1, 2. Khombisa kutsi kungani kubalulekile kukhutsatana.

CRISTINA, loneminyaka lengu-18 ^[1] budzala utsi: “Batali bami abangikhutsati, kepha bahlale banginyembenya njalo. Emavi abo angivisa buhlungu. Batsi ngeke ngibe yintfombatana lebhadlile, anginangcondvo futsi ngisidudla. Ngako ngihlala ngikhala futsi angitsandzi kukhuluma nabo. Ngitiva ngingasilutfo.” Nangabe kute sikhutsato, imphilo ngeke seyibemnandzi!

² Ngakulolunye luhlangotsi, sikhutsato sihle. Rubén utsi: “Ngiye ngalwa nemiva yekungabi lusito iminyaka leminyenti. Kodvwa ngalelinye lilanga, bengishumayela nalomunye lomdzala welibandla, lowabona kutsi angikajabuli. Wangilalela ngemusa njengobe ngiveta indlela lebengitiva ngayo. Wase ungikhumbuta ngetintfo letinhle lebengitenta. Waphindze wangikhumbuta emavi aJesu latsi​—ngamunye wetfu ubaluleke kwendlula bojolwane labanyenti. Ngihlale ngiwukhumbula loyomBhalo futsi usayitsintsa inhlitiyo yami. Lamavi alomzalwane enta umehluko lomkhulu emphilweni yami.”​—Mat. 10:31.

3. (a) Umphostoli Pawula watsini mayelana nesikhutsato? (b) Sitawucoca ngani kulesihloko?

³ Akukafaneli kusimangalise kutsi liBhayibheli ligcizelela kutsi  kufanele sikhutsatane. Umphostoli Pawula wabhalela emaKhristu langemaHebheru watsi: “Caphelani bazalwane, kutsi kubete kini loba nenhlitiyo lembi nalete kukholwa ngekutsi akhweshe kuNkulunkulu lophilako; kodvwa chubekani nikhutsatana malanga onkhe,  . . kuze kubete emkhatsini wenu loba lukhuni ngenca yekuyenga kwesono.” (Heb. 3:12, 13) Nangabe ukhumbula emavi lake akukhutsata, utawukwati kutsi kumcoka kanganani kulalela leseluleko sekukhutsata lomunye. Ngako asesicoce nganayi imibuto: Kungani sikhutsato sibalulekile? Yini lesiyifundzako ngendlela Jehova, Jesu kanye naPawula labakhutsata ngayo labanye? Singabakhutsata kanjani labanye ngendlela lekahle?

4. Bobani labadzinga sikhutsato futsi kungani singatfolakali namuhla?

⁴ Sonkhe siyasidzinga sikhutsato. Loku kuliciniso ikakhulukati nasisakhula. Timothy Evans, longumfundzisi, utsi: “Bantfwana . . . badzinga sikhutsato njengobe netihlahla tidzinga emanti. Nangabe umntfwana akhutsatwa, angativa abalulekile futsi atsandvwa.” Kodvwa siphila emalangeni ekugcina. Bantfu sebatinaka bona, seluncane lutsandvo futsi sekute sikhutsato. (2 Thim. 3:1-5) Labanye batali ababancomi bantfwana babo ngobe nabo batali babo abazange babakhutsate. Bacashi labanyenti abancomani, ngako loku kwenta kutsi kube kuncane kakhulu kukhutsatana etindzaweni temisebenti.

5. Sifaka ekhatsi ini sikhutsato?

⁵ Sikhutsato sifaka ekhatsi kuncoma umuntfu ngentfo lenhle layente kahle. Singabakhutsata labanye ngekubatjela ngebuntfu lobuhle labanabo nome sikhulume “ngendlela ledvudvutako nalabacindzetelekile.” (1 Thes. 5:14) Leligama lesiGriki lelihunyushwe ngekutsi “khutsata” lisho “kubitela lomunye eceleni.” Nangabe sisebenta ndzawonye nebazalwane nabodzadze, sinematfuba lamanyenti ekusho tintfo letikhutsatako. (Fundza Umshumayeli 4:9, 10.) Siyawasebentisa yini ematfuba lamahle ekutjela labanye kutsi kungani sibatsandza? Ngaphambi kwekutsi siwuphendvule lombuto, kungaba kuhle kucabanga nganasi saga: “Kuhle kunika imphendvulo lefanele ngesikhatsi lesifanele!”​—Taga 15:23.

6. Kungani Develi afuna kusicedza emandla? Niketa sibonelo.

⁶ Sathane Develi ufuna kusicedza emandla ngobe uyati kutsi kudvumateka kungasenta sibe butsakatsaka etintfweni letiphatselene naNkulunkulu kanye nangaletinye tindlela. Taga 24:10 titsi: “Nawukhubatela ngesikhatsi lesibucayi, usuke unemandla lamancane.” Sathane wasebentisa tinhlekelele kanye nekucamba emanga lokwehlukehlukene kuze advumate Jobe lobekalungile, kodvwa leyo metamo yakhe lemibi ayizange iphumelele. (Jobe 2:3; 22:3; 27:5) Singalwisana nemisebenti yaDeveli ngekutsi sikhutsate emalunga emindeni yetfu kanye nemalunga elibandla. Loku kutawusita ekwenteni emakhaya etfu kanye nemaHholwa eMbuso kutsi abetindzawo letijabulisako naletiphephile.

7, 8. (a) Ngutiphi tibonelo letiseBhayibhelini letikhombisa kutsi Jehova ubheka sikhutsato njengalesibalulekile? (b) Yini batali labangayenta kuze balandzele sibonelo saJehova? (Buka sitfombe lesisekucaleni kwalesihloko.)

⁷ Jehova. Umhlabeleli wahlabela watsi: “Simakadze uhlala asedvute nabo labanetinhlitiyo letephukile uyabasindzisa labanemoya lowephukile.” (Hla. 34:18) Ngesikhatsi Jeremiya umphrofethi lobekatsembekile esaba futsi aphelelwe ngemandla, Jehova wamcinisa. (Jer. 1:6-10) Cabanga ngaDanyela  umphrofethi lobekasakhulile kutsi wakhutsateka kanjani ngesikhatsi Nkulunkulu atfumela ingilosi yakhe leyafike yamcinisa. Lengilosi yabita Danyela ngekutsi “ngulotsandzekile.” (Dan. 10:8, 11, 18, 19) Ungabakhutsata yini nawe labanye bamemeteli, emahlahlandlela kanye nebazalwane nabodzadze lasebakhulile lasebaphelelwa ngemandla?

⁸ Nkulunkulu akazange adzinwe kukhutsata iNdvodzana yakhe Jesu nayilana emhlabeni, nanobe bebanesikhatsi lesidze kakhulu basebenta ndzawonye ezulwini. Kunaloko, kunetikhatsi letimbili lapho Jesu eva Babe wakhe akhuluma asezulwini atsi: “Lena yiNdvodzana yami letsandzekako nalengiyemukele.” (Mat. 3:17; 17:5) Ngako, Nkulunkulu wancoma Jesu futsi wamcinisekisa ngekutsi wenta kahle. Kufanele kube Jesu wativa akhutsateka kakhulu nakeva lamavi kabili​—nakacala inkonzo yakhe kanye nangemnyaka wakhe wekugcina alapha emhlabeni. Jehova waphindze watfumela ingilosi yakhe kutsi itocinisa Jesu ngesikhatsi acindzetelekile ngebusuku bangaphambi kwekufa kwakhe. (Luk. 22:43) Nangabe sibatali, kufanele silandzele sibonelo saJehova ngekutsi sibakhutsate njalo bantfwabetfu futsi sibancome nangabe bente lokuhle. Kufanele sibasekele nakakhulu lapho babhekene netilingo letivivinya bucotfo babo esikolweni.

9. Yini lesingayifundza endleleni Jesu labaphatsa ngayo baphostoli bakhe?

⁹ Jesu. Ngebusuku Jesu lacalisa ngabo umkhosi weSikhumbuto sekufa kwakhe, wabona kutsi baphostoli bakhe bebatigcabha. Nanobe Jesu atitfoba wageza tinyawo tabo, bebasolo baphikisana ngekutsi ngubani lomkhulu emkhatsini wabo futsi Phetro abetetsemba kakhulu. (Luk. 22:24, 33, 34) Kodvwa, Jesu wabancoma baphostoli bakhe labebatsembekile ngekutsi banamatsela kuye ngisho nangetikhatsi letimatima. Wabatjela kutsi bebatawenta imisebenti lemikhulu kuneyakhe futsi wabacinisekisa ngekutsi Nkulunkulu abebatsandza. (Luk. 22:28; Joh. 14:12; 16:27) Singahle sitibute kutsi: ‘Ngiyamlingisa yini Jesu ngekuncoma bantfwabami ngetintfo letinhle labatentako, kunekunaka emaphutsa abo?’

10, 11. Umphostoli Pawula wakubonisa kanjani kubaluleka kwekukhutsata labanye?

¹⁰ Umphostoli Pawula. Pawula wakhuluma kahle ngemaKhristu labekanye nawo etincwadzini latibhala. Wahamba iminyaka leminyenti nalamanye awo futsi akungabateki kutsi abewati nemaphutsa awo, kepha washo tintfo letinhle ngawo. Nasi sibonelo: Pawula wachaza Thimothi ngekutsi: “Ngumntfwanami lengimtsandzako nalowetsembekile eNkhosini,” lesimbone kutsi utimisele etintfweni letinyenti letiphatselene nalamanye emaKhristu. (1 Khor. 4:17; Fil. 2:19, 20) Umphostoli Pawula nakakhuluma nelibandla laseKhorinte wakhuluma kahle ngaThithusi , watsi: “Usisebenti lengibambisene naso nalengikanye naso kuze kusitakale nine.” (2 Khor. 8:23) Asingabati kutsi Thimothi naThithusi bakhutsateka nabeva kutsi Pawula abecabangani ngabo!

¹¹ Pawula kanye naBhanabasi bafaka kuphila kwabo engotini ngekubuyela etindzaweni lebebake bahlaselwa kuto. Nasi sibonelo: Nanobe bebaphikiswe kakhulu eListra kodvwa babuyela khona kute bayokhutsata emaKhristu lasemasha kutsi ahlale etsembekile. (Imis. 14:19-22) Ngesikhatsi ase-Efesu, Pawula wabhekana nesicumbi sebantfu lebesitfukutsele. UmBhalo weMisebenti 20:1, 2 utsi: “Ngemuva kwalesiphitsiphitsi, Pawula wabita bafundzi, wabakhutsata futsi wabavalelisa, wase uyesuka uya eMasedoniya. Nasahambe kuleto tifundza, futsi asakhutsate nebazalwane bakhona, wefika eGrisi.” Ngako kuyacaca kutsi kukhutsata labanye kwakubalulekile kuPawula.

12. Imihlangano lesiba nayo isisita njani kutsi sikhutsatane?

¹² Lesinye sizatfu lesente Babe wetfu losezulwini wasilungiselela imihlangano yelibandla lebakhona njalo, kutsi sikhutsatane. (Fundza Hebheru 10:24, 25.) Njengebalandzeli baJesu bangelikhulu lekucala, sihlangana ndzawonye kuze sonkhe sifundze futsi sikhutsateke. (1 Khor. 14:31) Cristina, lesikhulume ngaye ekucaleni kwalesihloko, utsi: “Lengikutsandza kakhulu ngemihlangano yelibandla, lutsandvo nesikhutsato lengikutfola khona. Ngaletinye tikhatsi ngiyaye ngitive ngicindzetelekile nangiya eHholweni LeMbuso, kepha bodzadze bayeta kimi bangange futsi batsi ngimuhle. Bangitjela nekutsi bayangitsandza futsi bayajabula nababona kutsi ngiyatfutfuka etintfweni letiphatselene naNkulunkulu. Emavi abo lakhutsatako angenta ngitive ngincono kakhulu.” Kujabulisa kakhulu nangabe sonkhe ‘sikhutsatana’!​—Rom. 1:11, 12.

13. Kungani tinceku taNkulunkulu lesetinesikhatsi lesidze timkhonta nato tisidzinga sikhutsato?

¹³ Ngisho netinceku taJehova lesetinesikhatsi lesidze timkhonta, tiyasidzinga sikhutsato. Cabanga ngesibonelo saJoshuwa. Besekakhonte Jehova ngekwetsembeka iminyaka leminyenti. Nobe kunjalo, Jehova watfuma Mosi kutsi ayomkhutsata, watsi: “Kodvwa yala Joshuwa, umcinise umkhutsate, ngobe nguye lotakuhola lesive asewetele ngesheya kwemfula; nguye futsi lotabenta badle lelive lolibonako.” (Dut. 3:27, 28) Joshuwa bekanemtfwalo lomatima wekungenisa ema-Israyeli eVeni Lesetsembiso. Bekatawubhekana netinkinga futsi bekungenteka kudzingeke kutsi alwe kute angene khona. (Josh. 7:1-9) Kungako Joshuwa bekadzinga sikhutsato nekuciniswa. Ngako natsi asibakhutsate labadzala belibandla, lokufaka ekhatsi babonisi besigodzi, njengoba basebenta kamatima kute banakekele umhlambi waNkulunkulu. (Fundza 1 Thesalonika 5:12, 13.) Lomunye umbonisi wesigodzi watsi: “Ngaletinye tikhatsi, bazalwane basibhalela incwadzi yekubonga, basitjele kutsi bajabule kanganani ngekutsi sibavakashele. Siyatibeka letincwadzi bese siyatifundza lapho sitiva siphelelwa ngemandla. Tingumtfombo wesikhutsato.”

14. Yini lekhombisa kutsi kuncoma labanye kanye nekubakhutsata kuyindlela lephumelelako nasiniketa seluleko?

¹⁴ Labadzala labangemaKhristu kanye nebatali batfole kutsi kuncoma kanye nekukhutsata labanye kuyindlela lekahle yekugcizelela seluleko seliBhayibheli. Ngesikhatsi Pawula ancoma emaKhristu aseKhorinte ngekusebentisa seluleko sakhe, kufanele kube ativa akhutsateka kutsi achubeke enta lokuhle. (2 Khor. 7:8-11) Andreas, lonebantfwana lababili utsi: “Sikhutsato sisita bantfwana kutsi bakhule kahle emitimbeni kanye nasetintfweni letiphatselene naNkulunkulu.  Ubayala kahle nangabe ubakhutsata. Nanobe bantfwabetfu bakwati lokulungile, kukwenta loko lokulungile kuba yincenye yekuphila kwabo nangabe sichubeka sibakhutsata.”

15. Nguyiphi lenye indlela lesingabakhutsata ngayo labanye?

¹⁵ Yibonge imetamo lemihle nebuntfu lobuhle bebazalwane lokanye nabo. (2 Khr. 16:9; Jobe 1:8) Jehova kanye naJesu, bayajabula ngemetamo yetfu lesiyentako nasisekela tindzaba letimnandzi teMbuso, ngisho nome emandla etfu naloko lesinikela ngako kukuncane ngenca yetimo tetfu letehlukahlukene. (Fundza Lukha 21:1-4; 2 Khorinte 8:12.) Nasi sibonelo: Labanye lesikanye nabo lesebakhulile ngeminyaka benta umetamo lomkhulu kuze babe khona njalo emihlanganweni yebuKhristu nasemsebentini wekushumayela. Akukafaneli yini kutsi sibancome siphindze sibakhutsate?

16. Kungani kungakafaneli sitibambe nakufanele sikhutsate labanye?

¹⁶ Wasebentise ematfuba ekukhutsata labanye. Nangabe sibona labatsite lokufanele sibancome, kungani singabancomi? Cabanga ngaloko lokwenteka kuPawula kanye naBhanabasi ngesikhatsi base-Antiyokhi lesePhisidiya. Tikhulu telisinagoge takhuluma nabo tatsi: “Banaketfu, nangabe ninalokutsite leningabakhutsata ngako bantfu, sicela nikusho.” Pawula wase sewubeka inkhulumo lekhutsatako. (Imis. 13:13-16, 42-44) Nangabe singakhona kusho emavi lakhutsatako, kungani singenti njalo? Nangabe sikhutsata labanye, nabo batasikhutsata futsi.​—Luk. 6:38.

17. Yini lengenta emavi etfu ekuncoma abaluleke nakakhulu?

¹⁷ Bani nebungani nawuveta umbono lotsite futsi ucondze endzabeni. Emagama lambalwa ekukhutsata kanye nekuncoma angaba lusito, kodvwa umlayeto waJesu labekawubhekisele kumaKhristu aseThiyathira akhombisa kutsi kuvele ucondze endzabeni kuncono. (Fundza Sembulo 2:18, 19.) Nasi sibonelo: Nangabe sibatali, singabatjela bantfwabetfu kutsi siyajabula ngendlela labatfutfuka ngayo etintfweni letiphatselene naNkulunkulu. Singahle sitjele make lokhulisa umntfwana ayedvwa, kutsi yini lesiyijabulelako ngendlela lakhulisa ngayo bantfwabakhe nakuba kungesiko lula. Emavi ekuncoma nalakhutsatako angadlala indzima lenkhulu ekuphileni.

18, 19. Singabakha njani labo labadzinga sikhutsato?

¹⁸ Jehova angeke asitjele kutsi sibakhutsate sitsini labanye njengobe enta kuMosi nakufanele akhutsate aphindze acinise Joshuwa. Noma kunjalo, Nkulunkulu uyajabula nasikhuluma emavi lakhutsatako kulabo lesikholwa nabo kanye nakulabanye bantfu. (Taga 19:17; Heb. 12:12) Nasi sibonelo: Singatjela umzalwane losibekele inkhulumo yelinyenti kutsi inkhulumo yakhe ibe neteluleko lebesitidzinga noma isisitile sakhona kucondza umBhalo lotsite. Lomunye dzadze wabhalela sivakashi lebesitobeka inkhulumo yelinyenti watsi: “Nanobe sikhulume sikhatsi lesifishane, ukhonile kubona buhlungu lebenginabo enhlitiyweni yami futsi wangidvudvuta. Ngifuna wati kutsi indlela lokhuluma ngayo ngemusa, ingente ngeva shengatsi Jehova ukhuluma nami.”

¹⁹ Nangabe sitimisele kusebentisa seluleko saPawula lesitsi: “Chubekani nikhutsatana futsi nakhana, njengobe nje nenta,” sitawutfola tindlela letinyenti tekwakha labanye bazalwane etintfweni letiphatselene naNkulunkulu. (1 Thes. 5:11) Sonkhe singamjabulisa Jehova nangabe sichubeka ‘sikhutsatana malanga onkhe.’