AJ TTZAJ qʼoʼn jun oyaj nim toklen qe il tiʼj tuʼn t-xi qqʼoʼn chjonte tiʼj. Yolin Jesús qa nim toklen tuʼn t-xi qqʼoʼn chjonte tej kykubʼ tqʼanin 10 xjal aʼyeju toktoq jun yabʼil kyiʼj aju mintiʼ qʼanbʼil tiʼj. Jun kyxol qeju 10 xjal «ajtz meltzʼaj in schʼin wen, in jaw tnimsaʼn tbʼi Dios». Tqʼama Jesús: «¿Myapetzun laj kybʼet qeju ma che bʼanix? ¿Yajtzun qeju bʼelajtl jatumtzun ateʼ qe?» (Lucas 17:12-17). Aju txʼolbʼabʼil lu in tzaj tyekʼun qe qa jun rat jaku tzikʼ tnaʼl quʼn aju tbʼanel in bʼant kyuʼn txqantl qiʼj.

Ik tzeʼn ma tzʼel qnikʼ tiʼj, mintiʼ juntl oyaj ik tzeʼn chojbʼil. Atzun matij oyaj o tzaj tqʼoʼn Dios qe. Tuʼntzunju, ¿tzeʼn kxel qqʼoʼn chjonte te Dios tiʼjju o bʼant tuʼn qiʼj?

• Ojtzqinka aju tzaj qʼonte oyaj. Mlay tzaj qʼoʼn kychwinqlal xjal te jumajx tuʼn chojbʼil noq kukx. Sino ik tten ik tzeʼn tqʼama Jesús te Ttat toj tnaʼj  Dios: «Ex atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3). Noqwit ma tzʼok tbʼiʼna qa kleta tuʼn jun xjal tej tzmatoq tal kʼwaʼla, ax tok, tajlo teya tuʼn tok tojtzqiʼna ex tuʼn t-xi tqanina te tiquʼn bʼant tuʼn. Ax ikx te Jehová aju tzaj qʼonte chojbʼil tuʼn qklet, taj tuʼn tok qojtzqiʼn ex tuʼn qok te tamiw. In tzaj tqʼamaʼn Tyol Dios jlu: «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8).

• Bʼaʼn tuʼn tten qʼuqbʼil tkʼuʼja tiʼj chojbʼil. «Alkye ma tzʼokslan tiʼj Tkʼwaʼl Dios, at tchwinqlal te jumajx» (Juan 3:36). ¿Tiʼ t-xilen tuʼn tten qʼuqbʼil qkʼuʼj? A t-xilen jlu tuʼn tkubʼ qyekʼun tukʼil qbʼinchbʼen qa at qʼuqbʼil qkʼuʼj tiʼj chojbʼil (Santiago 2:17). Tuʼn tok jun oyaj te teya, il tiʼj tuʼn tel tnuqpiʼn tqʼabʼa ex tuʼn ttzaj ttzyuʼna. Ax ikx il tiʼj tuʼn tel «tnuqpiʼn tqʼabʼa» tuʼn t-xi tkʼamoʼna chojbʼil. A t-xilen jlu tuʼn tel qnikʼ tiʼj tzeʼn taj Dios tuʼn qanqʼin ex tuʼn tkubʼ qqʼoʼn toj xnaqʼtzbʼil. * Naʼna Dios te Jehová, qaninxa te tuʼn tkubʼ tnajsaʼn tila ex tuʼn tten tnabʼila saq. Laqʼexa ttxlaj Dios ex tenx qʼuqbʼil tkʼuʼja qa tuʼn chojbʼil ktel mujbʼabʼil te jumajx toj ambʼil tzul kye qeju at qʼuqbʼil kykʼuʼj ex qa che tel toj tbʼanel (Hebreos 11:1).

• Txiʼya toj Nabʼitz Tkyimlen Jesucristo. Tuʼn miʼn tikʼ tnaʼl quʼn aju chojbʼil, kyaj bʼant tuʼn Jesús tuʼn tkubʼ ikʼset jun ikʼsabʼil jun maj toj abʼqʼi. Tqʼama jlu: «Kybʼinchame jlu te nabʼl weye» (Lucas 22:19). Toj abʼqʼi lu, aqoʼye testigos de Jehová kbʼel qikʼsaʼne Nabʼitz Tkyimlen Jesucristo toj martes 11 te abril, ajxi tkuʼx bʼaj Qʼij. Toj chmabʼil lu aju chʼixme jun or in ten, kʼeletz chikʼbʼaʼn tiʼ t-xilen tkyimlen Jesús ex alkye tten jaku tzʼonin qiʼj toj ambʼil jaʼlo ex toj ambʼil tzul. Toj abʼqʼi kyaj e pon junlo 20 millón xjal twitz tkyaqil Txʼotxʼ toj Nabʼitz Tkyimlen Jesucristo. In qo txokine tiʼja tuʼn tpona toj chmabʼil lu tuʼn t-xi tqʼoʼna chjonte te Dios tuʼnju o tzaj tqʼoʼn chojbʼil qe.