PEMERE si luar biasa ngiahken kita guna ngataken bujur. Kenca ipepalem Jesus sepuluh dilaki si penakitna la malem-malem, ituriken Jesus pelajaren si penting. Sekalak dilaki e ”mulihken ia, ipujina Dibata alu sora megang”. E maka nina Jesus, ”Ma sepuluh kalak kin si malem ndai? I ja siwah kalak nari?” (Lukas 17:12-17) Kai pelajarenna? Menukah kel siakap ngelupaken kiniulin kalak.

La lit hadiah si bali bagi tebusen. E me pemere si mbelinna si pernah lit. Jadi uga tanggapenndu nandangi kai si nggo ilakoken Dibata guna kepentingenndu?

• Tandailah Si Merekenca. Aminna pe lit tebusen, labo ertina kerina jelma nggo pasti ndatken kegeluhen si rasa lalap. Bagi si ikataken Jesus bas totona, ”Kegeluhen si tuhu-tuhu si la erkeri-kerin e: Itandai kalak Kam ngenca Dibata si tuhu-tuhu, dingen itandaina Jesus Kristus si isuruhNdu.” (Johanes 17:3) Adi lit si ngatakenca maka lit sekalak dilaki si nelamatken kam paksa kitik denga, nggit nge kam nandai ia terbagesen janah meteh ngkai maka iselamatkenna kam? Dibata Jahwe mereken tebusen guna nelamatken kam, ateNa min gelah rembak kam ras Ia, labo sibar  meteh saja. Iahken Pustaka kam, ”Rembakkenlah dirindu ku Dibata, e maka Ia pe ngerembakken diriNa man bandu.”—Jakup 4:8.

• Erkinitekenlah nandangi tebusen. ”Ise tek man Anak e ialokenna me kegeluhen si tuhu-tuhu si la erkeri-kerin.” (Johanes 3:36) Bukti maka kita erkiniteken man tebusen teridah arah perbahanen. (Jakup 2:17) Kai maksudna? Sada hadiah nggo jadi jangndu adi ialokenndu. Emaka, arus iangkaindu janah ialokenndu tebusen e. Uga carana? Pelajarilah peraten Dibata janah lakoken. * Ertotolah man Dibata gelah kam ialemiNa ras ibersihkenNa pusuh peratenndu. Ise pe si ngerembakken diri ras Dibata alu erkiniteken, tebusen jadi jaminen guna ndatken kegeluhen si rasa lalap si dem alu kedamen, keamanen, ras kemakmuren.—Heber 11:1.

• Ikutilah Peringet-ingeten kematen Jesus. Ibenaken Jesus si e guna ngingetken kita nandangi manpaat tebusen. Paksa si e, nina, ”Bahanlah bagenda guna peringet-ingeten man bangku.” (Lukas 22:19) Saksi-Saksi Jahwe mperingeti kematen Jesus i bas wari Selasa, 11 April 2017 kenca matawari sundut. Acara e sada jam dekahna termasuk lit penjelasen kerna kematen Jesus janah uga e erguna gundari ras wari si pepagi. Tahun si lewat, lit 20 juta kalak i sebelang doni ngikuti acara Peringeten. Meriah ukur kami ngundang kam gelah radu ras kita ngaloken pemere Dibata si mbelinna e.