LÈ NOU resevwa yon kado ki gen anpil valè, nòmalman, sa pouse n montre nou rekonesan. Jezi te montre enpòtans sa genyen apre l te fin geri dis mesye ki te gen yon maladi terib ki pa t gen tretman nan epòk la. Gen youn nan mesye yo, lè l wè l geri, li “retounen [kot Jezi] toutpandan l ap bay Bondye glwa byen fò”. Men sa Jezi te di l: “Se nou toule dis ki geri, pa vre? Men, kote nèf lòt yo?” (Lik 17:12-17). Ki leson nou aprann nan sa? Se pa ti fasil sa fasil pou nou bliye bèl aksyon lòt moun fè anvè nou!

Ranson an se yon kado ki pa gen parèy. Anfèt, se pi gwo kado nou te ka resevwa. Nan ka sa a, ki jan w ta dwe reyaji parapò ak kado sa a Bondye ba w la?

• Aprann konnen Moun ki bay li a. Lèzòm pap annik jwenn lavi ki pap janm fini an grasa ranson an san yo pa fè okenn efò pou sa. Okontrè, men sa Jezi te di pandan l t ap priye Bondye: “Pou yo ka gen lavi ki pap janm fini an, se pou yo aprann konnen w, ou menm, sèl vrè Dye a, ak sila a ou te voye a: Jezi Kris.” (Jan 17:3). Si w ta vin aprann  gen yon mesye ki te sove lavi w pandan w te timoun, èske w pa t ap renmen konnen plis bagay sou mesye sa a ak rezon ki fè l te sove lavi w la? Se Jewova Dye ki bay ranson an, kado ki sove lavi nou an. Nonsèlman Jewova vle nou konnen kiyès li ye, men tou, li ta renmen nou vin gen yon relasyon sere sere avè l. Men sa Bib la fè konnen: “Pwoche bò kote Bondye e l ap pwoche bò kote nou.” — Jak 4:8.

• Demontre lafwa nan ranson an. “Moun ki demontre l gen lafwa nan Pitit la ap gen lavi ki pap janm fini an.” (Jan 3:36). Ki sa sa vle di demontre lafwa? Sa vle di poze aksyon; pou w demontre lafwa nan ranson an, sa mande pou w poze aksyon (Jak 2:17). Ki aksyon konsa? Yon kado vin pou ou, lè w aksepte l. Menm jan an tou, ou dwe fè efò pou w aksepte ranson an. Ki jan w ka fè sa? Ou bezwen aprann fason Bondye vle w mennen lavi w epi ou dwe viv jan l vle a *. Priye Bondye pou w mande l padon e pou w ka gen yon konsyans ki klè. Pwoche bò kote Bondye, toutpandan w kwè ak tout kè w, grasa ranson an, ou gen garanti w ap gen lavi ki pap janm fini an, w ap jwenn sekirite, lapè ak anpil bon bagay Bondye rezève pou tout moun ki gen lafwa nan ranson an. — Ebre 11:1.

• Asiste Memoryal lanmò Jezi a. Jezi te etabli yon evènman pou n selebre chak ane yon fason pou l te fè n sonje ranson an. Men ki sa Jezi te di konsènan evènman sa a: “Kontinye fè sa pou nou montre nou sonje m.” (Lik 22:19). Temwen Jewova yo ap selebre lanmò Jezi jou k ap madi 11 avril 2017 la, apre solèy la fin kouche. Pwogram nan ap dire anviwon inèdtan e ladan l y ap pale konsènan enpòtans lanmò Jezi genyen ak benediksyon li fè n jwenn kounye a ak lòt benediksyon ankò nou pral jwenn pi devan. Ane ki sot pase a, te gen anviwon 20 milyon moun ki te asiste Memoryal la ansanm avèk nou. Ane sa a, se ak tout kè nou nou envite w vin asiste evènman sa a ansanm avèk nou pou w demontre rekonesans ou pou gwo kado sa a Bondye bay la.