Son sama e biibi taki te wan sama dede ai go a wan taa peesi. Taawan e biibi taki te wan sama dede ai nasi toon wan taa sama efuso wan taa sani. Ma yu abi son sama di e denki taki te wan sama dede, a nai go a nawan peesi.

Kande a peesi pe i kiya anga den sani di i leli, meke yu e denki wan hii taa fasi fu a toli ya. Winsi pe fu goontapu u go, a ná ala sama e go na a wanse te den e taki fu a toli ya. Ma wan sama efuso wan sani de di poi yeepi u fu sabi san e pasa anga wan sama te a dede?

A omen ondoo yali kaba keliki fesiman e leli sama taki libisama abi wan sani aini den sikin di den e kai sili efuso akaa. Den taki a sani ya nai dede. Den Kelesten keliki, Hindu biibi, Dyu biibi anga den Moslim e biibi taki libisama abi akaa. Den e biibi taki te wan sama dede, da a akaa fi en e go a yeye kondee. Ma den sama fu a Buda biibi e leli sama taki te wan sama dede, ai nasi omen leisi te da a kon abi wan sowtu koloku libi. Na a sani ya den e kai Nirvana.

Fu di keliki e leli sama den sani ya, meke a hii goontapu sama e denki taki te den dede den o go libi a wan taa peesi. A omen sama e si a dede di sama e dede enke wan sani di mu pasa fu den sa kengi go aini wan taa libi. Den e si enke a so Gadu sete a libi. Ma san Beibel e taki fu a toli ya? Gaantangi leisi a taa artikel. Kande i foondoo te i si san Beibel taki.