DIPA ditambe buimpe didi ne bua kutuenzeja bua kuleja dianyisha. Yezu wakaleja dilongesha edi yeye mumane kuondopa bantu balume dikumi bavua ne disama dibi divua dienda ditekesha mubidi divua kadiyi ne buanga tshikondo atshi. Umue wa ku bantu balume dikumi “wakapingana utumbisha Nzambi ne dîyi dikole.” Yezu wakamba ne: “Bantu bonso dikumi bavua balengejibue, ki mmuomu anyi? Kadi bakuabu tshitema badi penyi?” (Luka 17:12-17) Ndilongesha kayi ditudi tupeta? Tudi mua kupua muoyo ne lukasa luonso malu mimpe adi bakuabu batuenzela.

Tshia kupikula natshi bantu ndipa ditambe mapa makuabu. Ndipa ditambe bunene dia katshia ne katshia didibu batupeshe. Kadi mpindieu ntshinyi tshiudi ne bua kuenza bua tshidi Nzambi mukuenzele etshi?

• Fika ku dimanya Udi mudifile. Tshia kupikula natshi bantu katshiena anu tshipetesha bantu bonso muoyo wa tshiendelele to. Kadi Yezu wakambila Nzambi mu disambila ne: “Bualu ebu budi bumvuija muoyo wa tshiendelele: bafike ku dikumanya wewe, Nzambi umuepele mulelela, ne yeye uuvua mutume, Yezu Kristo.” (Yone 17:3) Muntu  yeye mukuambile ne: muntu kampanda uvua musungile muoyo webe pautshivua muana, kuakujingaku bua kumanya malu a bungi adi atangila muntu au ne kumanya bua tshinyi uvua mukusungile anyi? Yehowa Nzambi uvua mufile dipa dia tshia kupikula natshi bantu bua kubasungila, mmusue bua umanye bimpe tshidiye ne udie nende malanda makole. Bible udi wamba ne: “Semenayi pabuipi ne Nzambi ne yeye neasemene pabuipi nenu.”​—Yakobo 4:8.

• Leja ditabuja mu tshia kupikula natshi bantu. “Muntu udi uleja ditabuja kudi Muana udi ne muoyo wa tshiendelele.” (Yone 3:36) Kuleja ditabuja kudi kumvuija tshinyi? Kuleja ditabuja mu tshia kupikula natshi kudi kumvuija kuenza bualu kampanda. (Yakobo 2:17) Bualu bua mushindu kayi? Dipa kampanda didi dilua diebe anu paudi udipatshila ne uditaba. Udi ne bua kuipatshila tshia kupikula natshi bantu ne kutshitaba. Mushindu kayi? Manya mudi Nzambi musue bua wikale, ne enza malu bilondeshile disua diende. * Sambila Nzambi bua akufuile luse ne akupesha kondo ka muoyo kimpe. Semena kudi Nzambi mutuishibue ne muoyo mujima ne: tshia kupikula natshi bantu netshipeteshe bantu bonso badi baleja ditabuja ku ditshi ditalala, bukubi ne masanka a bungi mu matuku atshilualua bua kashidi.​—Ebelu 11:1.

• Buela mu Tshivulukilu tshia lufu lua Yezu. Yezu wakabanjija tshibilu tshia ku tshidimu bua kutuvuluija tshia kupikula natshi bantu. Wakamba bua disekelela dia tshibilu etshi ne: “Tungunukayi ne kuenza nunku bua kumvuluka.” (Luka 22:19) Bantemu ba Yehowa nebenze tshibilu tshia kuvuluka lufu lua Yezu mu Dibidi dia 11/4/2017, dîba dimane kubuela. Tshibilu etshi netshienzeke mu dîba dimue, nebenzamu muyuki udi umvuija mushinga udi nawu lufu lua Yezu ne muatuadilalu bantu masanka mpindieu ne mu matuku kumpala. Tshidimu tshishale etshi bantu batue ku miliyo 20 ba pa buloba bujima bavua babuele mu Tshivulukilu. Tudi tukubikila ne muoyo mujima bua ulue kuenza netu tshibilu etshi bua tuleje Nzambi dianyisha bua dipa diende ditambe bunene edi.