LUMINUWAS an sarong artikulo na may apurado asin malinaw na pangapudan: “Mga Parahayag kan Kahadian sa Britania—Magmata Kamo!!” (Informant, * Disyembre 1937, edisyon para sa London) Sinabi pa kan nakakapaisip na subtitulo kaiyan: “Mayong Dakulang Pag-uswag sa Laog nin Sampulong Taon.” Bilang patotoo, ilinaag sa inot na pahina an sarong sampulong taon na report nin paglilingkod puon 1928 sagkod 1937.

Taano ta nagin mabublay an gibuhon na paghuhulit sa Britania? Minalataw na “naguot” an mga kongregasyon, na dai gayong makaabante arog kan sinundan na mga taon. Dugang pa, nagdesisyon an sangang opisina na mga 200 sanang payunir an kaipuhan sa nasyon, na gabos naglilingkod sa hararayong teritoryo imbes na sa mga kongregasyon. Kaya, sinabihan kan sangang opisina an mga gustong magpayunir na pano na an teritoryo sa Britania asin dinagka sinda na maglingkod sa ibang mga nasyon sa Europa. Pero an nakakaugma, kadakul pa man giraray an nagdagos na magpayunir, naghali sa Britania, asin naglingkod sa ibang nasyon arog kan Pransia, dawa dikit sana an aram ninda sa lengguwahe o mayo pa ngani.

An artikulo sa Informant kan 1937 nagtao nin bakong madaling pasuhan para sa taon 1938: Sarong milyon na oras! Maaabot an pasuhan na iyan kun magamit an mga parahayag nin 15 oras kada bulan sa ministeryo asin an mga payunir, 110 na oras. Nagtao man nin suhestiyon na mag-organisar nin mga grupo sa paglilingkod sa langtad na mahulit nin limang oras sa kada pagluwas asin suhestiyon na tawan nin atensiyon an mga pagdalaw liwat, lalo na sa mga banggi sa laog kan semana.

Ikinaugma nin dakul an pagduduon liwat na ini sa paghuhulit. “Pangapudan idto kan headquarters na humiro, na pighahalat kan kadaklan sa samo, na sa dai nahaloy, may mararahay na resulta,” an nagigirumduman ni Hilda Padgett. * Si Sister E. F. Wallis nagsabi: “Marahayon na suhestiyon an limang oras sa kada pagluwas! May mas nakakaugma pa daw kisa sa bilog na aldaw na paglilingkod sa Kagurangnan?” Sinabi pa niya na pagal sindang nagpupuli, pero maugmang marhay sinda. Namatian man kan hoben pa kaidtong si Stephen Miller an pagkaapurado kan gibuhon, kaya naghimati siya sa pangapudan. Gusto niyang gibuhon iyan mantang may oportunidad siya! Nagigirumduman niya an mga grupong nakabisikleta na bilog na aldaw na naghuhulit, asin sa banggi nin tig-init, nagpapatugtog nin isinaplakang mga pahayag. Maigot sindang nag-aanunsiyo mantang naglalakaw na may mga plakard asin nagpapatotoo sinda sa tinampo gamit an mga magasin.

Nagtao man an Informant nin bagong pangapudan: “Kaipuhan ta nin sarong hukbo nin 1,000 payunir.” Binago man an palisiya sa sangay—an mga payunir dai na maglilingkod na suway sa mga kongregasyon kundi kaiba ninda, na matabang asin mapakusog sa sainda. Nagigirumduman ni Joyce Ellis (dating Barber an apelyido): “Narerealisar na kan dakul na tugang na kaipuhan nindang magpayunir. Dawa  13 anyos pa sana ako kaidto, iyan an gusto kong gibuhon; gusto kong magpayunir.” Naabot niya an pasuhan na iyan kan Hulyo 1940, sa edad na 15. Si Peter, na kan huri nagin agom ni Joyce, nadangog man an pangapudan na “Magmata,” napahiro siya kaiyan na “pag-isipan an pagpapayunir.” Kan Hunyo 1940, sa edad na 17, nagbisikleta siya nin 105 kilometros pa-Scarborough tanganing maglingkod diyan bilang bagong payunir.

Arog kan ibang bagong payunir, mapagsakripisyo man si Cyril asin Kitty Johnson. Nagdesisyon sindang ipabakal an saindang harong asin mga rugaring para may panggastos sinda sa saindang bilog na panahon na paglilingkod. Nag-resign sa trabaho si Cyril, asin sa laog nin sarong bulan andam na sindang magpayunir. Nagirumduman niya: “Siguradong-sigurado kami digdi. Maugma saka gikan sa buot ming ginibo ini.”

Mantang marikas na nagdadakul an mga payunir, nag-isip an mga brother na nanginginot sa gibuhon nin praktikal na mga paagi para suportaran an nagdadakul na hukbong ini. Sinunod ni Jim Carr, sarong zone servant (inaapod ngunyan na paraataman nin sirkito) kan 1938, an suhestiyon na magkaigwa sa mga siyudad nin mga istaran para sa mga payunir. Dinagka an mga grupo nin mga payunir na mag-istar asin maglingkod na magkairibanan tanganing makatipid. Sa Sheffield, nag-arkila sinda nin sarong dakulang harong na sarong maygurang sa espirituwal na brother an nangangataman. Nagkontribwir nin pondo asin mga muwebles an kongregasyon sa lugar na iyan. Nagirumduman ni Jim: “Gabos nakikooperar tanganing magin mapanggana iyan.” Sampulong mahihigos na payunir an nakaistar diyan, na pinagdadanay an marahay na rutina sa espirituwal. “Kinokonsiderar an teksto [kan aldaw] kada aga sa pamahaw,” dangan “aroaldaw na minaduman an mga payunir sa kanya-kanyang teritoryo na nasa manlain-lain na lugar sa siyudad.”

Parehong naghimati sa pangapudan an mga parahayag asin payunir, kaya naabot an pasuhan na sarong milyon na oras kan 1938. Sa katunayan, ipinapahiling kan mga report an pag-uswag kan gabos na aktibidad sa ministeryo. Sa laog nin limang taon, haros natriple an bilang nin mga parahayag sa Britania. An panibagong pagtaong atensiyon sa gibuhon na pang-Kahadian nakapakusog sa mga lingkod ni Jehova na atubangon an nagdadangadang na masasakit na taon nin giyera.

Sa ngunyan, mantang nagdadangadang an giyera nin Diyos na Armagedon, nagdadakul giraray an mga payunir sa Britania. Sa nakaaging sampulong taon, pirmi sindang may bagong pinakahalangkaw na bilang nin mga payunir. Kan Oktubre 2015, uminabot iyan sa 13,224 payunir. Puka nanggad an mga payunir na ini sa katotoohan na an paglaog sa bilog na panahon na paglilingkod iyo an saro sa pinakamarahay na paagi na magagamit ninda an saindang buhay.