Ngang ua uputiw lón Paddington, eú kinikin lón London lón ewe fénú England, ikewe mi wor chómmóng aramas ra nónnóm ie. Ua nónnóm ren inei we me úlúmén pwii watte seniei. Semei we ese kon nónnómetiw rem pokiten a mmen soun sakaw.

Atun ai kúkkún, inei we a kan áiti ngeniei ai upwe iótek iteiten pwiin. A wor nei kúkkún Paipel mi masou ren chék ewe puken Kölfel, iwe ua kan fférútá ngingiin kapasan kewe pún upwe tongeni kélúúr. Ua chemeni ai álleani ei mwuten kapas me lón eú nei puk me a mwéchúló lón mékúrei: “Eú ekkeei rán, esap chúen wor pwal eú rán mwirin.” Ekkeei kapas ra efisi ai upwele chék nenneló lepwin me ekkekieki usun mwachkkan. Ua ekieki: ‘Itá manawach esap chék iei usun. Pwata ua manaw wóón fénúfan?’ Use fókkun mochen máló!

Ua poputá le mochen silei usun angangen roong. Ua sóssót le fós ngeni ekkewe mi máló, fiti chienei kewe chón sukul le ló ren ekkewe leenien peias, me fitiir le katol ekkewe kachito mi fókkun eniweniw. Me rem, ekkena mettóch mi ámmeseik me pwal eniwokkus.

Atun a chék engol ieri ua poputá le eáni manaw mi ngaw. Ua poputá le ún suupwa, me a mwittir ai upwele chék umwesimwesin mochen ún. Mwirin, ua pwal poputá ún maruo. Atun a 11 ieri, ua poputá le sótuni sakaw. Ikaamwo use sani nennan nge ua sani mwirilóón ren ai ua sakaw. Ua pwal sani nikáttik me pwérúk. Ua kan soun fiti pariin kunou me ló lón nightclub. Ua kan soun ánnif seni leim lepwin me pwal ánnifelongsefál mwen chék an epwele rániló. Sorotá, ua mélúlú, iwe, ua kan etiwaaló sukul iteitan. Lón ekkewe rán ua fiti sukul, ua kan ún sakaw me mwen poputáán ai kewe class.

A fókkun ngaw ai kewe grade lón ewe sáingoon ier ua fiti sukul. Mesemwan, inei we ese kon tepereni ekkewe mettóch mi ngaw ua féfféri, nge iei a fókkun letipengaw me song rei. Aua áninifengen, iwe ua sú seni leimw. Ren och fansoun ua nónnóm ren nei we kammwet itan Tony. Átena a kan solá, a amémé sáfei mi efeiengaw, me a iteféúló ren an fókkun akkachofesá.  Mwirin, ua pwopwo, iwe ua néúnatiw néúm we át atun a chék 16 ieri.

Lón ewe áeúin atun ua chuuri Chón Pwáraatá Jiowa, ua nóm lón eú imwen túmúnú fefin me néúr ménúkol, ekkewe mi néúnéú nge ese wor pwúlúwer. Eú mwicheich lón ena leeni a ngeniei eú ruumwei me ikena ie. Rúúemén fefin Chón Pwáraatá ra kan soun etto chuuri ekkóch lein ekkewe inelap fépwúl lón ei leeni. Iwe, eú rán ua fitiir lón ar pwóppwóróusfengen. Ua mochen ánneta pwe ekkena Chón Pwáraatá iir mi mwáál. Iwe nge, ra mmen mosonoson me a fataffatéch ar pélúweni seni Paipel eú me eú ai kewe chómmóngun kapas eis. Ra mmen kirekiréch me tipepwetete, ikkena met ra fókkun nukiei. Iwe ua tipeeú ngeni ar repwe káé ngeniei Paipel.

Ló, ló, ló, ua káé och mettóch seni Paipel mi ekkesiwili manawei. Seni chék lekúkkúni ua fen niweiti máló. Iwe iei ua kúna minne Jesus a eáni asukul fán iten ewe manawsefál! (Johannes 5:28, 29) Ua pwal kúna pwe Kot a chúngúei. (1 Petrus 5:7) A fókkun chúng letipei ren masouen Jeremaia 29:11, a apasa: “Ngang üa silei mine üa ekieki ngenikemi. Üa ekieki feiöchümi, nge sap feiengauemi, pwe üpwe ngenikemi eu fansounöch me apilükülük.” Ua poputá le lúkú pwe ua tongeni eáni ewe ápilúkúlúkún manaw esemuch lón Paratis wóón fénúfan.​—Kölfel 37:29.

Ekkewe Chón Pwáraatá Jiowa ra pwáraatá ar enletin tongeei. Lón ewe áeúin rán ua fiti eú me lein ar kewe mwich, ra fókkun etiwaéchúei me meinisin iir ra chiechiéch! (Johannes 13:34, 35) A wesewesen sókkóló seni met ua kúna lón pwal eú imwenfel lón na leeni. Ekkewe Chón Pwáraatá ra etiwaéchúei inaamwo ika a iei usun nónnómun manawei. Ra awora ngeniei ar fansoun, pwáraatá ar tongeei, áfánniei, me ra pwal awora watteen álillis ngeniei. Ua meefi pwe ngang chóchóón eú watteen famili mi tong.

Seni ai káéén Paipel, ua mirititi lamoten ai upwe féri siwil lón manawei pwe upwe tongeni etipeeúfengeni me án Kot kewe allúk. Ese mecheres ai upwe péútaaló suupwa. Lón pwal ena fansoun, ua mirititi pwe ekkóch ekkewe nikáttik ua akkaúseling ra alapaaló ai mochen ún maruo, iwe ua ekkesiwili nei nikáttik. Pokiten ua mochen ai usap sakaw, ua úkútiw le ló fiti pariin kunou me ló lón nightclub, ikewe a kan efisi ai upwe mochen sakawóló. Ua pwal kútta mineféén chiechiei iir kewe repwe álisiei lón ai manaweni ewe mineféén manaw.​—Än Salomon Fos 13:20.

Nge lón pwal ena fansoun, Tony a pwal kákkáé Paipel ren Chón Pwáraatá Jiowa. Ren án ekkewe Chón Pwáraatá pélúweni seni Paipel an kewe kapas eis, i a pwal lúkúlúk pwe mi enlet minne a kákkáé. A féri watteen siwil lón manawan, áwewe chék, a úkútiw le chiechi ngeni chienan kewe mi féri féfférún akkachofesá, kouló le solá, me péútaaló maruo. Ren ám aupwe unusen apwapwaai Jiowa, ám me rúúemén aua kúna lamoten ám aupwe ekkesiwili manawem mi limengaw me awora manaw mi núkúnúkéch fán iten néúm we át. Aua apwúpwúlú lón 1982.

Ua chemeni ai kútta ekkewe lesen lón Watchtower me Awake! * mi wor pwóróusen chókkewe mi sópwéch lón ar ekkesiwili manawer. A fókkun chúng letipei ren met ra féri! Ua meefi péchékkúletá me a álisiei ai upwe achocho nge usap fangetá. Ua kan iótek ngeni Jiowa an esap fangetá wóói. Lón July 1982 ám me Tony aua papataiseló me wiliti Chón Pwáraatá Jiowa.

Ai ámááraatá ai chiechi ngeni Jiowa Kot a seláni manawei. Ám me Tony aua pwal kúna án Jiowa álisikem lón fansoun weires. Aua káé ám aupwe lúkúlúk wóón Kot lón fansoun weires, me aua meefi pwe a kan ákkálisi me akkatufichi ám famili.​—Kölfel 55:22.

Ua pwapwa le álisi néúm kewe át me nengngin ar repwe silei Jiowa usun chék ngang. Iei ua pwal meefi ena esin pwapwa atun ua kúna néúr kewe mi pwal mámmááritá lón ar silei Kot.

Iei use chúen nenneló lepwin me aúreki usun mwachkkan are máló. Ám me Tony aua áeá ám fansoun le sái ngeni sókkopaten mwichefel iteiten wiik pwe aupwe apéchékkúler. Aua etiir le asukula ekkewe ekkóch pwe repwe lúkú Jesus, pwe pwal iir repwe tongeni pwapwaiti manaw tori feilfeiló chék.