E INFORMADÓ * di desèmber 1937, edishon di Lònden, a duna e yamada kla akí: “Publikadónan di Reino na Gran Bretaña, Lanta Ariba!” Despues a sigui e suptítulo akí: “No Tabatin Niun Oumento Notabel den e Último Dies Añanan.” Anto un rapòrt di sirbishi di e último dies añanan, di 1928 pa 1937, ku nan a pone riba e promé página, a duna prueba di esei.

Kiko a pone e rumannan na Gran Bretaña baha man na e trabou di prediká? Parse ku nan a pèrdè nan zelo, i e trabou no tabata bai padilanti. Ademas, e sukursal a bisa ku e teritorio por a akapará solamente mas o ménos 200 pionero, kendenan tabata traha den teritorionan aislá en bes di traha huntu ku e kongregashonnan. De echo, e sukursal a bisa e rumannan ku kier a bira pionero ku no tabatin mas lugá den e teritorio na Gran Bretaña i a animá nan pa bai sirbi na otro paisnan europeo. Bastante pionero a bai paisnan manera Fransia, apesar ku nan tabata sa masha tiki di e idioma òf no tabata sa e mes. Nan esfuerso ta digno di elogio.

E artíkulo den e Informadó di 1937 a pone un meta pa aña 1938 ku a parse difísil pa alkansá: Traha un mion ora den sirbishi! Lo tabata fásil pa alkansá e meta ei si e publikadónan a traha 15 ora pa luna den sirbishi i e pioneronan 110 ora. E organisashon a sugerí pa organisá salidanan di sirbishi di sinku ora pa dia i a enfoká riba hasi rebishita, foral atardi riba dianan den siman.

E énfasis nobo akí riba sirbishi a emoshoná hopi ruman. Hilda Padgett * a kòrda: “Tabata un yamada di e sede mundial pa pone man na obra, algu ku hopi di nos tabata anhelá p’e i no a dura muchu ku esei a duna resultado maravioso.” E ruman muhé E. F. Wallis a bisa: “E sugerensia pa traha sinku ora pa dia [den sirbishi] tabata fantástiko. Ki goso mas grandi por tin ku traha henter dia pa Señor? . . . Kisas nos tabata yega kas kansá, pero sin duda nos tabata felis!” E yònkuman Stephen Miller a sinti e urgensia, i e tambe a respondé na e yamada. E kier a partisipá miéntras e tabatin e oportunidat. E ta kòrda kon gruponan di ruman tabata pasa henter dia den sirbishi riba baiskel, i parti atardi nan tabata toka diskursonan grabá. Nan tabata partisipá yen di entusiasmo den e marchanan di informashon ku pankarta i tabata ofresé revista riba kaya.

Ademas, e Informadó a bisa ku tabatin mester di 1.000 pionero. Komo ku a kambia e manera di abarká teritorio, e pioneronan lo no a traha mas nan so, sino huntu ku e kongregashonnan pa sostené nan i fortalesé nan. Joyce Ellis a bisa: “Un kantidat grandi di ruman hòmber a kuminsá realisá ku nan tabatin ku traha pionero. Aunke e tempu ei mi tabatin 13 aña, esei ta loke mi kier a hasi;  mi kier a traha pionero.” El a logra su meta na yüli 1940, tempu e tabatin 15 aña. Peter, kende despues a kasa ku Joyce, tambe a tende e yamada pa “Lanta Ariba.” E yamada ei a motiv’é pa e “kuminsá pensa pa traha pionero.” Na yüni 1940, tempu e tabatin 17 aña di edat, el a kore 105 kilometer riba baiskel bai Scarborough pa kuminsá ku su asignashon nobo komo pionero.

Cyril ku Kitty Johnson tabata un di e parehanan ku a hasi hopi sakrifisio pa traha komo pionero. Nan a disidí di bende nan kas i nan pertenensianan pa sostené nan mes den e sirbishi di tempu kompleto. Cyril a kita for di trabou, i denter di un luna nan tabata kla pa kuminsá traha pionero. El a kòrda: “Nos tabatin sigur di e desishon ei. Nos a hasié kontentu i di buena gana.”

Komo ku e kantidat di pionero a sigui oumentá drástikamente, e rumannan ku tabata dirigí e obra a pensa riba maneranan práktiko pa sostené e rumannan ei. Jim Carr, kende tabata sirbi komo sirbidó di zona (awor yamá superintendente di sirkuito) na 1938, a sigui e sugerensia pa buska kasnan pa pionero den stat. Nan a animá gruponan di pionero pa biba i traha huntu pa asina nan baha gastu. Na Sheffield, nan a hür un kas grandi i lag’é na enkargo di un ruman hòmber responsabel. E kongregashon lokal a kontribuí ku sèn i muebel. Jim a kòrda: “Tur hende a duna un man pa hasi esei bira un éksito.” Dies pionero diligente a bai biba einan i nan a mantené un bon rutina spiritual. El a agregá: “Tur mainta ora di desayuno nan tabata trata e teksto [di dia],” i “despues e pioneronan tabata sali bai traha den nan teritorio na diferente parti di e stat.”

Tantu publikadó- komo pioneronan a aseptá e yamada i a logra e meta di yega un mion ora den sirbishi na 1938. De echo, e rapòrtnan a mustra ku tabatin un oumento den tur aspekto di sirbishi. Den un periodo di sinku aña, e kantidat di publikadó na Gran Bretaña a bira kasi tres biaha mas tantu. E enfoke nobo akí riba prediká e Reino a fortalesé e pueblo di Yehova pa e añanan difísil di guera ku tabata na kaminda.

Awe, segun ku Armagedon, e guera di Dios, ta yega mas serka, e kantidat di pionero na Gran Bretaña ta oumentando atrobe. Den e último dies añanan, e kantidat di pionero a yega máksimonan nobo; e último tabata na òktober 2015 ora tabatin 13.224 pionero. E pioneronan akí ta bon konsiente ku e sirbishi di tempu kompleto ta un di e mihó kosnan ku nan por hasi den bida.