KA TAU tetai apinga aroa umere ei akakeu ia tatou kia akaari i te tu āriki rekareka. Kua akaari a Iesu i teia apiianga i muri ake i tana akaora anga i te maki kino o te tai ngauru tangata kare e rapakauanga. Kua “oki maira tetai o te ngauru ma te kapiki ua te reo i te akakakā anga i te Atua.” Karanga a Iesu: “Kare ainei tino ngauru katoa i akaoraia nei? teiea io nei ra e toko iva?” (Luka 17:12-17) Te apiianga? Mei teaa atura te viviki i te akangaropoina i te angaanga meitaki ta tetai ke i rave no tatou!

Kare atu e apinga aroa i aite ki te oko. Ko teia te apinga aroa maata tei orongaia mai. Akapeea i reira koe me ariu atu ki ta te Atua i rave noou?

• Kia kite i Tei Oronga. Kare te oko e oronga ua mai i te ora mutukore no te tangata ravarai. Mari ra, karanga a Iesu i roto i tana pure ki te Atua: “Teia oki te ora mutu kore, kia kite ratou ia koe i te Atua mou ra, e ia Iesu i te Mesia, i taau i tono maira.” (Ioane 17:3) Me rongo koe e na tetai tangata i akaora ia koe i toou tamariki anga, kare ainei koe e inangaro i te kite maata atu no runga i tera tangata e te tumu i akaora ai aia ia koe? Te Atua ko Iehova tei oronga mai i te apinga aroa o te oko ei akaora ia tatou, ka  inangaro aia ia koe kia kite iaia e kia rauka tetai pirianga vaitata kiaia. Te raurau maira te Pipiria, “E akavaitata atu ki te Atua, e nana e akavaitata mai kia kotou na.”​—Iakobo 4:8.

• Akatupu i te akarongo i roto i te oko. “Ko te akarongo i te Tamaiti ra, e ora mutu kore tona.” (Ioane 3:36) Eaa te aiteanga kia akatupu i te akarongo? Tona aiteanga kia rave i te angaanga; ka anoanoia te angaanga kia akatupu i te akarongo ki roto i te oko. (Iakobo 2:17) Mei teaa rai te tu o te angaanga? Ka rauka tetai apinga aroa me itae koe i te reira e me āriki atu. No reira ka anoanoia koe kia itae atu e kia āriki i te oko. Akapeea ra? E apii eaa ta te Atua e inangaro ra ia koe kia rave no te oraanga, e oti e rave i te reira. * Pure ki te Atua kia akakore i taau ara e kia oronga i te akava ngakau mā. E akavaitata atu ki te Atua ma te irinaki papu e ka oronga mai te oko i te oraanga au, meitaki e te mataora e mutukore ua atu ki te aronga tei akatupu i te akarongo!​—Ebera 11:1.

• Kia tae mai ki te Akamaaraanga i te mate o Iesu. Kua akanoo a Iesu i tetai akakoroanga tei raveia i te au mataiti ei akamaara ia tatou i te apinga oronga ua o te oko. No runga i teia akamaaraanga, karanga aia: “E akapera kotou ei manako anga iaku.” (Luka 22:19) Ka akamaara te Au Kite o Iehova i to Iesu mate i te Ruirua, Aperira 11, 2017, me opu te rā. Kapiti mai ki teia porokaramu e tai ora te roa te akoanga te ka akamārama i te puapinga o te mate o Iesu e te au akameitakianga ta te reira ka apai mai i teianei e te tuatau ki mua. I te mataiti i topa, kua tae mai tetai 20 mirioni tangata takapini i teianei ao ki te Akamaaraanga. Te pati pumaana nei matou ia koe kia piri mai kia matou ei ariu atu ki te apinga aroa maata rava atu a te Atua.