1. (a) Bilong wanem ol manmeri bilong God inap bilip olsem ol bai lusim kalabus bilong Babilon na kamap fri olgeta? (b) Yumi bai skelim wanem ol askim?

LONG stadi i kamap paslain, yumi kisim save long olsem wanem ol Kristen tru i stap kalabus long Bikpela Babilon. Tasol ol i no inap stap kalabus inap oltaim oltaim. God i tok: “Ol manmeri bilong mi, . . . yupela i mas lusim dispela ples na kam ausait.” Dispela tok bai popaia sapos i no gat man i lusim kalabus bilong ol lotu giaman. (Ritim Revelesen 18:4.) Yumi laik save long wanem taim ol manmeri bilong God i lusim kalabus bilong Babilon na kamap fri olgeta! Pastaim yumi mas kisim bekim bilong ol dispela askim: Paslain long 1914, ol Sumatin Bilong Baibel i mekim wanem bilong kamapim klia tingting ol i holim long Bikpela Babilon? Olsem wanem long sait bilong wok autim tok long taim bilong Wol Woa 1? Ol wokman bilong God i kisim tok bilong stretim ol long taim bilong Wol Woa 1, na yu ting dispela i mekim na ol i kalabus long Babilon?

2. Ol Sumatin Bilong Baibel long pastaim i holim wanem tingting long ol lotu giaman?

² Inap olsem 30 yia paslain long Wol Woa 1, Charles Taze Russell  na ol wanwok bilong em i luksave olsem ol lotu bilong lain Kristendom i no skulim ol man long tok i tru. Olsem na ol i mekim disisen olsem ol i no inap bung moa wantaim ol lotu giaman. Ol i autim tingting bilong ol na prinim long Wastaua bilong bipo (Zion’s Watch Tower) bilong Novemba 1879: “Sapos ol lotu i tok ol i stap klin na ol bai kamap meri bilong Krais, tasol ol i pas gut na sapotim wok bilong dispela graun (wel animal), orait yumi mas kolim ol olsem lotu bilong pamukmeri”—dispela tok i makim Bikpela Babilon.—Ritim Revelesen 17:1, 2.

3. Ol Sumatin Bilong Baibel i luksave olsem ol i mas lusim ol lotu giaman, olsem na ol i strongim bel long mekim wanem? (Lukim piksa long kirap bilong stadi.)

³ Ol manmeri bilong God i save long stretpela samting ol i mas mekim. Ol i save olsem God i no inap blesim ol sapos ol i sapotim yet wok bilong ol lotu giaman. Olsem na planti Sumatin Bilong Baibel i raitim pas bilong toksave olsem ol bai lusim lotu bilong ol. Long sampela lotu, ol sumatin i ritim pas bilong ol yet long ai bilong ol manmeri long taim bilong lotu. Sampela lotu i tambuim dispela pasin, olsem na ol sumatin i salim pas long olgeta wan wan memba bilong lotu. Ol i no laik tru long bung moa wantaim ol lotu giaman! Bikpela hevi tru inap painim ol dispela sumatin. Klostu long yia 1900, ol gavman long planti kantri i no strong moa long sapotim ol lotu. Olsem na ol manmeri long ol dispela kantri i no pret long toktok long ol samting bilong lotu na tokaut long ol samting ol i no wanbel long en.

4. Long taim bilong Wol Woa 1, ol manmeri bilong God i mekim wanem?

⁴ Ol Sumatin Bilong Baibel i luksave olsem ol i mas toksave long ol wanblut, ol pren, na ol memba bilong lotu olsem ol i lusim lotu giaman. Na tu, ol i mas toksave long olgeta man bilong graun olsem olgeta lotu giaman i stap olsem Bikpela Babilon—pamukmeri! Namel long Disemba 1917 na bihain tasol long 1918, liklik lain Sumatin Bilong Baibel em ol inap olsem 3 tausen, ol i givim bel tru long tilim 10 milion kopi bilong liklik nius i gat dispela het tok “Babilon i Pundaun” (“The Fall of Babylon”)—dispela nius i sutim tok long ol lotu giaman. Ol pris pasto i belhat nogut tru, tasol ol Sumatin Bilong Baibel i no larim dispela i pasim ol, na ol i wok yet long tilim dispela nius. Ol i tingting strong long ‘bihainim tok bilong God tasol, na ol i no bihainim tok bilong ol man.’ (Apo. 5:29) Dispela stori i givim wanem tingting long yumi? Ol Kristen i no kalabus long Bikpela Babilon long taim bilong woa, nogat, ol i wok long kamap fri na lusim kalabus bilong en, na ol i helpim ol narapela tu long lusim dispela kalabus.

5. Wanem samting i soim klia olsem ol bratasista i givim bel tru long autim tok long taim bilong Wol Woa 1?

⁵ Insait long ol yia i go pinis, yumi ting olsem Jehova i no amamas long ol manmeri bilong em bikos ol i no givim bel long autim tok long taim bilong Wol Woa 1. Yumi ting olsem dispela i mekim na Jehova i larim Bikpela Babilon i kalabusim ol Kristen inap sotpela haptaim. Tasol bihain, ol bratasista i stap gut long God long 1914 i go inap 1918 i kamapim klia olsem, lain manmeri bilong God olsem wanpela lain olgeta i bin mekim wok autim tok. I gat planti samting i soim klia olsem tru tru ol i bin mekim dispela wok. Yumi bin kisim sampela save moa long wok em ol manmeri bilong God i mekim long bipo, na dispela i helpim yumi long kliagut moa long ol stori bilong Baibel.

6, 7. (a) Ol Sumatin Bilong Baibel i karim wanem ol hevi long taim bilong Wol Woa 1? (b) Ol Sumatin Bilong Baibel i bin mekim wanem na dispela i soim olsem ol i givim bel tru long autim tok?

 ⁶ Long taim bilong Wol Woa 1 (1914-1918), ol Sumatin Bilong Baibel i mekim bikpela wok tru long autim tok. Tasol sampela samting i kamap na i putim hevi long ol. Yumi bai stori long 2-pela bilong ol dispela samting. Namba 1: Long dispela taim, ol i mekim wanpela wok tasol—ol i save tilim ol nius bilong Baibel. Bihain tasol long 1918, gavman i putim tambu long buk The Finished Mystery, na dispela i putim hevi long planti bratasista. Ol i no lain yet long yusim Baibel tasol long autim tok—ol i save tilim buk na larim ol man yet long ritim, na i olsem dispela buk i autim tok long ol man. Namba 2: Long 1918, bikpela sik kus bilong Spen i kamap na i putim bikpela hevi long ol bratasista. Dispela sik kus i kilim i dai planti manmeri, olsem na i hatwok long ol pablisa i go autim tok. Maski ol dispela hevi i kamap, ol Sumatin Bilong Baibel olsem wanpela lain olgeta i givim bel tru long mekim yet wok autim tok.

⁷ Long 1914, liklik lain Sumatin Bilong Baibel i soim piksa “Photo-Drama of Creation” long planti manmeri tru, winim 9 milion. Dispela drama i gat ol piksa slait em ol i pilaim wantaim musik. Em ol piksa bilong ol samting i kamap long taim God i stat long wokim ol samting long graun na i go inap long pinis bilong Wan Tausen Yia. Dispela wok i kamapim gutpela samting. Olsem: Namba bilong ol manmeri i lukim dispela drama long 1914 i winim tru namba bilong ol pablisa i stap long olgeta hap bilong graun long nau! Ripot i soim olsem, long 1916 inap olsem 809,393 manmeri i kam long ol miting long Amerika, na long 1918 namba bilong ol i go antap inap 949,444. Ol Sumatin Bilong Baibel i givim bel tru long autim tok!

8. Olsem wanem ol bratasista i kisim ol tok bilong strongim bilip bilong ol long taim bilong Wol Woa 1?

⁸ Long taim bilong Wol Woa 1, ol brata i givim bel tru long strongim bilip bilong ol Sumatin Bilong Baibel em ol i stap long narapela narapela hap. Olsem na ol bratasista i mekim yet wok autim tok. Brata Richard H. Barber i mekim bikpela wok long dispela taim, na em i tok: “Sampela wasman raun i mekim yet wok bilong ol na mipela i sambai long ol, na mipela i prinim yet  nius Wastaua na salim i go long Kanada, em kantri we ol i tambuim dispela nius. Mi mekim wok bilong salim ol liklik sais kopi bilong buk The Finished Mystery i go long planti pren em ol birua i bin rausim ol buk bilong ol. Brata Rutherford i tokim mipela long stretim rot bilong mekim kibung long sampela taun long hap wes bilong Amerika, na salim ol brata i go mekim ol tok bilong strongim ol bratasista.”

9. (a) Bilong wanem lain bilong God i kisim ol tok bilong stretim ol long ol yia namel long 1914 na 1919? (b) Yumi no ken holim wanem tingting kranki long ol Sumatin Bilong Baibel?

⁹ Namel long 1914 na 1919, ol Sumatin Bilong Baibel i mekim sampela samting we i no stret wantaim ol stiatok bilong Baibel. Ol bratasista i no birua long gavman, tasol sampela taim ol i no holim stretpela tingting long pasin bilong stap daun long gavman. (Rom 13:1) Olsem na sampela taim ol i insait long pait. Taim presiden bilong Amerika i makim Me 30, 1918 olsem de bilong mekim beten bilong kamapim bel isi, nius Wastaua i kirapim ol Sumatin Bilong Baibel long bihainim tok bilong presiden. Sampela brata i givim mani bilong baim ol samting bilong pait long woa, na sampela i holim gan na bainat na ol i go long ples bilong pait. I no stret long yumi ting olsem Bikpela Babilon i kalabusim ol Sumatin Bilong Baibel long rong ol i mekim, nogat. Ol dispela sumatin i save olsem ol i no ken bung wantaim ol lotu giaman, olsem na long taim bilong Wol Woa 1, ol i lusim pinis planti pasin bilong Bikpela Babilon.—Ritim Luk 12:47, 48.

10. Long taim bilong Wol Woa 1, olsem wanem ol Sumatin Bilong Baibel i soim olsem ol i rispektim laip bilong man?

¹⁰ Ol Sumatin Bilong Baibel i no kliagut long olgeta stiatok bilong Baibel we i tambuim ol Kristen long insait long pait, tasol ol i kliagut long wanpela samting: Baibel i tambuim pasin bilong kilim man i dai. Maski sampela brata i holim ol samting bilong pait na go wantaim ol narapela soldia long pait long Wol Woa 1, ol i no yusim ol dispela samting long kilim man. Sampela brata i no laik kilim ol birua, olsem na ol wansoldia bilong ol i putim ol dispela brata i go paslain long ol bambai ol birua i kilim ol.

11. Ol bikman bilong gavman i pilim olsem wanem taim ol Sumatin Bilong Baibel i no insait long pait?

¹¹ Satan i kros tru long pasin ol brata i mekim long sanap strong long bilip na ol i no kilim narapela. Olsem na Satan i “putim lo i tok orait long ol manmeri i mekim pasin nogut.” (Sng. 94:20) James Franklin Bell em Meja-Jenerel bilong ami bilong Amerika, na em i toktok wantaim Brata J. F. Rutherford na Brata W. E. Van Amburgh. James Franklin Bell i tok Jastis Dipatmen Bilong Amerika i laik putim lo bilong kilim ol man husat i no laik insait long pait. Dispela tok i makim ol Sumatin Bilong Baibel. James Franklin Bell i kros na i tokim Brata Rutherford olsem: “Dispela lo i no kamap bikos Wilson [Presiden Bilong Amerika] i stopim dispela lo; tasol mipela i save long rot bilong bagarapim yupela, na mipela bai mekim olsem!”

12, 13. (a) Bilong wanem kot i makim 8-pela brata long kalabus inap planti yia? (b) Taim ol brata i go kalabus, yu ting dispela i kirapim ol long senisim tingting na ol i no bihainim tok bilong Jehova? Stori long dispela.

¹² Ol bikman bilong gavman i mekim samting ol i tok long mekim, na ol i arestim ol brata i go pas long Wastaua Sosaiti, em Brata Rutherford, Brata Van Amburgh na 6-pela arapela brata. Taim jas i skelim kot, em i tok: “Wok lotu bilong ol dispela man inap giamanim planti man na em i nogut  moa winim wanpela grup bilong ol soldia bilong Jeman . . . Ol i luk daun long wok bilong ol man i putim lo insait long Gavman na ol i no rispektim ol bikman bilong ami, na tu, ol i daunim wok bilong ol manmeri bilong olgeta narapela lotu. I stret long ol i kisim bikpela strafe.” (Buk Faith on the March, em A. H. Macmillan i raitim, p. 99) Kot i makim ol dispela 8-pela brata long kalabus inap planti yia long banis kalabus long Atlanta, Georgia—em kalabus bilong ol man em pasin bilong ol i nogut tru. Taim woa i pinis, kot i tok orait long ol i ken lusim kalabus.

¹³ Taim ol dispela 8-pela brata i stap long kalabus, ol i sanap strong na bihainim yet ol tok bilong Baibel. Ol i raitim pas i go long presiden bilong Amerika na ol i kamapim klia tingting bilong ol, na ol i tok: “Long Baibel, Bikpela i tok, ‘No ken kilim man i dai,’ olsem na sapos wanpela memba bilong Asosiesen [Bilong Intenesenel Sumatin Bilong Baibel] i givim bel tru long mekim wok bilong Bikpela, tasol bihain em i no stap gut long dispela wok, God i no inap orait long em na bagarap bai painim em. Olsem na ol i no laik kilim i dai ol narapela.” Ol dispela strongpela tok i soim klia olsem ol brata i holim wanpela tingting tasol—ol i no inap lusim bilip!

14. Baibel i stori olsem wanem long ol samting i kamap namel long 1914 na 1919?

¹⁴ Malakai 3:1-3 i stori long ol samting bai kamap namel long 1914 na 1919, taim God i stretim ol “wokman bilong Bikpela.” (Ritim.) Long dispela taim, God Jehova em “Bikpela I Gat Olgeta Strong,” na Jisas Krais em “ensel bilong autim tok bilong kontrak,” ol i kam long skelim pasin em ol Kristen i bihainim long mekim lotu. Jehova i stretim ol manmeri bilong em, olsem na dispela i redim ol long mekim bikpela wok moa. Long 1919, “gutpela wokboi i gat savetingting” i kirap long givim kaikai bilong strongim bilip bilong ol manmeri. (Mat. 24:45) Ol manmeri bilong God i lusim pinis Bikpela Babilon. Kirap long dispela taim, Jehova i soim bikpela pasin helpim long ol manmeri bilong em na ol i kisim planti save moa long laik bilong em na ol i laikim em moa yet. Ol i amamas tru long ol blesing ol i kisim! ^[1]

15. Yumi lusim pinis kalabus bilong Bikpela Babilon, olsem na dispela i mas kirapim yumi long mekim wanem?

¹⁵ Ol Sumatin Bilong Baibel i amamas tru long lusim kalabus bilong Bikpela Babilon na kamap fri! Satan i wok hat long pinisim lotu i tru long dispela graun, tasol hatwok bilong em i lus nating. Tasol oltaim yumi mas tingim risen na Jehova i helpim yumi long kamap fri. (2 Kor. 6:1) Planti manmeri i gat gutpela bel, tasol ol i stap kalabus yet long ol lotu giaman. Yumi mas helpim ol long lusim dispela kalabus. Yumi inap soim rot long ol. Yumi mas bihainim eksampel bilong ol bratasista bilong yumi long dispela taim bipo na wok strong long helpim ol manmeri long lusim lotu giaman na kamap fri!