EKICONCO ky’omutaano kishemereire kutuhiga kusiima. Yesu akooreka enshonga egyo obu yaatambira abashaija ikumi endwara y’amaani eyaabaire etarikukira obunaku obwo. Omwe aha bashaija ikumi niwe yaagarukire “naahimbisa Ruhanga n’eiraka rihango.” Yesu akagira ati: “Abaashemezibwa t’ikumi? Omwenda barahi?” (Luka 17:12-17) Eky’okwega? Ka nitubaasa kurahuka kwebwa ebi abandi barikutukorera!

Ekitambo nikitaana aha biconco ebindi. Hati nikyo kiconco ekirikukirayo omu biconco byona ebirahairwe. Mbwenu shi noija kukora ki ahabw’eki Ruhanga akukoreire?

• Manya Ogwo owaatuhaire ekiconco eki. Ekitambo tikirikureetera abantu kutunga amagara agatahwaho butunu baaba bataine eki bakozire. Omu mwanya gw’ekyo, Yesu obu yaabaire naashaba Ruhanga akagira ati: ‘Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.’ (Yohaana 17:3) Mbwenu shi baakugira ngu hariho omushaija owaakucungwire obu waabaire okiri muto, torikugira ekihika ky’okwega bingi ebirikumukwataho n’okumanya enshonga ahabw’enki yaakucungwire? Yehova Ruhanga, owaatuhaire ekiconco ky’ekitambo ekirikucungura amagara, tarikwenda  ngu omumanye bumanya kyonka, beitu naayenda ngu ogire n’omukago murungi nawe. Baibuli neetuhiga eti: “Mwirire haihi Ruhanga, nawe abone kubairira haihi.”—Yakobo 4:8.

• Ikiririza omu kitambo. “Orikwikiriza Omwana aine amagara agatahwaho.” (Yohaana 3:36) Nikimanyisa ki okwikiriza? Nikimanyisa ngu twine kugira eki twakora. (Yakobo 2:17) Twine kukora ki? Ekiconco nikiba ekyawe waakununkirira okakyakiira okaikiriza kukitwara. N’ahabw’ekyo oshemereire kukununkirira okaikiriza ekitambo. Mu muringo ki? Manya oku Ruhanga arikwenda ngu otwaze, reero otwaze omu muringo ogurikuhikaana n’ebi oyegire. * Shaba Ruhanga kukusaasira n’okugira omuntu w’omunda oshemeire. Shaba Ruhanga oine obuhame obwijwire ngu ekitambo nikiija kureeta emigisha omu biro by’omumaisho, nk’obusingye, oburinzi, n’okuba gye kwa boona abarikukiikiririzamu!—Abaheburaayo 11:1.

• Za aha mukoro gw’okwijuka okufa kwa Yesu. Yesu akatandikaho omukoro ogwine kwijukwa buri mwaka kutwijutsya obukuru bw’ekitambo, ekiconco eki twahairwe. Aha bikwatiraine n’omukoro ogu, Yesu akagira ati: “Mugume mukore mutyo okuunyijukiraho.” (Luka 22:19) Abajurizi ba Yehova nibaija kwijuka okufa kwa Yesu Okwakana, Orwakabiri 11, 2017, bwanyima y’eizooba kurenga. Entebeekanisa egi erikumara eshaaha nk’emwe, neetwariramu orubazo orurikushoboorora obukuru bw’okufa kwa Yesu, n’oku kurikureeta emigisha omu bunaku obu n’omu biro by’omumaisho. Omwaka oguhweire, abantu obukaikuru nka 20 omu nsi yoona bakaija aha Kiijutsyo. Nitukweta na rukundo mpango kutwegaitaho omu kusiima ekiconco ekirikukirayo eki Ruhanga ahaire abantu.