BAWENE gamahe nafõrani ani fu tambuahe. Yesu afura tipa gipai re tifuo ko husi akumba bawe nadu na kere kaza nga gu naarengbanga ka hu ti gu regbo re ya. Kumba sa dagba agu akumba nadu bawe “ki sa tini, ki irisi Mbori ni bakere fugo”. Yesu ki ya: “I ahusa nga yo bawe te? Ono agu yo ribua i wari?” (Ruka 17:12-17) Ginipai ani awirikaha ti gipai re? Bangirani nago ni ipo dedede ti gu weneapai akuarani amangaha furani!

Motumo tumorii wa kura agamahe te. Si nga gu nyanyakipa gamahe i afuhe. Ono ginipai ga Mbori bakere gamahe nika saro mo mangihe?

• Mo ini Bafuhe. Gu motumo tumorii re ayengo na nyenye unga nibasa fu aboro dunduko te. Kuba gure, Yesu ape gupai rogo gako kparakpee yo fu Mbori nga: ‘Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.’ (Yoane 17:3) Ka boro gumba gupai foro nga, kumba abatasi ungaro mbu ro ni tooni gude, ya mo mo idinga ka ino dungu apai tipa gu kumba re na ginipai nasako ko batasi ro te? Yekova Mbori naafu gu gamahe nga ga motumo tumorii, ko akpingo nyemu gupai nga mo ini ko gbua te, ono ko naida gupai nga mo du na dawedawe pagume na ko. Ziazia Kekeapai nangarasa  rani niya: “Oni mbédi na Mbori, ko ki mbedi na oni.”—Yakoba 4:8.

• Mo du na idapase kuti ga Yesu motumo. “Gu ni ka idi pa Wiri nyenye unga du adu be ni.” (Yoane 3:36) Du na idapase naida ginipai? Si naida mangapai; Tipa ka yugo gaani idapase kuti motumo tumorii, si naida ani yuguhe rogo mangaapai yo. (Yakoba 2:17) Gini ngbatunga mangaapai? Gamahe rengbe ka da ni ga boro kina gu ka ni mangipai tipaha. Si du, si naida ani mangiapai amanga tipa motumo tumorii. Wai rengbe ani ka mangaha? Mo wirikipai tipa wai Mbori aida mo raki, mo kini mangipai kuti gupai mo awirikaha. * Mo kpari fu Mbori tipa mbupai gbiati gigiri sangbakpotoseyo. Mo nifura na Mbori ki du na gu kido nga, motumo tumorii nafu gu kido du tipa nyenye raka kumbatayo nga ga zereda, ngbabase, gbiati weneapai fu agu aboro du na idapase kuti gu motumo re!—AEbere 11:1.

• Mo ndu tipa gu dunguratise nga ga Tingida Pakpio Yesu. Yesu amoi mburu gupai si adu nga ani kaa mangaha bara sa rogo garã yo kaa tingida tirani na pa gu motumo ko afuhe. Nibipa tingida pa gi regbo re, ko aya: “Oni mangi gere nitingidi pa re.” (Ruka 22:19) ADezire Yekova nika tingida pakpio Yesu Rago Ue, Zerekpe 11, 2017, fuo ti uru. Gi mbakadapai nika du tipa saa sa re, nika du na gumbapai nga gu nika fura tipa nyakapa pakpio Yesu na wai si aye na undo furani awere na kumbatayo. Rogo gu garã na susi, aboro nga amirioni 20 rogo zegino dunduko nadu pati Tingida Pakpio Yesu. Ani nayamba ro tipa mo ye ka du na ani pati gi dunguratise re, ni yugo gaani tambuahe tipa gu babakere gamahe Mbori afuhe.