1. (a) Dikon e pueblo di Dios por a karga e speransa di ser librá for di Babilonia e Grandi? (b) Ki preguntanan nos lo kontestá?

DEN e artíkulo anterior, nos a siña kon kristiannan fiel, den un sentido, a bai den koutiverio na Babilonia. Pero, e bon ta ku nan lo no a keda den e koutiverio ei pa semper. E mandato di Dios pa “sali for di dje, mi pueblo” lo no tin sentido si niun hende no por libra nan mes for di gara di e imperio mundial di religion falsu. (Lesa Revelashon 18:4.) Nos tin masha gana di sa na ki tempu Dios a libra su pueblo kompletamente for di gara di Babilonia. Pero promé, nos mester kontestá e siguiente preguntanan: Promé ku 1914, kiko e Studiantenan di Beibel tabata determiná pa hasi relashoná ku Babilonia e Grandi? Durante Promé Guera Mundial, kon aktivo e rumannan tabata den e trabou di prediká? Ta pa risibí korekshon nan mester tabata den koutiverio na Babilonia durante e tempu ei?

2. Relashoná ku religion falsu, kiko e promé Studiantenan di Beibel tabata determiná pa hasi?

² Den e dékadanan promé ku Promé Guera Mundial, Charles Taze Russell i su kompañeronan a realisá ku iglesianan di  kristiandat no tabata siña bèrdatnan bíbliko. P’esei nan tabata determiná pa no tin nada di haber ku loke nan a komprondé tabata religion falsu. For di novèmber 1879 kaba, E Toren di Vigilansia di Sion a splika bon kla kiko tabata nan punto di bista bíbliko: ‘Kualke iglesia ku ta pretendé di ta un bírgen puru komprometé ku Kristu pero ku en realidat ta uní ku e mundu (bestia) i ta haña su apoyo ta, den término bíbliko, un iglesia prostituta,’ òf manera e Skritura ta indiká, parti di Babilonia e Grandi.—Lesa Revelashon 17:1, 2.

3. Kiko Studiantenan di Beibel a hasi pa mustra ku nan no ke tabatin nada mas di haber ku religion falsu? (Wak e promé plachi.)

³ E kristiannan fiel ei tabata sa kiko pa hasi. Nan no por a haña Dios su bendishon si nan a sigui apoyá religion falsu. P’esei, hopi Studiante di Beibel a renunsiá por eskrito di nan religion. Den algun kaso, nan a lesa nan karta na bos haltu den misa. Esnan ku no a haña pèrmit pa hasi esei a manda un kopia di nan karta pa tur miembro di iglesia. Nan no ke tabatin nada mas di haber ku religion falsu. Si tabata otro tempu, esei lo por a kosta nan nan bida. Pero na final di siglo 19, iglesia a kuminsá pèrdè apoyo di estado den hopi pais. Komo ku siudadanonan di e paisnan ei no tabatin miedu di represaya, nan por a papia libremente tokante tópikonan religioso i no tabatin ripara pa bisa ku nan no tabata di akuerdo ku e iglesianan di e tempu ei.

4. Durante Promé Guera Mundial, kon e Studiantenan di Beibel tabata mira Babilonia e Grandi?

⁴ E Studiantenan di Beibel a komprondé ku no tabata sufisiente pa bisa solamente nan famia, amigu- i miembronan di iglesia kiko tabata nan punto di bista di religion falsu. Henter mundu mester a mira Babilonia e Grandi pa loke realmente e ta, esta, un prostituta religioso. P’esei, di desèmber 1917 pa komienso di 1918, e par di mil Studiantenan di Beibel yen di entusiasmo a parti 10.000.000 ehemplar di e tratado ku tabatin e tema “E Kaida di Babilonia,” un tema ku a dal e miembronan di kristiandat duru. Manera bo por imaginá, e lidernan religioso tabata furioso; pero esaki no a stroba e Studiantenan di Beibel ku nan trabou importante di prediká. Nan tabata determiná pa “obedesé Dios na promé lugá, i no hende.” (Echo. 5:29) Na ki konklushon nos por yega? E kristiannan no a bai den koutiverio na Babilonia e Grandi durante e guera; mas bien, nan tabata saliendo for di gara di religion falsu i tabata yuda otro hende hasi meskos.

5. Ki evidensia nos tin ku e rumannan a prediká ku zelo durante Promé Guera Mundial?

⁵ Den pasado nos tabata pensa ku Yehova tabata malkontentu ku su pueblo pasobra nan no a prediká ku zelo durante Promé Guera Mundial. P’esei nos a yega na e konklushon ku Yehova a permití Babilonia e Grandi hiba nan den koutiverio pa un periodo kòrtiku. Pero, rumannan fiel ku a sirbi Dios durante 1914-1918 a indiká bon kla despues ku, komo grupo, e pueblo di Dios a hasi tur loke nan tabata por pa sigui ku e trabou di prediká. Tin pruebanan konvinsente ku ta apoyá esaki. Un bista mas kla di e historia di e pueblo di Dios a yuda nos haña un mihó komprondementu di sierto susesonan ku Beibel ta papia di dje.

6, 7. (a) Ki opstákulonan e Studiantenan di Beibel a enfrentá durante Promé Guera Mundial? (b) Kiko ta mustra ku e Studiantenan di Beibel tabata yen di zelo?

 ⁶ En realidat, e Studiantenan di Beibel a duna tremendo testimonio durante Promé Guera Mundial (1914-1918). Pero, pa diferente motibu esaki no tabata fásil pa nan. Laga nos konsiderá dos di nan. Pa di promé, e trabou prinsipal den e tempu ei tabata di distribuí literatura basá riba Beibel. Ora outoridatnan a prohibí e rumannan pa repartí e buki E Misterio Terminá na komienso di 1918, a bira difísil pa hopi di nan prediká. Nan tabata laga E Misterio Terminá ‘papia’ pa nan pasobra ainda nan no a siña kon pa prediká ku Beibel so. Na di dos lugá, na 1918 tabatin un epidemia devastador di grip spañó. Debí ku e malesa teribel akí a plama tur kaminda, tabata difísil pa e publikadónan move libremente di un lugá pa otro. Pero apesar di esaki i otro opstákulonan, komo grupo, e Studiantenan di Beibel a hasi tur nan esfuerso pa sigui ku e trabou di prediká.

⁷ Na 1914, e grupo chikitu di Studiante di Beibel ku tabatin e tempu ei a presentá e “Foto-Drama di Kreashon” na mas ku 9.000.000 hende. E Drama, manera nan tabata yam’é, tabata un kombinashon di pelíkula i slide, sinkronisá ku zonido, ku a konta e historia di hende for di e periodo di kreashon te na fin di e Mil Aña. Pa su tempu, esei tabata un gran logro. Pensa riba esaki: e kantidat di hende ku a wak e presentashon akí na 1914 ta mas tantu ku e kantidat total di publikadó aktivo rònt mundu awe. Informenan ta indiká tambe ku na 1916, un total di 809.393 persona a asistí na e reunionnan públiko na Merka, i na 1918 e kantidat a subi yega te 949.444. Sin duda, e Studiantenan di Beibel tabata yen di zelo!

8. Kon e rumannan ku tabata dirigí e organisashon a fortalesé e Studiantenan di Beibel durante Promé Guera Mundial?

⁸ Durante e promé guera mundial, e rumannan ku tabata dirigí e organisashon a hasi hopi esfuerso pa sigui duna kuminda spiritual i animashon na e Studiantenan di Beibel, na unda ku nan por tabata. Esaki a duna e rumannan forsa pa sigui ku e trabou di prediká. Richard H. Barber, kende tabata aktivo durante e tempu  ei, a konta: “Nos a logra pa algun superintendente biahero sigui ku e trabou, i nos a sigui distribuí E Toren di Vigilansia i asta mand’é Canada kaminda e trabou di prediká tabata prohibí. Mi tabatin e privilegio di pòst algun ehemplar di E Misterio Terminá di tamaño chikitu pa un kantidat di ruman debí ku outoridatnan a konfiská nan bukinan. Ruman Rutherford a pidi nos pa organisá kongreso den diferente stat parti wèst di Merka i pa manda oradó pa purba di animá e rumannan mas tantu posibel.”

9. (a) Dikon e pueblo di Dios tabatin mester di korekshon di 1914 pa 1919? (b) Aunke nan tabatin mester di korekshon, kiko esei no a indiká?

⁹ No ta tur loke e Studiantenan di Beibel a hasi di 1914 pa 1919 tabata di akuerdo ku prinsipionan bíbliko. Maske nan tabata sinsero, no ta semper nan tabatin e punto di bista korekto tokante sumishon na gobièrnunan humano. (Rom. 13:1) P’esei, komo grupo, no ta semper nan a keda neutral durante guera. Por ehèmpel, ora e presidente di Merka a dekretá 30 di mei 1918 komo un dia pa resa pa pas, E Toren di Vigilansia a urgi e Studiantenan di Beibel pa apoyá e inisiativa akí. Algun ruman a kumpra bono pa sostené e guera finansieramente, i un par a asta bai den trincheranan pa sòldá ku arma i bayonèt. Sinembargo, lo no ta korekto pa konkluí ku e Studiantenan di Beibel a bai den koutiverio na Babilonia e Grandi debí ku nan tabatin mester di korekshon. Al kontrario, nan a komprondé ku nan mester a separá nan mes di religion falsu, i durante Promé Guera Mundial nan a libra nan mes kasi kompletamente kaba di e imperio mundial ei.—Lesa Lukas 12:47, 48.

10. Ki posishon firme e Studiantenan di Beibel a tuma pa mustra ku pa nan bida ta sagrado?

¹⁰ Aunke e Studiantenan di Beibel no a komprondé eksaktamente kiko ke men keda neutral, manera nos ta komprond’é awe, un kos sí nan tabata sa: Beibel ta prohibí hende di mata otro. Pues asta e poko ruman hòmbernan ku a tuma arma i bai den e trincheranan durante Promé Guera Mundial a nenga redondamente di usa nan arma pa mata otro hende. Algun ruman ku a nenga di mata otro hende a ser mandá den e promé filanan di bataya pa nan pèrdè nan bida.

11. Kon outoridatnan a reakshoná ora Studiantenan di Beibel a nenga di usa arma den guera?

¹¹ Ta bisto ku Diabel no tabata kontentu ku e posishon firme di e rumannan relashoná ku guera, maske nan no a keda kompletamente neutral. P’esei, el a influensiá gobièrnunan pa bini ku leinan ku lo a kousa difikultat pa nan. (Sal. 94:20) Den un kòmbersashon ku General Mayó James Franklin Bell di Merka tabatin ku Rumannan J. F. Rutherford i W. E. Van Amburgh, el a bisa nan ku e Departamento di Hustisia di Merka a trata na pasa un lei den Kongreso ku lo a permití hende ku a nenga di karga arma den guera haña kastigu di morto. I el a referí spesialmente na e Studiantenan di Beibel. Tur rabiá e General a bisa Ruman Rutherford: “Wilson [presidente di Merka] a stroba e lei ei di pasa; pero nos sa kon pa haña boso i nos ta bai hasi esei!”

12, 13. (a) Dikon ocho ruman hòmber a haña un sentensia largu di prizòn? (b) Kastigu di prizòn a pone nan pèrdè nan determinashon pa obedesé Yehova? Splika esei.

¹² Outoridatnan a kumpli ku nan palabra. Nan a arestá Rumannan Rutherford, Van Amburgh i seis otro representante di Sosiedat Watch Tower. Den korte, e  hues ku a dikta sentensia a bisa: ‘E kampaña religioso ku e hòmbernan akí ta hiba ta kousa mas daño ku un divishon di sòldá aleman. . . . No solamente nan a kuestioná e funshonarionan di gobièrnu i e servisio sekreto militar, sino tambe nan a denunsiá tur pastor di tur iglesia. Nan kastigu mester ta pisá.’ (Faith on the March, skirbí pa A. H. Macmillan, pág. 99) Asina a sosodé. Nan a sentensiá e ocho Studiantenan di Beibel akí na kastigu largu di prizòn den e prizòn federal na Atlanta, Georgia. Pero ora guera a kaba, nan a sali liber i tur e akusashonnan kontra nan a keda anulá.

¹³ Asta tempu ku e ocho hòmbernan akí tabata den prizòn, nan a pega firmemente na loke nan a komprondé di e Skritura. Den un karta ku nan a skirbi e presidente di Merka pa pidi klemensia, nan a bisa: “E boluntat di Señor ta skirbí den e Skritura: ‘Lo bo no mata.’ I p’esei kualke miembro di e Asosiashon [Internashonal di Studiantenan di Beibel] ku ta dediká na Señor i ku boluntariamente ta bai kontra su dedikashon lo pèrdè e fabor di Dios i haña destrukshon eterno. Pues e miembronan ta konsiente ku nan no por kita bida di otro ser humano boluntariamente.” Sin duda, e rumannan akí a demostrá hopi kurashi! Klaramente anto, nan tabata determiná pa mantené nan integridat.

14. Splika a base di e Skritura kiko a sosodé di 1914 pa 1919.

¹⁴ Malakías 3:1-3 ta deskribí e tempu, esta, for di 1914 te na komienso di 1919, ku “e yu hòmbernan di Levi,” ku ta representá kristiannan ungí, a pasa den un periodo di refinashon òf korekshon. (Les’é.) Durante e tempu ei, Yehova Dios, “e Señor” berdadero, i Hesukristu, “e Mensahero di e aliansa,” a bini na e tèmpel spiritual pa inspekshoná e hendenan ku tabata sirbi einan. Despues ku nan a haña e korekshon nesesario, e pueblo puru di Yehova tabata kla pa tuma un asignashon nobo. Na 1919, Hesus a nombra un “esklabo fiel i prudente” pa proveé kuminda spiritual pa tur sirbidó di Dios. (Mat. 24:45) Por fin e pueblo di Dios tabata liber di tur influensia di Babilonia e Grandi. For di e tempu ei padilanti, pa medio di Yehova su bondat inmeresí, su pueblo a sigui haña mas konosementu di su boluntat i mas amor pa nan Tata selestial. Ki gradisidu nos ta pa e bendishon akí! ^[1]

15. Kon nos por mustra ku nos ta gradisidu ku Yehova a libra nos for di Babilonia e Grandi?

¹⁵ Ta masha emoshonante ku nos a ser librá for di koutiverio di Babilonia e Grandi! Satanas su esfuersonan pa kaba ku berdadero kristianismo a frakasá barbaramente. Sinembargo, nos no mester lubidá pa ki propósito Yehova a libra nos. (2 Kor. 6:1) Hopi hende di kurason sinsero ainda ta katibu di religion falsu. Nan mester haña sa kon nan por sali liber. Anto nos por guia nan. Pues, laga nos imitá e rumannan di siglo pasá i hasi tur loke nos por pa yuda e hendenan akí sali for di religion falsu.