KƐ́ MƆ KO ke wɔ nɔ ko ni jara wa waa lɛ, esa akɛ no atsirɛ wɔ ni wɔjie hiɛsɔɔ kpo. Yesu ma oti nɛɛ nɔ mi be ni etsa hii nyɔŋma ni miiye hela ko ni naa wa waa, ni abɛ naa tsabaa yɛ nakai beiaŋ lɛ. Hii nyɔŋma lɛ ateŋ mɔ kome ‘ku esɛɛ eba, ni ekɛ gbee ni wa wo Nyɔŋmɔ hiɛ nyam.’ Yesu kɛɛ akɛ: “Ahã mɛi nyɔŋma lɛ fɛɛ he tse, aloo jeee nakai? Belɛ, nɛgbɛ mɛi nɛɛhu ni eshwɛ lɛ yɔɔ?” (Luka 17:12-17) Mɛni wɔkaseɔ yɛ mli? No ji akɛ, ewaaa kwraa akɛ wɔhiɛ baanyɛ akpa ejuji ni mɛi feɔ wɔ lɛ nɔ!

Nikeenii ko bɛ ni abaanyɛ akɛto kpɔmɔnɔ lɛ he. No ji nikeenii ni fe fɛɛ ni akɛke dã. Belɛ, te esa akɛ ofee onii yɛ nɔ ni Nyɔŋmɔ efee ehã bo lɛ he ohã tɛŋŋ?

• Lé Nikelɔ lɛ. Kpɔmɔnɔ lɛ ni akɛhã wɔ lɛ etsɔɔɔ doo akɛ wɔbaaná naanɔ wala. Moŋ lɛ, Yesu kɛɛ Nyɔŋmɔ yɛ sɔlemɔ mli akɛ: “Enɛ ji naanɔ wala lɛ, akɛ amɛbaale bo, anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ.” (Yohane 17:3) Kɛ́ mɔ ko kɛɛ bo akɛ, be ni oji gbekɛ lɛ, nuu ko here oyiwala  lɛ, ani osumɔŋ akɛ obaale nuu lɛ he saji babaoo kɛ nɔ hewɔ ni ehere oyiwala lɛ? Yehowa Nyɔŋmɔ ní kɛ kpɔmɔnɔ lɛ hã koni ekɛhere wɔyiwala lɛ miisumɔ ni wɔ le lɛ, ní wekukpaa kpakpa ahi wɔ kɛ lɛ teŋ. Biblia lɛ woɔ wɔ hewalɛ akɛ, “Nyɛtsia nyɛbɛŋkɛa Nyɔŋmɔ, ni ebaatsi ebɛŋkɛ nyɛ.”—Yakobo 4:8.

• Jiemɔ hemɔkɛyeli kpo yɛ kpɔmɔnɔ lɛ mli. “Mɔ ni jieɔ hemɔkɛyeli kpo yɛ Bi lɛ mli lɛ yɛ naanɔ wala.” (Yohane 3:36) Mɛni hemɔkɛyeli kpo ni wɔɔjie lɛ tsɔɔ? Etsɔɔ akɛ, dani wɔbaanyɛ wɔjie hemɔkɛyeli kpo yɛ kpɔmɔnɔ lɛ mli lɛ, ebiɔ ni wɔfee nɔ ko. (Yakobo 2:17) Mɛni ebiɔ ni wɔfee lɛ? Nikeenii ko baanyɛ atsɔ onɔ kɛ́ okpã onine mli ni ohe. No hewɔ lɛ, esa akɛ okpã onine mli ni ohe kpɔmɔnɔ lɛ. Mɛni no tsɔɔ? Etsɔɔ akɛ esa akɛ okase bɔ ni Nyɔŋmɔ sumɔɔ ni ohi shi ohã, ni okɛ nɔ ni okaseɔ lɛ atsu nii. * Sɔlemɔ ní Nyɔŋmɔ kɛ ohe eshai ake bo koni oná henilee kpakpa. Yaa Nyɔŋmɔ ŋɔɔ, kɛ nɔmimaa akɛ, ebaahã mɛi fɛɛ ni jieɔ hemɔkɛyeli kpo yɛ kpɔmɔnɔ lɛ mli lɛ aná toiŋjɔlɛ, miishɛɛ, kɛ shihilɛ kpakpa!—Hebribii 11:1.

• Yaa Yesu gbele lɛ Kaimɔ lɛ. Yesu to nifeemɔ ko shishi koni no akai wɔ kpɔmɔnɔ ni ekɛhã wɔ lɛ, ni afeɔ nifeemɔ nɛɛ daa afi. Ewie kɛkɔ nakai nifeemɔ lɛ he akɛ: “Nyɛyaa nɔ nyɛfea enɛ kɛkaia mi.” (Luka 22:19) Yehowa Odasefoi baakai Yesu gbele lɛ Jufɔ, April 11, 2017, be ni hulu enyɔ shi. Nifeemɔ lɛ baahe aaafee ŋmɛlɛtswaa kome, ni abaahã wiemɔ kɛtsɔɔ bɔ ni Yesu gbele lɛ he yɔɔ sɛɛnamɔ, kɛ bɔ ni wɔnáa he sɛɛ bianɛ kɛ bɔ ni wɔbaaná he sɛɛ wɔsɛɛ. Nyɛsɛɛ lɛ afi lɛ, mɛi aaafee akpekpei 20 ba Kaimɔ lɛ yɛ jeŋ fɛɛ. Wɔkɛ miishɛɛ miifɔ̃ bo nine ni obafata wɔhe kɛjie hiɛsɔɔ kpo wɔtsɔɔ Nyɔŋmɔ nɔkeenɔ ni fe fɛɛ lɛ.