WOSHASHA wa diambo pombaka totshutshuya dia mɛnya lowando. Yeso akɛnya ohomba wa dui sɔ l’ɔkɔngɔ wa nde nkɔnɔla apami dikumi waki la hemɔ ka wolo kele vɔ kotana onto lawakɔnɔla lo nshi shɔ. Pami ɔtɔi l’atei w’apami dikumi asɔ “akakalola ayatombola Nzambi la dui dia wolo.” Yeso akate ate: “Shi anto 10 mbakakɔnwɛ? Ko lende ele akina 9?” (Luka 17:12-17) Wetshelo akɔna wakondjaso? Mbokɛmaka dia sho koka mbohɛ esadi eto etsha w’ɛlɔlɔ watosalɛ anto akina.

Oshinga w’etshungwelo ekɔ woshasha wotshikitanyi la weshasha ekina tshɛ. Vɔ wekɔ woshasha woleki woke wahatakimɔmaka ndooko lushi. Ko laasɔ, ahombayɛ nsala lo menda kɛnɛ kakasale Nzambi lo wahɔ ayɛ?

• Eka dia mbeya Ɔnɛ lakakimɔ woshasha akɔ. Oshinga w’etshungwelo hasha anto tshɛ lɔsɛnɔ la pondjo mbala kakɔ ɔtɔi. Koko, Yeso akate lo dɔmbɛlɔ diakandalɔmbɛ Nzambi ate: “Dia vɔ nkondja lɔsɛnɔ la pondjo, weke dia keya wɛ Nzambi  ɔtɔi ka mɛtɛ, la Yeso Kristo lakayatome.” (Joani 17:3) Naka onto ɔmɔtshi ambokotɛ dia pami kɛmɔtshi akakokɛ lɔsɛnɔ layɛ etena kakiyɛ dikɛnda, onde wɛ hoyasha dia mbeya awui efula lo kɛnɛ kendana la onto akɔ ndo mbeya lande na kakandakokokɛ? Jehowa Nzambi, ɔnɛ lakakimɔ woshasha w’oshinga w’etshungwelo washimbɛ lɔsɛnɔ, nangaka aha tsho dia wɛ mbeeya koko ndo dia wɛ monga la diɔtɔngandelo dia ma ma la nde. Bible totɛka ɔnɛ: “Nyoyasukanya la Nzambi, ko nde ayoyasukanya la nyu.”—Jakɔba 4:8.

• Onga la mbetawɔ l’oshinga w’etshungwelo. “Onto tshɛ lele la mbetawɔ le Ɔna ayokondja lɔsɛnɔ la pondjo.” (Joani 3:36) Kakɔna kalembetshiya monga la mbetawɔ? Dui sɔ nembetshiyaka monga la etsha, dia monga la mbetawɔ lo oshinga w’etshungwelo nɔmbamaka dia monga la etsha. (Jakɔba 2:17) Weho akɔna w’etsha walɔmbama? Woshasha ndjongaka wayɛ paka naka wɛ ambodja welo ndo ambowetawɔ. Ɔnkɔnɛ, wɛ pombaka mbidja welo ndo mbetawɔ oshinga w’etshungwelo. Lo woho akɔna? Eka woho walanga Nzambi dia wɛ nsɛna, oma laasɔ ko wɛ nsala akambo lo ndjela lolango lande. * Lɔmba Nzambi edimanyielo ndo nkum’otema ka pudipudi. Yasukanya la Nzambi lo ndjaɛkɛ le nde tshɛ lo tshɛ ɔnɛ oshinga w’etshungwelo mbasha diaaso dia monga la nshi yayaye ya pondjo pondjo yele la wɔladi, lotui tshitshi ndo ɔngɔnyi le onto tshɛ longa la mbetawɔ lɔkɔ.—Hɛbɛru 11:1.

• Ɔtɔka lo Eohwelo ka nyɔi ka Yeso. Yeso akahɔhɔla dui dimɔtshi diasalema mbala ɔtɔi lo ɔnɔnyi dia tohola woshasha w’oshinga w’etshungwelo. Lo kɛnɛ kendana la osalelo wa dui sɔ, nde akate ate: “Kanyotshake ɔnkɔnɛ dia mbohɔkami.” (Luka 22:19) Ɛmɛnyi wa Jehowa wayosala Eohwelo ka nyɔi ka Yeso Lushi la hende, Ngɔndɔ ka nɛi 11, 2017, l’ɔkɔngɔ wa ɛɔtwɛlɔ ka wonya. Ekongelo kayoviya suke la wonya wa ntango kayonga ndo la sawo diayolembetshiya kitshimudi ya nyɔi ka Yeso ndo woho welatɔ ɛtshɔkɔ nshi nyɛ ndo lo nshi yayaye. Ɔnɔnyi wetshi, suke l’anto miliyɔ 20 wa l’andja w’otondo wakɔtɔ lo Eohwelo. Tambokelɛ la wangasanu tshɛ dia ndjɔtɔ la so dia mɛnya lowando lo woshasha woleki woke waki Nzambi.