумӕ фарни туххӕй искувтайуонцӕ, ӕма «Гъӕуайгӕнӕн мӕсуг» дӕр Библиртасгути баразӕнгард кодта, цӕмӕй ин ӕ фӕдзӕхстмӕ байгъустайуонцӕ. Еуӕй-еу ӕнсувӕртӕ ба тугъди гъуддӕгтӕн ӕхцайӕй ӕнхус кодтонцӕ, кадӕртӕ ба ма си тугъдмӕ дӕр рандӕ ’нцӕ. Фал сӕ уӕхӕн гъуддӕгти бараст кӕнун ке гъудӕй, е уобӕл дзорӕг н ’адтӕй, ӕма уой туххӕй Устур Вавилони уацари бахаудтӕнцӕ. Етӕ ’й лӕдӕрдтӕнцӕ, мӕнгӕ дини хӕццӕ син еумӕйагӕй ке гъӕуама маци уа, ӕма си Фиццаг дуйнеуон тугъди рӕстӕг, зӕгъӕн ес, ӕма рахецӕн ӕнцӕ. (Бакӕсӕ Лукай 12:47, 48.)

10. Библиртасгутӕ куд ӕвдистонцӕ, цардӕн аргъ ке кӕнунцӕ, уой?

¹⁰ Дуйней гъуддӕгти архайун ци нисан кӕнуй, уой Библиртасгутӕ кӕронмӕ нӕ лӕдӕрдтӕнцӕ, фал уӕддӕр еу гъуддаг зудтонцӕ: адӕймаги рамарун устур тӕрегъӕд ӕй. Ӕма кӕд еуӕй-еу ӕнсувӕртӕ сӕ къохмӕ тохӕндзаумау истонцӕ, уӕддӕр си маргӕ ба неке кодтонцӕ. Еци ӕнсувӕрти ӕрвистонцӕ, тугъд хъӕбӕрдӕр кӕми цудӕй, уӕхӕн бунӕттӕмӕ, цӕмӕй уоми сӕ мӕлӕт иссирдтайуонцӕ.

11. Библиртасгутӕ тугъди адӕни марун ке нӕ кумдтонцӕ, уомӕ хецауадӕ цӕхуӕн цӕстӕй ракастӕй?

¹¹ Ӕнсувӕртӕ Хуцаубӕл еузӕрдонӕй ке байзадӕнцӕ, уобӕл Сайтан кунӕг нӕ мӕстгун кодта. Уомӕ гӕсгӕ син сӕ нихмӕ искодта, «зиан ка хӕссуй, уӕхӕн закъӕнттӕ ка уадзуй», еци адӕни (Пс. 94:20). Еугонд Штатти ӕфсади генерал Джеймс Франклин Белл ӕнсувӕртӕн Джозеф Рутерфорд ӕма Уильям ван Амбургӕн загъта, тохун ка нӕ комуй, уонӕн мӕлӕти тӕрхон хӕссунмӕ син барӕ ка дӕтта, уӕхӕн закъон рауадзунбӕл ке архайунцӕ. Еци закъон фиццагидӕр Библиртасгути нихмӕ арӕзт адтайдӕ. Генерал Белл хъӕбӕр мӕстгунӕй ӕнсувӕр Рутерфордӕн загъта: «Аци хатт бал фӕййервазтайтӕ, уомӕн ӕма президент Уилсон еци закъон рауадзун нӕ бауагъта. Фал ӕй мах зонӕн, ци уин кӕнгӕ ’й, уой, ӕма уӕ уотемӕй нӕ ниууадздзиан!»

12, 13. а) Аст бӕрнон ӕнсувӕри ахӕстдони цӕмӕн исбадун кодтонцӕ? б) Ӕнсувӕртӕ ахӕстдони ке адтӕнцӕ, е син сӕ нифс басаста? Ба ’й лӕдӕрун кӕнӕ.

¹² Фӕстагмӕ хецауадӕ уӕддӕр иссирдтонцӕ фадуат Библиртасгути бафхуӕрунмӕ. Ӕнсувӕрти Рутерфорд ӕма Уильям ван Амбурги, удта ма Гъӕуайгӕнӕн Мӕсуги Ӕхсӕнадӕй иннӕ ӕхсӕз адӕймаги ниййахӕстонцӕ. Тӕрхон син ку хастонцӕ,  уӕд тӕрхонгӕнӕг загъта: «Аци адӕн ци куст кӕнунцӕ, е нин немуцаг дивизийӕй дӕр фулдӕр зиан архӕсдзӕй. Етӕ айдагъ хецауади ӕма ӕфсади нихмӕ нӕ цӕунцӕ, фал ӕгас аргъауӕнти нихмӕ дӕр, ӕма сӕ гъӕуй хъӕбӕр карзӕй бафхуӕрун». Ӕма ӕцӕгӕйдӕр уотӕ ӕрцудӕй. Аст ӕнсувӕрей дӕр исбадун кодтонцӕ Атланти (штат Джорджийӕ, АЕШ) ахӕстдони. Фал тугъд ку фӕцӕй, уӕдта син сӕ гъуддагмӕ нӕуӕгӕй ӕркастӕнцӕ ӕма сӕ исуӕгъдӕ кодтонцӕ.

¹³ Ахӕстдони бадгӕй дӕр еци аст ӕнсувӕри Хуцауи закъӕнттӕбӕл федарӕй хуӕстӕнцӕ. Цӕмӕй сӕ исуӕгъдӕ кодтайуонцӕ, уой туххӕй Еугонд Штатти президентмӕ финстӕг ниффинстонцӕ. Еци финстӕги ин балӕдӕрун кодтонцӕ, Библимӕ гӕсгӕ адӕймаги рамарун тӕрегъӕд ке ӕй ӕма Хуцауӕн ӕхе ка иснивонд кодта, уӕхӕн адӕймаг Хуцауи закъон ку фехала, уӕд си арази ке нӕбал уодзӕй ӕма ’й ке фесафдзӕй. Уотемӕй ин балӕдӕрун кодтонцӕ, иннӕ адӕни марун сӕ бон цӕмӕннӕ ’й, уой. Уӕхӕн финстӕг ниффинсунмӕ сӕ федар нифс гъудӕй. Бӕрӕг ӕй, Йеговӕмӕ игъосун сӕ федар фӕндӕ ке адтӕй.

14. Балӕдӕрун кӕнӕ, Библий ци финст ес, уомӕ гӕсгӕ 1914-аг анзӕй 1919-аг анзмӕ цӕхуӕн хабӕрттӕ ӕрцудӕй?

¹⁴ Малахи 3:1–3 финст дзурдтӕ лӕдӕрун кӕнунцӕ, 1914-аг анзӕй 1919-аг анзи райдайӕнмӕ Библиртасгутӕбӕл ци хабӕрттӕ ӕрцудӕй, уони. (Ба сӕ кӕсӕ.) Йеговӕ – «ӕцӕг Хецау», ӕма Йесо Киристе – «бадзурди минӕвар», ӕрцудӕнцӕ, цӕмӕй «Левиййи фуртти» – исӕрст киристӕнтти, гъуддӕгтӕмӕ ӕркӕсонцӕ. Ку сӕ бараст кодтонцӕ ӕма сӕ ку искӕдзос кодтонцӕ, уӕд цӕттӕ адтӕнцӕ нӕуӕг ихӕслӕвӕрд ӕнхӕст кӕнунмӕ. 1919-аг анзи Киристе иснисан кодта «ӕууӕнкгун ӕма зундгин цагъари», цӕмӕй Хуцауи лӕггадгӕнгутӕн разамунд лӕвардтайдӕ (Матф. 24:45). Хуцауи адӕн Устур Вавилонӕй кӕронмӕ исуӕгъдӕ ’нцӕ. Уӕдӕй фӕстӕмӕ син Хуцау ӕ фӕндон ӕргом кӕнуй ӕма ’й ӕ адӕн никки фулдӕр уарзунцӕ. Уӕхӕн арфӕдзийнӕдти туххӕй Хуцауӕй хъӕбӕр боз ӕнцӕ! ¹

15. Устур Вавилонӕй ке исуӕгъдӕ ан, е нӕ цӕмӕ разӕнгард кӕнуй?

¹⁵ Йеговӕй хъӕбӕр боз ан, Устур Вавилони дзӕмбутӕй нӕ ке исуӕгъдӕ кодта, уой туххӕй! Сайтанӕн раст дин фехалунӕй неци рауадӕй. Ӕ пълӕнттӕ нӕ фӕррӕстмӕ ’нцӕ! Фал мах гъӕуама макӕд иронх кӕнӕн, Йеговӕ нӕ цӕмӕн исуӕгъдӕ кодта, уой (2 Кор. 6:1). Хъӕбӕр берӕ хуарззӕрдӕ адӕн нур дӕр ма мӕнгӕ дини уацари ’нцӕ, ӕма син гъӕуй над байамонун, цӕмӕй уордиги рацӕуонцӕ. Гъӕйдӕ мадта нӕ еузӕрдон ӕнсувӕрти фӕнзӕн, ӕма нӕ бон ци ӕй, уой кӕнӕн, цӕмӕй еци адӕн дӕр Устур Вавилонӕй иссӕребарӕ уонцӕ!