MUNDONTINPI ashkha religionespi, Iglesia Católica Romana nisqapi, iglesias ortodoxas nisqaspi, budismo nisqapi, waj iglesiaspiwan, religionta kamachejkunata chayri curasta mana casarakojta saqenkuchu. Ashkha runastaj yuyanku, religionespi ñaupajman apajkuna mana casarakusqankurayku khuchichakuy imaspi urmasqankuta.

¿Bibliapirí, ninchu Diospa kamachisnin solterospuni qhepakunankuta? Chayta yachanapajqa, parlarina imaynatachus chay costumbre qallarisqanmanta, imaynatachus waj iglesiasman chayasqanmanta, chantapis imatachus Dios yuyasqanmanta.

Kay 2006 watapi, papa Benedicto XVI Romapi uj tantakuypi nerqa, curas mana casaranankoqa, “apostolespa tiemponkumanta qhepaman uj costumbre kasqanta”.

Chaywanpis ñaupa tiempo cristianospa tiemponkupeqa, mana chay costumbre kajchu. Imajtinchus apóstol Pablo, pichus chay tiempopi kausarqa, waj cristianosman nerqa, waj runas, “chʼaukiyaj” palabraswan runasta pantachinankuta. Nillarqataj: “Paykunaqa runasta kamachenqanku ama casarakunankuta”, nispa (1 Timoteo 4:1-3).

Kay 201-300 watas chaynejpi, chay costumbreqa ashkha cristiano nichikoj iglesiasman chayarqa, aswan qhepamantaj chay iglesiasqa, Iglesia Católica Romana nisqamanta karqanku. Chay costumbremanta parlaj libropitaj sutʼinchan, “Roma suyupi ni pi qhariwarmi jina puñuykunanta kamachikushajtillantaj qallarisqanta”.

Aswan qhepamantaj, iglesiata kamachejkuna tantakuyninkupi, Iglesiata jatarichejkuna ima nerqanku curas ama casarakunankuta. Creejtaj kanku qhariwarmi jina puñuykoyqa runasta pantachisqanta,  iglesiapi kamachejkunapis mana ruwanasninkuta juntʼanankupaj jinachu kasqankuta. Jinapis uj libro nisqanman jina, “901-1000 watas chaynejpi ashkha curasraj, wakin obispos ima casados karqanku”.

Curas mana casaranankutaqa nikorqa 1123 chantá 1139 Concilios de Letrán nisqapi, Roma llajtapi, kunankamataj Iglesia Catolicapi chay costumbre tiyan. Casado curasqa wawasninkuman Iglesiaj imasninta herenciata jina saqej kanku. Chay niña kasqanrayku Iglesia Catolicaqa atiyniyoj, qolqeyojtaj.

Dios imatachus chay costumbremanta yuyasqanqa sutʼita nin Palabranpi. Bibliapi nishan, Jesús imatachus pay jina “cielopi kaj Gobiernorayku” soltero qhepakojkunamanta nisqanta (Mateo 19:12). Apóstol Pablopis parlarqa, pay jinallataj “sumaj willaykunarayku” solteros qhepakojkunamanta (1 Corintios 7:37, 38; 9:23).

Jesuswan Pablowanqa mana nisharqankuchu Diospa kamachisnin solterosllapuni kanankuta. Jesusqa sutʼincharqa soltero kay, Diospa regalon kasqanta, nitaj tukuy kamachisninchu solterospuni qhepakunankuta. Apóstol Pablopis solterosllapuni kajkunamanta nerqa: “Ni jaykʼaj casararqankuchu chaykunamantaqa, mana imatapis Señor kamachiwanchu. Chaywanpis noqaman rijchʼawasqanta nini”, nispa (Mateo 19:11; 1 Corintios 7:25).

Bibliapeqa nillantaj ñaupa tiempo cristianosmanta, wakenqa casados kasqankuta, apóstol Pedro jina (Mateo 8:14; Marcos 1:29-31; 1 Corintios 9:5). Ñaupa cristianospa tiemponkupi Romapi runasqa, millay kausayniyoj karqanku. Chayrayku apóstol Pablo nerqa congregacionta qhawajqa “uj warmiyojlla” kanan kasqanta, “wawasninpis kasukojkuna” kanankuta (1 Timoteo 3:2, 4).

Paykunaqa casarasqas kaspapis mana solteros jinachu karqanku, imajtinchus Biblia jinata nin: “Qosaqa warminman imatachus qonanta juntʼachun”, nispa. Chantapis qhariwarmi jina puñuykuymanta nillarqataj: “Qhariwarmi puñuykuyta, ama jarkʼanakuychejchu”, nispa (1 Corintios 7:3-5). Reparanchej jina, Diosqa mana mañanchu kamachisnin solterospuni kanankuta.

Diospa kamachisnin mana solterospunichu qhepakunanku kajtin, ¿imaraykutaj Pablowan Jesuswan soltero kay allin kasqanta nerqanku? Imaraykuchus soltero kaspaqa Diospa reinonmanta astawan predicayta atinku. Chantapis Diospaj llankʼayta atinku mana casados jina waj imasmanta llakikuspa (1 Corintios 7:32-35).

Davidmanta parlarina, payqa uj sumaj trabajota saqerqa Ciudad de México nisqapi, Costa Rica suyoj ujnin llajtitanman ripunanrayku, chaypitaj runasman Bibliamanta yachachinanpaj. ¿Soltero kasqan allinchu karqa? David nin: “Arí, mana waj llajtaman, nitaj costumbresninman yachaykukuyta atillarqanichu, jinapis noqallamanta llakikunay karqa, chayrayku yachaykukullarqani”, nispa.

Claudiapis solterallataj, maypichus pisi willajkunalla kanku chayman yanapakoj riporqa, nintaj: “Imatachus ruwasqayqa mayta gustawan. Dios mana qonqakapuwasqanta rikuspa, creeyniy aswan kallpachasqa, Paymantaj astawan qayllaykuni”, nispa.

Soltero kayqa mana llakikunapajchu kanan tiyan, Claudia nin jina: “Solteros kaspapis chayri casados kaspapis, Jehovata tukuy atisqanchejta sirvispaqa kusisqa kasun”, nispa (Salmo 119:1, 2).