TSHIFHIWA tsho khetheaho tshi fanela u ri ṱuṱuwedza uri ri livhuwe. Yesu o ombedzela yeneyo ngudo musi o no fhodza vhanna vha fumi vhe vha vha vhe na vhulwadze vhu ofhisaho he ha vha vhu sa lafhei nga tshenetsho tshifhinga. Muṅwe wa vhenevho vhanna vha fumi o “humela murahu a tshi khou renda Mudzimu nga ipfi ḽihulwane.” Yesu o ri: “Naa a si zwone uri ho fhodzwa vha fumi? Vhaṅwe vha ṱahe vha ngafhi?” (Luka 17:12-17) Ri guda mini? Ri nga ṱavhanya u hangwa zwithu zwavhuḓi zwe vhaṅwe vha ri itela zwone!

Tshirengululi tsho fhambana na zwiṅwe zwifhiwa. Ndi tshifhiwa tshihulwanesa u fhira zwifhiwa zwoṱhe zwe zwa vhuya zwa ṋewa. Nga zwenezwo, ni fanela u sumbedza hani u livhuwa zwe Mudzimu a ni itela zwone?

• U ḓivha Muṋei watsho. Tshirengululi a tshi iti uri vhathu vhoṱhe vha sokou wana vhutshilo vhu sa fheli hu si na zwe vha ita. Nṱhani hazwo, kha thabelo yawe, Yesu o ri: “Uri vha wane vhutshilo vhu sa fheli, vha fanela uri vha ḓivhe iwe Mudzimu wa ngoho u woṱhe, vha ḓivhe na Yesu Kristo we wa mu ruma.” (Yohane 17:3) Arali muṅwe muthu a ni vhudza uri hu na muthu we a tshidza vhutshilo haṋu musi ni tshee muṱuku, naa ni nga si ṱoḓe u ḓivha zwo engedzeaho nga ha onoyo muthu  na uri ndi ngani o ita nga u ralo? Yehova Mudzimu we a ni ṋea tshifhiwa tsha tshirengululi tshi tshidzaho, ha ṱoḓi fhedzi ni tshi ḓivha zwine a vha zwone, fhedzi u dovha a ṱoḓa ni tshi vha na vhushaka ha tsini nae. Bivhili i ri ṱuṱuwedza u ri: “Sendelani tsini ha Mudzimu, na ene u ḓo sendela tsini haṋu.”—Yakobo 4:8.

• Ivhani na lutendo kha tshirengululi. “Ane a vha na lutendo kha Murwa u ḓo wana vhutshilo vhu sa fheli.” (Yohane 3:36) Zwi amba mini u vha na lutendo? Zwi amba mishumo; u vha na lutendo kha tshirengululi zwi vhonala nga mishumo. (Yakobo 2:17) Mishumo ifhio? Tshifhiwa tshi vha tshaṋu fhedzi musi ni tshi ita vhuḓidini ha u tshi ṱanganedza. Nga zwenezwo, ni fanela u ita vhuḓidini ha u ṱanganedza tshirengululi. Nga nḓila-ḓe? Gudani nḓila ine Mudzimu a ṱoḓa ni tshi tshila ngayo nahone ni tshile u tendelana nayo. * Rabelani uri Mudzimu a ni hangwele na u vha na luvalo lwo kunaho. Ambani na Mudzimu ni na fulufhelo ḽa uri tshirengululi tshi ḓo ita uri vhane vha vha na lutendo khatsho vha vhe na mulalo, u tsireledzea na u ḓiphina nga hu sa fheli!—Vhaheberu 11:1.

• Ivhani hone Tshihumbudzoni tsha lufu lwa Yesu. Yesu o thoma vhuṱambo ha ṅwaha muṅwe na muṅwe u itela u ri humbudza ndugiselelo ya tshirengululi. Malugana na honoho vhuṱambo, Yesu o ri: “Dzulani ni tshi ita zwenezwi u itela u nkhumbula.” (Luka 22:19) Ṱhanzi dza Yehova vha ḓo humbula lufu lwa Yesu nga Ḽavhuvhili ḽa 11 April 2017 musi ḽo no kovhela. Mbekanyamushumo i nga dzhia awara nthihi nahone i ḓo katela na nyambo ine ya ṱalutshedza nga ha ndeme ya lufu lwa Yesu na nḓila ine lwa ri vhuyedza ngayo zwino na tshifhingani tshi ḓaho. Mahoḽa, vhathu vha ṱoḓaho u vha milioni dza 20 u mona na shango ḽoṱhe, vho vha hone Tshihumbudzoni. Ri ni ramba uri ni ḓe ni ṱanganele na riṋe kha u livhuha tshifhiwa tshihulwanesa tsha Mudzimu.