A SUNGLAWI tukmi laksawng nih kan i lawmhnak langhter awkah a kan forh ding a si. Jesuh nih mah lio caan ah damh khawh lomi, thinghmui zawtnak a ngeimi pa pahra kha a damter hna hnuah a biapimi kong pakhat a rak chim. An lak i pakhat cu “a ra kir i Pathian kha fakpi in a thangṭhat.” Mah tikah Jesuh nih “an pahra ningin an dam lo maw? Pakua tah khuazei ah dah an si kun?” tiah a ti. (Luka 17:12-17) Mah in zeidah kan hngalh khawh? Midang nih kan cungah ṭhatnak an tuahmi kha fawi tein kan philh khawh ti hi a si.

Tlanhnak man cu a dang laksawng he an i lo lo. Kan hmuhmi laksawng vialte lakah a ṭha bikmi a si. A si ahcun na caah Pathian nih aan tuahpiakmi he aa tlaiin zeitindah na lehrulh lai?

• Laksawng Petu kha hngalh i zuam. Tlanhnak man nih mi zapi kha zungzal nunnak dairek in a hmuhter hna lo. Pathian sin thla a cam lioah Jesuh nih hitin a ti: “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.” (Johan 17:3) Na ngakchiat lioah mi pakhat nih na nunnak aan khamh tiah hei ti u sih. Mah aan khamhtu pa kong le zei ruangah dah aan khamh timi kong kha tam deuh in hngalh na duh lai, a si ko lo maw? Na nunnak khamh awkah tlanhnak  man laksawng aan petu Jehovah Pathian nih a kong hngalhter le amah he pehtlaihnak ṭha ngeihter aan duh. Baibal nih “Pathian cu naih u law aan naih ve hna lai” tiah a kan forh.—Jeim 4:8.

• Tlanhnak man na zumhnak kha langhter. “Fapa an zumhnak a langhtermi paoh cu zungzal nunnak an ngei.” (Johan 3:36, NW) Zumhnak langhter timi sullam cu zeidah a si? Tlanhnak man kan zumh kha tuahsernak in langhter a hau tinak a si. (Jeim 2:17) Zei bantuk tuahsernak dah a hau? Laksawng pakhat cu na sin a phak i na cohlan tik lawngah nangmah ta a hung si. Cu bantukin tlanhnak man zong na sinah phanh in na cohlan a hau ve. Zeitin in dah? Pathian nih zeitindah nunter a ka duh ti kha hlathlai law mah ningin nung. * Pathian sinah ngaihthiamnak hmuh awk le a thiangmi chiaṭha thleidannak lungthin ngeih awkah thla cam. Tlanhnak man an zumhnak a langhtermi hna cu hmailei ah daihnak, himnak le hlawhtlinnak an hmu lai timi zumhnak he Pathian sinah thla cam.—Hebru 11:1.

• Jesuh a thih Philhlonak ah i pum. Tlanhnak man timhtuahnak kong a kan hngalhter ṭhan hngami, kum fatin tuahmi a thih philhlonak puai kha Jesuh nih a rak thawk. Mah puai he aa tlaiin Jesuh nih “keimah philhlonak ah run tuah u” tiah a ti. (Luka 22:19) Jehovah Tehte Hna nih Jesuh a thih philhlonak puai kha 2017, April 11, Nihnih Ni, nitlak hnuah an tuah lai. Suimilam pakhat chung a raumi mah pumhnak ah Jesuh thihnak a biapitnak kong le mah nih atu le hmailei ah zei ṭhatnak dah a chuahter lai timi kong fianternak a um lai. Nikum ah vawleicung pumpi i tuahmi Ruahnolhnak ah aa pummi cu nuai 20 hrawng an si. Pathian laksawng ngan bik cung naa lawmhnak langhter awkah kanmah he rak i pumh ve dingin kan in sawm.