1, 2. Gava yihonena yina kulikida asi ekorangedo kwa kara nomulyo.

CRISTINA gonomvhura 18 kwa tanta asi: “Vakondi vange kapi ngava korangeda nge nye ngava uyungire nge momudona. Nonkango dawo ngadi koresa nge unene. ^[1] Awo ngava uyunga asi ame kwato nondunge ntani kapi ngani diva yuma, ame hena asi na neta unene. Ame nkenye apa ngani lili ntani kapi ngani hara kuuyunga nawo. Ame kulizuvha asi kwato mulyo.” Eparu kudigopa unene nsene kapi vana kukukorangeda.

² Ekorangedo sininke somulyo unene. Rubén kwa tanta asi: “Nomvhura dononzi ame ngani lizuvhu asi kwato mulyo. Nye ezuva limwe, apa na zuvhisire kumwe nomukuronambunga ta dimburura asi nina guwu. Apa na mu tanterere udigu wange, age kwa purakenene nge nawa. Makura ta diworokesa nge yininke yoyiwa eyi na rugana. Age hena ta diworokesa nge nonkango edi ga uyungire Jesus asi ose kwa pitakana manzunge gomanzi momulyo. Ame nkenye apa kudiworoka etjangwa olyo ntani alyo simpe kuguma nge komutjima. Eyi ga tanterere nge mukuronambunga gwina ya vaterere nge unene.”—Mat. 10:31.

3. (a) Yisinke ga uyungire mupositoli Paurusa kuhamena ekorangedo? (b) Mapuro musinke natu ka konakona mosirongwa esi?

³ Bibeli za nkondopeka mulyo gokulikorangeda nkenye apa. Mupositoli Paurusa kwa tjangerere Vakriste  woVahebeli asi: ‘Ano vakwetu, kareni muna kotoka asi, mokatji keni mwa ha kara nampili gumwe ogu ga kara nomutjima gomudona gokudira kupura, a zumbe Karunga goMunamwenyo. Nye omu likorangede–korangede nkenye ezuva,  asi di dire kupukisa po gumwe nonzo, di mu kukutike.’ (Heb. 3:12, 13) Ove ngo mona mulyo gokukorangeda wopeke nsene ngo diworoka apa wa gwene ekorangedo eli lya ku gumine komutjima. Tu konakoneni mapuro aga: Morwasinke ekorangedo lya karera nomulyo? Yisinke natu lirongera ko omu Jehova naJesus naPaurusa va korangedere wopeke? Ntani ngapi omu natu gava ekorangedo lyewa?

4. Wolye va hepa ekorangedo, nye morwasinke vamwe ava dilire kuligwana?

⁴ Natuvenye kwa hepa ekorangedo, unene po ngomu tuna kukura. Murongi gedina Timothy Evans kwa tanta asi: “Vanona kwa hepa ekorangedo ngwendi moomu yimeno ya hepa mema. Munona kulizuvha asi age mulyo ntani kwa mu hara nsene tava mu korangeda.” Ose kuna kuparuka poyiruwo yoyidigu. Vantu kwa lihara tupu vene, kwato nkenda ntani kapi va hara kulikorangeda. (2 Tim. 3:1-5) Vakurona vamwe kapi ava pandadeke vana vawo morwa nawo kapi va gwene epandadeko kovakurona vawo. Varugani wovanzi kusivana morwa kapi ava va pandadeke ndi va va korangede koyirugana yawo.

5. Yisinke ya hamena mo mekorangedo?

⁵ Ekorangedo kwa hamena mo kupandadeka muntu koyininke yoyiwa eyi ga rugana. Ose simpe kuvhura tu korangede wopeke pokuvatantera asi awo kwa kara noyikara yoyiwa ndi ‘pokukorangeda wompwagetjima ndi wokudompa mutjima.’ (1 Tes. 5:14) Nkango zoRugereka “ekorangedo” kutanta asi “kuhedera muntu pepi.” Apa atu rugana kumwe novanavazinyetu, ose kugwana nompito dokulikorangeda. (Resa Muudisi 4:9, 10.) Ose kuruganesa nkenye mpito zongwa mokutantera wopeke eyi twa va harera ndi? Mokulimburura epuro olyo, pomuhowo twa hepa kugazadara ko kuhamena sisewe esi: “Ee, ehafo musinke lyokugwana nonkango dina zire mo poruveze rwado.”—Yis. 15:23.

6. Morwasinke Muzonaguli ana harere kutudompesa? Gava sihonena.

⁶ Satana Muzonaguli ana hara kutudompesa morwa ga yi diva asi edompeso kuninkisa muntu a tengure monyima pampepo ntani nomononkedi dimwe hena. Bibeli kwa tanta asi: “Nsene o dompa mutjima momaudigu, kapi ngo kara nononkondo.” (Yis. 24:10, NW) Satana kwa ruganesere mahepeko nomarundiro yipo a dompese Joba, nye kapi ya mu tompokere. (Joba 2:3; 22:3; 27:5) Ose kuvhura tu funde po yirugana yoMuzonaguli pokulikorangeda nava vemepata lyetu ntani nava womombungakriste. Eyi ngayi tu vatera tu kare noruhafo nokulizuvha epopero momapata getu nomombungakriste.

7, 8. (a) Yihonena musinke yomoBibeli ayi likida asi Jehova kutara ekorangedo asi mulyo? (b) Ngapi ava va kara novana nava temwinina sihonena saJehova? (Tara efano pepenuno 4.)

⁷ Jehova. Muepisarome kwa dimbire asi: “HOMPA kukara pepi nava vana dombo nomutjima; age kuparura ava lina pu ehuguvaro.” (Epis. 34:18) Jehova kwa nkondopekere muporofete gomulimburukwi Jeremiya apa ga kere nowoma nokudompa mutjima. (Jer. 1:6-10) Ntani gazara omu muporofete Ndaniyera ga lizuvhire apa Karunga ga tumine muengeli a ya  mu korangede. Muengeli ogu kwa tanterere Ndaniyera asi: “Karunga kwa ku hara.” (Ndan. 10:8, 11, 18, 19) Nove kuvhura o korangede vazuvhisi navenye novanavazinyetu wovakurupe.

⁸ Karunga kapi ga lizuvhire asi morwa va rugene nomvhura dononzi meguru naMunwendi kapi ya kere hepero kumupandadeka nokumukorangeda apa ga ya kere pevhu. Nye yikando yivali Jesus ga zuvhire oGuhwe tava uyunga kutundilira meguru asi: “Ogu yige Munwange ogu na hara, ga za nge komutjima.” (Mat. 3:17; 17:5) Karunga kwa pandadekere Jesus nokumutantera asi age kwa rugene nawa. Jesus ya mu korangedere apa ga zuvhire nonkango odo yikando yivali petamekero lyosirugana sendi sokuzuvhisa ntani momvhura zokuhulilira zeparu lyendi pevhu. Jehova kwa tumine muengeli a ya nkondopeke Jesus apa ga guvire unene komeho va ka mu dipage. (Ruk. 22:43) Nsene twa kara novana, tu honeneni Jehova pokuvakorangeda nkenye apa nokuvapandadeka nsene vana rugana nawa. Ntani twa hepa kuvavatera nsene epuro lyawo kuna kuliheteka kosure.

9. Yisinke natu lirongera ko omu Jesus ga tekwire vapositoli vendi?

⁹ Jesus. Masiku gena Jesus ga tulisire po Murarero gwaHompa, age kwa mwene sikara selinenepeko movapositoli vendi. Age kwa linunupikire pokukuhwa nompadi dawo, nye awo simpe kwa lipatanene asi yilye munene po mokatji kawo, ano Peturusa kwa lihuguvarere nyamwendi. (Ruk. 22:24, 33, 34) Nampili ngoso, Jesus kwa pandadekere vapositoli vendi wovalimburukwi kweyi va kere nage momaheteko gena ga pitire. Jesus kwa va tanterere asi awo ngava rugana yoyinene kupitakana eyi ga rugene ntani asi Karunga ga va hara. (Ruk. 22:28; Joh. 14:12; 16:27) Tu lipureni asi: ‘Kuvhura ni honene Jesus pokupandadeka vana vange ntani wopeke kweyi ava rugana mevango lyokudemenena komapuko gawo ndi?’

10, 11. Ngapi Paurusa ga yi likidire asi kukorangeda wopeke kwa kere mulyo?

¹⁰ Mupositoli Paurusa. Monombilive dendi, Paurusa kwa pandadekere Vakriste vakwawo. Age nga zi navamwe morugendo rwendi nomvhura dononzi ntani ga divire mapuko gawo nye simpe nga uyunga yininke yoyiwa kuvahamena. Pasihonena, Paurusa kwa tumbwire Timoteusa asi: “Munwange mwahompa, ogu na hara na huguvara,” ogu nga pakere mbili Vakriste. (1 Kol. 4:17; Fil. 2:19, 20) Ntani age kwa tanterere mbungakriste zoVakolinte kuhamena Titusa asi: “Murugani mukwetu mokumukwafa.” (2 Kol. 8:23) Timoteusa naTitusa va hefe apa va zuvhire nonkango dekorangedo edi ga uyungire Paurusa kuvahamena.

¹¹ Paurusa naBaranabasa kwa tulire eparu lyawo mosiponga apa va tengwire komavango oku va va homokerere. Pasihonena, nampili ngomu va ligwanekerere nomahepeko moLisitira awo kwa tengwilire ko va ka korangede varongwa wovape va kare mepuro. (Yirug. 14:19-22) MoEfeso, Paurusa kwa mu homokerere mbunga. Yirugana 20:1, 2 kwa tanta asi: “Ndjorongani eyi za pwa, makura Paurusa ta zigida varongwa, ta va korangeda ta va rekere, ta katuka a ze koMakedoniya. Age kwa gendere a pite moyirongo oyo oku ta korangeda vantu nononkango dononzi, makura ta wiza mosirongo saGereka.” Yosili, kukorangeda wopeke kwa kere nomulyo kwaPaurusa.

12. Monkedi musinke atu likorangeda komapongo?

¹² Konda zimwe zeyi Guhyetu gemeguru ga tu wapaikira mapongo kuna kara asi tu ka likorangede-korangede. (Resa Vahebeli 10:24, 25.) Ngwendi moomu ngava yi rugana varongwa vaJesus wokuhova, nose kuponga kumwe yipo tu lironge nokugwana ekorangedo. (1 Kol. 14:31) Cristina ogu vana tumbura ketameko kwa tanta asi: “Ame kuhafera unene eharo nekorangedo eli ani gwana komapongo. Poyiruwo yimwe ame kudompa mutjima apa ani zi koSinyanga soUhompa. Nye vanavazinyetukadi kulidingira nge nokutantera nge asi nina dwara nawa. Awo kutantera nge asi kwa hara nge ntani kuhafera ezokomeho lyange. Ekorangedo lyawo kuninkisa nge ni lizuvhe nawa.” Ee omu tupu ya wapa apa natuvenye atu lihameke mo ‘mokulikwafa-kwafa’ ndi mokulikorangeda-korangeda!—Rom. 1:11, 12.

13. Morwasinke ava va karera Karunga siruwo sosire va hepera ekorangedo?

¹³ Nampili ava va karera Karunga siruwo sosire nawo va hepa ekorangedo. Pasihonena, Josuwa kwa karerere Jehova noulimburukwi nomvhura dononzi. Nye Jehova kwa tanterere Mosesa asi: “Tantera nye Josuwa, omu koreke oku to mu korangeda, yeeyi age yige nga pitisira mbunga, age yige nga ka va pingisa sirongo esi ono kumona.” (Deut. 3:27, 28) Josuwa kwa mu pere situmbukira sosinene sokutwara Vaisraeli koSirongo sEtumbwidiro. Age kwa ligwanekerere nomaudigu ntani va ya mu fundire moyita sikando simwe. (Jos. 7:1-9) Yiyo Josuwa ga heperere ekorangedo. Nose twa hepa kukorangeda vakuronambunga, vatareli wonombunga ava ava rugana unene mokupakera mbili siunda saKarunga. (Resa 1 Vatesaronika 5:12, 13.) Mutareli gonombunga gumwe kwa tanta asi: “Poyiruwo yimwe vanavazinyetu kutupandura omu ava hafere edinguro lyetu monombilive edi ava tu pe. Ose kupungura nombilive odo nokudiresa apa atu dompo mutjima. Ado kutukorangeda sili unene.”

14. Yisinke yina kulikida asi epandadeko nekorangedo kuvatera muntu a tambure mapukururo?

¹⁴ Vakuronambunga novareti kwa yi nongonona asi pokugava mapukururo gomoBibeli ya wapa kupandadeka nokukorangeda muntu. Apa Paurusa ga pandadekere Vakriste womoKolinte kweyi va tambwire epukururo lyendi, ayo ya va korangedere mokutwikira kurugana youhunga. (2 Kol. 7:8-11) Andreas ogu ga kara novana vavali kwa tanta asi: “Ekorangedo kuvatera vanona va kure pampepo nokukara nonondunge. Mokuninka asi muntu a tambure mapukururo, pomuhowo wa  hepa kumukorangeda. Nampili ngomu vanona va diva yininke youhunga, awo ngava twikira kuyirugana nsene o twikira kuvakorangeda.”

15. Nkedi musinke zimwe natu korangeda wopeke?

¹⁵ Likida rupandu kelituromo lyovapuli vakwetetu noyikara yawo yoyiwa. (2 Hist. 16:9; Joba 1:8) Eyi atu rugana natuvenye mokukwatesa ko Uhompa, Jehova naJesus kuyitara asi mulyo, nampili ngomu atu gava yoyisesu morwa maukaro getu. (Resa Rukasa 21:1-4; 2 Vakolinte 8:12.) Pasihonena, vakurupe vamwe kulitura mo unene mokuza komapongo ntani kulihameka mokuzuvhisa nkenye apa. Ngano tu ruganese nkenye mpito mokuvapandadeka nokuvakorangeda.

16. Morwasinke natu korangedera wopeke nsene tuna gwana mpito?

¹⁶ Papara nompito dokukorangeda wopeke. Nsene tuna mono mpito zokupandadeka wopeke, twa hepa kuyirugana. Tarurura eyi ya horokere apa Paurusa naBaranabasa va kere moAntiyokiya zomoPisidiya. Vakurona wosinagoge kwa tanterere Paurusa novakwawo asi: “Vakwetu, ntene muna kara nonkango zokuza vantu konomutjima [ndi zekorangedo], zi uyungeni.” Ano Paurusa yipo ga geve siuyungwa sosiwa. (Yirug. 13:13-16, 42-44) Nsene pana moneka mpito, twa hepa kukorangeda wopeke. Nsene tu kara nonkareso zokukorangeda wopeke, nawo ngava tu korangeda.—Ruk. 6:38.

17. Yisinke ayi ninkisa epandadeko li gume muntu komutjima?

¹⁷ Vyukilira kutumbura yuma. Mbudi zaJesus ezi za tembe koVakriste womoTiyatira kulikida asi yawapa kuvyukilira kutumbura yininke nsene kuna kukorangeda. (Resa Ehororo 2:18, 19.) Nsene twa kara novana, kuvhura tu va tantere asi ose kuhafera ezokomeho lyawo lyopampepo eli vana kutura po. Kuvhura tu pandadeke zinya gomudike eyi ayi tu tetukisa omu a rere vana vendi nampili ngomu ga kara moukaro owo woudike. Epandadeko nekorangedo lyangoso kuguma muntu komutjima.

18, 19. Ngapi omu natu lipameka-pameka pampepo?

¹⁸ Jehova kapi nga vyukilira kututantera nonkango edi natu uyunga mokukorangeda wopeke ngwendi moomu ga tanterere Mosesa a ka korangede Josuwa. Nye nampili ngoso, Karunga kumuhafesa apa atu korangeda vapuli vakwetetu nava wopeke. (Yis. 19:17; Heb. 12:12) Pasihonena, kuvhura tu tantere ogu ana gava siuyungwa sanavenye omu tuna gwanene mo mapukururo gomawa ndi omu siuyungwa sina tu vatere tu kwate egano etjangwa lyongandi. Munazinyetukadi gumwe kwa tjangerere munazinyetugara ogu ga ya geve siuyungwa posigongi sawo asi: “Nampili ngomu tuna dili kusimwitira siruwo sosire, ove ono korangeda nge. Monkedi ezi ono uyunga apa ono gava siuyungwa soge ntani nomu ono uyungisa nge, kuna ninkisa nge ni lizuvhe asi Jehova yige ana kutumu o ya korangede nge.”

¹⁹ Ose ngatu lipameka-pameka pampepo nsene tu tokomena kutura pasirugana epukururo lyaPaurusa eli asi: ‘Omu likorangede-korangede oku tomu likwafa-kwafa, moomu tupu muna kurugana pwanaina.’ (1 Tes. 5:11) Natuvenye ngatu hafesa Jehova nsene tu ‘likorangeda–korangeda nkenye ezuva.’