ԵՐԲ բացառիկ նուէր մը ստանանք, պէտք է մղուինք մեր գնահատանքը արտայայտելու։ Յիսուս այս կէտը շեշտեց երբ բժշկեց տասը մարդոց հիւանդութիւնը, որ այդ ժամանակ բուժում չունէր։ Այդ տասը մարդոցմէ մէ՛կը «ետ դարձաւ ու մեծ ձայնով փառք կու տար Աստուծոյ» (Ղուկաս 17։12-17)։ Ասիկա ի՞նչ կը ցուցնէ։ Իրապէս շատ արագ կրնանք մոռնալ մեզի ի նպաստ ուրիշին ըրած լաւ բաները։

Փրկանքը ուրիշ նուէրի չի նմանիր։ Ատիկա մինչեւ հիմա տրուած մեծագոյն նուէրն է։ Լաւ, ինչպէ՞ս պէտք է ընդառաջես Աստուծոյ տուած այս նուէրին։

• Տուողը ճանչցիր։ Փրկանքը ինքնաբերաբար յաւիտենական կեանք չի տար բոլոր մարդոց։ Յիսուս աղօթքի մը մէջ Աստուծոյ ըսաւ. «Այս է յաւիտենական կեանքը, որ ճանչնան քեզ միմիայն ճշմարիտ Աստուածդ ու Յիսուս Քրիստոսը, որ դուն ղրկեցիր» (Յովհաննէս 17։3)։ Եթէ անհատ մը քեզի ըսէր որ երբ պզտիկ էիր՝ մէկը քու կեանքդ ազատեց, պիտի չուզէի՞ր աւելին գիտնալ այդ մարդուն մասին եւ թէ ինչո՛ւ ազատեց քեզ։ Եհովա Աստուած, որ կեանք ազատող փրկանքի նուէրը տուաւ, ոչ միայն կ’ուզէ որ զինք ճանչնաս, այլեւ՝ իրեն հետ  մտերիմ ըլլաս։ Սուրբ Գիրքը կը քաջալերէ. «Աստուծոյ մօտեցէ՛ք ու անիկա ձեզի պիտի մօտենայ» (Յակոբոս 4։8)։

• Փրկանքին հաւատա՛։ «Ան որ Որդիին կը հաւատայ, յաւիտենական կեանքն ունի» (Յովհաննէս 3։36)։ Հաւատալը կը պահանջէ բան մը ընել։ Փրկանքին հաւատալը գործով կ’ըլլայ (Յակոբոս 2։17)։ Ի՞նչ գործ։ Նուէր մը քեզի կ’ըլլայ միայն երբ ձեռքդ երկարես եւ ընդունիս զայն։ Ուրեմն, պէտք է ‘ձեռքդ երկարես’ եւ ընդունիս փրկանքը։ Ինչպէ՞ս։ Սորվէ թէ Աստուած ինչպէ՛ս կ’ուզէ որ ապրիս եւ ատոր համաձայն ապրէ *։ Աղօթքով Աստուծմէ ներում եւ մաքուր խիղճ խնդրէ։ Աստուծոյ մօտեցիր լման վստահութիւն ունենալով որ փրկանքը կ’ապահովէ խաղաղութիւնով, ապահովութիւնով եւ յաջողութեամբ լեցուն ապագայ մը (Եբրայեցիս 11։1)։

• Յիսուսին մահուան Յիշատակատօնին ներկայ եղիր։ Յիսուս այս առիթը հաստատեց, որպէսզի մեզի յիշեցնէ փրկանքին կարգադրութիւնը։ Ան ատոր մասին ըսաւ. «Ասիկա ըրէք զիս յիշելու համար» (Ղուկաս 22։19)։ Երեքշաբթի, 11 ապրիլ 2017–ին՝ արեւամուտէն ետք, Եհովայի վկաները պիտի յիշատակեն Յիսուսին մահը։ Յայտագիրը մօտաւորապէս մէկ ժամ կը տեւէ եւ կը պարունակէ դասախօսութիւն մը, որ կը բացատրէ Յիսուսին մահուան նշանակութիւնը եւ թէ ատիկա ի՛նչ օգուտներ կը բերէ թէ՛ ներկայիս եւ թէ ապագային։ Անցեալ տարի, աշխարհի չորս կողմը շուրջ 20 միլիոն անհատներ Յիշատակատօնին ներկայ գտնուեցան։ Սրտանց քեզ կը հրաւիրենք որ մեզի հետ գնահատանքդ ցուցնես Աստուծոյ տուած մեծագոյն նուէրին հանդէպ։