TE WI kisi wan kefalek moi kado, dan wi musu sori taki wi de nanga tangi. Na dati Yesus ben wani leri sma baka di a ben dresi tin man di ben abi wan takru siki di sma no ben man dresi na a ten dati. Wan fu den tin man „drai kon baka . . . èn a gi Gado glori nanga wan tranga sten”. Yesus taki: „A no tin sma kon krin? Pe den tra neigi de dan?” (Lukas 17:12-17) San disi e leri wi? A kan pasa makriki taki wi e frigiti den bun di trawan e du gi wi.

A lusu-paiman na a moro warti kado di wi kisi. Nowan tra sma gi wi so wan bigi kado. Sobun, san yu musu du fu di Gado gi yu a kado disi?

• Leri sabi a sma di gi yu a kado. Wi no e kisi têgo libi soso fu di a lusu-paiman pai. Wi musu du wan sani fosi. Di Yesus ben e begi Gado, a taki: „Efu sma wani kisi têgo libi, den musu leri sabi yu, a wan-enkri tru Gado, èn a sma di yu seni kon, Yesus Krestes” (Yohanes 17:3). Efu wan sma taigi yu taki wan man kibri yu libi di yu ben pikin ete, dan yu no ben o wani kon sabi moro fu a man disi? Yu no ben o wani kon sabi fu san ede a yepi yu? Yehovah Gado, a sma di pai a lusu-paiman so taki wi kan kisi libi, wani taki yu musu kon sabi en. Boiti dati, a wani taki yu tron wan bun mati fu en. Bijbel e gi yu a deki-ati disi: „Kon krosibei  na Gado èn a o kon krosibei na unu.”—Yakobus 4:8.

• Sori bribi na ini a lusu-paiman. „A sma di e bribi na ini a Manpikin, e kisi têgo libi” (Yohanes 3:36). Fa wi musu sori bribi na ini a lusu-paiman? Wi musu du wan sani (Yakobus 2:17). San wi musu du dan? Efu wan sma e gi yu wan kado, dan a kado o de fu yu soso te yu langa yu anu teki en. Sobun, yu musu langa yu anu teki a kado di Gado gi wi. Fa yu kan du dati? Kon sabi fa Gado wani taki yu musu libi èn du san yu leri. * Begi Gado fu gi yu pardon èn fu gi yu wan krin konsensi. Te yu e begi, yu musu abi a bribi taki ala sma di e sori bribi na ini a lusu-paiman o kisi têgo libi na ini wan grontapu pe freide de èn pe ala sani e go bun.—Hebrewsma 11:1.

• Go na a Memrefesa fu a dede fu Yesus. Yesus seti a Memrefesa so taki ala yari wi kan memre na ofrandi fu en. A ben taki: „Tan du disi fu memre mi” (Lukas 22:19). Yehovah Kotoigi o memre a dede fu Yesus tapu tudewroko 11 april 2017, baka te son dongo. Na a konmakandra disi di e teki wán yuru, wan lezing o hori di o sori o prenspari a dede fu Yesus de èn fa a e tyari blesi kon gi wi now èn na ini a ten di e kon. A yari di pasa sowan 20 milyun sma na heri grontapu kon na a Memrefesa. Wi e gi yu wan kari fu kon na a konmakandra disi. Na so yu kan sori taki yu de nanga tangi gi a moro bigi kado di Gado gi wi.