EDIEKE inen̄erede ima enọ emi ẹnọde nnyịn, ana inam n̄kpọ ndiwụt ke imama enọ oro. Jesus ama owụt ke se ikpesinamde edi emi ke ini enye akanamde idem ọsọn̄ mbon akpamfia duop. Kpa ye oro owo mîkesikemeke ndikọk udọn̄ọ emi ini oro, Jesus ama ọkọk mmọ. Edi owo kiet kpọt ke otu owo duop oro akafiak “edi edinọ Abasi ubọn̄.” Ntak edi oro Jesus ọkọdọhọde ete: “Nte idịghe owo duop ke ẹkenam ẹsana? Enye, ndien, owo usụkkiet eken?” (Luke 17:​12-17) Nso ke emi owụt? Owụt ke edieke nnyịn mîkpemeke, ke imekeme ndisọp mfre eti n̄kpọ emi mbon en̄wen ẹnamde ẹnọ nnyịn.

Idụhe enọ emi ẹkemede ndimen ndomo ye ufak. Enye edi akakan enọ. Ntre, nso ke edinam iban̄a se Abasi anamde ọnọ fi emi?

• Kpep n̄kpọ ban̄a Abasi emi ọnọde nnyịn enọ emi. Abasi ndinọ nnyịn ufak iwọrọke ke enye ayada ufak oro anam kpukpru owo ẹnyene nsinsi uwem. Jesus ọkọbọn̄ akam ọnọ Abasi ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.” (John 17:⁠3) Edieke ẹdọhọde fi ke enyene owo emi akanyan̄ade fi ke ini ekedide ekpri, ndi ukpûyomke usụn̄ udiọn̄ọ owo oro unyụn̄ ufiọk ntak  emi enye akanyan̄ade fi? Jehovah Abasi emi ọkọnọde ufak man nnyịn idu uwem ọdọhọ ekpep n̄kpọ aban̄a imọ onyụn̄ edi ufan imọ. Bible ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.”​—⁠James 4:⁠8.

• Buọt idem ke ufak. “Owo eke ọbuọtde idem ke Eyen enyene nsinsi uwem.” (John 3:36) Nso ke ndibuọt idem ọwọrọ? Ọwọrọ ke ana inam n̄kpọ; ana inanam iwụt ke imọbuọt idem ke ufak. (James 2:17) Nso ke ana inam? Edieke owo ọnọde fi n̄kpọ, nso ke akpanam man owụt ke omoyom n̄kpọ oro? Edi ndinyan ubọk mbọ. Kpasụk ntre, ana anam n̄kpọ ndiwụt Abasi ke omoyom enọ esie emi. Kpep nte Abasi oyomde odu uwem, nyụn̄ du uwem nte enye oyomde. * Bọn̄ akam ben̄e Abasi efen mme idiọkn̄kpọ fo onyụn̄ anam fi enyene eti esịt. San̄a kpere Abasi nyụn̄ nịm ke n̄kpa Jesus ayanam kpukpru mbon oro ẹbuọtde idem ye Jesus ẹnyene nsinsi uwem, ẹdu ke emem, ẹnyụn̄ ẹkop inemesịt.​—⁠Mme Hebrew 11:⁠1.

• Dụk Editi n̄kpa Jesus. Jesus ama ọtọn̄ọ n̄kpọ emi ẹdisinamde ke isua ke isua, emi editide nnyịn ufak emi Abasi ọkọnọde. Enye eketịn̄ ntem aban̄a edinam oro: “Ẹka iso ẹnam emi nditi mi.” (Luke 22:19) Mme Ntiense Jehovah ẹyeti n̄kpa Jesus ke Tuesday, April 11, 2017, ke utịn ama okosụhọde. Edinam emi edidi n̄kpọ nte hour kiet, ndien ikọ Abasi emi ẹdikwọrọde do oyowụt nte n̄kpa Jesus enyenede ufọn ọnọ nnyịn idahaemi ye se Abasi edidade n̄kpa esie inam inọ nnyịn ke ini iso. Ke 2016, n̄kpọ nte owo miliọn 20 ẹkedụk Editi ke ofụri ererimbot. Imokot fi etiene edidụk edinam emi man owụt ke amama akakan enọ Abasi emi.