1. Fa wi du sabi taki Gado pipel ben o kon fri fu Babilon a Bigiwan èn sortu aksi wi o go luku?

NA INI a fosi artikel, wi kon si fa den tru Kresten ben kon de na ini katibo fu Babilon. Ma san moi na taki den no ben o tan na ini katibo fu ala ten. Fa wi sabi disi? We, Gado ben taki: „Komoto drape, mi pipel.” Efu nowan sma ben man kon fri fu falsi bribi, dan a sani disi di Gado taki ben o de fu soso. (Leisi Openbaring 18:4.) Now wi wani kon sabi o ten Gado pipel ben kon fri fu a makti fu Babilon. Ma wi o luku den aksi disi fosi: Fa den Bijbel Ondrosukuman sori taki den no ben wani abi noti fu du nanga Babilon a Bigiwan fosi 1914? Fa den brada fu wi sori taki den ben e preiki fayafaya na a ten fu a Fosi Grontapufeti? Wi musu denki taki Gado pipel ben de na ini Babilon na a ten dati fu di a ben wani gi den piri-ai èn fu di a ben wani leri den wan sani?

2. San den Bijbel Ondrosukuman du, baka di den kon si taki kerki e leri sani di no tru?

² Na ini den yari bifo a Fosi Grontapufeti, Charles Taze Russell nanga den mati fu en kon si taki den Kresten kerki no ben e leri san Bijbel e taki. Dati meki den bosroiti taki  den no wani abi noti fu du nanga den falsi kerki disi. Na ini november 1879, Zion’s Watch Tower taki krin fa den ben e denki fu den kerki: „Efu wan kerki e taki dati a no e doti ensrefi nanga falsi bribi fu di a trow nanga Krestes, ma a e moksi nanga grontapu . . . èn grontapu e horibaka gi en, dan wi musu krutu so wan kerki taki a de wan huru-uma, leki fa Bijbel e taki en.” A huru-uma disi na Babilon a Bigiwan.​—Leisi Openbaring 17:1, 2.

3. San den Bijbel Ondrosukuman du fu sori taki den no ben wani abi noti fu du moro nanga falsi kerki? (Luku a prenki na a bigin fu na artikel.)

³ Futuboi fu Gado ben sabi san den ben musu du. Den no ben kan fruwakti taki Gado ben o blesi den efu den ben o tan horibaka gi falsi kerki. Dati meki furu Bijbel Ondrosukuman seni brifi gi a kerki fu den fu sori taki den no de wan memre fu a kerki moro. Son tron den ben e leisi den brifi fu den leti na fesi ala sma fu a kerki. Te den no ben man du disi, dan den ben e seni wan brifi gi ibri sma fu a kerki. Iya, den no ben wani abi noti fu du moro nanga falsi bribi! Efu na fosi, den ben kan lasi den libi fu a sani disi. Ma na a ten fu 1870, wan lo kondre no ben e horibaka so furu moro gi kerki. Fu di sma na ini den kondre dati no ben frede moro taki den ben o kisi strafu, meki den ben e taki fri fu kerkitori, èn efu den no ben agri nanga kerki, den ben taki dati tu.

4. Fa Gado pipel ben e si Babilon a Bigiwan na a ten fu a Fosi Grontapufeti?

⁴ Bijbel Ondrosukuman ben kon si taki a no ben nofo fu fruteri famiriman, mati nanga tra kerkisma taki den no de wan memre moro fu falsi kerki. Heri grontapu ben musu kon sabi taki Babilon a Bigiwan ben de wan huru-uma fu di a ben e wroko makandra nanga den tiriman. Dati meki fu december 1917 te go miti a bigin fu 1918, wan tu dusun Bijbel Ondrosukuman prati 10.000.000 traktaat di ben taki fu a tori: „A fadon fu Babilon”. Na so den ben wani sori sma krin taki kerki e leri sani di no tru. Soleki fa wi kan frustan, dan den kerki fesiman ati ben bron srefisrefi. Ma den Bijbel Ondrosukuman no ben frede. Den go doro nanga a prenspari wroko disi. Den ben wani du ala san den man fu „gi yesi na [Gado] moro leki na libisma” (Tori 5:29). Sobun, san disi e sori wi? A e sori taki den Kresten man nanga uma disi no ben e tron srafu fu Babilon a Bigiwan na a ten fu a Fosi Grontapufeti. Ma na fri den ben e kon fri èn den srefi ben e yepi trawan fu kon fri tu.

5. Sortu buweisi wi abi taki den brada nanga sisa ben de fayafaya na a ten fu a Fosi Grontapufeti?

⁵ Fosi, wi ben e bribi taki Yehovah ben mandi nanga a pipel fu en fu di den no ben e du a preikiwroko fayafaya na a ten fu a Fosi Grontapufeti. Dati meki wi ben taki dati Yehovah gi pasi taki Babilon a Bigiwan tyari den go na ini katibo fu wan syatu pisi ten. Ma den brada nanga sisa di ben e dini Gado na a pisi ten fu 1914 te go miti 1918 sori krin taki leki wan grupu den ben e du ala san den man fu tan preiki. Wi abi furu buweisi taki disi de so. Fu di wi kon sabi moro fini san ben pasa nanga den Bijbel Ondrosukuman na a ten dati, meki wi kon frustan son sani di skrifi na ini Bijbel moro bun.

6, 7. (a) Sortu problema miti Bijbel Ondrosukuman na a ten fu a Fosi Grontapufeti? (b) Gi eksempre di e sori taki den Bijbel Ondrosukuman ben de fayafaya.

 ⁶ Fu taki en leti, den Bijbel Ondrosukuman ben e preiki fayafaya na a ten fu a Fosi Grontapufeti (1914-1918). Furu sani ben meki taki a no ben makriki gi den fu du disi. Wi o luku tu sani. A fosi sani na taki na soso buku den ben e prati na ini a preikiwroko. Dati meki na a bigin fu 1918, di den tiriman no ben wani taki den prati a buku The Finished Mystery, a ben muilek gi furu brada fu du a preikiwroko. Den no ben leri ete fa fu gebroiki a Bijbel wawan na ini a preikiwroko. Na a buku disi ben e yepi den fu preiki. Wan tra sani di ben meki taki a preikiwroko no ben makriki, na taki a Spaanse griep broko na ini 1918. Fu di a takru siki disi ben de na ala sei, meki a ben muilek gi den preikiman fu go preiki pe den wani. Ma aladi den problema disi ben de, toku den Bijbel Ondrosukuman ben e meki muiti fu tan preiki.

⁷ Na ini 1914 wawan, a pikin grupu Bijbel Ondrosukuman sori a Photo-Drama der Schepping na moro leki 9.000.000 sma. A Drama, soleki fa sma ben e kari en, ben abi syatu pisi felem, moi fowtow nanga moi poku. A ben de na ini kloru èn yu ben kan yere sma sten. A ben e taki fu a ten di Gado meki libisma teleki a kaba fu a Dusun Yari Tiri. Na wan tumusi moi sani den brada du na a ten dati. Prakseri fu a tori. Den sma di si a Photo-Drama disi na ini 1914, furu moro ala Kownukondre preikiman di wi abi now. Soleki fa skrifi, dan na Amerkankondre, 809.393 sma go na den publiki taki na ini 1916 èn na ini 1918 disi ben de 949.444 sma. Den Bijbel Ondrosukuman disi ben de fayafaya.

8. San den brada du fu gi Bijbel Ondrosukuman deki-ati na a ten fu a Fosi Grontapufeti?

⁸ Na a ten fu a Fosi Grontapufeti den brada ben e du ala san den man fu meki buku nanga tijdschrift èn fu gi deki-ati na den Bijbel Ondrosukuman di ben panya na ala sei. Disi ben gi den brada a krakti fu du a preikiwroko. Richard H. Barber di ben de wan fayafaya preikiman na a ten dati, e taki: „Wi ben man seni wan tu kring-opziener go  na den gemeente ete èn wi ben e sorgu taki sma ben man kisi The Watch Tower. Wi ben man seni a tijdschrift disi go na Kanada tu pe lanti ben tapu a wroko. Mi ben abi a grani fu seni pikinwan fu a buku The Finished Mystery gi den mati fu wi di no ben abi wan, fu di lanti ben teki en. Brada Rutherford ben wani taki wi seti kongres na ini difrenti foto na a west-sei fu Amerkankondre èn wi ben musu seni brada go drape fu hori lezing di ben o gi den brada nanga sisa deki-ati.”

9. Fu san ede Gado pipel ben abi piri-ai fanowdu na a ten fu 1914 te go miti 1919, ma san disi no wani taki?

⁹ A no ala sani di den Bijbel Ondrosukuman du fu 1914 te go miti 1919 ben e kruderi nanga san Bijbel e taki. Aladi den ben de fayafaya, toku den no ben kaba frustan san a wani taki fu saka densrefi na ondro den tiriman (Rom. 13:1). Dati meki den ben e teki sei na ini feti son leisi. Fu eksempre, di a presidenti fu Amerkankondre bosroiti taki 30 mei 1918 ben o de a dei pe sma ben musu begi gi freide, dan The Watch Tower gi Bijbel Ondrosukuman deki-ati fu begi tu. Son brada gebroiki den moni fu horibaka gi a feti, èn wan tu fu den go na feti èn den ben tyari gon. Ma wi no musu denki taki den Bijbel Ondrosukuman go na ini katibo fu Babilon a Bigiwan fu di Gado ben wani gi den piri-ai èn fu di a ben wani leri den wan sani. Fu taki en leti, den ben frustan taki den no ben musu moksi nanga falsi bribi èn na a ten fu a Fosi Grontapufeti, wi kan taki dati den ben du pikinmoro ala sani fu kon fri.​—Leisi Lukas 12:47, 48.

10. Fa den Bijbel Ondrosukuman ben sori taki den ben e si a libi leki wan santa sani?

¹⁰ Aladi den Bijbel Ondrosukuman no ben e frustan bun san a wani taki fu no teki sei na ini feti, leki fa wi e frustan en now, toku den ben sabi taki Bijbel e taki dati sma no mag kiri trawan. Sobun, srefi den brada di go na ini a legre na a ten fu a Fosi Grontapufeti no ben wani kiri sma nanga den gon fu den. Dati meki a legre seni sonwan fu den brada disi go feti na fesisei fu a legre pe srudati ben e feti hebi. Den du disi fu di den ben howpu taki den brada disi ben o lasi den libi.

11. San den tiriman du fu di den Bijbel Ondrosukuman no ben wani go na feti?

¹¹ A ben de krin taki Didibri ati ben bron taki den brada teki so wan bosroiti aladi den no ben kaba frustan san a wani fu no teki sei na ini feti. Fu dati ede, a sorgu taki tiriman meki ’wet fu kan du den ogri’ (Ps. 94:20). James Franklin Bell di ben de legre-edeman fu a legre fu Amerkankondre, ben abi wan takimakandra nanga Brada J. F. Rutherford nanga W. E. Van Amburgh. A taigi den taki a Ministeria fu Skowtu-afersi ben wani meki wan wet fu sorgu taki sma di no wani go na ini a legre, kisi dedestrafu. Na den Bijbel Ondrosukuman a ben abi na prakseri. Nanga bigi atibron a legre-edeman Bell taigi Brada Rutherford: „Na Wilson [Presidenti fu Amerkankondre] sorgu taki a wet dati no meki. Ma no span. Wi sabi fa wi o kisi unu!”

12, 13. (a) Fu san ede aiti brada di ben e teki fesi na ini na organisâsi ben musu go na strafu-oso? (b) Fu san ede wi kan taki dati den brada tan gi yesi na Yehovah di den ben de na strafu-oso?

¹² Te fu kaba den tiriman feni wan  fasi fu du san den pramisi den Bijbel Ondrosukuman. Den tyari Brada Rutherford, Brada Van Amburgh nanga siksi trawan di ben e teki fesi na ini na organisâsi, go sroto. A krutuman di ben e luku a tori fu den brada disi taki: „Den sani di den man disi e leri, ogri moro san den srudati fu Doisrikondre man du. Boiti taki den de teige ala den tiriman fu a kondre nanga a legre, den krutu ala den kerki fesiman tu. Den musu kisi hebi strafu” (Faith on the March, di A. H. Macmillan skrifi, blz. 99). Na dati pasa tu. Den krutu den aiti Bijbel Ondrosukuman disi èn den seni den go na a strafu-oso fu Atlanta, Georgia, pe den ben o abi fu koti strafu omeni yari langa. Ma di a feti kaba, den lusu den brada èn den tiriman no ben feni moro taki den du wan ogri.

¹³ Srefi di den aiti brada disi ben de na strafu-oso, den du san den leri fu Bijbel. Na ini wan brifi di den skrifi gi a presidenti fu Amerkankondre, den taki: „A wani fu Masra, soleki fa skrifi na ini Bijbel, na taki wi no musu kiri sma. Dati meki iniwan Bijbel Ondrosukuman di gi ensrefi abra na Masra èn di e pasa Gado wet fu espresi o meki Gado kisi atibron. Disi kan meki taki a lasi en libi srefi. Dati meki a konsensi fu wi no e gi nowan fu wi pasi fu kiri sma.” Den brada ben abi deki-ati fu skrifi a sani disi! Noiti den ben o du wan sani di Gado no feni bun!

14. Fruteri san pasa fu 1914 te go miti 1919.

¹⁴ Maleaki 3:1-3 e sori san ben o pasa nanga den salfuwan fu 1914 te go miti a bigin fu 1919. (Leisi en.) Na a ten dati Yehovah Gado, „a tru Masra”, nanga Yesus Krestes, „a boskopuman fu a frubontu”, kon luku fa a ben e go nanga „den Leifisma” di e prenki den salfuwan. Baka di Yehovah poti sani kon reti èn a krin den, den ben man teki wan nyun frantwortu na den tapu. Na ini 1919, Yesus poti wan „koni srafu di de fu frutrow” fu gi den futuboi fu en a nyanyan di den ben abi fanowdu fu tranga a bribi fu den (Mat. 24:45). Now Gado pipel ben kon fri fu Babilon a Bigiwan. Fu di Yehovah sori en pipel bun-ati, meki sensi a ten dati, den leri furu sani di abi fu du nanga a wani fu Gado èn den kon lobi den hemel Tata moro srefi. Den breiti taki Gado blesi den na a fasi disi! ^[1]

15. San wi musu du fu di wi kon fri fu Babilon a Bigiwan?

¹⁵ Wi breiti srefisrefi taki wi kon fri fu Babilon a Bigiwan! Satan fesi fadon! A no ben man puru a tru Kresten bribi na grontapu. Ma wi no musu frigiti fu san ede Yehovah meki wi kon fri (2 Kor. 6:1). Bun furu reti-ati sma de ete na ini katibo fu falsi bribi. Wi musu sori den fa den kan komoto drape. Meki wi yepi den. Sobun, teki na eksempre fu den brada fu wi na ini a ten di pasa èn du ala san yu man fu yepi sma fu kon fri!