ONIAY apuraan tan malinew ya mensahe: “Manangipalapag na Panarian Diad Britain—Bangon Kayo!!” (Informant, * Disyembre 1937, London edition) Onia ni kaaruman na satan ya seryoson mensahe: “Anggapoy Baleg ya Inaligwasan ed Loob na Samploy Taon.” Nabasa itan ed unonan pahina na service report nipaakar ed ngalngali samploy taon ya agawaan manlapud 1928 anggad 1937.

Akin et abawasay seseg na saray agagi ed ministeryo diad Britain? Lapud diad dakel a taon et apasakey so paraan na saray kongregasyon, singa ra “alatian.” Sakey ni, nandesisyon so branch ya 200 labat ya payunir so kaukolan na teritorya da, saramay walad nisulinek ya pasen imbes ya diad saray kongregasyon. Binilin na branch iray manplaplanon manpayunir ya dakdakel lay walad Britain kanian dia lad arum ya bansa ed Europe so panlingkoran da. Makapalikliket ta amayamay so payunir ed Britain ya linmad arum ya bansa a singa diad France anggano agda amta so lenguahe odino daiset labat so natatalosan da.

Say 1937 ya artikulo na Informant et angiter na eksayting ya goal parad 1938: Sakey milyon ya oras! Mainomay ya naabot na saray manangipalapag itan no makala ray 15 oras kada bulan diad ministeryo tan saray payunir et 110 oras. In-suggest met na artikulo ya mangiyuksoy na saray grupo parad lawak na serbisyo, ya kada agew et limaran oras so aboten da tan manpokus irad panagpawil, lalo lad saray labi na Lunes anggad Biernes.

Dakel so eksayted lapud sayan impamaseseg ed ministeryo. Oniay nanonotan nen Hilda Padgett: * “Pinaseseg kami na headquarters ya onkiwas, abayag mi la ’tan ya tatalaranan tan balibali so resulta.” Imbaga nen Sister E. F. Wallis: “Marakep may suhestion ya aboten so limaran oras kada agew! Wala ni kasi mas makapangiter na liket nen say sanagew ya pankimey parad Katawan? . . . Nayarin naksawan kami kayari sanagew, balet kasin maliket kami? Siempre!” Amoria na kabataan ya si Stephen Miller ya apuraan so kimey kanian kinmiwas. Labay ton gawaen itan legan ya walay pankanawnawa to! Nanonotan to ni may grupo na agagin sanagew ya manbibisikleta ed ministeryo tan kada no labi no summer et manpapatogtog ira na in-rekord iran paliwawa. Makulikuli ran akilad martsa ya awi-awit da ray placard, nampulong irad karsada, tan nambunog na magasin.

Onia ni mensahe na Informant: “Kaukolan mi 1,000 ya payunir.” Diad balon instruksion nipaakar ed teritorya, miulop la ray payunir ed saray kongregasyon, suportaan tan pabiskegen da ray agagi. Oniay nanonotan nen Joyce Ellis (née Barber): “Apakiwas so dakel ya agagi ya manpayunir.  Anggano 13  aon ko ni labat ed saman, labay ko lay manpayunir.” Agawaan toy goal to nen Hulyo 1940, nen mantaon na 15. Si Peter ya nagmaliw ya asawa nen Joyce et naamtaan to met itan ya kerew kanian “implano to met lay manpayunir.” Nen Hunyo 1940, nen 17 to, binisikleta toy 105 km paonlad Scarborough pian diman manpayunir.

Kaibad saray masakripisyon balon payunir et si Cyril tan Kitty Johnson. Nandesisyon iran ilakoy abung tan kaykayarian da pian walay usaren dad panagpayunir. Nan-resign ed trabaho si Cyril, tan kayari na sakey bulan et ginmapo ran nampayunir. Oniay imbaga to: “Segurado kamid desisyon mi. Akaparaan kami tan maliket mi yan gawaen.”

Maples ya dinmakel iray payunir, kanian nanggawa na praktikal iran paraan iray mangidadaulon brother pian nasuportaan ira. Si Jim Carr, ya zone servant (natan et tatawagen ya manangasikaso na sirkito) nen 1938, et inunor toy suhestion ya mananap na panayaman na saray payunir diad saray syudad. Pinaseseg iray grupo na payunir ya manayam tan mankimey a saniiba pian makatipid ira. Diad Sheffield, nanrenta ra na baleg ya abung ya aasikasoen na sakey ya responsablin brother. Nandonasyon na kuarta tan kagawaan so kongregasyon ed lugar da. Oniay nanonotan nen Jim: “Nantutulongan so amin pian nasumpal itan.” Samploran makukulin payunir so nanayam diman, tan walay espiritual ya rotina da. “Kinabuasan iran manteteksto antis na almusal,” tan “inagew-agew ya manpupulong iray payunir ed teritorya da diad nanduruman parte na syudad.”

Tinmulok iray manangipalapag tan payunir ed kerew, nabot day goal ya sakey milyon ya oras nen 1938. Diad tua, ipapanengneng na report ya inmaligwas so amin ya aspekto na kimey ed ministeryo. Diad loob na limaran taon, tripli so indakel na saray manangipalapag ed Britain. Lapud bilin ya manpokus irad kimey na Panarian, apabiskeg so totoo na Dios ya arapen so onsabin mairap ya panaon na guerra.

Natan, ondadakel lamet iray payunir ed Britain, legan ya manasingger so guerra na Dios diad Armagedon. Diad loob na samploran taon, asabi so balon peak na saray payunir ya 13,224 nen Oktubre 2015. Amta na sarayan payunir ya say full-time a panaglingkor so sakey ed saray sankaabigan ya paraan a pangusaran day bilay da.