KE WA nine su nike ní kpakpa ko nɔ ɔ, e sa nɛ e kanya wɔ nɛ wa je hɛ sa kpo. Yesu ma oti nɛ ɔ nɔ mi benɛ e tsa nyumuhi nyɔngma nɛ hiɔ yaya ko ngɛ a he ɔ. Jamɛ a be ɔ mi ɔ, hiɔ nɛ ɔ be tsaba. Nyumuhi nyɔngma amɛ a kpɛti nɔ kake “kpale e se kɛ ba, nɛ e ba je Mawu yi kɛ ngmlaa.” Yesu bi lɛ ke, “Pi nyumuhi nyɔngma nɛ i tsa a! Jije nɛɛ ɔmɛ ngɛ?” (Luka 17:12-17) Mɛni wa kaseɔ ngɛ mi? E yi kulaa kaa wa hɛ maa je ní kpakpahi nɛ nihi pee kɛ ha wɔ ɔ nɔ!

Kpɔmi nɔ́ ɔ ji nike ní nɛ se be. E ji nike ní nɛ e nɔ kuɔ pe kulaa nɛ a kɛ ha. Mɛni o maa pee kɛ tsɔɔ kaa o bua jɔ nɔ́ nɛ Mawu pee ha mo ɔ he?

• Kase Nɔ́ Halɔ ɔ he ní. Kpɔmi nɔ́ ɔ ma ha nɛ wa ná neneene wami, se nɔ́ ko ngɛ nɛ e sa nɛ waa pee loko wa nine maa su neneene wami ɔ nɔ. Yesu sɔle nɛ e de Mawu ke: “Ke a na le kaa mo ji anɔkuale Mawu ɔ, nɛ a le Yesu Kristo, nɔ nɛ o tsɔ ɔ, a ma na neneene wami.” (Yohane 17:3) Ke nɔ ko de mo ke nyumu ko he o yi wami benɛ o ji jokuɛyo ɔ, anɛ o be suɔe kaa o maa le nyumu ɔ saminya nɛ́ o le nɔ́ he je nɛ e he o yi wami ɔ lo? Yehowa Mawu, nɔ  nɛ ha kpɔmi nɔ́ ɔ konɛ a kɛ he wa yi wami ɔ suɔ kaa o le lɛ bɔ nɛ pee nɛ huɛ bɔmi kpakpa nɛ hi o kɛ lɛ nyɛ kpɛti. Baiblo ɔ woɔ wɔ he wami ke, “Nyɛɛ hɛ nyɛ kɛ su Mawu he, nɛ e maa hɛ lɛ kɛ su nyɛ he.”—Yakobo 4:8.

• Mo ná hemi kɛ yemi ngɛ kpɔmi nɔ́ ɔ mi. Baiblo ɔ de ke: “Nɔ nɛ heɔ Bi ɔ yeɔ ɔ, e nine su neneene wami ɔ nɔ.” (Yohane 3:36) Mɛni tsɔɔ kaa nɔ ko ngɛ hemi kɛ yemi? Nɔ ɔ ní peepee lɛ tsɔɔ kaa e ngɛ hemi kɛ yemi. Enɛ ɔ he ɔ, e biɔ nɛ o pee nɔ́ ko kɛ tsɔɔ kaa o ngɛ kpɔmi nɔ́ ɔ mi hemi kɛ yemi. (Yakobo 2:17) Lɛɛ mɛni e sa nɛ o pee? Loko nike ní ko maa pee o nɔ́ ɔ, ja o ngɔ ngɛ nɔ́ halɔ ɔ dɛ. Enɛ ɔ he ɔ, e sa nɛ o kpã o nine mi nɛ o ngɔ nike ní nɛ ji kpɔmi nɔ́ ɔ. Ngɛ mɛni blɔ nɔ? Moo kase bɔ nɛ Mawu ngɛ hlae nɛ o ba o jemi ha, nɛ o kɛ tsu ní. * Moo sɔle kɛ bi Mawu nɛ e ngɔ o he yayami ɔmɛ kɛ pa mo konɛ o ná he nile kpakpa. Mo ná nɔ mi mami kaa nihi nɛ a ngɛ hemi kɛ yemi ngɛ kpɔmi nɔ́ ɔ mi ɔ ma ná tue mi jɔmi, he piɛ pomi kɛ si himi kpakpa nɛ maa hi si kɛ ya neneene hwɔɔ se!—Hebri Bi 11:1.

• Moo ya Yesu gbenɔ Kaimi ɔ. Yesu to gbijlɔ ko nɛ e sa kaa e ya nɔ daa jeha a sisi konɛ e ha nɛ wa hɛ nɛ hi kpɔmi nɔ́ ɔ he blɔ nya tomi ɔ nɔ. Yesu de ke: ‘Nyɛɛ ya nɔ nɛ nyɛɛ pee enɛ ɔ nɛ nyɛ kɛ kai mi.’ (Luka 22:19) Yehowa Odasefohi ma kai Yesu gbenɔ ɔ Pɛplɛgbi, April 11, 2017, benɛ pu nɔ si. A kɛ maa pee ngmlɛfia kake lɛ maa pee ní peemi nɛ ɔ. Ngɛ ní peemi nɛ ɔ sisi ɔ, a maa tsɔɔ bɔ nɛ Yesu gbenɔ ɔ he hia ha, bɔ nɛ wa náa he se ha mwɔnɛ ɔ, kɛ bɔ nɛ wa ma ná he se ha hwɔɔ se. Ngɛ jeha nɛ be ɔ mi ɔ, nimli ayɔ 20 nɛ a ya Kaimi ɔ ngɛ je kɛ wɛ. Wa ngɛ mo nine fɔe nɛ o ba piɛɛ wa he kɛ je hɛ sa kpo ngɛ Mawu nike ní nɛ se be nɛ ɔ he.