MUYUNDIJ Allpapimi achca religioncunaca, iglesiata pushajcunapish curacunapish ama cazarachun nishpa leycunata churancuna. Por ejemplo Iglesia Católica Romanapipish, ortodoxa iglesiacunapipish, shinallataj budismo nishca religionpipishmi chai leycunata churancuna. Chaimantami achca gentecunaca iglesiata pushajcunata mana cazarachun saquishcamantami achca violacioncuna, huainayaicuna tiyan nishpa yuyancuna.

¿Diosta servijcunaca cazarai tucunchu? ¿Bibliapica ama cazarachun nishpachu yachachin? Cai tapuicunamanta yachangapajca mana cazarana yuyaicuna maimanta callarishcatapish, Dios imata yuyashcatapish ricushun.

2006 huatapica, papa Benedicto dieciseisca iglesia catolicata pushajcunamanca shuj conferenciatami curca. Chaipica cashnami nirca: “Apostolcuna huañushca qꞌuipamantami iglesiata pushajcunaca mana cazarajcuna carca” nircami.

Shinapish Jesusta punta catijcunaca mana chaita rurajcunachu carca. Chaimantami apóstol Pabloca umajcunami tiyanga “paicunaca cazaranatapish jarcangacunami” nishpa crijcunata cunarca (1 Timoteo 4:1-3).

101 huatamanta 200 huatacamaca, Jesustami catinchij nij iglesiacunami cai costumbreta japircacuna. Qꞌuipa punllacunapica cai iglesiacunaca Iglesia Católica Romana nishcami tucurca. Religioncunapi tiyashca costumbrecunamanta parlaj shuj libroca caitami nin: “Chai punllacunallatajmi, romanocuna mandashca llajtacunapica aichapi mana chayarinamanta achcacuna parlanacucurcacuna” ninmi.

Qꞌuipa huatacunaca iglesiata pushajcunapaj, curacunapaj tandanacuicunapica: Sacerdotecunapish curacunapish mana cazaranachu can nijcunami carca.  Aichapi chayarinaca mana allichu. Chaita rurajcunaca iglesiapi ruraicunataca mana pajtachi tucungacunachu nijcunami carca. Shinapish Encyclopædia Britannica libropica, “Jesús shamushca 1.000 huatacuna qꞌuipacamaca achca sacerdotecunapish, obispocunapish huarmita charijcunarajmi carca” ninmi.

Iglesia Catolicami 1123 y 1139 huatacunapica, Roma llajtapi Letrán nishca tandanacuicunapi “iglesiata pushajcunaca mana cazaranachu can” nishpa leycunata churajcuna carca. Chai leycunaca cunancamami Iglesia Catolicapica tiyan. Iglesiata pushajcuna cazarashca cashpaca paicunapaj huahuacunamanmi iglesia charishca huaquin cosascunataca saquijcuna carca. Chaimantami mana cazarana leyta churarcacuna. Chashnami iglesiacunaca mana tucurij carca, cullquitapish charijcuna carca.

Mana cazaranamanta Dios imata yuyashcataca Bibliapimi yachai tucunchij. Jesusca pai layallataj ‘Diospajllata ruraj’ solterocunamantami parlarca (Mateo 19:12). Shinallataj huaquincunaca apóstol Pablo laya, ‘alli huillaita huillangapajmi’ solterocuna saquirijcuna carca. Paicunamantami apóstol Pablopish parlarca (1 Corintios 7:37, 38; 9:23).

Shinaca ¿Jesuspish Pablopish Diosta servijcuna ama cazarachunchu jarcacurca? Mana. Jesusca paita catijcuna mana tucuicuna soltero saquiri tucushcatami yachachirca. Pablopish mana cazarajcunamanta parlashpaca cashnami nirca: “Cꞌarita manaraj rijsijcunapajca, Mandaj Jesús mandashcataca mana charinichu”. Shinapish ‘ñuca yuyashcallatami cunani’ nircami (Mateo 19:11; 1 Corintios 7:25).

Shinallataj Bibliapica Jesusta punta catijcunaca cazarajcuna cashcatami yachachin. Por ejemplo, apóstol Pedroca cazadomi carca (Mateo 8:14; Marcos 1:29-31; 1 Corintios 9:5). Pero romanocuna mandashca llajtacunapica achca huainayajcunami tiyarca. Chaita ricushpami apóstol Pabloca, congregacionta pushaj cazadocunamanca cashna nirca: ‘Shuj huarmipajlla cusa cachun, paipaj huahuacunapish cazujcuna cachun’ nircami (1 Timoteo 3:2, 4).

¿Cazarashca cashpapish aichapi chayarinata jarcarijcunachu carca? Pabloca mana chaita yachachicurcachu. Ashtahuanpish caitami nirca: “Cusaca quiquin huarmiman cuna cashcata cuchun” nircami. Shinallataj cusa huarmi aichapi chayarinamantaca cashnami nirca: “Caishujpish chaishujpish ama mitsarinacuichijchu” nircami (1 Corintios 7:3-5). Shinashpaca cazarasha nijcunataca Yaya Diosca mana jarcanchu.

Cazaranata Dios mana jarcajpica, ¿imamantataj Jesuspish Pablopish soltero saquirichun nirca? Soltero saquirishpaca Diosmantami ashtahuan huillai tucuncuna. Solterocunaca mana cazadocuna laya achcata preocuparinachu can (1 Corintios 7:32-35).

Mexicomanta David shutimanta parlashun. Davidca shujtaj ladopimi Bibliamanta yachachisha nirca. Chaimantami México llajtapi charishca alli trabajota saquishpa Costa Rica llajtaman rirca. Chai llajtapi costumbrecunata shujtaj ruraicunata yachanaca mana jahuallachu carca. Shinapish ¿paipajca soltero canaca llaquichu carca? Mana. Paica: “Soltero cashcamantami ñucallataj mantinirinaca ashtahuan jahualla carca” nircami.

Shinallataj Claudia shuti solteramanta parlashun. Paica maipimi Diosmanta yachachingapaj ashtahuan ayuda minishtirin chai llajtacunamanmi rirca. Paica cashnami nin: “Cashna Diosmanta yachachishpaca cushillami sintirini. Shinallataj Dios ñucata ima shina cuidajta ricushpami paipajman ashtahuan cꞌuchuyashcani, paipimi ashtahuan crini” ninmi.

Soltero canaca alhajami can. Claudia nishca shinaca: “Soltero cashpapish cazado cashpapish Jehová Diosta tucui shunguhuan servishpaca cushillami causangui” (Salmo 119:1, 2).