വിശിഷ്ടമായ ഒരു സമ്മാനം ലഭിക്കുമ്പോൾ നമ്മൾ നന്ദി കാണിക്കേണ്ടതാണ്‌. ഒരിക്കൽ പത്തു കുഷ്‌ഠരോഗികളെ സുഖപ്പെടുത്തിയശേഷം യേശു അതിന്‍റെ പ്രാധാന്യം എടുത്തുപറഞ്ഞു. ആ മാറാരോഗത്തിന്‌ അന്നു മരുന്നില്ലായിരുന്നു. ആ പത്തു പേരിൽ ഒരാൾ “താൻ ശുദ്ധനായെന്നു കണ്ടപ്പോൾ ഉറക്കെ ദൈവത്തെ സ്‌തുതിച്ചുകൊണ്ട് മടങ്ങിവന്നു.” യേശു ചോദിച്ചു: “പത്തു പേരല്ലേ ശുദ്ധരായത്‌? ബാക്കി ഒൻപതു പേർ എവിടെ?” (ലൂക്കോസ്‌ 17:12-17) മറ്റുള്ളവർ നമുക്കുവേണ്ടി ചെയ്യുന്ന ദയാപ്രവൃത്തികൾ എളുപ്പം മറന്നുകളയാൻ സാധ്യതയുണ്ടെന്നാണ്‌ ഇതു കാണിക്കുന്നത്‌.

മോചനവിലയ്‌ക്കു തുല്യമായി മറ്റൊരു സമ്മാനവുമില്ല. നമുക്കു ലഭിക്കാവുന്നതിലുംവെച്ച് ഏറ്റവും മികച്ച സമ്മാനമാണ്‌ അത്‌. ദൈവം നിങ്ങൾക്കുവേണ്ടി നൽകിയ ആ സമ്മാനത്തെ നിങ്ങൾ എങ്ങനെ വീക്ഷിക്കും?

• നൽകിയ വ്യക്തിയെ അടുത്തറിയുക. യേശുവിലൂടെ ദൈവം മോചനവില നൽകിയെങ്കിലും നിത്യജീവൻ ലഭിക്കണമെങ്കിൽ നമ്മുടെ ഭാഗത്ത്‌ ശ്രമം ആവശ്യമാണ്‌. കാരണം പ്രാർഥനയിൽ യേശു ദൈവത്തോട്‌ ഇങ്ങനെ പറഞ്ഞു: “ഏകസത്യദൈവമായ അങ്ങയെയും അങ്ങ് അയച്ച യേശുക്രിസ്‌തുവിനെയും അവർ അറിയുന്നതാണു നിത്യജീവൻ.” (യോഹന്നാൻ 17:3) കുട്ടിയായിരുന്നപ്പോൾ ഒരാൾ നിങ്ങളുടെ ജീവൻ രക്ഷിച്ചെന്ന് അറിഞ്ഞാൽ ആ വ്യക്തിയെക്കുറിച്ച് കൂടുതൽ അറിയാനും അദ്ദേഹം എന്തുകൊണ്ടാണ്‌ നിങ്ങളെ രക്ഷിച്ചതെന്നു മനസ്സിലാക്കാനും നിങ്ങൾ ശ്രമിക്കില്ലേ? നമ്മുടെ ജീവൻ രക്ഷിക്കാനായി  മോചനവില എന്ന സമ്മാനം നൽകിയ യഹോവ, തന്നെ അറിയാൻ മാത്രമല്ല താനുമായി ഒരു അടുത്ത ബന്ധത്തിലേക്കു വരാനും ആഗ്രഹിക്കുന്നു. ബൈബിൾ പറയുന്നു: “ദൈവത്തോട്‌ അടുത്ത്‌ ചെല്ലുക; അപ്പോൾ ദൈവം നിങ്ങളോട്‌ അടുത്ത്‌ വരും.”—യാക്കോബ്‌ 4:8.

• മോചനവിലയിൽ വിശ്വാസം അർപ്പിക്കുക. “പുത്രനിൽ വിശ്വസിക്കുന്നവനു നിത്യജീവനുണ്ട്.” (യോഹന്നാൻ 3:36) വിശ്വാസം അർപ്പിക്കുക എന്നു പറഞ്ഞാൽ എന്താണ്‌? പ്രവർത്തിക്കുക എന്ന് അർഥം. മോചനവിലയിൽ വിശ്വാസമുണ്ടെന്നു കാണിക്കാൻ പ്രവൃത്തികൾ അനിവാര്യമാണ്‌. (യാക്കോബ്‌ 2:17) ഏതുതരം പ്രവൃത്തികൾ? ഒരു സമ്മാനം നിങ്ങളുടെ സ്വന്തമാകുന്നത്‌ നിങ്ങൾ കൈ നീട്ടി അതു സ്വീകരിക്കുമ്പോഴാണ്‌. അതുകൊണ്ട് ശ്രമം ചെയ്‌ത്‌ മോചനവില എന്ന സമ്മാനം സ്വീകരിക്കുക. എങ്ങനെ? നിങ്ങൾ എങ്ങനെ ജീവിക്കാനാണ്‌ ദൈവം പ്രതീക്ഷിക്കുന്നതെന്നു മനസ്സിലാക്കിക്കൊണ്ടും അതുപോലെ പ്രവർത്തിച്ചുകൊണ്ടും. * ക്ഷമയ്‌ക്കും ശുദ്ധമായ മനസ്സാക്ഷിക്കും വേണ്ടി ദൈവത്തോടു പ്രാർഥിക്കുക. മോചനവിലയിൽ വിശ്വാസം അർപ്പിക്കുന്നവർക്ക് സമാധാനവും സുരക്ഷിതത്വവും സമൃദ്ധിയും നിറഞ്ഞ ഒരു ജീവിതം എന്നേക്കും ആസ്വദിക്കാമെന്ന പൂർണബോധ്യത്തോടെ ദൈവത്തെ സമീപിക്കുക.—എബ്രായർ 11:1.

• യേശുവിന്‍റെ മരണത്തിന്‍റെ ഓർമ ആചരിക്കുന്ന പരിപാടിയിൽ പങ്കെടുക്കുക. മോചനവിലയെന്ന ദൈവത്തിന്‍റെ കരുതൽ ഓർമിക്കാനായി യേശു ഒരു വാർഷികാചരണം ഏർപ്പെടുത്തി. അതിനെക്കുറിച്ച് യേശു ഇങ്ങനെ പറഞ്ഞു: “എന്‍റെ ഓർമയ്‌ക്കുവേണ്ടി ഇതു തുടർന്നും ചെയ്യുക.” (ലൂക്കോസ്‌ 22:19) 2017 ഏപ്രിൽ 11-‍ാ‍ം തീയതി, ചൊവ്വാഴ്‌ച സൂര്യാസ്‌തമയശേഷം യഹോവയുടെ സാക്ഷികൾ യേശുവിന്‍റെ മരണത്തിന്‍റെ ഓർമ ആചരിക്കാൻ കൂടിവരും. ഒരു മണിക്കൂറോളം ദൈർഘ്യമുള്ള ഈ പരിപാടിയിൽ യേശുവിന്‍റെ മരണത്തിന്‍റെ പ്രാധാന്യവും അത്‌ ഇപ്പോഴും ഭാവിയിലും നമുക്ക് എന്തെല്ലാം അനുഗ്രഹങ്ങൾ നൽകിത്തരുമെന്നും വിശദീകരിക്കുന്ന ഒരു പ്രസംഗമുണ്ടായിരിക്കും. കഴിഞ്ഞ വർഷം ഈ ആചരണത്തിൽ ലോകമെങ്ങുമായി ഏകദേശം 2 കോടി ആളുകൾ സംബന്ധിച്ചു. ദൈവത്തിന്‍റെ ഈ അതിവിശിഷ്ടസമ്മാനത്തോടു നന്ദി കാണിക്കുന്നതിൽ ഞങ്ങളോടൊപ്പം ചേരാൻ ഞങ്ങൾ നിങ്ങളെ ആത്മാർഥമായി ക്ഷണിക്കുന്നു.