1. Ia duwen atail ese me sapwellimen Koht aramas akan pahn sohla mi pahn manaman en Papilon Lapalap, oh peidek dah kan me kitail pahn sapengala?

 NAN iren onop en mwoweo, kitail sukuhlki me Kristian lelepek kan mihla pahn manaman en Papilon Lapalap. Rohng mwahwo iei me re sohte pahn mi pahn manaman wet kohkohlahte. Kitail ese met pwehki nan Paipel, Koht mahsanihong sapwellime aramas akan en “tangasang” pelien lamalam likamw koaros. (Wadek Kaudiahl 18:4.) Met kadehdehda me Kristian kan pahn saledeksang Papilon Lapalap. Kitail uhdahn men sukuhlki iahd me re pahn saledekla! Ahpw keieu, kitail anahne sapengala peidek pwukat: Pil mwohn pahr 1914, dahme Tohnsukuhl kan en Paipel koasoanehdi teng en wia me pid Papilon Lapalap? Ia uwen ngoang me riatail Kristian kan kasalehda nan doadoahk en kalohk erein Mahwen Keieu en Sampah? Ia duwe, sapwellimen Koht aramas akan mi pahn manaman en Papilon erein ahnsowo pwehki re anahne kaweid pwehn kapwungala pein irail?

2. Dahme tepin Tohnsukuhl kan en Paipel pilada en wia pil mwohn Mahwen Keieu en Sampah?

² Sounpar tohto mwohn Mahwen Keieu en Sampah (1914-1918),  Charles Taze Russell oh ekei Tohnsukuhl en Paipel tehkada me pelien lamalam kan me kose irail Kristian kei sohte kin padapadahngki dahme mehlel sang nan Paipel. Ihme kahrehda irail sohte mwahn men pidada kaudok likamw. Pil nan pahr 1879, Kahn Iroir en mahs (Zion’s Watch Tower) koasoia me pelien lamalam koaros me kose me irail iei sapwellimen Krais lih kamwohd loalopwoat ahpw kin utungada palien koperment uhdahn wia kisehn Papilon Lapalap, me Paipel kahdaneki lihen netiki paliwere.​—Wadek Kaudiahl 17:1, 2.

3. Dahme Tohnsukuhl kan en Paipel wia pwehn kasalehda me re solahr wia kisehn kaudok likamw? (Menlau kilang tepin kilel.)

³ Ohl oh lih lelepek kan ese me ma re pahn pousehlahte utung kaudok likamw, Koht sohte pahn ketin kapairailda. Eri, tohto irail kadarala kisinlikou ong arail pelien lamalam ko pwehn kasalehda me re solahr men iang irail. Ekei pil wadek neirail kisinlikou kan ni ngihl laud mwohn tohn sarawi ko. Ong wasa kan me met sohte mweimwei, re kin kadarala kisinlikou ong emenemen tohn sarawi ko. Tohnsukuhl kan en Paipel kasalehda ni sansal me re sohte mwahn men pidada kaudok likamw! Ma re wia met sounpar kei mwowe, re kakete mehkihla. Ahpw ni pahr 1870, palien koperment kan nan sahpw tohto solahr kin utung pelien lamalam kan duwehte me re kin wia mwoweo. Met aramas akan kakehr koasoia duwen Paipel ni saledek oh pil pilada en sohte pwungki pelien lamalam kan.

4. Erein Mahwen Keieu en Sampah, ia ahn Tohnsukuhl kan en Paipel ar madamadau ong Papilon Lapalap? Menlau kawehwehda.

⁴ Tohnsukuhl kan en Paipel wehwehki me e sohte itar en ihte padahkihong kiserail kan, kompoakparail keren kan, oh tohn arail sarawi ko me re solahr kin utung kaudok likamw. Re men tohnsampah pwon en ese me Papilon Lapalap me iei pelien lamalam likamw koaros oh kin karasaraskihong lih en netiki paliwere! Eri nanpwungen December 1917 oh tepin pahr 1918, Tohnsukuhl en Paipel kid kei me ngoangki kihpeseng kisin doaropwe lella dep (10,000,000) me ehu oaralap ko nda “Ohlahn Papilon.” Kisin doaropweo kin kasalehda dahme mehlel duwen pelien lamalam kan me kose me irail Kristian kei. Kitail kak medewehla uwen kaunen pelien lamalam ko ar uhdahn lingeringerkihda met! Ahpw Tohnsukuhl en Paipel ko sohte uhdi. Re koasoanehdi teng en doulahte kalokalohk oh peikiong “Koht, a kaidehn aramas.” (Wiewia 5:29) Dahme met kasalehiong kitail? Met kasalehda me erein Mahwen Keieu en Sampah, ohl oh lih Kristian pwukat sohte mi pahn manaman en Papilon, ahpw re tepida saledeksang kaudok likamw oh sewese meteikan en pil wia duwehte.

5. Dahme kahrehda kitail kak nda me riatail kan uhdahn ngoangki kalohk erein Mahwen Keieu en Sampah?

⁵ Mahso, kitail nda me Koht sohte ketin kupwurki sapwellime aramas akan erein Mahwen Keieu en Sampah pwehki re sohte ngoangki kalohk. Pwehki kahrepe wet, kitail kamehlele me Siohwa ketin mweidohng ren mi pahn manaman en Papilon Lapalap erein ahnsou mwotomwot. Ahpw, riatail Kristian lelepek kan me kin papah Koht nanpwungen pahr 1914 oh 1918 mwuhr kawehwehda me nin duwen pwihn ehu, re kin wia soahng koaros me re kak pwehn doulahte kalokalohk. Atail kalaudehla oh wehwehki dahme  wiawihong Tohnsukuhl kan en Paipel ahnsowo kin sewese kitail en wehwehki soahng kan me kileldi nan Paipel.

6, 7. (a) Kahpwal dah kan me Tohnsukuhl kan en Paipel lelohng erein Mahwen Keieu en Sampah? (b) Dahme kasalehda me Tohnsukuhl kan en Paipel uhdahn ngoang?

⁶ Ni mehlel, erein Mahwen Keieu en Sampah, Tohnsukuhl kan en Paipel uhdahn soupisengki kalokalohk. Ahpw pil mie kahpwal kei me re lelohng. Kitail tehkpene meh riau. Keieu, re sohte sukuhlki en kalohk doadoahngki Paipel kelehpw. Re ahnla kihpeseng pwuhk kan oh mweidohng pwuhk pwukat en kawehwehda padahk mehlel. Eri ni ahnsou me palien koperment irehdi ehu neirail pwuhk ko (The Finished Mystery) ni tepin pahr 1918, doadoahk en kalohk kin apwalla ong riatail Kristian tohto. Keriau, nan pahrohte soumwahu lusulus me adaneki Spanish flu tepida. Soumwahu suwed wet kin uhdahn douseli oh kahrehda e kin apwal ong riatail Kristian kan en seiloakseli oh kalohk. Mendahki kahpwal pwukat, Tohnsukuhl kan en Paipel kin wia uwen arail kak en pousehlahte wia doadoahk en kalohk.

⁷ Nan pahr 1914, pwihn tikitik ehu en Tohnsukuhl kan en Paipel kasalehda kasdohn “Photo-Drama of Creation.” Re wia met ni arail doadoahngki slides oh kasdo me mie ngile, me ni ahnsowo wia mehkot kapw. Kasdo wet kin koasoia duwen poadopoad en aramas sang Adam lel ni kaimwiseklahn Kaundahn Krais. Nan pahr 1914, re tepin kasalehda kasdo wet oh aramas tohtohsang duwerar (9,000,000) me kilang. Nna medewehla met. Met tohtohsang nempehn Sounkadehdehn Siohwa kan koaros patpene nan sampah pwon rahnwet! Ripoht teikan kasalehda me nan pahr 1916 aramas tohtohsang walilopw duwekid (809,000) me towehda mihting kan ong wehipokon nan Amerika, oh nan pahr 1918, nempeo tohtohla kereniong lel duwelopw limenen (950,000). Tohnsukuhl en Paipel pwukat uhdahn ngoang!

8. Ia duwen brother kan me kin tiengla mwowe ar kin kakehlakahda Tohnsukuhl kan en Paipel erein Mahwen Keieu en Sampah?

⁸ Erein Mahwen Keieu en Sampah, brother kan me kin tiengla mwowe kin doadoahk laud pwehn wiahda sawaspen Paipel kan oh kangoange Tohnsukuhl kan en Paipel koaros. Soangen sawas limpoak wet kakehlakahda  irail en pousehlahte kalokalohk. Richard H. Barber me pil wia emen sounkalohk me kin ngoangki kalohk ni ahnsowo koasoia: “Se pweida ni at sewese ekei sounapwalih me kin seiloak kan en doulahte wia arail doadoahk oh se pil pousehlahte wiahda Kahn Iroir kan oh kadarala Canada, wasa me makasihno keinapwihdi.” E pil nda: “I ahneki pwais kaselel en kadarala pwuhk me adaneki The Finished Mystery me wiawihda en tikitik (pocket-size) ong kompoakepahi tohto me koperment en wasao kihsang neirail ko. Brother Rutherford peki sen koasoanehdi mihting tohrohr kan nan ekei kahnimw nan palikapi en Wehin Amerika oh kadarala irail kan me pahn wia padahk pwe ren wia uwen arail kak en kangoange riatail Kristian kan.”

9. (a) Dahme kahrehda sapwellimen Koht aramas akan anahne kaweid pwehn kapwungala pein irail nanpwungen pahr 1914 oh 1919? (b) Mendahki re anahne kaweid pwehn kapwungala pein irail, dahme kitail en dehr medewe?

⁹ Mie soahng kan me Tohnsukuhl kan en Paipel anahne kapwungala. Re sohte uhdahn wehwehki ni Siohwa eh ketin mahsanih me ren peikiong palien koperment kan. (Rom 13:1) Ihme kahrehda nin duwen pwihn ehu, re sohte kin ahnsou koaros soupoupali erein ahnsoun mahweno. Karasepe, ni ahnsou me president en Amerika peki rehn aramas akan en kapakapki popohl nan May 30, 1918, Kahn Iroir kangoange Tohnsukuhl kan en Paipel en pil iang kapakap. Ekei brother kan pil kihda mwohni pwehn utung mahweno, oh ekei irail pil wiahla sounpei kei oh iang kohla mahwen. Mendahki re anahne kapwungala met, e pahn sapwung en medewe me iei kahrepe wet me re mi pahn manaman en Papilon Lapalap. Ni mehlel, re kereniong tohrohrasang douluhl kaudok likamw en sampah pwon ni ahnsoun Mahwen Keieu en Sampah.​—Wadek Luk 12:47, 48.

10. Ia duwen Tohnsukuhl kan en Paipel ar kasalehda me re wauneki mour?

¹⁰ Mehlel me Tohnsukuhl en Paipel ko sohte uhdahn wehwehki ia wehwehn Kristian kan en soupoupali. Ahpw re ese me e sapwung en kemehla aramas. Eri ekei brother kan me pil wiahla sounpei oh ale dipwisoun mahwen erein Mahwen Keieu en Sampah sohte doadoahngki dipwisou pwukat pwehn kemehla aramas akan. Ekei me sohte men kemehla aramas pekederla rehn sounpei kan nan mahweno pwe ren kamakamla.

11. Ia duwen palien koperment kan ar mwekidki ni Tohnsukuhl en Paipel ko ar sohte men iang pei nan mahweno?

¹¹ Tepilo uhdahn lingeringer pwehki brother ko ar loalopwoatohng Koht. Met imwikihla e kin “kamanahla kosonned sapahrek.” (Mel. 94:20) Emen kaun en sounpei nan Amerika, James Franklin Bell ndaiong brother Rutherford oh brother Van Amburgh me arail palien kopermento song en wiahda kosonned kapw ehu me pahn kamanala kamakamlahn sohte lipilipil me sohte men iang pei nan mahweno. Ohlo koasoakoasoia Tohnsukuhl en Paipel ko. Kaunen sounpeio uhdahn lingeringer oh ndaiong brother Rutherford me re sohte kamanala kosonnedo pwehki president en Amerika sohte mweidada met en wiawi. Ahpw kaun en sounpeio nda: “Se ese ia duwen at pahn koledi kumwail, oh se uhdahn pahn wia met!”

12, 13. (a) Dahme kahrehda ohl welimen ko anahne selidi nan imweteng ahnsou reirei? (b) Ia duwe, ar mi nan imweteng pahn kahrehiong ren sohla tengediong arail peikiong Siohwa? Menlau kawehwehda.

¹² Palien kopermento pil diar ehu wiepen  ar pahn kaloke Tohnsukuhl en Paipel ko. Brother Rutherford oh brother Van Amburgh pil iangahki iengerail me wenemen teiko me wia wiliepen Watch Tower Society selidi. Sounkopwung me wia kopwung wet nda me brother ko uhdahn keper sang pwihn en sounpei en Sehmen. E nda me re kalingeringerihada palien kopermento, palien sounpei, oh pelien lamalam koaros oh me re anahne ale kalokolok laud. (Menlau kilang pwuhken Faith on the March, sang A. H. Macmillan, pali 99) Eri irail Tohnsukuhl en Paipel welimen ko pahn selidi ahnsou reirei nan imweteng nan Atlanta, Georgia. Ahpw ni ahnsou me mahweno sohla wiawi, irail saledekla oh kopwung me kohwong irail sohla wiawi.

¹³ Pil erein ohl welimen pwukat ar mi nan imweteng, re koasoanehdi teng en peikiong sapwellimen Koht kosonned. Ia duwen atail ese met? Re ntinglahng president en Amerika oh peki ren saledekla sang imweteng. Nan kisinlikowo, re koasoia me Paipel padahkihong kitail me kitail en dehr kemehla aramas. Eri emen me wiahda inou ong Koht ahpw sohte men peikiong, Koht sohte pahn ketin kupwurki aramaso oh e pahn ketin kasohrehla aramaso. Re kawehwehda me ih kahrepen re sohte kak oh sohte pahn kemehla aramas. Re uhdahn eimah pwe re ntingihla met rehn presidento! E sansal me brother ko sohte pahn uhdihsang arail pahn tengedihong arail peikiong Siohwa.

14. Menlau kawehwehda sang nan Paipel dahme wiawi sang pahr 1914 lel 1919.

¹⁴ Malakai 3:1-3 kawehwehda dahme wiawihong Tohnsukuhl en Paipel ko nanpwungen pahr 1914 lel pahr 1919. (Wadek.) Siohwa Koht, Kaun mehlelo, oh Sises Krais, “meninkeder” en inowo, ketido pwehn tehk “samworo kan” me iei me keidi kan. Mwurin Siohwa eh ketin kapwungala oh kamwakelehda irail, re onopadahr pwehn ale pwukoa kapw ehu. Nan pahr 1919, Sises ketin idihada “ladu lelepek oh loalokongo” en pwukoahki kahluwa oh kaweid sapwellimen Koht ladu kan koaros. (Mad. 24:45, NW.) Sapwellimen Koht aramas akan saledeklahr sang Papilon Lapalap. Sangete ahnsowo, re kin kalaudehla arail sukusukuhlki duwen kupwuren Koht, oh arail limpoak ong ih inenen laudla. Ia uwen arail kalahnganki sapwellime kapai! ^[1]

15. Ia duwen atail kak kasalehda me kitail kalahnganki atail saledeksang Papilon Lapalap?

¹⁵ Kitail uhdahn kalahnganki atail saledeksangehr Papilon Lapalap. Sehdan sohte kak kasohrehla kaudok mehlel. E sohte pweida! Ahpw, kitail anahne tamataman dahme kahrehda Siohwa ketin kasaledekihala kitail. Kupwure iei me aramas koaros en ale komourparail. (2 Kor. 6:1) Ahpw kaudok likamw kin kakaunte aramas rar rar kei me ahneki mohngiong mehlel, oh re anahne atail sawas! Kitail en wia uwen atail kak koaros pwehn alasang riatail Kristian lelepek kan me sewesewese aramas akan en saledekla.