1, 2. Lande na kele ekɔ ohomba nkeketsha anto akina?

CRISTINA lele l’ɛnɔnyi 18 mbutaka ate: “Ambutshi ami hawokeketshaka pondjo, koko vɔ mɔnyɔlakami efula. Ndo ɛtɛkɛta awɔ pomuyakami efula. Vɔ mbutaka dia dimi lekɔ oyoyo, haleye ndooko ɛngɔ ndo lekɔ ekamakama. Ɔnkɔnɛ, dimi ndelaka mbala efula ndo haalange nsawola la wɔ. Dimi ndjaokaka dia lekɔ onto l’anyanya.” ^[1] (Enda nɔtɛ ka la koma.) Lɔsɛnɔ koka monga wolo efula naka anto akina hawotokeketsha.

² Lo wedi okina, tokanyiya polo lo yɛdikɔ yakɔna yakokaso nkimanyiya anto akina etena kaakeketshaso. Rubén mbutaka ate: “Lakalɔshanaka la kanyi ya ndjaɔsa oko onto l’anyanya l’edja k’ɛnɔnyi efula. Koko, etena kɛmɔtshi lakatasambishaka l’ekumanyi kɛmɔtshi kakashihodia ɔnɛ dimi komemɔ dimɛna lushi lɔsɔ. Nde akampokamɛ la kɛtshi tshɛ etena kakamawɔkɔndɔlɛka dui diaki la mi. Oma laasɔ, nde akambohola akambo w’amɛna watomosalaka. Nde akambohola nto ɛtɛkɛta wa Yeso wata ɔnɛ onto tshɛ la l’atei aso ndeka nsɔlɛ efula nɛmɔ. Mbala efula, dimi mbohɔka divɛsa sɔ ndo diɔ tetemalaka munanda otema ami. Ɛtɛkɛta w’ekumanyi kɛsɔ wakakimanyiya dia nsala etshikitanu efula.”—Mateo 10:31.

3. a) Kakɔna kakate ɔpɔstɔlɔ Pɔɔlɔ lo dikambo dia nkeketsha anto akina? b) Kakɔna kayangaso nsɛdingola lo sawo nɛ?

 ³ Bible totɛka dia sho pombaka keketshanaka lam’asaso mbala la mbala. Ɔpɔstɔlɔ Pɔɔlɔ akafundɛ Akristo wa la Hɛbɛru ate: “Analengo le, nyewɔ diaha onto ɔmɔtshi l’atei anyu ndjonga la otema wa kɔlɔ wele bu la mbetawɔ lo mangana la Nzambi kasɛna, koko nyotetemale keketshana lam’asanyu lushi tshɛ.” Pɔɔlɔ akalembetshiya lande na kahombaso nsala dui sɔ lo mbuta ɔnɛ: “Diaha ɔmɔtshi l’atei anyu monga ɔtɛ wolo oma lo nkudu ka lokeso kele la pɛkato.” (Hɛbɛru 3:12, 13) Ohokanyiya woho watoyɔngɛnangɛnaka etena kakokeketsha onto ɔmɔtshi. Ko, ɛkɔkɔ akɔna wele la so wa nkeketsha anangɛso? Wetshelo akɔna wakondjaso oma lo woho wakakeketsha Jehowa, Yeso ndo Pɔɔlɔ anto akina? Ndo toho takɔna tɔmɔtshi takokaso keketshanaka lam’asaso? Ambola asɔ mbayangaso nsɛdingola.

4. Waa na wele l’ohomba wa keketshama? Lande na kele anto efula ɛlɔ kɛnɛ hawokeketsha anto akina?

⁴ Onto tshɛ la l’atei aso ekɔ l’ohomba wa keketshama. Ndo ekɔ ohomba djekoleko le ambutshi dia keketshaka anawɔ. Ombetsha welɛwɔ Timothy Evans nembetshiyaka ɔnɛ ana “wekɔ l’ohomba w’ekeketshelo oko wele diononɛ l’ohomba w’ashi.” Nde kotshaka ate: “Ekeketshelo konyaka di’ɔna ndjaoka dia nde ekɔ la nɛmɔ ndo ekɔ lo mandɔma.” Koko l’ɔtɛ wasɛnaso lo “nshi y’ekomelo,” anto efula wekɔ la lokaki ndo waya la yema tshitshɛ ya “ngandji ka lam’asa ase nkumbo.” (2 Timɔte 3:1-5) Ambutshi amɔtshi hawokeketsha anawɔ nɛ dia ambutshi awɔ kombakeketshaka. Epalanga vɔ la wɔ wekɔ l’ohomba wa keketshama, koko mbala efula dui sɔ hadiosalema. Ɛnyɛlɔ, anto efula nyangaka ɔnɛ hawowaandola kaanga yema l’ɔtɛ wa kɛnɛ kasalawɔ l’olimu.

5. Ngande wakokaso nkeketsha anto akina?

⁵ Sho koka nkeketsha anto akina lo mbawaandola l’ɔtɛ wa dui dimɔtshi dia dimɛna diambowosala. Sho koka nto nkeketsha anto akina lo mbatɛ dia vɔ wekɔ la waonga w’amɛna ndo lo mbasamba etena kewɔ l’okiyanu kana kambowɔkɔmɔ. (1 Tɛsalɔnika 5:14) Lam’ele mbala efula sho mongaka kaamɛ l’anangɛso la akadiyɛso, tekɔ la waaso efula wa mbuta dui dimɔtshi diakeketsha. (Adia Ondaki 4:9, 10.) Ɔnkɔnɛ, yambola wate: ‘Onde dimi salaka di’anto akina mbeya lande na kawaɔsami la nɛmɔ ndo kawaokami ngandji? Ndo onde dimi salaka dui sɔ etena tshɛ kakokami disala?’ Ohokanyiya kɛnɛ kata Bible kɛnɛ: “Dui diotami lo etena kahombama diekɔ dimɛna efula!”—Tokedi 15:23.

6. Lande na kalanga Satana nkɔmɔla ekambi wa Nzambi? Sha ɛnyɛlɔ ka woho wakandasale dui sɔ.

⁶ Tokedi 24:10 mbutaka ɔnɛ: “Naka wɛ ambɔkɔmɔ lo lushi la paa, kete wolo ayɛ wayokitakita.” Satana mbeyaka dia naka nde tɔkɔmɔla, kete nde koka nkitshakitsha diɔtɔnganelo diasaso la Jehowa. Nde akasale la wolo dia nkɔmɔla Jɔbɔ lo mbeela asui wa wolo. Koko tokanyi ta kɔlɔ taki Satana takakite tatala. Jɔbɔ akatshikala la kɔlamelo le Jehowa. (Jɔbɔ 2:3; 22:3; 27:5) Sho la wɔ koka ndɔshana la Satana ndo ndjashikikɛ ɔnɛ nde hotɔlɛndja. Naka sho ntetemala nkeketsha ase nkumbo kaso ndo anangɛso l’akadiyɛso wa l’etshumanelo, kete tayokimanyiyana dia monga l’ɔngɛnɔngɛnɔ ndo ntshikala suke la Jehowa.

7, 8. a) Ngande wakakeketsha Jehowa anto amɔtshi? b) Ngande wakoka ambutshi mbokoya ɛnyɛlɔ ka Jehowa? (Enda osato wele lo mbɔtwɛlɔ.)

⁷ Jehowa keketshaka anto. Omembi w’esambo akafunde ate: “Jehowa ekɔ suke la wanɛ  wele l’etema wambatɛ; nde shimbɛka wanɛ wambɔkɔmɔ.” (Osambo 34:18, nɔtɛ) Etena kakoke omvutshi Jɛrɛmiya wɔma ndo kakandakɔmɔ, Jehowa akawolake dia mbokimanyiya. (Jɛrɛmiya 1:6-10) Jehowa akatome ondjelo ɔmɔtshi dia ndjokeketsha omvutshi Danyɛlɛ laki aya osombe. Ondjelo akɔ akelɛ Danyɛlɛ ɔnɛ “onto la nɛmɔ efula.” (Danyɛlɛ 10:8, 11, 18, 19) Shi wɛ koka nkeketsha ananyɔ l’akadiyɛyɛ woho akɔ waamɛ, mbidja ndo ambatshi mboka la esombe wahayokoka nsala akambo efula woho wakawasalaka?

⁸ Kaanga mbele Jehowa la Yeso wakasɛnaka kaamɛ l’edja k’ɛnɔnyi efula, Jehowa akeyaka dia nde pombaka ntetemala nkeketsha Ɔnande etena kaki Yeso la nkɛtɛ. Yeso akoke She atɛkɛta oma l’olongo etena kakandatatɛ olimu w’esambishelo ndo ɔnɔnyi w’ekomelo wakinde la nkɛtɛ. Lo waaso ahende asɔ, Jehowa akate ate: “Ɔnɛ ele Ɔnami, lokami ngandji, ɔnɛ lamometawɔ.” (Mateo 3:17; 17:5) Yeso mɛtɛ akakeketshama efula etena kakandoke She ata dia nde mbookaka ngandji ndo aki l’ofunu lo dikambo diande. L’ɔkɔngɔ diko, l’otsho wa la ntondo ka Yeso mvɔ, nde akonge l’ekiyanu efula. Jehowa akokeketsha lo ntoma ondjelo ɔmɔtshi dia ndjookeketsha ndo ndjoosamba. (Luka 22:43) Ambutshi le, nyu koka mbokoya ɛnyɛlɔ ka Jehowa lo keketshaka ananyu mbala la mbala. Nyowaandole naka wambosala dui dimɔtshi dia dimɛna. Ndo etena kahembamawɔ la kalasa, nyosale la wolo dia mbakeketsha ndo mbakimanyiya dia mbikikɛ.

9. Wetshelo akɔna wakondjaso oma lo woho wakasalɛka Yeso apɔstɔlɔ ande akambo?

⁹ Yeso nde la wɔ akatotshikɛ ɛnyɛlɔ ka dimɛna ka mbokoya. L’otsho wa la ntondo ka nyɔi kande, Yeso akasole apɔstɔlɔ ande ekolo ndo akawatɛ ohomba wa monga la okitshakitsha. Koko, vɔ waki l’otako ndo wakawane dia mbeya ɔnɛ lakaleke woke ndo Petero akasɛmɛ dia nde hatshikaki Yeso pondjo. (Luka 22:24, 33, 34) Koko, Yeso kombika washo lo wandja awɔ. Lo dihole dia nsala ngasɔ, nde akawaandola l’ɔtɛ wakawatshikala la kɔlamelo le nde. Nde akawalake dia vɔ wakahombe nsala akambo wa weke ndeka wanɛ wakandasale ndo akawashikikɛ dia Jehowa mbaokaka ngandji. (Luka 22:28; Joani 14:12; 16:27) Sho koka ndjambola ɔnɛ: ‘Onde dimi mbokoyaka ɛnyɛlɔ ka Yeso lo mandolaka anto akina l’ɔtɛ wa waonga awɔ w’amɛna lo dihole dia mbika washo lo munga yawɔ?’

10, 11. Ngande wakakeketsha Pɔɔlɔ anango, ndo kakɔna kakandalangaka nsala?

¹⁰ Mbala efula, ɔpɔstɔlɔ Pɔɔlɔ akataka akambo w’amɛna lo dikambo di’anango. Nde aketetaka l’amɔtshi l’atei awɔ l’edja k’ɛnɔnyi efula ndo akawaeye dimɛna efula, koko nde kofunda awui wendana la wandja awɔ. Koko, nde akawaandolaka. Ɛnyɛlɔ, Pɔɔlɔ akate ɔnɛ Timɔte ekɔ “ɔnami la ngandji ndo la kɔlamelo lo Nkumadiɔndjɔ” ndo nde aki l’eshikikelo dia Timɔte akakoke nkotsha ehomba w’anto akina. (1 Kɔrɛtɔ 4:17; Filipɛ 2:19, 20) Pɔɔlɔ akatɛ Akristo wa la Kɔrɛtɔ ɔnɛ Tito ekɔ “osekami ndo onto lakamba la mi lo wahɔ anyu.” (2 Kɔrɛtɔ 8:23) Lo mɛtɛ, Timɔte la Tito wakakeketshama etena kakawoke kɛnɛ kakate Pɔɔlɔ lo dikambo diawɔ!

¹¹ Pɔɔlɔ nde la Barnabasɛ wakadje nsɛnɔ yawɔ lo waale dia nkeketsha anangɛwɔ. Ɛnyɛlɔ, vɔ akɔ ahende wakeyaka di’anto efula wa l’osomba wa Lustɛra wakalangaka mbadiaka. Koko, vɔ wakakalola lɛkɔ dia tokeketsha ambeki w’eyoyo ndo mbakimanyiya dia ntshikala la kɔlamelo le Jehowa. (Etsha 14:19-22) L’ɔkɔngɔ diko, etena kakinde l’Ɛfɛsɔ, Pɔɔlɔ aki lo waale oma le olui w’anto waki la nkɛlɛ wakalangaka mbosalɛ kɔlɔ, koko nde akatshikala nshi efula dia nkeketsha anango. Etsha 20:1, 2 mbutaka ɔnɛ: “Pɔɔlɔ akelɛ ambeki ndo l’ɔkɔngɔ wa nde mbakeketsha, nde akalakana  la wɔ ndo akatshu otsha la Makɛdɔniya. L’ɔkɔngɔ wa nde ntshɔ l’ahole amɔtshi wa l’ɛtshi ka nkɛtɛ kɛsɔ ndo nkamba l’ɛtɛkɛta efula w’ekeketshelo, nde akatokoma la Ngirika.”

12. Lande na kele ekɔ dimɛna dia sho mbɔtɔka lo nsanganya?

¹² Jehowa tokombolɛka nshi tshɛ kɛnɛ koleki ɔlɔlɔ. Diakɔ diatotɛnde dia sho sanganaka mbala la mbala. Lo nsanganya yaso, sho mbekaka akambo wendana la nde ndo keketshanaka lam’asaso. (1 Kɔrɛtɔ 14:31; adia Hɛbɛru 10:24, 25.) Cristina, lakatatɛkɛtshi dikambo diande l’etatelo ka sawo nɛ mbutaka ate: “Dikambo dialekami nanga lo nsanganya ele, ngandji ndo ekeketshelo kakondjami lɔkɔ. Tena dimɔtshi, dimi kɔmɔka etena kakomami lo Mbalasa ka Diolelo. Koko, etena kasawola akadiyɛso la mi, vɔ kumbatɛkami ndo mbutɛkami ɔnɛ lekɔ olangala. Vɔ mbutɛkami ɔnɛ vɔ mbokakami ngandji ndo ngɛnangɛnaka woho watamahame lo nyuma. Ekeketshelo kawɔ konyakami dia ndjaoka dimɛna efula!” Shi ekɔ ohomba dia onto tshɛ la l’atei aso keketshaka anto akina!—Rɔmɔ 1:11, 12.

13. Lande na kele kaanga wanɛ wambokambɛ Jehowa edja wekɔ l’ohomba wa keketshama?

¹³ Kaanga wanɛ wambokambɛ Jehowa edja wekɔ l’ohomba wa keketshama. Tɔshi ɛnyɛlɔ ka Jashua. Etena kaki ase Isariyɛlɛ suke la mbɔtɔ lo Nkɛtɛ ya Daka, Jehowa akasɔnɛ Jashua dia mbalɔmbɔla. Koko, Jehowa akatɛ Mɔsɛ dia nde mbokeketsha kaanga mbele laasɔ ko, Jashua ambokambɛ Jehowa l’edja k’ɛnɔnyi efula. Jehowa akate ate: “Sha Jashua ɔkɛndɛ wa nɔmbɔla, kimanyiyande dia nde monga la dihonga ndo keketshande, nɛ dia nde kayotehɔ la ntondo k’anto anɛ ndo nde kayosala dia vɔ nkita wodja wayoyɛna.” (Eohwelo k’Ɛlɛmbɛ 3:27, 28) Jashua akahombe keketshama, nɛ dia l’ɔkɔngɔ diko wodja ɔsɔ wakahombe ndɔ ata efula ndo kaanga nɛndjama lo ata amɔtshi. (Jashua 7:1-9) Ɛlɔ kɛnɛ, sho kokaka nkeketsha dikumanyi ndo emendji w’etshimbedi wakamba olimu efula dia nkokɛ ekambi waki Nzambi. (Adia 1 Tɛsalɔnika 5:12, 13.) Omendji w’otshimbedi ɔmɔtshi akate ate: “Mbala mɔtshi, anangɛso toshaka mukanda dia tokaloya losaka lo mbuta woho wambowɔngɛnangɛna wembwelo aso. Sho namaka mikanda ɛsɔ ndo ndjowaadiaka etena kakɔmɔso. Vɔ wekɔ kiɔkɔ ya mɛtɛ y’ekeketshelo.”

14. Bɛnyɛlɔ diakɔna diɛnya dia ekɔ dimɛna mandola anto akina etena kawashaso dako?

¹⁴ Lo diaaso dimɔtshi, ɔpɔstɔlɔ Pɔɔlɔ akasha ase Kɔrɛtɔ dako. Etena kakawakambe la dako diakɔ, Pɔɔlɔ akawaandola. (2 Kɔrɛtɔ 7:8-11) Lo mɛtɛ, ɛtɛkɛta ande wakaakeketsha dia ntetemala nsala kɛnɛ kele ɔlɔlɔ. Ɛlɔ kɛnɛ, dikumanyi ndo ambutshi kokaka mbokoya ɛnyɛlɔ ka Pɔɔlɔ. Andreas, lele l’ana ahende mbutaka  ate: “Ekeketshelo kimanyiyaka ana dia mpama lo nyuma ndo lo tokanyi. Wɛ pombaka tɔtɔmiya alako lo mbakeketsha. Kaanga mbele anaso wokeyaka kɛnɛ kele ɔlɔlɔ, nsala akambo w’ɛlɔlɔ ayonga yoho yawɔ ya lɔsɛnɔ naka tekɔ lo mbakeketsha mbala la mbala.”

15. Naa yoho mɔtshi yakokaso nkeketsha anto akina?

¹⁵ Tɛ ananyɔ l’akadiyɛyɛ dia wɛ mbɔsaka welo wadjawɔ ndo waonga awɔ w’amɛna la nɛmɔ di’efula. (2 Ɛkɔndɔ 16:9; Jɔbɔ 1:8) Naka sho nsala dui sɔ, kete tayokoya Jehowa ndo Yeso. Vɔ mbɔsaka oseka dui tshɛ diasalaso lo dikambo diawɔ la nɛmɔ kaanga naka hatokoke nsala akambo efula walangaso nsala. (Adia Luka 21:1-4; 2 Kɔrɛtɔ 8:12.) Ɛnyɛlɔ, sho mbeyaka di’anangɛso wa ngandji w’esombe mbidjaka welo efula dia ndja lo nsanganya ndo ntshɔ l’olimu w’esambishelo mbala la mbala. Onde sho mbakeketshaka ndo mbawaandolaka l’ɔtɛ wa kɛnɛ tshɛ kasalawɔ?

16. Etena kakɔna kakokaso nkeketsha anto akina?

¹⁶ Keketshaka anto akina mbala tshɛ kakokayɛ nsala dui sɔ. Etena tshɛ kɛnayɛ onto ɔmɔtshi ambosala dui dia dimɛna, andolande. Etena kaki Pɔɔlɔ nde la Barbasɛ l’Atiyɔka wa la Pisidiya, ɛnɔmbɔdi wa shinangɔnga wa lɛkɔ wakawatɛ ɔnɛ: “Anangɛso le, naka nyekɔ la dui dimɔtshi dia nkeketsha anto, nyodite.” Pɔɔlɔ akakambe la diaaso sɔ dia nkeketsha anto. (Etsha 13:13-16, 42-44) Naka sho keketshaka anto akina, kete ondo wayotokeketsha ndo sho.—Luka 6:38.

17. Yoho yakɔna yoleki dimɛna ya mandola anto akina?

¹⁷ Sembɔ tɔɔ lo dikambo. Etena kakaandola Yeso Akristo wa la Tiyatira, nde akasembɔ tɔɔ lo dikambo ndo akawatɛ awui w’amɛna wakawasalaka. (Adia Ɛnyɛlɔ 2:18, 19.) Ngande wakokaso mbookoya? Ondo sho koka mandola womoto lodia ana ndaamɛ lo woho wodiande anande oyadi ekakatanu akɔna wele la nde. Kana naka wɛ ekɔ ombutshi, wɛ koka mandola anayɛ lo welo wadjawɔ dia kambɛ Jehowa. Tɛwɔ akambo w’amɛna wɛnayɛ le wɔ. Naka sho nsembɔ tɔɔ lo dikambo etena kakeketshaso anto akina, vɔ wayoshihodia ɔnɛ sho mbeyaka kɛnɛ kataso.

18, 19. Ngande wakokaso kimanyiyana lam’asaso dia ntshikala suke la Jehowa?

¹⁸ Jehowa akatɛ Mɔsɛ dia nkeketsha ndo nsukɛ Jashua. Lo mɛtɛ, Jehowa hɔtɛkɛta la so nshi nyɛ ko totɛ dia nkeketsha onto ɔmɔtshi. Koko, nde ngɛnangɛnaka etena kɛnande welo wadjaso dia nkeketsha anto akina. (Tokedi 19:17; Hɛbɛru 12:12) Ɛnyɛlɔ, naka ɔnangɛso ɔmɔtshi ambosha sawo dia lo sɛkɛ l’etshumanelo kaso, sho koka mbotɛ akambo wakatangɛnyingɛnyi lo sawo diande. Ondo kɛnɛ kakandatshi akatokimanyiyisha dia ndɔshana l’okakatanu ɔmɔtshi kana nshihodia divɛsa dimɔtshi dimɛna. Kadiyɛso kɛmɔtshi akafundɛ ɔnangɛso ɔmɔtshi lakasha sawo dia lo sɛkɛ ate: “Kaanga mbakatasawodi lo minitɛ ngana tsho, wɛ akashihodisha lonyangu laki l’otema ami, wɛ akansambi ndo akangɛnyingɛnyisha. Eya dia etena katoyɔtɛkɛtaka lo yoho ya dimɛna ngasɔ, oyadi lo lɔyɛnga kana l’onto ɔmɔtshi, dimi tokaka ɔnɛ ɔsɔ ekɔ woshasha ɔmɔtshi w’oma le Jehowa.”

¹⁹ Tayonga l’akoka wa kimanyiyana lam’asaso dia ntshikala suke la Jehowa naka sho ndjela dako dia Pɔɔlɔ nɛ: “Nyotetemale keketshana onto la wonyande ndo mbodiana onto la wonyande, oko wasalanyu.” (1 Tɛsalɔnika 5:11) Naka sho “[ntetemala] keketshana lam’asa[so] lushi tshɛ,” kete tayɔngɛnyangɛnya Jehowa efula!