1, 2. Why nao hem important for encouragem narawan?

CRISTINA, ^[1] wea hem 18 year hem sei: “Dadi and mami bilong mi nating savve encouragem mi bat evritaem tufala tok daonem mi nomoa. Datwan mekem mi feel nogud tumas. Tufala sei mi olsem smol pikinini nomoa, mi dark hed, and mi baonsa. Staka taem mi krae and mi no laek for story witim tufala. Mi feel olsem mi iusles nomoa.” Taem olketa narawan no encouragem iumi, datwan savve barava spoelem iumi!

² Bat tingim gud samting wea narawan kasem taem iumi encouragem hem. Rubén sei: “For staka year nao mi feel olsem mi iusles nomoa. Bat wantaem, mi waka witim wanfala elder long ministry and hem luksavve mi no hapi. Hem barava lisin long mi taem mi storyim feeling bilong mi long hem. Then hem storyim olketa gudfala samting wea mi duim. Hem talem tu toktok bilong Jesus wea sei iumi barava important winim evri smol bird. Mi no savve forgetim datfala toktok bilong Jesus and datwan evritaem encouragem mi. Toktok wea datfala elder talem barava helpem mi.”—Matt. 10:31.

3. (a) Wanem nao aposol Paul talem abaotem wei for encouragem narawan? (b) Wanem nao bae iumi storyim long disfala study?

³ Bible sei iumi mas encouragem narawan evritaem. Aposol Paul  sei long olketa Hebrew Christian: “Keakea olketa brata, nogud eniwan long iufala garem nogud heart wea no garem faith bikos hem lusim datfala God wea laef. Bat gohed for encouragem narawan evriday, . . . mekem no eniwan long iufala hem bighed bikos long sin wea savve trikim man.” (Heb. 3:12, 13) Taem narawan encouragem iu datwan savve mekem iu barava hapi. So why nao hem important for encouragem olketa brata and sista bilong iumi? Wanem nao iumi savve lanem from wei wea Jehovah, Jesus, and aposol Paul encouragem narawan? And wanem nao iumi savve duim for encouragem olketa narawan? Bae iumi storyim olketa kwestin hia.

4. Hu nao needim samwan for encouragem hem, bat why nao staka pipol distaem no duim datwan?

⁴ Iumi evriwan needim narawan for encouragem iumi. Hem barava important for dadi and mami encouragem pikinini bilong olketa. Wanfala teacher wea nem bilong hem Timothy Evans sei olketa pikinini “needim narawan for encouragem olketa olsem wei wea wanfala plant needim wata for hem grow gud.” Hem sei tu: “Taem dadi and mami encouragem pikinini, datwan mekem hem feel gud and hem savve tufala tinghae long hem.” Bat from iumi stap long “olketa last day,” staka pipol tingim olketa seleva nomoa and “no garem love insaed long famili.” (2 Tim. 3:1-5) Samfala dadi and mami no encouragem pikinini bilong olketa bikos dadi and mami bilong olketa tu no encouragem olketa. Olketa wea big finis tu needim narawan for encouragem olketa, bat staka taem no eniwan duim datwan. Olsem example, staka pipol sei long waka ples no eniwan savve encouragem olketa.

5. Wanem nao iumi savve duim for encouragem olketa narawan?

⁵ Iumi savve encouragem olketa narawan taem iumi talem thankiu for gud samting wea olketa duim, and taem iumi talem olketa iumi tinghae long olketa gudfala wei bilong olketa. Narafala wei for encouragem narawan tu hem for comfortim olketa wea sorre or helpem olketa wea wikdaon. (1 Thess. 5:14) Taem iumi stap witim olketa brata and sista, iumi garem staka chance for encouragem olketa. (Readim Ecclesiastes 4:9, 10.) So hem gud for tingim diswan: ‘Waswe, mi evritaem talem olketa narawan why mi tinghae and lovem olketa?’ Hem gud for tingim wanem Bible talem abaotem diswan. Hem sei: “Toktok wea man talem long barava taem hem gud tumas!”—Prov. 15:23.

6. Why nao Satan laekem pipol bilong God for wikdaon? Storyim example.

⁶ Long Proverbs 24:10 hem sei: “Sapos iu feel wikdaon taem iu kasem trabol, bae iu no strong nao.” Satan savve sapos iumi feel wikdaon, datwan savve spoelem spiritual saed bilong iumi. Hem trae for mekem Job wikdaon taem hem mekem Job for kasem staka nogud samting. Bat datfala nogud plan bilong Satan no mekem Job wikdaon. Job hem gohed for faithful long Jehovah. (Job 2:3; 22:3; 27:5) Iumi tu savve againstim Satan and no letem eni samting mekem iumi wikdaon. Sapos iumi gohed encouragem olketa insaed long famili bilong iumi and olketa brata and sista long kongregeson, iumi evriwan bae hapi and fren gud witim Jehovah.

7, 8. (a) Wanem nao Jehovah duim for encouragem olketa narawan? (b) Hao nao olketa dadi and mami savve followim example bilong Jehovah? (Lukim piksa long start bilong study.)

⁷ Jehovah savve encouragem olketa narawan. Man wea raetem psalm sei: “Jehovah hem stap klosap long olketa wea safa and hem sevem olketa wea barava wikdaon.” (Ps. 34:18, footnote) Taem profet Jeremiah fraet and wikdaon, Jehovah sei bae hem helpem  hem. (Jer. 1:6-10) Jehovah sendem wanfala angel for strongim olo profet Daniel. Datfala angel sei Daniel “man wea barava spesol.” (Dan. 10:8, 11, 18, 19) Iumi tu savve encouragem olketa brata and sista, olketa pioneer, and olketa olo wea distaem olketa no strong for duim staka samting.

⁸ Nomata Jehovah and Jesus stap tugeta long heven for staka year, Jehovah savve hem mas gohed for encouragem Son bilong hem taem hem stap long earth. Tufala taem nao Jesus herem Dadi bilong hem story kam long hem from heven. Jehovah sei: “Diswan nao Son bilong mi wea mi lovem and wea mi hapi long hem.” (Matt. 3:17; 17:5) Masbi taem Jesus herem Dadi bilong hem sei hem lovem and hapi long hem long tufala taem hia, datwan barava strongim hem. Long naet bifor Jesus dae, hem barava wari tumas. Long datfala taem tu Jehovah sendem wanfala angel for strongim and comfortim hem. (Luke 22:43) Olketa dadi and mami, iufala savve followim example bilong Jehovah taem iufala evritaem encouragem pikinini bilong iufala. Praisem olketa taem olketa duim gud wanfala samting. And taem olketa kasem samfala hard samting long skul, traem best for strongim olketa and helpem olketa for no givap.

9. Wanem nao iumi savve lanem from wei wea Jesus deal witim olketa aposol?

⁹ Jesus tu showimaot gudfala example for iumi followim. Long naet bifor hem dae, Jesus wasim leg bilong olketa aposol and talem olketa wei wea hem important for olketa mas hambol. Bat olketa praod and raoa abaotem hu long olketa nao important, and Peter tokplas and sei hem bae nating lusim Jesus. (Luke 22:24, 33, 34) Nomata olsem, Jesus no tingim wik point bilong olketa. Bat hem praisem olketa from olketa gohed for faithful long hem. Hem sei olketa samting wea olketa bae duim bae hem winim olketa samting wea hem duim, and hem talem olketa Jehovah lovem olketa. (Luke 22:28; John 14:12; 16:27) Iumi savve tingim diswan: ‘Waswe, mi followim example bilong Jesus for no tingim wik point bilong olketa narawan bat mi talem olketa mi tinghae long olketa gudfala wei bilong olketa?’

10, 11. Hao nao Paul encouragem olketa nara Christian, and wanem nao hem duim wea showimaot hem willing for duim datwan?

¹⁰ Staka taem nao aposol Paul storyim olketa gud samting abaotem olketa nara Christian. Hem savve gud long samfala hia bikos olketa savve gogo tugeta for staka year. Nomata olsem, hem nating raet abaotem wik point bilong olketa bat hem praisem olketa. Olsem example, Paul hem sei abaotem Timothy: “Hem olsem pikinini bilong mi. Mi lovem hem and hem faithful for duim waka bilong Lord.” Paul sei tu hem barava sure Timothy bae tingim and lukaftarem olketa nara Christian. (1 Cor. 4:17; Phil. 2:19, 20) Paul talem olketa Christian long Corinth hao Titus hem wanfala brata wea waka witim hem for helpem olketa. (2 Cor. 8:23) Masbi taem Timothy and Titus herem samting wea Paul talem abaotem tufala, datwan barava encouragem tufala!

¹¹ Paul and Barnabas putim laef bilong tufala long danger for encouragem olketa nara Christian. Olsem example, tufala savve staka pipol long Lystra laek for killim tufala. Nomata olsem, tufala go bak long there for encouragem olketa niu disaepol and for helpem olketa for gohed faithful long Jehovah. (Acts 14:19-22) Bihaen, long Ephesus, wanfala big sekson kros long Paul and laek for killim hem. Long Acts 20:1, 2 hem sei: “Bihaen bigfala raoa hia hem finis, Paul sendem message for olketa disaepol kam long hem. Hem encouragem olketa, then hem sekhand witim olketa and go long Macedonia. Hem go long olketa difren ples long Macedonia and encouragem olketa disaepol, then hem go long Greece.”

12. Why nao hem gud for iumi go long olketa meeting?

¹² Jehovah laekem iumi for kasem gud samting. Dastawe hem talem iumi for hipap tugeta evritaem. Long olketa meeting bilong iumi, iumi lane abaotem hem and iumi encouragem each other. (1 Cor. 14:31; readim Hebrew 10:24, 25.) Cristina wea iumi storyim long start bilong disfala study hem sei: “Samting wea mi laekem tumas long olketa meeting hem nao wei wea olketa brata and sista showimaot love and olketa encouragem mi. Samfala taem mi no feel gud taem mi kasem Kingdom Hall. Bat then olketa sista kam long mi, hugim mi, and sei mi luk naes. Olketa sei olketa lovem mi, and olketa hapi for lukim mi gohed gud long spiritual wei. Evri samting hia mekem mi barava feel gud!” Hem barava important for iumi encouragem olketa narawan!—Rome 1:11, 12.

13. Why nao olketa wea worshipim Jehovah for longfala taem finis tu needim samwan for encouragem olketa?

¹³ Nomata olketa wea worshipim Jehovah for longtaem finis, olketa needim narawan for encouragem olketa. Tingim Joshua. Taem olketa Israelite redi for go insaed long Promis Land, Jehovah chusim Joshua for leadim olketa. Nomata Joshua worshipim Jehovah for staka year finis, Jehovah talem Moses for encouragem hem. Jehovah sei: “Markem Joshua for changem iu and encouragem and strongim hem, bikos hem nao bae tekem pipol hia go insaed long land wea bae iu lukim.” (Deut. 3:27, 28) Joshua needim samwan for encouragem hem bikos taem olketa go insaed long datfala Promis land, bae olketa faet againstim staka nation, and bae olketa lus long wanfala faet tu. (Josh. 7:1-9) Distaem tu iumi savve encouragem olketa elder and circuit overseer wea waka hard for lukaftarem pipol bilong God. (Readim 1 Thessalonica 5:12, 13.) Wanfala circuit overseer sei: “Samfala taem mifala kasem olketa leta from olketa brata and sista for sei thankiu long mifala, and for sei olketa barava enjoyim visit bilong mifala. Mifala keepim olketa leta hia and readim moa taem mifala feel wikdaon. Datwan hem barava encouragem mifala.”

14. Olketa wanem example nao showimaot hem gud for praisem olketa narawan taem iumi stretem olketa?

¹⁴ Long wanfala taem aposol Paul kaonselem olketa Christian long Corinth. Taem olketa followim datfala kaonsel, Paul praisem olketa. (2 Cor. 7:8-11) Masbi toktok wea hem talem encouragem olketa for gohed duim stret samting. Distaem, olketa elder and olketa dadi and mami tu savve followim example bilong Paul. Andreas, wea garem tufala pikinini hem sei: “Taem iu encouragem pikinini datwan helpem olketa for hapi and gohed gud long spiritual wei. Taem iu encouragem olketa bae hem hard for olketa  forgetim kaonsel wea iu givim. Taem iumi encouragem olketa pikinini bilong iumi, bae olketa no savve nomoa long stret samting bat bae olketa evritaem duim stret samting tu.”

15. Wanem nao wanfala samting wea iumi savve duim for encouragem olketa narawan?

¹⁵ Talem olketa brata and sista iu barava tinghae long wei wea olketa waka hard and long olketa gudfala wei bilong olketa. (2 Chron. 16:9; Job 1:8) Sapos iumi duim olsem, iumi followim example bilong Jehovah and Jesus. Tufala tinghae long evri samting wea iumi duim for tufala, nomata wanem iumi duim hem smol nomoa. (Readim Luke 21:1-4; 2 Corinth 8:12.) Olsem example, iumi savve hem no isi for olketa olo brata and sista bilong iumi for kam long olketa meeting, and for go long preaching evritaem. Waswe, iumi praisem and encouragem olketa?

16. Wanem taem nao iumi savve encouragem narawan?

¹⁶ Evritaem encouragem olketa narawan. Taem iu lukim samwan duim gudfala samting, talem hem iu tinghae long datwan. Taem Paul and Barnabas stap long Antioch long Pisidia, olketa bigman bilong sinagog sei long olketa: “Olketa brata, sapos iufala garem eni toktok for encouragem pipol long hia, plis iufala talem kam.” Paul iusim datfala chance for encouragem pipol long there. (Acts 13:13-16, 42-44) Taem iumi encouragem narawan, bae olketa tu encouragem iumi.—Luke 6:38.

17. Wanem nao best wei for encouragem olketa narawan?

¹⁷ Talem wanem iu tinghae long hem. Taem Jesus praisem olketa Christian long Thyatira, hem talem gud samting wea olketa duim wea hem tinghae long hem. (Readim Revelation 2:18, 19.) Hao nao iumi savve followim example bilong hem? Maet iumi savve talem wanfala singol mami iumi tinghae long hao hem trainim olketa pikinini bilong hem nomata datwan hem no isi for hem. Or sapos iu wanfala dadi or mami, iu savve talem olketa pikinini bilong iu hao iu tinghae long wei wea olketa duim best bilong olketa for worshipim Jehovah. Talem long olketa gudfala samting wea olketa duim. Sapos iumi duim olsem taem iumi encouragem olketa narawan, olketa bae kasem gud samting from datwan.

18, 19. Wanem nao iumi savve duim for helpem each other for fren gud witim Jehovah?

¹⁸ Jehovah talem Moses for encouragem and strongim Joshua. Long distaem, Jehovah no story kam olsem long iumi and hem no talem hu nao for iumi encouragem. Bat hem hapi tumas taem hem lukim iumi encouragem narawan. (Prov. 19:17; Heb. 12:12) Olsem example, taem wanfala brata givim pablik tok long kongregeson, iumi savve talem long hem point wea iumi laekem long tok bilong hem. Maet hem talem advaes wea iumi needim long wanfala problem wea iumi feisim or hem explainim wanfala scripture wea iumi no minim gud bifor. Wanfala sista raet long wanfala brata wea givim wanfala tok. Hem sei: “Nomata iu story witim mi for lelebet taem nomoa, iu luksavve long hard taem wea kasem mi, and iu comfortim and encouragem mi. Mi laek for talem iu taem iu givim tok long stage and taem iu story witim mi bihaen, wei wea iu tok kaen hem wanfala present wea mi kasem from Jehovah.”

¹⁹ Sapos iumi followim kaonsel bilong aposol Paul, bae iumi fit for helpem each other for fren gud witim Jehovah. Paul sei: “Gohed for encouragem and strongim narawan, olsem iufala duim distaem.” (1 Thess. 5:11) Jehovah bae barava hapi long iumi sapos iumi “gohed for encouragem narawan evriday”!