OTYIAWA tupewa tyipondola okutulunda a tupandula. Jesus walongesile otyipuka tyimwe etyi ahakula ovalume 10 ankho vena ouvela umwe pehena ou utyivila okuuhakula. Povalume ovo 10, wike vala “wakondoka, ahilivika Huku nondaka yaya peulu.” Jesus ati: “Aveho vahakulwa, hatyo? Ovakuavo 9 velipi?” (Lucas 17:12-17) Liwa-liwa onthue tupondola okulimbuako etyi vakuetu vetulingila!

Ofeto yeyovo otyiawa tyimwe tyelikalela no viawa ovikuavo. Otyiawa otyo, otyiawa otyinene vali ku aviho tupewa. Ngotyo, oñgeni matulekesa okuti tuapandula Huku mokonda yetyi etulingila?

• Noñgonoka Huku. Namphila Huku aava ofeto yeyovo, mahi otyo katyilekesa okuti aveho mavakala nomuenyo uhapu. Jesus wapopilile Huku melikuambelo okuti: “Omuenyo uhapu oyou, okukala nenoñgonoko liove Huku wike yotyotyili, na Jesus Kristu una watumine.” (João 17:3) Inkha pena umwe ukupopila okuti omulume umwe wekuyovolele puetyi ankho umona, okuti ove ñgeno kualingile atyiho opo unoñgonoke vali omulume oo no ñgeni ekuyovolele? Jeova Huku, waava omona wae ngofeto yeyovo, kahande vala umunoñgonoke mahi tupu uhanda ukale noupanga nae. Ombimbiliya  ipopia okuti: “Fuenei ku Huku, opo nae afuene kuonwe”—Tiago 4:8.

• Kala nekolelo mofeto yeyovo. “Una wokuna ekolelo mo Mona, una omuenyo uhapu.” (João 3:36) Okukala nekolelo tyihangununa-tyi? Tyihangununa okuti ovipuka tulinga vina okulekesa okuti tuna ekolelo mofeto yeyovo. (Tiago 2:17) Oityi tuna okulinga? Tyina upewa otyiawa, ove una okulesa okuti wetyitavela. Ngotyo ove una okulekesa okuti, utavela ofeto yeyovo. Ñgeni? Wanoñgonoka oñgeni Huku ahanda ove utyinde omuenyo wove iya olingi ngetyi monoñgonoka. * Likuambela ku Huku opo ekuevele iya ekuavela ombungo yasukuka. Huku wapopia okuti aveho vana vayumba onthumbi mofeto yeyovo, komutwe wandyila, mavakala nombembwa, nepamo, nomalumono!—Hebreus 11:1.

• Endyu Pehinangelo lio nonkhia mba Jesus. Jesus wetutuma okuhinangela ononkhia mbae kese nima. Konthele yotyo Jesus wati: “Tyilingei-lingei apeho mehinangelo liange.” (Lucas 22:19) Onombangi mba Jeova mavahinangela ononkhia mba Jesus mohanyi ya Tyikukutu monthiki 11 yo 2017, putyina ekumbi liamanyingila. Lilingwa mo ola ike vala, makulingwa elongomona lipopia etyi ononkhia mba Jesus mbuhangununa noñgeni mbutuetela ouwa pahetyino no komutwe wandyila. Menima liokualamba, ovanthu vatuuka onomiliau 20 veliongiyile opo vahinangele ononkhia mba Jesus. Tukukonga opo uye okuliongiya nonthue opo utehelele otyiawa otyinene tuapewa na Huku.