„ინფორმატორი“ * ბრიტანელ მაუწყებელეფს მოუწოდენდ: „სამეფოშ მაუწყებელეფი — გეგშაკურცხით!“ (დეკემბერი 1937, ლონდონიშ გიშაშქუმალა). თე სტატიას დუმაფიქრებელ ქვესათაურ უღუდ: „ვით წანაშ დინახალე მაუწყებელეფს უმნიშვნელოთ აძინუ“. თე აზრის ამტკიცენს ინფორმატორიშ პირველ გვერდის მოჩამილ 1928—1937 წანეფიშ ანგარიში.

მუ რდუ თიშ მიზეზ, ნამდა ქადაქებაშ საქმე ენთუზიაზმით ვემიშუ? კრებეფი ართ ადგილს გერდეს დო ბრელ წანაშ წოხოლე ეჭოფილ ტემპით აგრძელენდეს მსახურებას. ფილიალქ გეგნოჭყვიდ, ნამდა ბრიტანეთიშ ტერიტორიას ობაღუდ 200-შახ პიონერი, მით იმსახურებუდეს თექ დაშორებულ ტერიტორიეფს დო ვართ ხოლო კრებეფს. ათეშგურშენ ფილიალქ პიონერობა ოკოდუნ თინეფს უწუ, ნამდა ბრიტანეთის მეტ პიონერეფი ვარდეს საჭირო დო მოუწოდ თინეფს, უმსახურებუდესკო ევროპაშ შხვა ქიანეფს. მართალო სახიოლო რე თინა, ნამდა ბრელ პიონერი უგუჩერებუო მიშუ საფრანგეთშა დო შხვა ქიანეფშა, თიშ უმკუჯინუო, ჭიჭე უჩქუდეს დო ვარ საერთოთ ვა უჩქუდეს თექიან ნინა.

ჟიშე მოშინაფილ „ინფორმატორიშ“ ართ-ართ სტატიას თიცალ მიზანიშ გურშენ დიჭარ, ნამუშ მეჭირინაფა გვალო ადვილ ვეჸიდ — 1938 წანაშო ართ მილიონ საათი ოკო იქადაქესკო! თე მიზანს თი დროს ქიმიოჭირინუანდეს, მუჟამსით მაუწყებელეფი ირ თუთას 15 საათის ქიქადაქენდეს დო პიონერეფ — 110 საათის. რჩევა რდუ, ნამდა ქადაქებაშ მსახურებაშ ჯგუფეფიშ ორგანიზება გუკეთებუდესკო დო დღაშე ხუთ საათი უქადაქებუდესკო; თეშ გარდა მეტ ყურადღება მეუქციებუდესკო თიშა, ნამდა დაინტერესებულეფს მაჟიაშა ქიმიაკითხესკო, განსაკუთრებულო შქა მარას ონჯუაშ საათეფს.

თე სიახალე ბრელშო მანგარ სახიოლო რდუ. „თენა რდუ მოწოდება მთავარ სამმართველოშე, ნამუსით ბრელ ხანს ველუდით დო ბრელ დროს ვამკურთუმუნ თეშ ჯგირ შედეგეფქ ქუმაჸუნ“, — იშინანს ჰილდა პაჯეტი. * და უოლისი იჩიებ: „დღაშე ხუთ საათიშ ქადაქება მანგარ ჯგირ რჩევა რდუ! მუ მომღანდეს თიშ უმოს ხიოლს, ნამდა მთელ დღას დაკავებულ ვორდითკონ ღორონთიშ მსახურებათ?! მართალ რე, შულადირეფ იფრთუდით, მარა დიდ ხიოლ მიღუდეს!“ ახალგაზრდა სტეფან მილერი გინაფლენდ, ნამდა თე საქმეშ გინოდვალა ვეშილებედ დო მთელ გურით ქეშუდირთ თის. სტეფანს ოკოდ უმსახურებუდუკო ონდო თენა შეულებუდუნ! თინა იშინანს, მუჭო მსახურენდეს ჯგუფურო ველისპეტეფით მთელ დღას დო ზაფხულს ონჯუა-ონჯუას ხალხის ინოჭარილ მოხსენებეფშა ორჩქილუანდეს. თინეფ მთელ მონდომათ მსახურენდეს პლაკატეფით დო ქუჩეფს ქადაქენდეს ჟურნალეფით.

„ინფორმატორს“ შხვა მოწოდება ხოლო რდუ: „საჭირო რე ანთას პიონერი“. ახალ მიდგომა თის გულისხმენდ, ნამდა პიონერეფს უკვე კრებეფშე ცალკე ვარინ, თინეფწკუმა ართო ოკო უმსახურებუდესკო, ელურინალდესკო დო გუმანგარებდესკო. ბრელ ჯიმაქ ქუგოხვად, ნამდა საჭირო რდუ „პიონერეფო უმსახურებდესკო,  — იშინანს ჯოისი ელისი“ (ბარბერი). თინა იჩიებ: „თი დროს 13 წანერ ვორდ, მარა მანგარო მოკოდ პიონერო მსახურება“. ჯოისიქ 1940 წანაშ ივლისის, 15 წანერ რდუნ თეშ მუშ მიზანს ქიმიოჭირინუ. პეტრექ, ნამუქით უმოს გვიანო ჯოისშა დექორწინუნ, ქიმირჩქილუ მოწოდება „გეგშაკურცხით“, ნამუქით სტიმულ ქიმეჩუ, „უფიქრებუდუკო პიონერო მსახურებაშენ“. 1940 წანაშ ივნისის, თინა 17 წანერ რდუ, მუჟამსით ველისპეტით 105 კილომეტრი იდუ, ნამდა სკარბოროშა მიდურთუმუდუკო დო თექ პიონერო იმსახურუკონ.

მუჭოთ ახალ პიონერეფინ, სირილ დო კიტი ჯონსონეფი, დუდგინოდვალირ მსახურეფ რდეს. თინეფქ გეგმოჩეს მუნეფიშ ჸუდე დო ქონება სრულ დროთ მსახურებაშ ხარჯეფიშ ოფორალო. სირილქ ქიდიტუ მუშ სამუშა დო ართ თუთაშა თინეფ მზათ რდეს, ქუდუჭყაფუდესკო პიონერულ მსახურება. თინა იშინანს: „დარწმუნებულ ვორდით, ნამდა ირფელ ჯგირო იჸიდ. ჩქი ჩქინ სურვილით ვმსახურენდით დო ბედნერო ბგინაფლენდით დუც“.

პიონერეფიშ რიცხვი მალ-მალას იძინანდ, ათეშგურშენ პასუხიშმგებელ ჯიმალეფქ ქიდიჭყეს თიშე ფიქრი, მუჭო მეხვარესკო თინეფს პრაქტიკულო. ჯიმ კერი, ნამუთ 1938 წანას სამხარეო მსახურ (თაშ ჯოხოდ ადრე რაიონიშ ზედამხედველს) რდუნ, ქიმიაჸუნ ფილიალიშ რჩევას, ნამდა ქალაქეფს პიონერეფშო ჸუდეეფი ქუშიებუდესკო. პიონერეფს ელუჩეს, ნამდა უცხოვრებუდესკო დო უმსახურებუდესკო ართო, ბრელ ხარჯეფი ვაუღუდესკონ თიშენ. ქალაქ შეფილდის ქირათ გეჭოფეს დიდ ჸუდე, ნამუსით პასუხიშმგებელ ჯიმა ზედამხედველენდ. ადგილობრივ კრებაქ თინეფს ფარათ დო ავეჯით მეხვარ. ჯიმ კერი იშინანს: „არძაქ მიღ მონაწილება თე საქმეს“. თაქ ვით პიონერ ცხოვრენდ დო ჯგირ სულიერ განრიგ უღუდეს. „ოჭმარეს ჭკომუაშ დროს, ირდღაშიან მუხლის გენიხილენდეს, უკულ მიშეს მუნეფიშ ტერიტორიაშა, ნამუთ ქალაქიშ შხვადოშხვა ნაწილს რდუ“.

მაუწყებელეფქ დო პიონერეფქ ართნერო მიღეს თე მოწოდება დო თინეფქ ქიმიოჭირინეს მიზანს დო 1938 წანას ართ მილიონ საათი იქადაქეს. ანგარიშეფქ ქაძირ, ნამდა მსახურებაშ არძა სფეროს უმოს მეტიქ გეკეთინ. ხუთ წანაშ დინახალე ბრიტანეთის მაუწყებელეფიშ რიცხვიქ გესუმორ. სამეფოშ საქმეშ ახალებურო მერინაქ გამანგარ იეჰოვაშ ხალხი, ნამდა მერუესკო სირთულეეფს ჩხუპიშ დროს, ნამუთ წოხოლე მელუდეს.

ამდღა, მუჟამსით არმაგედონიშ დღა მონჭაფილ რენ, ბრიტანეთის პიონერეფიშ რიცხვი ხოლო იძინანს. ბოლო ვით წანაშ დინახალე პიონერეფიშ რიცხვიქ დიდო ქიმიძინ დო 2015 წანაშ ოქტომბერიშ მონაცემებით თინეფიშ რიცხვიქ 13 224-ის ქიმიოჭირინუ. თე პიონერეფს ბოლოშა არჩქილენა, ნამდა სრულ დროთ მსახურება არძაშ უჯგუშ საქმე რე მუნეფიშ ცხოვრებას.