UWILA ucindame cuze ungatulenga ukuti twataizya sana. Yesu watusambilizye isambililo pali vino tufwile kutaizya apa cisila ca kupozya aonsi 10 aalwile indwala iyipisye ino kutali nanti wenga uwakupozya. Umonsi wenga pali yaya 10 “waswililemo, ala akulumbanya Leza ni izwi likulu.” Lyene Yesu watiile: “Uzye antu ikumi yonsi yatali yapoziwa? Uzye yauze fundimbali [9] yene yali kwi?” (Luka 17:12-17) Uzye i vyani vino tungasambilila kuli vino vyacitiike? Naswe kwene tungilila zuwa kuli vino anji yakutucitila!

Kutaya uwila ungakolana ni imfwa yakwe Yesu. U wila umwi ucindame sana. Uzye tungacita uli pakulanga ukuti tukataizya pali vino Leza watucitiile?

• Mulinzile ukumanya uwamupeela uwila. Impolelwa isyalenga ukuti umuntu papo kwene aye nu umi wape. Lelo Yesu walanzile umwi pepo ukuti: “Umi wa pe uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.” (Yoane 17:3) Ndi cakuti umwi wamunena ukuti umuntu wi u wakupuswisye ala ucili mwance, uzye mutanga mutemwe ukumanya  umuntu wiyo alino ni calenzile amupususye? Yeova uwalenzile ukuti muye nu umi pakumupeela impolelwa, akalonda ukuti mumumanye ningo nu kuya ya cuza yakwe. Baibo ikatukomelezya ukuti “mupalame kuli Leza, nga nawe amapalama kunomuli.”—Yakobo 4:8.

• Mwataila umu mpolelwa ino Yesu wapiile. “Wino wensi akataila Mwana wene ali nu umi wape.” (Yoane 3:36) Cikapiliula cani ukuya nu utailo? Cikapiliula ukucitapo vimwi; fwandi pakulanga utailo umu mpolelwa tulinzile ukucitapo vimwi. (Yakobo 2:17) I vyani vivyo kwene vino tulinzile ukucita? Uwila ukaya uwitu ndi twazumila nu kupokelela. Fwandi tulinzile ukuzumila nga nu kupokelela impolelwa iyo. Tungacita uli vivyo? Tulinzile ukumanya vino Leza akalonda twaikala nu kulaikala ukulingana na vino wene akalonda. * Tulinzile ukulapepa kuli Yeova na kampingu musanguluke. Impolelwa yalenga tupalame kuli Yeova ukwaula intete nupya ilalenga tukaipakizya umutende wa cumi ni vintu vingi vino yonsi ataila umu mpolelwa yalaipakizya.—Ayebulai 11:1.

• Mwazanwa uku Ciusyo ca mfwa yakwe Yesu. Yesu watandike ukuzevya kwa ciusyo ca mfwa yakwe icikatwiusya vino impolelwa yacindama kuli fwefwe. Lino walandanga pa kuzevya kwene kuu, watiile: “Mwacita cii pa kunjiusya.” (Luka 22:19) Ya Nte Yakwe Yeova yalaazevya imfwa yakwe Yesu pali Ciili, pa 11 Epulelo, 2017, lino ilanzi lyawa. Pa kuzevya kuu ukukamala umupiipi ni iwala lyonga, palaya ni lyasi ililalondolola vino imfwa yakwe Yesu yacindama na vino yatwavwa pali ndakai alino nu ku nkoleelo. Mwacizo, antu umupiipi na 20 milyoni yazanyilwe ku Ciusyo. Ala namwe kwene tukumwama ukuti muce mwize tukazevezye capamwi pakuti tukalangizye vino tukataizya apa wila uu ukulu cuze uno Leza watupeela.