Sira sai livre husi relijiaun falsu
“Sai husi nia, haʼu-nia povu.”—APOKALIPSE 18:4.
KNANANUK: 10, 45
1. Saida mak hatudu katak Maromak nia povu sei la sai dadur ba nafatin, no ita sei koʼalia kona-ba pergunta saida deʼit?
HUSI lisaun uluk, ita aprende katak Babilónia Boot halo ema kristaun neʼebé laran-metin ba Maromak sai nuʼudar dadur. Maibé sira-nia situasaun neʼe laʼós atu sai dadur ba nafatin. Oinsá mak ita hatene? Tanba Bíblia haruka Maromak nia povu atu “sai husi” relijiaun falsu sira. (Lee Apokalipse 18:4.) Ida-neʼe hatudu katak Maromak nia povu sei sai livre duni husi Babilónia Boot. Maibé horibainhira mak sira sai livre? Atu hatene resposta ba pergunta neʼe, ulukliu mai ita koʼalia kona-ba pergunta sira tuirmai neʼe: Antes 1914, Estudante Bíblia hakaʼas an halo saida kona-ba Babilónia Boot? Irmaun sira hatudu badinas ka lae kona-ba serbisu haklaken iha tempu Funu Mundiál Primeiru? Iha tempu neʼebá, Maromak husik Babilónia Boot halo ninia povu sai dadur tanba atu fó dixiplina ba sira, neʼe loos ka lae?
“BABILÓNIA MONU”
2. Antes Funu Mundiál Primeiru, Estudante Bíblia sira foti desizaun saida?
2 Tinan balun antes Funu Mundiál Primeiru akontese, Charles Taze Russell no Estudante Bíblia seluk haree katak igreja kristaun sira la hanorin lia-loos husi Bíblia, tan neʼe sira lakohi iha ligasaun ho relijiaun falsu sira-neʼe. No iha tinan 1879, livru Zion’s Watch Tower koʼalia nakloke hodi dehan katak igreja neʼebé hatete sira mak Kristu nia noiva neʼebé laran-metin maibé fó fali apoiu ba governu, tuir loloos sira hola parte iha Babilónia Boot, no Bíblia bolu sira nuʼudar feto-aat.—Lee Apokalipse 17:1, 2.
3. Saida mak Estudante Bíblia sira halo hodi hatudu katak sira lakohi tan hola parte iha relijiaun falsu? (Haree foto iha pájina 26.)
3 Ema neʼebé laran-metin ba Maromak hatene katak se sira kontinua fó apoiu ba relijiaun falsu, Maromak sei la haraik bensaun ba sira. Tan neʼe ema barak hakerek karta ba igreja hodi rezigna an. Ema balu lee karta sira-neʼe iha igreja ba ema hotu rona. Se igreja mak bandu sira labele lee karta neʼe ba ema iha igreja laran, sira haruka deʼit karta ba membru ida-idak. Ho ida-neʼe Estudante Bíblia sira hatudu ho momoos katak sira lakohi hola parte iha relijiaun falsu! Uluk ema la brani halo hanesan neʼe tanba sira bele hetan kastigu mate. Maibé toʼo tinan 1870, iha rai barak governu ladún apoia tan igreja sira hanesan uluk. Iha tempu neʼebá, ema iha ona liberdade atu koʼalia kona-ba Bíblia no kontra igreja nia doutrina sira.
4. Durante tempu Funu Mundiál Primeiru, Estudante Bíblia sira sente oinsá kona-ba Babilónia Boot? Esplika toʼok.
4 Estudante Bíblia sira hatene katak latoʼo atu fó-hatene deʼit ba família, kolega, no membru husi igreja sira katak sira la apoia tan relijiaun falsu. Sira mós hakarak fó-hatene ba mundu tomak katak Babilónia Boot mak hanesan feto-aat ida! Tan neʼe mak entre fulan-Dezembru tinan 1917 toʼo tinan 1918 nia hahú, Estudante Bíblia neʼebé uitoan deʼit fahe tratu hamutuk 10.000.000 ho títulu “The Fall of Babylon” (Babilónia monu). Tratu neʼe koʼalia nakloke kona-ba igreja kristaun sira, no neʼe halo igreja nia ulun-naʼin sira hirus tebes, maibé Estudante Bíblia sira la taʼuk. Sira kontinua haklaken tanba sira hakarak “halo tuir Maromak nuʼudar ukun-naʼin duké halo tuir ema”. (Apóstolu 5:29) Neʼe hatudu saida mai ita? Ida-neʼe hatudu ho klaru katak durante tempu Funu Mundiál Primeiru, Estudante Bíblia sira la husik tan Babilónia Boot atu halo sira dadur, maibé sira hakaʼas an hodi sai husi relijiaun falsu. No sira mós ajuda ema seluk atu sai husi nia.
BADINAS IHA TEMPU FUNU MUNDIÁL PRIMEIRU
5. Tanbasá mak ita fiar katak irmaun sira badinas tebes atu haklaken iha tempu Funu Mundiál Primeiru?
5 Ita-nia livru sira uluk hatete katak Maromak la kontente ho ninia povu tanba sira la laran-manas tan atu haklaken iha tempu Funu Mundiál Primeiru. Tanba razaun neʼe mak uluk ita hanoin katak Maromak husik ninia povu atu sai dadur ba Babilónia Boot. Maibé realidade la hanesan neʼe tanba ikusmai irmaun-irmán sira neʼebé laran-metin esplika katak, tuir loloos nuʼudar grupu ida, sira hakaʼas an tebes atu halo buat hotu ho sira-nia kbiit atu haklaken husi tinan 1914 toʼo tinan 1918. Se ita haree istória kona-ba saida mak akontese ba Estudante Bíblia sira iha tempu neʼebá, neʼe ajuda ita atu komprende kona-ba akontesimentu balu neʼebé hakerek iha Bíblia.
6, 7. (a) Estudante Bíblia sira presiza tahan hasoru susar saida deʼit iha tempu Funu Mundiál Primeiru? (b) Saida mak hatudu katak sira badinas tebes iha tempu neʼebá?
6 Tuir loloos, Estudante Bíblia sira laran-manas tebes hodi haklaken iha tempu Funu Mundiál Primeiru (1914-1918) maski la fasil ba sira atu halo nuneʼe. Iha razaun rua tanbasá susar ba sira atu haklaken. Razaun primeiru mak sira hatene deʼit atu uza livru sira hodi esplika kona-ba lia-loos. Sira seidauk aprende oinsá atu uza Bíblia hodi haklaken ba ema. Tan neʼe mak iha tinan 1918 bainhira governu bandu atu labele fahe tan livru The Finished Mystery, irmaun sira sente susar no la hatene oinsá atu haklaken ba ema. Razaun segundu mak iha tinan neʼebá, hahú mós moras-peste naran gripe españól. Moras neʼe hadaʼet lalais no perigu tebes, tan neʼe susar ba irmaun sira atu bá-mai hodi haklaken. Maski hasoru daudauk susar sira-neʼe, Estudante Bíblia sira nuʼudar grupu, hakaʼas an nafatin atu halaʼo serbisu haklaken.
Estudante Bíblia sira-neʼe badinas tebes! (Haree parágrafu 6, 7)
7 Ezemplu ida mak iha tinan 1914, Estudante Bíblia sira hatudu filme ida ba ema ho títulu, “Foto-Drama kona-ba Kriasaun”. Filme neʼe hatudu dezeñu ho lian kona-ba istória iha Bíblia husi tempu Maromak kria Adão toʼo tempu neʼebé Jesus ramata ninia Ukun ba tinan Rihun Ida. Filme neʼe hetan susesu boot, tanba iha tinan 1914 nia laran, ema naʼin–9.000.000 mak haree ona filme neʼe. Ema sira-neʼe barak liu fali Testemuña ba Jeová iha mundu tomak ohin loron! Iha relatóriu seluk tan neʼebé hatudu katak iha tinan 1916, ema naʼin–809.000 liu mak tuir reuniaun públiku sira neʼebé halaʼo iha Estadus Unidus. No iha tinan 1918 ema sira neʼebé tuir reuniaun neʼe aumenta toʼo besik naʼin–950.000. Estudante Bíblia sira laran-manas tebes!
8. Iha dalan saida mak irmaun sira neʼebé tau matan ba Maromak nia organizasaun hametin Estudante Bíblia sira iha tempu Funu Mundiál Primeiru?
8 Durante tempu Funu Mundiál Primeiru, irmaun sira neʼebé tau matan ba Maromak nia organizasaun hakaʼas an tebes hodi halo livru sira atu fó laran-manas ba Estudante Bíblia sira. Apoiu neʼe hametin duni sira hodi kontinua haklaken. Irmaun Richard Barber mós haklaken ho badinas iha tempu neʼebá, nia dehan: “Ami konsege fó apoiu ba irmaun sira neʼebé vizita kongregasaun hodi sira bele halaʼo nafatin sira-nia knaar no irmaun-irmán sira bele lee nafatin ita-nia Livru Haklaken no haruka mós ba rai-Kanadá neʼebé bandu hela Livru Haklaken.” Nia hatutan tan dehan: “Haʼu mós iha oportunidade atu haruka livru kiʼik kona-ba The Finished Mystery ba irmaun-irmán balu neʼebé governu hadau tiha sira-nia livru. Irmaun Rutherford hakarak ami atu organiza reuniaun boot iha sidade balu iha Estadus Unidus parte oeste no haruka irmaun balu ba fatin sira-neʼe atu hatoʼo diskursu hodi fó laran-manas ba irmaun-irmán sira.”
MAROMAK NIA POVU PRESIZA HADIʼA HAHALOK RUMA
9. (a) Entre tinan 1914 no 1919, Maromak nia povu presiza hadiʼa saida? (b) Maibé neʼe la hatudu kona-ba saida?
9 Iha buat ida mak Estudante Bíblia sira presiza hadiʼa entre tinan 1914 no 1919. Sira seidauk hatene didiʼak Jeová nia hanoin kona-ba hakruʼuk ba governu katak sá. (Roma 13:1) Tan neʼe mak nuʼudar grupu ida, sira la hatudu hahalok neutrál iha tempu hotu. Porezemplu, bainhira prezidente Estadus Unidus haruka ema atu reza kona-ba dame iha loron 30 Maiu 1918, Livru Haklaken mós fó laran-manas ba Estudante Bíblia sira atu halo orasaun kona-ba neʼe. Irmaun balu fó osan hodi apoia funu, no balu tan foti kilat hodi tuir funu. Maski sira presiza atu hadiʼa hahalok sira-neʼe, maibé la dehan katak tanba razaun sira-neʼe mak Maromak husik sira sai dadur ba Babilónia Boot. Realidade mak iha tempu Funu Mundiál Primeiru, sira komprende ona katak sira tenke sai husi relijiaun falsu no tempu atu haketak an iha dalan neʼebé kompletu mós besik ona.—Lee Lucas 12:47, 48.
10. Oinsá mak Estudante Bíblia sira hatudu katak sira respeitu moris?
10 Maski Estudante Bíblia sira seidauk komprende didiʼak kona-ba oinsá atu hatudu hahalok neutrál, maibé sira hatene katak Bíblia bandu ema atu labele oho. Tan neʼe, maski irmaun balu neʼebé tuir funu no kaer kilat iha tempu Funu Mundiál Primeiru, sira lakohi uza kilat sira-neʼe atu tiru ema. No tanba sira lakohi oho, ema haruka sira balu laʼo uluk iha soldadu nia oin hodi inimigu bele oho fali sira iha funu.
11. Governu sente oinsá kona-ba Estudante Bíblia sira lakohi luta iha funu?
11 Diabu sai hirus tebes tanba irmaun sira-nia laran-metin ba Maromak. Tan neʼe nia “halo problema liuhusi ukun-fuan”. (Salmo [Mazmur] 94:20) Jenerál James Franklin Bell husi forsa Estadus Unidus hatete ba irmaun Rutherford no Van Amburgh katak governu koko ona atu halo lei ida kona-ba fó kastigu-mate ba ema sira neʼebé lakohi luta iha funu. Ninia liafuan neʼe koʼalia kona-ba Estudante Bíblia sira. Jenerál neʼe hirus tebes hodi dehan ba irmaun Rutherford katak, lei neʼe la tun tanba prezidente ba rai-Estadus Unidus mak la hatán. Tuirmai nia dehan: “Maibé ami hatene oinsá atu kaer imi, no ami sei halo duni hanesan neʼe!”
12, 13. (a) Tanbasá mak ema julga irmaun naʼin-ualu atu tama komarka ba tinan barak? (b) Komarka halo irmaun sira kontra Jeová ka lae? Esplika toʼok.
12 Ikusmai governu fó duni kastigu ba Estudante Bíblia sira. Sira kaer irmaun Rutherford, Van Amburgh, no irmaun naʼin-neen seluk tan neʼebé reprezenta ita-nia organizasaun. Juíz neʼebé tau matan ba kazu neʼe hatete katak irmaun sira-neʼe perigu liu fali forsa husi Alemaña. Nia hatete katak irmaun sira-neʼe kontra ona governu, militár, no igreja sira no sira tenkesér hetan kastigu. Tan neʼe sira julga Estudante Bíblia naʼin-ualu neʼe atu tama komarka ba tempu kleur iha sidade Atlanta, Georgia. Maibé bainhira funu ramata ona, governu husik fali irmaun sira livre no kansela tiha kazu neʼe.
13 Maski iha komarka laran, irmaun naʼin-ualu neʼe laran-metin nafatin atu halo tuir Maromak nia ukun-fuan. Oinsá mak ita hatene kona-ba neʼe? Tanba sira hakerek karta ida ba prezidente Estadus Unidus husu atu husik sira sai husi komarka. Sira hakerek katak Bíblia bandu sira atu labele oho ema, tan neʼe se ema ida mak dedika ona ninia an ba Maromak, maibé ho ninia hakarak rasik atu kontra fali nia, Maromak sei hakribi ema neʼe no ema neʼe sei lakon ninia moris. Sira esplika katak tanba razaun neʼe mak sira lakohi oho ema. Sira hatudu aten-brani duni hodi hakerek karta ba prezidente. Ida-neʼe hatudu ho klaru katak irmaun sira-neʼe hakarak atu halo tuir deʼit Jeová.
IKUSMAI MAROMAK NIA POVU SAI LIVRE!
14. Esplika toʼok eskritura fó-hatene nanis kona-ba saida mak sei akontese entre tinan 1914 toʼo 1919.
14 Eskritura sira fó-hatene nanis saida mak sei akontese ba ema kose-mina entre tinan 1914 toʼo 1919 nia hahú. (Lee Malaquias [Maleakhi] 3:1-3. *) Iha tempu neʼebá, Maromak Jeová, “Naʼi neʼebé loos”, mai hamutuk ho Jesus Kristu, “manu-ain ba aliansa” atu ravista ema kose-mina, “Levi nia oan-mane sira”. Bainhira Jeová korrije no hamoos tiha sira, sira mós prontu ona atu simu knaar foun. Iha tinan 1919, Jesus hili “atan laran-metin no matenek” atu tau matan no hanorin Maromak nia povu. (Mateus 24:45) Komesa husi tempu neʼebá, Maromak nia povu sai livre duni husi Babilónia Boot. No sira-nia koñesimentu kona-ba Maromak nia hakarak no domin ba nia aumenta ba beibeik. Jeová hatudu duni laran-diʼak ba sira hodi fó bensaun ba sira! [1]—Haree nota husi lisaun.
15. Iha dalan saida mak ita bele hatudu katak ita agradese tanba livre ona husi Babilónia Boot?
15 Ita agradese tebes tanba livre ona husi Babilónia Boot. Satanás nia hakaʼas an atu halakon lia-loos la hetan susesu. Maibé ita tenkesér hanoin-hetan nafatin tanbasá Jeová halo ita livre husi Babilónia Boot. Tanba Maromak nia hakarak mak atu ema hotu bele hetan salvasaun. (2 Korinto 6:1) Relijiaun falsu sei kontrola hela ema laran-loos rihun ba rihun, no ema sira-neʼe presiza ita-nia ajuda! Tan neʼe mai ita hakaʼas an atu banati-tuir irmaun-irmán sira husi tempu uluk hodi ajuda ema sira-neʼe sai livre!
^ [1] (parágrafu 14) Buat neʼebé akontese ba ema judeu bainhira sira sai dadur ba Babilónia, barak mak hanesan ho buat neʼebé akontese ba ema kristaun sira iha tempu neʼebé apóstolu hotu mate. Maibé, ema judeu nia situasaun la reprezenta saida mak akontese ba ema kose-mina sira, tan neʼe ita labele uza akontesimentu ida-idak husi ema judeu sai dadur atu esplika katak buat sira-neʼe mós tenkesér akontese ba ema kose-mina, tanba iha buat barak mak la hanesan. Ezemplu ida mak kona-ba ema judeu sai dadur ba tinan 70, maibé ema kristaun sai dadur kleur liu fali ema judeu sira.
^ par. 14 Malaquias 3:1-3 1 Jeová, ukun-naʼin ba tropa lalehan nian dehan: “Haree bá! Haʼu haruka haʼu-nia manu-ain, no nia sei hamoos dalan iha haʼu-nia oin. No derrepente deʼit Naʼi neʼebé loos, neʼebé imi buka, sei mai iha ninia templu; no manu-ain ba aliansa sei mai, ida neʼebé imi hein hela ho haksolok. Haree bá! Nia sei mai duni”. 2 “Maibé sé mak bele tahan iha loron neʼebé nia mai, no sé mak bele hamriik hela bainhira nia mosu mai? Tanba nia sei mai hanesan ahi atu hamoos besi no hanesan sabaun atu fase roupa. 3 No nia sei tuur hanesan badain neʼebé halo nabeen no hamoos osan-mutin no nia sei hamoos Levi nia oan-mane sira; no nia sei hamoos sira hanesan osan-mean no osan-mutin, no ba Jeová, sira sei sai duni nuʼudar povu neʼebé hasaʼe sakrifísiu ho laran-loos.
